Read xamtanga ይዃንስት ወንጌል 5 Bible Online

ይዃንስት ወንጌል 5 - xamtanga bible

ይዃንስት ወንጌል 5

¹እንዝ ግረ ኣይዅዳኒዙ በልድ ችጝ ዊናንስቅ፣ እየሱስም እየሩሳልየም ፊሩ።

²እየሩሳልየምስም ቢቀ ሚረይዝ ጋቢል እቭራይስጢዝ፦ «በተሰይደ»[6] የነው ላው ጣምቅሸነው ምኝጭ ዊኑ፤ ጝጅልወይልም ጝታንየይል ተዘን ተስንቍ ዋጥርጥረነቍ ኣኰ ደረጅጥ ዊን።

³እንዛይ ዋጥርጥረነቍ ደረጅጢልም ንቕፀቍ ድውያን፣ ኻርብ፣ ኻካዛን ኽሪጛ ዊን። [ጛይም ኣቚዙ ናውፅሽተነውድ ሊሚድጛ ዊን።

⁴ላው ላው ግርየ ኣደረት መላክ ጊም ኣቝድዛት ናውፃንድ፣ ቃውስ ኣቚል ጥወው እጅርድቅ ጝፃይሸው ፅውዘይስ ቓዳ ዊኑ።][7]

⁵ጝግልም ሰውርጝን ሰውጠ ምት ምሉዝ ፅዊት ፅበው ላው እጅር ዊኑ።

⁶እየሱስም እኒን እጅርድ ጝግል ኽሪ ፅበጘ ቓላንድ እክሰው ግርየ እነይ ፅበጘ ኣርቕ ጝት፦ «ቓድተ በንረኵመ?» የው ዋቕሩ።

⁷እድ ፅውዝጅነ እጅርድም፦ «ኣደረወ! ኣቝድ ናውፅሽታንድ ይት ጒ ፊስ ኣቚል ድወው እጅርም እጀር፤ ይቕም ጥውጨ ሚኵራንድም ላየ እጅር ይት ቃውስ ጥወኵ» ዩ።

⁸እየሱስም፦ «ጕ! ክኽርየነድ መውትር ፊጥ!» ዩ።

⁹እጅርድም በውዝ ቓዱ፤ ጝኽርየነድየንትም መውር ፊሩ፤ እንም ኣቐውድ ቅዳምሲንቭት ግርየዝ ዊኑ።

¹⁰ኣይዅዳንድም እድ ቓደው እጅርድየንት፦ «ንጭ ቅዳምሲንቭት ግርየዝ ክኽርየነድየንት መውርተ ወሪትት ኽግድ ፊቅዳውም» ይ።

¹¹ጘጝ ግን፦ «ይት ቓዘው እጅርድ፦ ‹ክኽርየነድ መውትር ፊጥ› የውኩ» የው ዊሱ።

¹²ጛይም፦ «ክኽርየነድ መውትር ፊጥ የውድ ኣው የጝ?» ይጝ ዋቕር።

¹³ጘጝ ግን ኽዝቭድ ንቕፃንስቅ፣ እየሱስም ጝጊስ ፈቀቅ የው ዊናንስቅ፣ ጝት ቓዘው እጅርድ ኣው ኣቐጘ ኣርቒየውም ዊኑ።

¹⁴እንዝ ግረ እየሱስ እድ እጅርድየንት መቅደስ ጝኒስ ችጝ፦ «እንወ ቓድርኵሩ፤ ነስየይስ ግን እኒስ ወሰው ችጛይረጘ ኽጥያት ሰራሽተ» ዩ።

¹⁵እጅርድም ጝት ቓዘውድ እየሱስ ኣቐጘ ፊር ኣይዅዳኒዝ ድቁ።

¹⁶ቅዳምሲንቭት ግርየዝ እነየው ዊገ ሰራሻንስቅ ኣይዅዳንድ እየሱስት ሲድሰነው ኪርም።

¹⁷እየሱስ ግን፦ «ይር ዊትርቅ ሰራሸኵ፤ ያንም ሰራጨኵን» ዩ።

¹⁸ነስየ ኣይዅዳንድ እየሱስ ቅዳምሲንቭት ሸሩዝ ጭቝ ኣዪጘቀ ጝቕምት እደረ ጅቅ እርውዝ፦ «እደረ ይር የጝ» ያንስቅ ጝት ቁጥጘ ቐናዝጝ ደምዘነው ኪርም።

¹⁹እየሱስም እንት ዩ፦ «እማን እማን የኵን! ጚር ሰራሻንድ ቓለውድየንት የጝጚ ዅር ጝቕምቲስ ውርቅ ሰራሽጠ ቸላውም፤ ኣይር ሰራሸውድየንት ዅርም ጘጝት ሰራሸኵ።

²⁰ኣይር ጝዅርት ቀነው ኣቓንስቅ ጘጝ ሰራሸውድየንትቅ ጝጭስ ቓሊሰኵ፤ ክትን ዲንቅሽስርናንስ ማጥን እንዛጊስም ዲቈው ሰቭ ቓሊሰኵ።

