Read xamtanga ይዃንስት ወንጌል 3 Bible Online

ይዃንስት ወንጌል 3 - xamtanga bible

ይዃንስት ወንጌል 3

¹ፈሪሳነ ዊግኒስ ኒቈዲመስ ይሽተው ላው ኣይዅዳነ ኻልቀ እጅር ዊኑ።

²እኒን እጅርድ ኻርዝ እየሱስትል ተር፦ «ክንሰተወ! እደረ ጝጅቅ ኣቐው እጅር ኣየውዝየ እንዛይ ክት ፃቭረቍ ምልክታንድዛት ፃቭጠ ቸለው ላው እጅርም እጀው፤ ኣቓንስቅም ክት እደረቲስ ክንሰተ ኣቕር ተትረጘ ኣርቕነኵን» ዩ።

³እየሱስም፦ «እማን እማን የኵን! እጅር ሊጘት እዅርሺየውዝየ እደረት ምጝግስትድየንት ቓልጠ ቸላውም» ዩ።

⁴ኒቈዲመስም፦ «እጅር ጊነት ግረ ኣወይ የጝ እዅርሽጠ ቸለውድ? ሊጘት ጝኘት ማፅቲል ጥው እዅርሽጠ ቸልጡመ?» ዩ።

⁵እየሱስም ዊስ፦ «እማን እማን የኵን! ኣውማው እጅር ኣቚስመ መንፈሲስ እዅርሺየውዝየ እደረት ምጝግስቲል ጥውጠ ቸላውም።

⁶ስየይስ እዅርሸውድ ሰየ የጝ፤ መንፈሲስ እዅርሸውድ መንፈስ የጝ።

⁷እንዝ ማጥን፦ ‹ሊጘት እዅርሽትርነ ጥውሸኵ› ያንስቅ ዲንቅሽተ።

⁸ፊግየ ጝት ሸዊዝጐቅ ጣዘኵ፤ ጝድመድም ወሽረኵ፤ ዊገድ ግን ኣውገይስ ተረጘ፣ ኣውገም ፊርጠጘ ኣርቓርም፤ መንፈሲስ እዅርሸውድም እኒዝጘ የጝ» ዩ።

⁹ኒቈዲመስም ዊስ፦ «እን ዊገድ ኣወይ የጝ ኣጠ ቸልሸውድ?» ዩ።

¹⁰እየሱስም፦ «ክት እስራየላኒዝ ክንሰተ ኣቕር ፅብራ እንዛት ኣርቓርመ?

¹¹እማን እማን የኵን! ኣርቕነውድየንት ዊግትነኵን፤ ቓልነውድየንትም ሚዝርድነኵን፤ ክትን ግን ይናሚዝርነይድ ለምራይርነቅም።

¹²ያን ዝቨይዝውድየንት ድቋንድ ኣምኒርነውዝየ፣ ሲመይዝውድ ድቋን ኣወሽርን ኣምንትርና?

¹³ሲመይስ ጊመው[3] እጅር ዅርትለ ሲመይ ፈው ኣውማው እጅርም እጀው።

¹⁴«ሙሴ በራኸይስ ሲቭረድየንት ንየስ ሸው ሲቅለጘ እጅር ዅርም እኒዝጘ ንየስ የው ሲቅልሽጠ ጥውሸኵ።

¹⁵እንም ጝት ኣምነውድቅ ዘላልምዙ ርዅየ ችጛንስ ማጥን የጝ።

¹⁶ጝት ኣምነውድቅ ዘላልምዙ ርዅየ ችጛንስጚ ድዛየጘ እደረ ላው ጭቝ ኣቐው ጝዅርድየንት ዲቍስን ይወነውል ኣሽ፣ ኣልምድየንት ጭቕጘ ቀንኩ።

