Read xamtanga ይዃንስት ወንጌል 6 Bible Online

ይዃንስት ወንጌል 6 - xamtanga bible

ይዃንስት ወንጌል 6

¹እንዝ ግረ እየሱስ ጥቭርያደውስ ይሽተው ገሊለቱ ባኽርድየንት ከር ባኽር ደርቸይል ፊሩ።

²ጭቕጘ ንቕፀው ኽዝቭም ፅውዝጅንጢል ፃቨቍ ታምራንዝቍ ምልክታንድ ቓላንስቅ፣ ጝት ቲክኑ።

³እየሱስም ኣበል ፍ ጝክንደጢጅቅ ጐዩ።

⁴ኣይዅዳኒዙ ፈዝየ በልድም ችጝ ዊኑ።

⁵እየሱስም ንቕፀው ኽዝቭ ጝጐ ተራንድ ጭቅ የው ቓሉ፤ ፊልበውስትም፦ «እንቍጠ ኽዝቪዝቅ ኣቐው ሚ ኣዊስ ጅቭንቅ?» ዩ።

⁶እኒንት ዋቕረውድ ፊትንጠ በንጚ ጘጝ ፃቭጡድ ጝቕም ኣርቓ ዊኑ።

⁷ፊልበውስም፦ «ጝታይተእጝቅዝቅ ላው ላው ቅርጨ እኳ ችጛንስ ማጥን ሊጘ ላ ዲናርዙ[8] ሚ ጅቭናን እኳ ኣቓውም» ዩ።

⁸ጝክንደጢስ ላውድ ስሙን ቢጥሮስት ዝን እንድርያስም፦

⁹«እንል ኣኰ ስቅም ምጭዝመ ሊጘ መልቍ ኻዝዝ ፃየው ላው እፈረ እኩ፤ ኣነጚ እንዛይ እንቝጠ ኽዝቭዝ ውር ኣጥጛ?» ዩ።

¹⁰እየሱስም፦ «እቅድዛት ጐይስጥን» ዩ። ጘጝ ስፍረይል ንቕፀው ፃቀ ዊኑ፤ እቅድም ጐይ፤ ጝታእግዘድም ኣኰ ሽኽ ኣጥጘ ግልