Read xamtanga ይዃንስት ወንጌል 20 Bible Online

ይዃንስት ወንጌል 20 - xamtanga bible

ይዃንስት ወንጌል 20

¹ሸወጪዙ በወትረ ግርየይዝ[17] ግረቨዝ ወገግ ያንድ፣ መግደላዊት ማርያም መቃቭሪል ፊርች፤ መቃቭርድ ዲቭሽት ዊነው ቕርጘድም ጊልብርሽ ዊኑ።

²እንዝ ማጥን ስሙን ቢጥሮስስመ እየሱስ ቀነው ዊነው ክንደተይል ውጢራ ፊትር፦ «ኣደረት፣ መቃቭሪስ ፊስጝኵ፤ ኣውል ፊስጘጘም ኣርቓይነቅም» ይች።

³ቢጥሮስስመ ላየ ክንደተይዝም በውዝ ጕጝ መቃቭሪል ፊር።

⁴ጝታቪልም ላብጠ ውጢጛ፣ እድየን ላየ ክንደተድ ቢጥሮስት ቃውስ መቃቭሪል ችጙ።

⁵ጘጝም ፍጥ የው መቃቭርድየንት ቓላንድ ፃረው ኻር ኣልቨድ ጝግል ፅበጘ ቓሉ፤ ኣነጚ ኣቒ ጥዊየውም።

⁶ስሙን ቢጥሮስም ቲክን መቃቭሪል ችጙ፤ መቃቭሪልም ጥዉ። ጘጝም ሚግንዚዙ ፃረው ኻርድ ጝግል ፅበጘ ቓሉ።

⁷እየሱስት ኣውሪል ጣጥምሽ ዊነው ኣልቨድም ሚግንዚጅቅ ኣዪጝቀ ላየ ስፍረል ጝለ ጥቅልሽ ዊነጘ ቓሉ።

⁸እንዝ ግረ እድየን ቃውስ መቃቭሪል ችጘው ክንደተድ መቃቭሪል ጥዉ፤ ቓልም ኣምኑ።

⁹እንም ክርጘይስ ጕጠ ጥውሸው ኣቐጘ ዊግተው መፃፊዙ ቃልድየንት ገነ ተረድሺየቍ ዊንጛንስቅ የጝ።

¹⁰እንዛይ ሊጘ ክንደጥድም ዋጥርጝ ጝታጝን ፊር።

¹¹መግደላዊት ማርያም ግን መቃቭሪዝ ቢዘይል ችብትር ሊዝራ ዊንች፤ ሊዝራም ፍጥ ይር መቃቭርድ ቓልች።

¹²ፃረው ኣልቨ ሲረቍ ሊጘ መላካንም እየሱስት እርሸድ ዊነው ስፍረይል ላውድ ኣውርገይል፣ ሊጘትረድ ቈሽ ልኰጐይል ጐይጝ ቓልች።

¹³ጛይም፦ «እውነ ክተ! ውር ቃጥ የጝ ሊዝረውድ?» ይ፤ ጚይም፦ «ይኣደረት ፊስጝኵ፤ ኣውል ፊስጝ እቝርጘጝም ኣርቐቅም» ይች።

¹⁴እኒንት ይርም እግርገ ብሩ ይራንድ እየሱስት ችብር ቓልች፤ ጘጝ እየሱስ ኣቐጘ ግን ኣርቒረይም።

¹⁵እየሱስም፦ «እውነ ክተ! ወረጘ ኣቕር የጝ ሊዝረውድ? ደምዝረውድስ ኣውት የጝ?» ዩ፤ ጚይም ኣታክልት ሊሚደተ ተኩዝ፦ «ይኣደረወ! ክት ፊስር ኣቕሽ ኣለቀይ ፊስጨር እቝርደው ስፍረድ ድቍ!» ይች።

¹⁶እየሱስም፦ «ማርያም!» ዩ፤ ጚይም እግርገ ብሩ ይር እቭራይስጥ ቋቈዝ፦ «ረቡኒ» ይች፤ ጝትርጕምድም፦ «ክንሰተወ!» የነት የጝ።