¹⁷እደረ ጝዅርት እፃቐውድ ኣልምድየንት ኲንናንስ ኣዪጝቀ፣ ኣልም ጝዅርት ኣመካይነትዝ ቓዳንስ ማጥን የጝ።

¹⁸ጝት ኣምነውድቅ ኲንንሻውም፤ ጝት ኣምናውድ ግን እደረት ላው ጝዅሪዝ ሽዝ ኣምኒየው ኣቓንስቅ ኻትሽ ኲንንሽኩ።

¹⁹ፍርድድም እኒን የጝ፦ ብርኻን ኣልሚዝጐ ተሩ፤ እቅ ግን ጝታሰቭድ ጭቓ ዊናንስቅ ብርኻኒስ ሽ ጥመድየንት ቀን።

²⁰ጭቓ ሰቭ ሰራሸው እጅርድቅ ብርኻን ሽክተኵ፤ ጝጭቓ ሰቭድም ጋልፅሽታየጘ ብርኻኒዝጐ ተራውም።

²¹እማን ኣቐው ዊገድየንት ሰራሸው እጅር ግን ጝሰቭድ እደረት ትዛዚዝ ሚስርትዝ ሰራሽተው ኣቐጘ ግልፅዝ ቓሊሽታንስ ማጥን ብርኻኒዝጐ ተረኵ።»

²²እንዝ ግረ እየሱስ ጝክንደጢጅቅ ይዅዳ ኻግሪዝጐ ፊሩ፤ ጝግል ኣቕም ጣምቃ ጛጅቅ ዊቱ ግርየ ጐዩ።

²³ኣይንድ ይዃንስ ሳልየምት ጋቢል ኺነውን የነው ስፍረይል ንቕፀው ኣቘ ዊናንስቅ ጝግል ኣቕ ጣምቃ ዊኑ፤ እቅም ጝጐ ፊርጛ ጣምቅሽጛ ዊን።

²⁴እንም ኣቐውድ ይዃንስ ገነ እፁሺጝቀ የጝ።

²⁵ኣይንድ ይዃንስት ክንደጢዝመ ኣይዅዳኒዝ[4] ማኽሊል ዊር የነው ስረቲዝቍዝ ክርክር ጉ።

²⁶ይዃንስት ክንደጥድም ጝጐ ኣልትጝ፦ «ክንሰተወ! ዮርዳኖስት እጂል ክጅቅ ዊነውድ፣ ክትም ጝማጥን ሚዝርድረው እጅርድ እንወ ጘጝም ጣምቀኵ፤ እጅር እጝቅም ጝጐ ፊረኵ» ይ።

²⁷ይዃንስም እንት ዩ፦ «እደረቲስ ችጚየውዝየ ኣውማው እጅር ውረውረቅ ለምርጠ ቸላውም።

²⁸‹ያን ክርስቶስ[5] ኣይቀርም፤ ዊገድ ግን ጝበዊል እፃጭኩን› የር ዊግጠጘ ክታቕም ይሚዝረጫን የጝ።

²⁹ስሪት ፃየውድ ኣስን የጝ፤ ኣስኒዝ ጋቢል ችብር ወሸው መዘድ ግን ኣስኒዙ ድመድ ወሻንድ ጭቕጘ ዲስ የኵ፤ እኒን ዲስተድ ይውድ የጝ፤ ጘጝም ነን ኻትሽኩ።

³⁰ጘጝ ንየስ ይጠ ያን ግን ዝጥቅ ይጨ ጥውሸኵ።

³¹«ኒየይስ ተረውድ እጝቂስቅ ኒየቱ የጝ፤ ዝቨይዝውድ ኣቓንድ ዝቨይዙ የጝ፤ ዝቨዙ ዊገድየንትም ዊግተኵ፤ ሲመይስ ተረውድ እጝቂስቅ ኒየ የጝ።

³²ጘጝ፦ ቓለውድየንት፣ ወሸውድየንትም ሚዝርደኵ፤ ዊገድ ግን ጝሚዝርነይድ ለምረውም እጀው።

³³ጝሚዝርነይድየንት ለምረው እጅር፣ እደረ እማንተው ኣቐጘ ደደደድሰኵ።

³⁴እደረ ጝመንፈስድ ሚክሪጝቀ ይወው ኣቓንስቅ እደረቲስ እፃሸውድ እደረት ቃልድየንት ዊግተኵ።

³⁵ኣይር ጝዅርት ቀነኵ፤ እጝቅትቅም ጝጭስ ዲቍስ ይውኩ።

³⁶ዅርት ኣምነውድቅ ዘላልምዙ ርዅየ ችጝኩ፤ ዅርት ኣምናውድ ግን እደረት ቍጠድ ጝዲጊል ፅብጡጚ ርዅየ ቓላውም።»