Read xamtanga ይዃንስት ወንጌል 18 Bible Online

ይዃንስት ወንጌል 18 - xamtanga bible

ይዃንስት ወንጌል 18

¹እየሱስ እኒንት ዊግተት ግረ ጝክንደጢጅቅ ኣቕ ቀድረውን ጭልዋይዝ እጂል ከሩ፤ ጝግል ዊነው ኣታክልት ስፍረይልም ጝክንደጢጅቅ ጥዉ።

²እየሱስስመ ጝክንደጢዝ እክሰው ግርየ ጝግል ኣኽቭሽጛ ዊንጛንስቅ፣ ጝት ዲቍስ ይወው ይዅዳ ጘጝ ስፍረድየንት ኣርቐው ዊኑ።

³ይዅዳም ዊተድርዝመ ካኽነጣነ ኻልቅጢስ ፈሪሳኒስም እፃሸቍ መቅደስ ጝኒዝቍ ዊተድሪዝ ቲክንዝ ጘጝ ስፍረይል ተሩ። ጛይም ፋኑስ፣ ሺከ፣ ጠውርመሰሪም ፃይጝ ዊን።

⁴እየሱስም ጝግል ችጝጡድቅ ኣርቕ ጝታጐ ፍ፦ «ኣውት ደምዝርና?» የው ዋቕሩ።

⁵ጛይም፦ «ናዝሪትቱ እየሱስታ» ይ። ጘጝም፦ «ያን የጝ» ዩ። ጝት ዲቍስ ይወው ይዅዳም ጛጅቅ ችብር ዊኑ።

⁶እየሱስም፦ «ያን የጝ» ያንድ እግርገ ፊርጝ ዝቨይል ሊቭ።

⁷ሊጘትም፦ «ኣውት ደምዝርና?» የው ዋቕሩ። ጛይም፦ «ናዝሪትቱ እየሱስት የጝ» ይጝ ዊስ።

⁸ጘጝም፦ «ያን የጝ ቃል የርኩን፤ ይት ኣቐውዝየ ደምዝርነውድ እንዛት በጥን ፊርጝነ» ዩ።

⁹እንም፦ «እንዛይ ክት ነይረቊስ ላውድ እኳ ድሲቀርም» የው ዊግተው ቃልድ ፋፅምሻንስ ማጥን የጝ።

¹⁰ስሙን ቢጥሮስም ሰይፍ ፃይ ዊናንስቅ ጝሰይፍድ ምዝ ካኽነጣነ ኻልቀይዝ ኣገልጋይዙ ለወ ቀርዝድየንት ቀቭ ማሉ፤ ኣገልጋይዝ ሽድም ማልኰስ የነው ዊኑ።

¹¹እየሱስ ግን ቢጥሮስት፦ «ከሰይፍድየንት ጝስፍረይል ዲ! ኣይር ነየው ፅወድየንት[14] ዝቀቅመ?» ዩ።

¹²እንዝ ግረ ዊተድርድ ጝታኣዘተይዝመ መቅደስ ጝኒዝቍ ዊተድሪዝጅቅ ኣቕጝ እየሱስት ፃይጝ እፅቍ።

¹³በዊልም ቀያፈት ኣስን ዊነው ኻነትል ፊስ፤ ቀያፈም ጘጝ ኣምረይዝ ካኽነጣነ ኻልቀ ዊኑ።

¹⁴ጘጝም፦ «ላው እጅር ኽዝቪዝ ማጥን ክራን ቺዘኵ» የው ኣይዅዳንድዛት ማኽረውድ ዊኑ።

¹⁵ስሙን ቢጥሮስስመ ላው ላየ ክንደተዝም ኣቕጝ እየሱስት ቲክንጛ ዊን፤ እኒን ላየ ክንደተድም ካኽነጣነ ኻልቀይዝ ኣርቕሽተው ዊናንስቅ፣ እየሱስ ጅቅ ካኽነጣነ ኻልቀይዝ ኻፅሪል ጥዉ።

¹⁶ቢጥሮስ ግን ቢዘ ኻፅር ሚረይል ችብር ዊኑ፤ እድየን ካኽነጣነ ኻልቀይዝ ኣርቕሽተው ዊነው ክንደተድም ዋጥር ፊር ሚረድ ሊሚድረይ ጊርድሸንስ ድቍ ቢጥሮስት ኣቒ ድውሱ።

¹⁷ሚረድ ሊሚድረይ ጊርድሸንም ቢጥሮስት፦ «ክት እን እጅሪዝ ክንደጢስ ላውድ ኣይረርቀ?» ይች። ጘጝም፦ «ኣይቀርም» ዩ።

¹⁸ወቅትድ ኪበ ዊናንስቅ ኣገልጋያኒዝመ ዊተድሪዝ ልየ ኻውሽጝ ኻኽም ደዪል ችብርጝ ቃውርጛ ዊን፤ ቢጥሮስም ጛጅቅ ችብር ቃውራ ዊኑ።

¹⁹ኣይንድ ካኽነጣነ ኻልቀድ እየሱስት ጝክንደጢዝቍዝመ ጝክንስኒዝቍዝ ዋቕሩ።

²⁰እየሱስም፦ «ያን ኣልሚዝ ግልፅዝ ዊግጥኩን፤ ኣዅዳንድ ኣኽቭሽጘው ምኵራቪል፣ መቅደስ ጝኒልም ዊትርቅ ክንስኩን፤ ስውርዝ ዊግጠው ዊገም እጀው።