²¹ኣይር ክረቍድ ጒሳንትጘ ርዅየም ይዋንትጘ ዅርም ጘጝት ጘጝ ዊደዊዝቅ ርዅየ ይወኵ።

²²ኣይር ኣውማውትልቅ ፊርዳውም፤ ዊገድ ግን ፊርደነውድቅ ጝዅርስ ይውኩ።

²³እንት ሸውድም እቅድቅ ኣይርት ኪብርዝጛንትጘ ዅርትም ኪብርዝጛንስ ማጥን የጝ፤ ዅርት ኪብርዛውድቅ ጝት እፃቐው ኣይርት ኪብርዛውም።

²⁴«እማን እማን የኵን! ይቃልድየንት ወሸው፣ ይት እፃቐውድየንትም ኣምነውድቅ ዘላልምዙ ርዅየ ችጝጡ፤ ጘጝ እጅርድ ክርጘይስ ርዅየዝጐ ከሩጚ ኲንንሻውም።

²⁵እማን እማን የኵን! ክረቍድ እደረት ዅርት ድመድ ወሽጘው ግርየ ተርጡ፤ እንም ነን የጝ፤ ወሸቍድቅም ርዅየዝ ፅብጥቍ።

²⁶ኣይር ጝቕም ርዅየ ጕርየ ኣቐጘ ዅርም ጘጝት ርዅየ ጕርየ ኣቓንስ ማጥን ይውኩ።

²⁷እጅር ዅርም ኣቓንስቅ ፊርድጠ ማጥን ኣይር ጝቕም ፊርደነው ስልጣን ይውኩ።

²⁸እንዝ ዲንቅሽትርነ፤ መቃቭሪል ፅበቍድቅ ጝድመድ ወሽጘው ግርየ ተርጡ።

²⁹ቀሰው ሰራሸቍድ ርዅየዙ ጐነዝ ፍጥቍ፣ ጭቓ ሰራሸቍድ ቈሽ ኵነንየዙ ጐነዝ ፍጥቍ።

³⁰ያን ይለ ውረውረቅ ፃቭጨ ቸለቅም፤ ያን ፊርጠውድ ወጨውድየንት ጭቝ የጝ፤ ይቕምት ፍቃድድ ኣዪጝቀ ይት እፃቐዊዙ ፍቃድድ ፃቨር ኣቓንስቅ ይፍርድድ ጭቅየው የጝ።»

³¹«ያን ይቕምስ ሚዝርጣን ይሚዝርነይድ ለምርሻውም።

³²ዊገድ ግን ይማጥን ሚዝርደው ላየ እኩ፤ ጘጝ ይማጥን ሚዝርደውድ እማን ኣቐጘ ኣርቐኵን።

³³ክትን ይዃንስትል እቅ እፃቕርን ዊንድርኑ፤ ጘጝም እማንት ማጥን ሚዝርድኩ።

³⁴እኒንት ዊግጠውድ ክትን ቓድርናንስ የርጚ ያን እቀ ሚዝርነይ በነር ኣቕም ኣየው።

³⁵ይዃንስ ኻውያ መቭራት ይወው ብርኻን ዊኑ፤ ክትንም ዊትወ ግርየስ ጝብርኻኒዝ ዲስ ይትርነ በንርኑ።

³⁶ያን ይዃንስት ሚዝርነይስ ዲቈው ሚዝር ፃቀር የጝ፤ ሰራጨ ማጥን ኣይር ነየው፣ ያንም ሰራጨው እኒን ሰቭድ ኣይር ይት ኣፃቐጘ ሚዝር የጝ።

³⁷ይት እፃቐው ኣይርም ይማጥን ሚዝርድኩ፤ ክትን ግን ስሪስቅ ጝድመድ ወሺርነቅም፤ ጝሚልክድም ቓሊርነቅም።

³⁸ጘጝ እፃቐውድየንት ኣምናይርነቅ ኣቕርናንስቅ ጝቃልድ ክታግል እጀውም።

³⁹ክትን ቅዱሳን መፃፋኒዝ ዘላልምዙ ርዅየ ችጝትርንቅ ተካ ጛት ሚርምርድርነኵ፤ ጛይም ይማጥን ሚዝርደቍ ጛይ።

⁴⁰ኣነጚ ርዅየ ችጝርናንስ ማጥን ይጐ ተረነው በናይርነቅም።

⁴¹«ያን እጅርዙ ክቭር በነቅም።

⁴²ዊገድ ግን እደረት ፍቅርድ ክታእዘኒል እጀው ኣቐጘ ክታት ኣርቐኵን።

⁴³ያን ይርት ሽዝ ተጡን፤ ክትን ግን ይት ለምሪርነቅም፤ ላየድ ጝቕምት ሽዝ ተራን ግን ለምርትርንቅ።

⁴⁴ክትን ክታስ ክታይ ክቭር ለምረ ለምርሽትርነቅ፣ ዊገድ ግን ላው እደረቲስ ተረው ክቭርድየንት በናይርነቅ ኣርነውዝየ ኣወይርን ኣምነነው ቸልትርና?

⁴⁵ያን ክታት ኣይርት በዊል ኪሰር ተኪነ፤ ክትን ቲስፈ ፃቭርነው ሙሴ የጝ ክታት ኪሰውድ።

⁴⁶ሙሴት ኣምንድርናንስ ይት ኣምንትርነ ዊንድርኑ፤ ምላሰንድም ሙሴ ፃፈውድ ይማጥን የጝ።

⁴⁷ጘጝ ፃፈውድየንት ኣምኒርነውዝየ ያን ዊግጠውድየንት ኣወሽርን ኣምንትርና?»