Read xamtanga ይዃንስት ወንጌል 4 Bible Online

ይዃንስት ወንጌል 4 - xamtanga bible

ይዃንስት ወንጌል 4

¹እንዝ ግረ ፈሪሳንድ፦ «እየሱስ ይዃንስትሽ ንቕፀቍ እቅ ክንደጥ ፃቨኵ፤ ጣምቀኵም» የነው ጂጘ ወሽ።

²ዊገድ ግን ጣምቀውድ እየሱስ ኣዪጝቀ ጝክንደጥድ ዊን።

³ኣደረም እኒንት ኣርቐጘ፣ ይዅዳ ኻግርድየንት በር ገሊለ ትጐ ዋጥር ፊሩ።

⁴ፊራንድም ሰማርየቱ ፃቭ ዲቍጠ ግድ ኣቑ።

⁵እንዝ ማጥን ያይቈቭ ጝዅር ዮሴፍስ ይወው ስፍረይዝ ጋቢል ዊንደይ ሲካር ይሽትረይ ሰማርየት ኻትመትል ተሩ።

⁶ጝግልም ያይቈቭቱ ኣቘ ቢ ዊኑ፤ እየሱስም ጒደነ ፃጘነውዝ ዝላቕ ዊናንስቅ፣ ኣቘ ቢⶔዝ ጋቢል ጐዩ፤ ሰትድም ዋልጠ ሳ ኣጠ ኣቕ ዊኑ።

⁷ኣይንድ ላይ ሳምራንወ እውነ ኣቝ ቐዳተ ጘጝ ቢⶔዝጐ ተርች፤ እየሱስም ጝርት፦ «ኣለቀይ ኣቝ ነቅ» ዩ።

⁸ጝክንደጥድም ሚ ጅቭጥጘ ኻትመይል ፊርጝ ዊን።

⁹እውነየንም፦ «ክት ኣይዅዳነው እጅር የጝ፤ እደስለ ያን ሳምርናወ እጅርቲስ ኣወይር የጝ፦ ‹ኣቝ ነቅ› ይረውድ?» ይች፤ እንት ይረውድም ኣይዅዳንድ ሳምራኒጅቅ ኽቭርዳቍ ዊንጛንስቅ የጝ።

¹⁰እየሱስም፦ «እደረት ይውቲዝመ ክት፦ ‹ኣቝ ነቅ› የውድ ኣው ኣቐጘ ኣርቕራን፣ ክት ጝት ጨውተ ዊንዱ፤ ጘጝም ርዅየዝቍ ኣቝ ነይጠ ዊኑ» ዩ።

¹¹እውነየንም፦ «ኣደረወ! ቐዳቐነ እጅረርም፤ ቢድም እክል የጝ፤ እደስለ ርዅየዝቍ ኣቝ ኣዊስ ችጝተ የጝ?

¹²እኒን ቢድ ነየው ይናኣይር ያይቈቭቲስመ ክት ዲቍረራ? ጝስመ ጝቝርስ፣ ጝጊንዝቫኒዝም እኒን ቢስ ዝይጝኵ» ይች።

¹³እየሱስም፦ «እንዛይ ኣቚስ ዝየውድቅ ሊጘት ዝቛንድጡ።

¹⁴ያን ይወቍ ኣቚስ ዝየው እጅር ግን ዘላልም ዝቛንዳውም፤ ያን ጝጭስ ይወቍ ኣቝድዛይ ጝኣቒል ዘላልምዙ ርዅየ ፍልፍልዘው ኣቘ ምኝጭ ኣጥቍ» ዩ።