¹⁷እየሱስም፦ «ገነ ይርትል ኣርጊቀርምነ ዳቕተ፤ ዊገድ ግን ይፅንትል ፊትር፦ ‹ያን ይርትል ክታይርትልም፣ ይኣምላክትል ክታኣምላክትልም ኣርግጭር የውኩ› ይር ድቍ» ዩ።

¹⁸መግደላዊት ማርያምም ክንደጢል ፊትር፦ «ኣደረትቃል ቓሉን» ይች፤ ጘጝ የውድየንትም ጛጭስ ድቍች።

¹⁹ጘጝ ሸወጪዙ በወትረ ግርየይዝ ኵኑ ክንደጥድ ኣይዅዳንድዛት ጐውትጛንስቅ ቢለድ ቘልፍጝ ጝን ኣቒል ጐይጝ ፅብጛ፣ እየሱስ ተር ጝታማኽሊል ችብር፦ «ዲግተ ክታጅቅ ኣነ!» ዩ።

²⁰እኒንት የውም፣ ጝናንጣኒዝመ ጝጒድኒዝ ቓሊሱ፤ ክንደጥድም ኣደረት ቓልጛንድ ጭቕጘ ዲስ ይ።

²¹እየሱስም እንደ ገነ፦ «ዲግተ ክታጅቅ ኣነ፤ ኣይር ይት እፃቐጘ ያንም ክታት እፃጭር» ዩ።

²²እኒንት የት ግረ ጝታግል እፍ ዩነ፦ «መንፈስ ቅዱስት ለምጥን፤

²³እቂዝ ጝታኽጥያትድ ይቅር ይርንሽ ይቅር ይሽትጡ፤ ይቅር ዪይርንሽ ግን ይቅር ይሽታውም» ዩ።

²⁴ኣይንድ ፅጭ ሊጘይስ ላውድ ኣቐው ዲድመስ የነው ተውማስ እየሱስ ተራንድ ጛጅቅ ዊኒየውም።

²⁵ላጥ ክንደጥድም፦ «ኣደረትቃል ቓልኑን» ይ። ተውማስ ግን ጛት፦ «ምስማርዝ ሲቭሸቍ ጝናንጣኒዙ ምልክትድ ቓሊቀውዝየ፣ ይዘፍርነድም ምስማራንድ ጥውጘዊል ድው ቓሊቀውዝየ፣ ይናንድም ጝጒድኒል ድው ቓሊቀውዝየ ኣምነቅም» ዩ።

²⁶ሰውጠ ግርቅዝ ግረም እንደ ገነ ክንደጥድ ጝን ኣቒል ዊን፤ ተውማስም ጛጅቅ ዊኑ፤ ቢልድም ዲቭሽትጝ ፅብጛጝ እየሱስ ተር ጝታማኽሊል ችብር፦ «ዲግተ ክታጅቅ ኣነ» ዩ።

²⁷እንዝ ግረ ተውማስት፦ «ክናንድ ይጐ ነሽ፤ ይናንጣንድም ቓል፤ ክናንድም ዘርጋቕር ይጒድኒል ዲ፤ ኣምንጚ ተጠራጥርሽተ» ዩ።

²⁸ተውማስም፦ «ይኣደረ! ይኣምላክም!» ዩ።

²⁹እየሱስም፦ «ቓልዳንስቅ ኣምንድርኵሩ፤ ቓሊጝቀ ኣምነቍድ ግን ቀቫሸቍ ጛይ» ዩ።

³⁰እየሱስ እኒን መፃፊል ፃፍሺየቍ ንቕፀቍ ምልክታንዝቍ ታምራን ጝክንደጢዝ በዊል ፃቭኩ።

³¹ዊገድ ግን ክትን እየሱስ፣ ጘጝም ክርስቶስ እደረት ዅር ኣቐጘ ኣምንድርናንስ፣ ኣምንድርንም ጝሽⶔዝ ርዅየ ችጝርናንስ ማጥን እኒን ፃፍሽኩ።