Read xamtanga ይዃንስት ወንጌል 19 Bible Online

ይዃንስት ወንጌል 19 - xamtanga bible

ይዃንስት ወንጌል 19

¹እንዝ ግረ ቢላጠውስ እየሱስት ፊስ ጊርፍሱ።

²ዊተድርድም ኣሚዙ ኣክሊል ኣስልጝ እየሱስት ኣውሪል ደፋቕ፤ ሰረው ኣልቨም ሲስ።

³ጝጐም ኣልትጛ፦ «ኣይዅዳነ ንጕስወ! ሲለም ይነኵን!» ይጛ ጥፊዝ ጣዝጛ ዊን።

⁴ቢላጠውስም እንደ ገነ ቢዘይል ፍ፦ «እንወ ውርም ኣይንት በደል ቺጚቀር ኣቐጘ ኣርቕርናንስ ማጥን ጝት ቢዘይል ፊስጭር» ዩ።

⁵እየሱስም ኣሚዙ ኣክሊል ጝኣውሪል ደፋቕ ሰረው ኣልቨም ሲር ቢዘይል ፉ፤ ቢላጠውስም፦ «እንወ እጅርድየን!» ዩ።

⁶ካኽነጣነ ኻልቅጢዝመ ጝታዊተድሪዝም እየሱስት ቓልጛንድ፦ «ሲቀል! ሲቅል!» ይጛ ቓፅ። ቢላጠውስም፦ «ክታቕም ፊስርን ሲቅልጥን፤ ያነ ጝት ኪስሰው ውረውረ በደልም ችጚቀር» ዩ።

⁷ኣይዅዳንድም ይን ኽግ ፃይነቅ የጝ፤ ጝቕምት እደረት ዅር ፃቨውድቅ ይናኽጊዝ ሚስርቲዝ ክርጠ ጥውሸኵ» ይ።

⁸ቢላጠውስም እኒንት ወሻንድ ወሰገቨ ጐውቱ።

⁹ኻፅር ኣቒልም ጥው እየሱስት፦ «እፈ ክት ኣዊስ የጝ ተትረውድ?» የው ዋቕሩ። እየሱስ ግን ውረውረቅ ዊሲየውም።

¹⁰ቢላጠውስም፦ «እፈ ድቋርመ? ክት ሲቅልጨም እክስጨም ስልጣን ፃቀር ኣቐጘ ኣርቓርመ?» ዩ።

¹¹እየሱስም፦ «እደረ ክጭስ ነዪየው ኣቓን ይግል ውረውረ ስልጣን እጅረርም ዊንዱ፤ እንዝ ማጥን ይት ክጭስ ዲቍስ ነየው እጅርድ ወሰው ኽጥያትኘ የጝ» ዩ።

¹²እንዝ ግረ ቢላጠውስ እየሱስት እክስጠ በኑ፤ ኣይዅዳንድ ግን፦ «እን እጅርድየንት እክስረውዝየ ቂሳርት ወደጅም ኣይረር፤ ጝቕምት ንጕስ ፃቨውድቅ ቂሳርት ተቃዋሚ የጝ!» ይጛ ቓፅ።

¹³ቢላጠውስም እኒንት ወሻንድ እየሱስት ቢዘይል ፊስ፦ «ጠፍጣፍ ቕርጘ» ይሽተው ስፍረይል ፍርድ ወምበርል ጐዩ፤ እኒን ስፍረድ እቭራይስጢዝ፦ «ገቨተ» ይሽተኵ።

¹⁴ግርየድ ፈዝየ በሊዝ ኣስልሸነው፣ ሰትድም ዋልጠ ሳ ኣጠ ዊኑ። ቢላጠውስም ኣይዅዳኒዝ፦ «እንወ ክታንጕስድ» ዩ።

¹⁵ጛይ ግን፦ «እለ እክልሽ! እክልሽ! ሲቅል!» ይጛ ቓፅ። ቢላጠውስም፦ «ውረ ክታንጕስድመ ሲቅልጫ?» ዩ። ካኽነጣነ ኻልቅጥድም፦ «ቂሳርትለ ላየ ንጕስም እጅነቅ» ይጝ ዊስ።

