Read xamtanga ይዃንስት ወንጌል 2 Bible Online

ይዃንስት ወንጌል 2 - xamtanga bible

ይዃንስት ወንጌል 2

¹ሸወትረ ግርየይዝም ገሊለት ኣውረጀይዝወ ቃነ የነይ ኻተመየንትል ቅየን ዊኑ፤ እየሱስትኘም ጝግል ዊንች።

²እየሱስስመ ጝክንደጢዝም ቅየኒል ጭጝሽጝ ዊን።

³ወይንዙ ሚዘድ ኣቢታንድም፤ እየሱስትኘ ጝት፦ «ወይንዙ ሚዘድቃል ኣቢቱ» ይች።

⁴እየሱስም፦ «እውነ ክተ! ያን ክጅቅ ውር ፃቀር? ይግርየድ ገነ ችጚየውም» ዩ።

⁵ጚይም ጝግል ዊነቍ ኣሳላፍያንድዛት፦ «ጘጝ የውድየንትቅ ፃቭጥን» ይች።

⁶ኣይዅዳንድ ዊር የነው ስረት ፃየቍ ዊንጛንስቅ ሊጘ፣ ዊንም ሻቘ ጭንጥ ጕየቍ ቕርጝዝቍ ዋልጠ ገንጥ ጝግል ዊን።

⁷እየሱስም ኣሳልፍያንድዛት፦ «ገንጥድዛት ኣቝ እቻዝጥን» ዩ፤ ጛይም ገንጥድዛት ጝታምቸይል ኣሽ ኣቝ እቻዝ።

⁸ጘጝም፦ «ፈርጥን ቐዳቕርን ኣሳላፍያነ ኻልቀይዝ ይውጥን» ዩ፤ ጛይም ቐዳቕጝ ይው።

⁹ኣሳላፍያነ ኻልቀድም ወይንዙ ሚዝ ኣቐቍ ኣቝድዛት ጣማንድ፣ ኣዊስ ተርጘጘ ኣርቒየውም፤ ኣቝድ ቐዳቐቍ ኣሳላፍያንድ ግን ኣዊስ ተርጘጘ ኣርቕጘኵ፤ ጘጝም ኣስንድየንት ጝለ ጭጝ፦

¹⁰«እጅር እጝቅ በዊል ቀሰው ወይንዙ ሚዘድ ኣልሰኵ፤ ኣብንድ ዝይጝ እፍትጘት ግረ ቈሽ ኣቝተውድ ኣልሰኵ፤ ክት ግን ቀሰወ ወይንዙ ሚዘድ ነኳን ኣሽ ዊንዝሩ» ዩ።

¹¹እየሱስ እኒን ታምራኒዙ ምልክቲዝ ኪርመነድየንት ገሊለት ኣውረጀይዝወ ቃነ ኻትመየንቲስ ፃቩ፤ እነሽም ጝክቭርድ ጋልፁ፤ ጝክንደጥድም ጝት ኣምን።

¹²እንዝ ግረ እየሱስ ጝኘስመ ጝፅኒዝጅቅ ጝክንደጢጅቅም ኣቕ ቅፍርናዀም ጊሙ፤ ጝግልም ዊትቍ ግርቅ ጐይ።

¹³እየሱስም ኣይዅዳኒዙ ፈዝየ በልድ ችጝጠ ጕ ዊናንስቅ እየሩሳልየም ክብዩ።

¹⁴መቅደስ ጝኒስም ቢል፣ ቢቅ፣ እርግቫን፣ ቅየቚዝመ ቍርሻን ላውጥውጠቊዝዛት ጐይጝ ኣርይድጛ ችጙ።

¹⁵ኣይንድ ቀቭረዙ ጂረፈ ተስ ቢቂዝመ ቢሊዝዛትቅ መቅደስ ጝኒስ ጅግዙ፤ ላውጥውጥጘቍ ቍርሻንድዛትም ቢትኑ፤ ጝታጠረቢዝጥድዛትም ጊልብርብሩ።

¹⁶እርግቫን ቅየቍ እቅድዛትም፦ «እንዛት እድጐ እክልስጥን! ይርት ጝንድየንት ኣሪ ጝን ፃቭትርነ!» ዩ።

¹⁷ኣይንድ ጝክንደጥድ፦ «ያን ክጝኒዝቍዝ ቀንየው ቅናትድየን ይት ልየይዝጘ ዀኵ» ይሽት ፃፍሸጘ ትዝ ይ።

¹⁸ኣይንድም ኣይዅዳንድ፦ «እኒንትቅ ፃቨነው ስልጣን ፃይረር ኣረጘ ደደደድሰው ውር ምልክት ቓሊስትር?» ይ።

¹⁹እየሱስም፦ «እኒን መቅደስ ጝንድየንት ፋዝጥን፤ ያንም ሻቘ ግርቅዝ ዊስ ተስጭር» ዩ።

²⁰ጛይም፦ «እኒን መቅደስ ጝንድ ተሰነውድ ኣርቭዝ ዋልጠ ምት ፊስኩ፤ እደስለ ክት ኣወሽር የጝ ሻቘ ግርቅዝ ተስረውድ?» ይ።

²¹እየሱስ ግን፦ «መቅደስ ጝን» የው ዊግተውድ ጝሰውነድየንት ዊኑ።

²²ጝክንደጥድም ጘጝ ክርጘይስ ጐት ግረ እኒንት ዊግት ዊነጘ ትዝ ይ፤ መፃፊዙ ቃሊዝመ እየሱስ ዊግተው ቃሊዝም ኣምን።

²³እየሱስም ፈዝየ በሊዝ እየሩሳልየም ፅባ ፃቨቍ ምልክታንድ ቓልጛንድ ንቕፀቍ እቅ ጝሽዝ ኣምን።

²⁴እየሱስ ግን ኣውማውትቅ ኣርቐው ኣቓንስቅ ጛት ኣምኒየውም።

²⁵ጘጝ እጅርዙ እዘኒል ፅበውድየንትቅ ኣርቐው ኣቓንስቅ ኣውማውቅ እጅርዝቍዝ ጝጭስ ድቍጠ በንዛውም ዊኑ።