²¹እደስለ ወረጘ ይት ዋቕርዳ? ዊግጣንድ ወሸቍድዛት ዋቕር፤ ያን ዊግጠውድየንት ጛይ ኣርቕጘኵ» ዩ።

²²እየሱስ እኒንት ዊግታንድ፣ ጝጋቢል ችብርጝ ዊነቊ ዊተድሪስ ላውድ፦ «ካኽነጣነ ኻልቀይዝመ እነሽር ዊስራ?» የው ጥፊዝ ጣዙ።

²³እየሱስም፦ «ኻቨረ ዊገ ዊግጥ ፅብሽ፣ ጭቓ ዊግጠጘ ሚዝርጭ፤ ያን ዊግጠውድ እማን ኣቕሽ ግን ውር ቃጥ የጝ ጣዝረውድ?» ዩ።

²⁴እንዝ ግረ ኻነ እየሱስት እፁሸጘ ካኽነጣነ ኻልቀ ቀያፈትል በርሱ።

²⁵ስሙን ቢጥሮስም ችብር ልየ ቃውራ፦ «ክትስ ጝክንደጢስ ላውድ ኣይረርቀ?» ይ። ጘጝም፦ «ኣይቀርም» የው ኻድዩ።

²⁶ቢጥሮስ ቀርዝድ ቀቨው እጅሪዝ ዚምድ ኣቐው ካኽነጣነ ኻልቅጢዝ ኣገልጋያኒስ ላውድ፦ «ኣታክልት ስፍረይስ ክት ጝጅቅ ቓሊቀርቀ?» ዩ።

²⁷ቢጥሮስም እንደ ገነ ኻድዩ፤ በውዝም ጅርወ ዋቑ።

²⁸እንዝ ግረ ኣይዅዳንድ እየሱስት ኻግር ቅመተይል ፊስ፤ ሰትድም ግረቨዝ ዊኑ፤ ኣይዅዳንድም ፈዝየ በሊዙ ቢገድ ዅጛንስ ማጥን ኣርክሽታይጘጘ ኻግር ቅመተይዙ ኻፅሪል ጥዊየቍም።

²⁹እንዝ ማጥን ቢላጠውስ ጝታጐ ፍ፦ «እን እጅርድየንት ኪስርነውድ ወረጝዝ የጝ?» የው ዋቕሩ።

³⁰ጛይም፦ «እን እጅርድ ወኝጀለኘ ኣየው ኣቓን ክጐ ነስነም ዊኒነቅ» ይጝ ዊስ።

³¹ቢላጠውስም፦ «ክትን ክታቕም ፊስርን ክታኽጊዝጘ ፊርድጥን» ዩ። ኣይዅዳንድም፦ «ይንመ ኣውማውትቅ ቍወነው መቭትም እጅነቅ» ይ።

³²እንም ኣቐውድ ኣወየው ክርጘዝ ክርጠጘድ እየሱስ ዊግት ዊነው ቃልድ ፋፅምሻንስ ማጥን የጝ።

³³ቢላጠውስም ጝኻፅር ኣቒል ዋጥር እየሱስት ጭጝስ፦ «ክት ኣይዅዳነ ንጕስመ?» ዩ።

³⁴እየሱስም፦ «ክት እኒንት ዊግትረውድ ክቕምቲስ ፊስርመ? ዊንስ ላጥ እቅ ይማጥን ክጭስ ድቍ?» ዩ።

³⁵ቢላጠውስም፦ «ያን ኣይዅዳነውመ ውረ? ክት ይጭስ ዲቍስጝ ነየቍድ በገዘ ክዊግን ኣይዅዳንድ ኣየቍቋ? ኣየውጚ ፃቭረው ዊገድ ወረጘ የጝ?» ዩ።

³⁶እየሱስም፦ «ይምጝግስትድ እን ኣልሚልም ኣየው፤ እን ኣልሚል ኣቓንመ ኣይዅዳኒዝ ናኒል ሊቫይቀጘ ይኣገልጋያንድ ጋጥምጥጘ ዊን፤ ዊገድ ግን ይምጝግስትድ እንልም ኣየው» ዩ።

³⁷ቢላጠውስም፦ «እደስለመ ክት ንጕስ የጛ!» ዩ። እየሱስም፦ «ያን ንጕስ ኣቐጘ ክት ዊግትሩ፤ ያን እዅርጨውድ፣ እን ኣልሚልም ተጠውድ እማንዝ ማጥን ሚዝርድጨ የጝ፤ እማኒስ ኣቐውድቅ ይቃልድ ወሸኵ» ዩ።

³⁸ቢላጠውስም፦ «እማን ወረጘ የጝ?» ዩ። እንዝ ግረ እንደ ገነ ኣይዅዳኒዝጐ ፍ፦ «ያን ጝት ኪስሰው ላው በደልም ችጚቀር።

³⁹ዊገድ ግን ኣምረ ኣምረዝ ፈዝየ በሊዝ ላው እፁሸው እጅር እክስን ነየነው ልምድ እኩ፤ እንዝ ማጥን ኣይዅዳነ ንጕስድየንት እክስጨ በንርነኵመ?» ዩ።

⁴⁰ጛይ ኣጛንድ፦ «በርቫንት እክሽጚ እኒንት እክስረር» ይጛ ቓፅ። በርቫን ግን ወምበዲ ዊኑ።