¹⁶ኻትሸነይዝም ቢላጠውስ እየሱስት ሲቅልጛንስ ማጥን ጛጭስ ዲቍስ ይዉ፤ ጛይም ጝት ፃይጝ ፊስ።

¹⁷እየሱስም ጝሲቅልሸነ ሚስቅልድየንት መውር፦ «ኣውር በወ» የነው ስፍረይል ፉ፤ እኒን ስፍረድ እቭራይስጢዝ፦ «ጐልጐተ» ይሽተኵ።

¹⁸ጛይም ጝት ጝግል ሲቅል፤ ጝጅቅም ሊጘ እቅ ላውድ ጝለዊዝ፣ ሊጘትረድ ጝፃግቪዝ እየሱስትም ጝታማኽሊል ፃቭጝ ሲቅል።

¹⁹ቢላጠውስም፦ «ናዝሪትቱ እየሱስ ኣይዅዳነ ንጕስ» ይሽት ፃፍሸው ፅፈሽ ነስ እየሱስት ሚዝቅሊዙ ኣውሪል እቝሩ።

²⁰እየሱስ ሲቅልሸው ስፍረድ ኻትመይዝ ጣቂል ኣቓንስቅ ፅፈሽድየንት ንቕፀቍ ኣይዅዳን ኣንቭቭ፤ ፃፍሸውድም እቭራይስጥዝ፣ ላቲንዝ፣ ግሪክዝ ዊኑ።

²¹እንዝ ማጥን ኣይዅዳኒዝቍ ካኽነጣነ ኻልቅጥድ ቢላጠውስት፦ «ጝቕም፦ ‹ያን ኣይዅዳነ ንጕስ የጝ ዩ› ይር ፃፍጚ ክት፦ ‹ኣይዅዳነ ንጕስ› ይር ፃፍተ» ይ።

²²ቢላጠውስ ግን፦ «ነስየ ፃፈውድየንት ፃፍኩን» ዩ።

²³ዊተድርድም እየሱስት ሲቅልጘት ግረ ጝኣልብድ ፊስጝ ጝታይተእጝቅዝቅ ችጛንስ ማጥን ሲዘትል ኣድል፤ ጝናንጣነው ኪተድየንትም ፊስ፤ ናንጣነው ኪተድም ሳነ እጀው ላው ፃቭን ተስኑ ዊኑ።

²⁴ጛይም፦ «እኒንትስ እፀ ማልን ጝችጘዊልቅ ችጝነጚ ቀዳይነቅም» ይ። እንም ኣቐውድ፦ «ይኣልቨድ ኣድልድልሽ፤ ይናንጣነው ኪተይልም እፀ ማል» የው መፃፊዙ ቃልድ ፋፅምሻንስ ማጥን የጝ፤ ዊተድርድም እኒንት ፃቭ።

²⁵እየሱስት ሚስቅሊዝ ጋቢልም ጝኘስመ ጝኘት ስንስ፣ ቀለየውበት እውነ ማርያምስመ መግደላዊት ማርያምስ ኣቕጝ ችብርጝ ዊን።

²⁶እየሱስም ጝኘስመ ጘጝ ቀነው ክንደተይዝ ጝጋቢል ችብርጝ ቓላንድ፣ ጝኘት፦ «እውነ ክተ! እንወ ክዅርት!» ዩ።

²⁷ክንደተየንትም፦ «እንወ ክኘት!» ዩ። ጘጝ ክንደተድም ጚ ሰትሸንቲስ ኪርም ጝርት ጝጝን ፊሱ።

²⁸እንዝ ግረ እየሱስ እጝቅቅ ኻትሸጘ ኣርቕ መፃፊዙ ቃልድ ፋፅምሻንስ ማጥን፦ «ዝቛንጡን» ዩ።

²⁹ጝግልም ዃምጥጠው ወይንዙ ሚዝ እቻቐው ጭን ዊኑ፤ ጛይም ዃምጥጠው ወይንድ ሰፍነግ[15] እቻዝጝ ኺሰውብ ዚግዝ[16] ፃቭጝ ጝምቸይል ኣልስ።

³⁰እየሱስም ዃምጥጠው ወይንዙ ሚዘድ ጣም በር፦ «ፋፅምሹ!» ዩ። ጝኣውርድየንትም ሳ ዘምበል ሹ፤ ኣይንድም ጝፈውጥድ ፍ።

³¹ጘጝ ግርየድ ቅዳምሲንቭትስ ኣስልሸነው ግርየ ዊኑ፤ ኣይዅዳንድም ሲቅልሸቍ እቂዙ እርሸድ ሚስቅልል ሲቅልሽ ግርያየጘ፣ ጘጝ ግርየድም ኽየው በል ኣቓንስቅ፣ ሲቅልሸቍ እቅድዛት ጝታዲብ ዲብድ ኪልጝ እርሸድየንት ሚስቅሊስ ጊማንስ ቢላጠውስት ጨው።

³²እንዝ ማጥን ዊተድርድ ተርጝ እየሱስ ጅቅ ሲቅልሽጝ ዊነቊድዛት ጝታዲብ ዲብድ ኪል።

³³እየሱስ ትጐ ተርጛንድ ግን፣ ጘጝ ክር ዊናንስቅ ጝዲብድ ኪልየቍም።

³⁴ዊገድ ግን ዊተድሪስ ላውድ ጝጒድንድየንት ኣጭነዝ ሲቩ፤ ኣይንድ ጝጒድኒስ ብርዝመ ኣቝዝ ፍጝ ቅብር።

³⁵እኒንት ቓለው እጅርድ ጝሚዝርነይድ ይውኩ፤ ጝሚዝርነይድም እማን የጝ፤ እማን ዊግትጠጘም ኣርቐኵ፤ ክትንም ኣምንድርናንስ ማጥን ሚዝርደኵ።

³⁶እንም ኣቐውድ መፃፍ፦ «ጝጛፂስ ላውቅ ኪልድሻውም» የው ዊግተው ቃልድ ፋፅምሻንስ ማጥን የጝ።

³⁷ላየ መፃፍዝም፦ «ጘጝ ሲቭጘውድየንት ቓልጥቍ» ይሽት ፃፍሽኩ።

³⁸እንዝ ግረ ኣይዅዳንድዛት ጐውታንስቅ ስውርዝ እየሱስት ክንደተ ዊነው ኣርማትያስቱ ዮሴፍ፦ «ኣለቀይ እየሱስት እርሸድየንት ነቅ» የው ቢላጠውስት ጨዉ፤ ቢላጠውስም፦ «ፊሽ» የው ፊቅዱ፤ ጘጝም እርሸድየንት ጊምዝ ፊሱ።

³⁹እንዝ ሚቅ ኻርዝ እየሱስትል ፊር ዊነው ኒቈዲመስም ሰውርጝን ሲዘ ኪለው ግራም ዲቭልቅሸው ከርቭየዝመ ኣውሸረዝ ፃይ ዮሴፍ ጅቅ ፊሩ።

⁴⁰ጛይም እየሱስት እርሸድ ፊስጝ ኣይዅዳኒዙ ጊንዘነ ስረቲዝጘ ሽቱ ጅቅ ፃረው ኻር ኣልቨዝ ጊንዝ።

⁴¹እየሱስ ሲቅልሽ ዊነውዊልም ኣታክልት ስፍረ ዊኑ፤ ኣታክልት ስፍረይልም ኣውማውቅ ዲቭሽቲየው ኣይር መቃቭር ዊኑ።

⁴²ግርየድ ቅዳምሲንቭትስ ኣስልሸነ ግርየ ዊናንስቅ፣ መቃቭርድም ጣቀት ዊናንስቅ እየሱስት ጝግል ዲቭ።