¹⁵እውነየንም፦ «ኣደረወ! ነስየይስቅ ዝቛንጣይቀጘ፣ እኒን ምኝጪልም ኣቝ ቐዳጨ ዋጥርጥራይቀጘ ኣለቀይ ጛይ ኣቝድ ነቅ!» ይች።

¹⁶ጘጝም፦ «ፊጥ ክጕርየት ጭጝር ለው» ዩ።

¹⁷ጚይም፦ «ግልወ እጀርም» ይች፤ እየሱስም፦ « ‹ግልወ እጀርም› ይረውድ እማን የጝ።

¹⁸እርግጥ ኣኰ ግልቍ ፃይር ዊንዱ፤ ነን ክጅቅ ፅበውድም ክጕርየም ኣየው፤ ኣቓንስቅም እማን ዊግትርኵሩ» ዩ።

¹⁹ጚይም፦ «ኣደረወ! ክት ነቭይ ኣረጘ ቓለኵን።

²⁰ይናኣቅልድ እኒን ኣበይል ስግድ፤ ክትን ኣይዅዳንድ ግን፦ ‹እጅር ሲግድጠ ጥውሸውድ እየሩሳልየም የጝ› ይርነኵ» ይች።

²¹እየሱስም፦ «እውነ ክተ! እኒን ኣበይልም ኣነ እየሩሳልየም ኣቕርን ኣይርስ ሲግዳይርነው ግርየ ተርጠጘ ይት ኣምን።

²²ክትን ሳምራንድ ኣርቓይርነው ኣምላኪዝ ሲግድርነኵ፤ ይን ኣይዅዳንድ ግን ቓድት ተረውድ ኣይዅዳኒስ ኣቓንስቅ ኣርቕነው ኣምላኪዝ ሲግድነኵን።

²³ዊገድ ግን እማንዝ ሲግደቍድቅ ኣይርስ መንፈስዝመ እማንዝ ሲግድጘው ግርየ ተርጡ፤ እንም ነን ኣቕኩ፤ ኣይርም በነውድ እነይጝ እማንዝ ሲግደቍድዛት የጝ።

²⁴እደረ መንፈስ የጝ፤ ጝጭስ ሲግደቍድም መንፈስዝመ እማንዝ ሲግድጥጘ ጥውሸኵ» ዩ።

²⁵እውነየንም፦ «ክርስቶስ የነው መሲኽ ጠርጠጘ ኣርቐኵን፤ ጘጝ ተራንድ እጝቅትቅ ድቍጡ» ይች።

²⁶እየሱስም፦ «ጘጝ መሲኽድ ያን ነን ክጅቅ ዊግጠርድ የጝ» የው ድቁ።

²⁷ኣይንድ ጝክንደጥድ ፊርጘዊስ ዋጥር፤ ጘጝም እውነ ጅቅ ዊግታንስቅ ዲንቅሽ፤ ኣነጚ፦ «ወረጘ በንሩ?» ዊንም፦ «ውርቃጥ የጝ ጝርጅቅ ዊግትረውድ?» የው ዋቕረው ኣውማውም ዊኒየው።

²⁸እውነየንም ጝርጭንድ ማልድር ኻትመይል ዋጥርድር ፊትር ኽዝቪዝ፦

²⁹«ያን ሰራጨው ገቨድየንትቅ ዊግተው እጅርድየንት ላቝጥን ቓልጥን! ምናልቫች ጘጝ ክርስቶስመ ኣጡ ኣጢ?» ይች።

³⁰ኽዝቭድም ኻትመይስ ፍ ጘጝ ፅበዊል ፊሩ።

³¹ኣይንድ ጝክንደጥድ፦ «ክንሰተወ! ኣረ ጣምጚ» ይ።

³²ጘጝ ግን፦ «ክትን ኣርቓይርነው ያን ዀው ዅረ ፃቅኩን» ዩ።

³³ጝክንደጥድም ጛስ ጛይ፦ «እጅርመ ዀነው ጝጭስ ነስ ዊኑ ኣጢ?» ይሽተይሽት።

³⁴እየሱስም እንት ዩ፦ «ይዅረድ ይት እፃቐዊዙ ፍቃድድ ፃቨነው፣ ጝሰቭድም ፋፅመነው የጝ።

³⁵ክትን፦ ‹ሲዘ ርፍዝ ግረ ማፅወ ኣቐኵ› ይርነኵ ኣየውቀ? ያን ግን፦ ‹እንወ ጭቅ ይርን ኣዝምረድ ችጘጘ ቻፅጝድዛት ቓልጥን› የኵን።

