Read xamtanga ይዃንስት ወንጌል 21 Bible Online

ይዃንስት ወንጌል 21 - xamtanga bible

ይዃንስት ወንጌል 21

¹እንዝ ግረ እየሱስ ጥቭርያደውስ ባኽሪዝ[18] ጋቢስ እንደ ገነ ጝክንደጢዝ እትሉ፤ እትለውድም እኒዝጘ ዊኑ፦

²ስሙን ቢጥሮስ፣ ዲድመስ ይሽተው ተውማስ፣ ቃነ ዘገሊለቱ ናትናየል፣ ዘቭዲወስት ቝርስመ ክንደጢስ ላጥ ሊጘድ ኣቕጝ ላብጠ ዊን።

³ስሙን ቢጥሮስም፦ «ኻዘ ፃውርጨ ፊጨ የጝ» ዩ። ጛይም፦ «ይንም ክጅቅ ተርነ የጝ» ይ። ፊርጝም ታኰይል ጥው፤ ዊገድ ግን ጘጝ ኻሪዝ ላው ኻዘም ፃዪየቍ።

⁴ቅሻንድም እየሱስ ባኽር ደዪይል ችብሩ፤ ክንደጥድ ግን እየሱስ ኣቐጘ ኣርቒየቍም።

⁵እየሱስም፦ «እፈሪነ! ኻዘ ፃይርንኵርኑመ?» ዩ፤ ጛይም፦ «እጅነቅም» ይ።

⁶ጘጝም፦ «መረቭድየንት ታኰይዝ ለዊዝጐቱ ማልጥን፤ ችጝትርንቅ» ዩ። ጛይም መረቭድ ባኽሪል ማል፤ ንቕፀው ኻዘም ፃይሻንስቅ መረቭድየንት ዊትረነ ብ።

⁷ኣይንድ እየሱስ ቀነው ዊነው ክንደተድ ቢጥሮስት፦ «ኣደረቃል የጝ» ዩ። ስሙን ቢጥሮስም፦ «ኣደረቃል የጝ» የነውድ ወሻንድ ጭውዝ ዊነው ጝኣልቨድየንት ሲር ባኽሪል ጥዉ።

⁸ላጥ ክንደጥድ ግን ባኽሪስ እክልድጘውድ ሊጘ ላ ቈሪ ጭቝ ኣቓንስቅ ኻዘ እቻቐው መረቭድየንት ዊትርጛ ታኰይዝ ተር።

⁹ዝቨይል ጊምጛንድም ልየ ኻኽመዝመ ሚዝ ቓል፤ ኻኽመይዝ ዲጊልም ኻዘ ዊኑ።

¹⁰እየሱስም፦ «ነን ፃይርነው ኻዘይስ ነስጥን» ዩ።

¹¹እንዝ ማጥን ስሙን ቢጥሮስ ታኰይል ፍ ላዝ ኣኵርጝን ሻቘ ኽየቝ ኻዝ ፃየው መረቭድየንት ሳ ዝቨይል ዊትሩ፤ መረብድየን እንቝጠ ኻዘ ፃይሽም እኳ ቀድሺየውም።

¹²እየሱስም፦ «ላቝጥን ዅጥን» ዩ። ጝክንደጢስም፦ «ክት ኣው የጝ?» የው ዋቕርጠ ዲፍረው ኣውማውም ዊኒየው፤ ምላሰንድም ኣደረ ኣቐጘ እጝቅቅ ኣርቕጝ ዊን።

¹³እየሱስም ተር ሚድየንት ጒ ይዉ፤ እኒዝጘም ኻዘድየንት ይዉ።

¹⁴እየሱስ ክርጘይስ ጐት ግረ ጝክንደጢዝ እትላንድ እኒን ሸወትረ ግርየ የጝ።

¹⁵ዅጝ ኻትጘት ግረ እየሱስ ስሙን ቢጥሮስት፦ «የውነት ዅር ስሙንወ! እንዛጊዝ ዲቍስር ይት ቀንደኵመ?» ዩ። ጘጝም፦ «ኣደረወ! የያ! ያን ክት ቀነር ኣቐጘ ክቕም ኣርቕረኵ» ዩ። እየሱስም፦ «ይኻጅድ ዀሽ» ዩ።

¹⁶እየሱስም ሊጘት፦ «የውነት ዅር ስሙነወ! እማን ይት ቀንደኵመ?» ዩ። ጘጝም፦ «ኣደረወ! የያ! ያን ክት ቀነር ኣቐጘ ክቕም ኣርቕረኵ» ዩ። እየሱስም፦ «ይቢቅድ ሊምጭ» ዩ።

¹⁷ሸወትም፦ «የውነት ዅር ስሙንወ! ይት ቀንደኵመ?» ዩ። ቢጥሮስም ሸውን፦ «ይት ቀንደኵመ?» የው ዋቕሩዝ ኻዝን፦ «ኣደረወ! ክት እጝቅትቅ ኣርቕረኵ፤ ያን ክት ቀነር ኣቐጘም ክቕም ኣርቕረኵ» ዩ። እየሱስም፦ «ይቢቅድ ዀሽ።

¹⁸እማን እማን የኵን! ክት ውርጋጠ ዊንዳንድ ክኣልቨድ ክቕም ከምሽር ክት ሸዊዝጐቅ ፊትራ ዊንዱ፤ ሽሚር ኣራንድ ግን ክናንድ ዘርጋትር፤ ላየድም ተር ከምስ ክት ፊርተ በናይረዊዝጐ ፊስጡ» ዩ።

¹⁹እየሱስ እኒንት የውድ ቢጥሮስ ኣወይን ክረነውዝ እደረት ኪብርዝጠጘድ ቓሊስጠ የጝ። እንዝ ግረ ቢጥሮስት፦ «ለው ቲክን!» ዩ።

²⁰ቢጥሮስም እግርገ ብሩ ያንድ፣ እየሱስ ቀነው ዊነው ክንደተድ ጛት ቲክና ቓሉ፤ እኒን ክንደተድ በውገ ድረይ ዅጛንድ እየሱስትል ኣልት፦ «ክት ዲቍስ ይውጡድ ኣው የጝ?» የው ዋቕረውድ የጝ።

²¹ቢጥሮስም ጝት ቓላንድ፦ «ኣደረወ! እኒንሰ ኣወይጣ?» ዩ።

²²እየሱስም፦ «ያን ዋጥርጪስቅ ጘጝ ርዅየዝ ዊናንስ ክውር ግድ? ክት ግን ይት ቲክን» ዩ።

²³እንዝ ምላሰንዝ፦ «እኒን ክንደተድ ክራውም» የነው ጂጘ ክንደጢል ጂጚቱ። ዊገድ ግን እየሱስ፦ «ያን ዋጥርጪስቅ ጘጝ ርዅየዝ ዊናንስ ክውር ግድ?» ዩጚ፦ «ጘጝ ክራውም» ዪየውም።

²⁴እንዛይዝቍዝ ሚዝርደውድ፤ እንዛትም ፃፈውድ እኒን ክንደተድ የጝ፤ ጝሚዝርነይድም እማን ኣቐጘ ኣርቕነኵን።

²⁵እየሱስ ፃቨቍ ላጥ ንጭፀቍ ዊቅም እኵ፤ እጝቅ ላውዝ ላው ፃፍሻን፣ ፃፍሸቍ መፃፋንድዛት ኣልምድ ጝቕም መውረነው ቸልጠም ዊኒየው ተከኵ።