³⁶ኣይረው እጅር ጝወየድ ችጘኵ፤ ዘላልምዙ ርዅየዝ ኣቐው ፍረም ኣኽቨኵ፤ እንዝም ፊዘዊዝመ ኣይረዊዝ ላብጠ ዲስ ይጘኵ።

³⁷ኣቓንስቅም፦ ‹ላውድ ፊዘዅ፤ ላየድ ኣይረኵ› የው ይሽተድ እማን የጝ።

³⁸ያንም ክትን ዝላቒርነውድየንት ኣይርድርናንስ ማጥን እፃቑን፤ ዝላዘው ሰቭድየንት ላጥድ ሰራሽ፤ ክትን ግን ጝታዝላይዙ ፍረድ ኣኽቭርኑ።»

³⁹እውነየን፦ «ያን ሰራጨውድየንትቅ ድቁ» ይር ሚዝርድራንስቅ፣ ጚ ኻትመየንቲስ ንቕፀቍ ሳምራን እቅ እየሱስት ኣምን።

⁴⁰እንዝ ማጥን ሳምራን እቅድ ጝጐ ተርጛንድ ጛጅቅ ሳብጣንስ ማጥን ኪው ሽጝ ጨው፤ ጘጝም ጝግል ሊጘ ግርቅ ሳብጡ።

⁴¹ጝቃሊስ ጐውም ላጥ ንቕፀቍ እቅ ጝት ኣምን።

⁴²እውነየንትም፦ «ነስየይስ ይን ጝት ኣምነውድ ክት ይናጭስ ድቍረዊዝ ጭቝም ኣየው፤ ይን ይናቕም ወሽንኵኑን፤ እርግጥ ጘጝ ኣልሚዝ ቐዘተ ኣቐጘ ኣርቕንኵኑን» ይ።

⁴³እየሱስም ሰማርየ ሊጘ ግርቅ ዊነት ግረ ገሊለ ትጐ ፊሩ።

⁴⁴ነቭይ በገዘ ጝኻግሪስ ኪብራው ኣቐጘ ጝቕም ዊግት ዊኑ።

⁴⁵ዊገድ ግን ጝግል ችጛንድ ገሊለት እቅድ ዲስተዝ ለምር፤ ምላሰንድም ጛይ ፈዝየ በሊዝ እየሩሳልየም ዊንጛንስቅ ጘጝ ጝጊስ ፃቨውድየንትቅ ጝታቕም ቓልጝ ዊን።

⁴⁶እየሱስም ኣቝድ ወይንዙ ሚዝ ፃቨው ገሊለት ኣውራጀይዝወ ቃነ ኻትመየንትጐ ሊጘት ፊሩ፤ ኣይንድ ቅፍርናዀምስ ጝዅርድ ፅዊተው ላው ሽም እጅር ዊኑ።

⁴⁷እን እጅርድ እየሱስ ይዅዳ ኻግሪስ ዋጥር ገሊለ ትጐ ተረጘ ወሻንድ፣ ጝጐ ፊር ክርጘል ችጘው ጝዅርድየንት ተር ቓዛንስ ማጥን ጨዉ።

⁴⁸እየሱስም፦ «ክትን ታምራንዝመ ምልክታንዝ ቓሊርነውዝየ ኣምናይርነቅም» ዩ።

⁴⁹ሽምድም፦ «ይኣደረወ! ይዅርድ ክሪጝቀ ኣለቀይ ቃዝየዝ ለው» ዩ።

⁵⁰እየሱስም፦ «ክዅርድ ርዅየዝ እኩ፤ ክጝን ዋጥር» ዩ። እጅርድየንም እየሱስ ዊግተው ቃልድየንት ኣምን ጝጝን ፊሩ።

⁵¹ገነ ጒደነይል ፅባም ጝኣገልጋያንድ ችጝጝ፦ «ክዅርድ ቓድኩ» ይጝ ድቍ።

⁵²ሽምድም እፈረድ ዋቐ ሳዝ ቓደጘ ዋቕራንድ፦ «ታትነ ላጝጠ ሳይዝ ጝብረድ ሊቁ» ይ።

⁵³ጘጝም ሰትድ እየሱስ፦ «ክዅርድ ርዅየዝ እኩ» የው ዊግተው ሰትድ ኣቐጘ ኣርቑ፤ ጝስመ ጝበተሰቪዝቅ እየሱስት ኣምን።

⁵⁴እንም እየሱስ ይዅዳ ኻግሪስ ገሊለ ትጐ ዋጥር ሰራሸው ሊጘትረ ታምርዙ ምልክት የጝ።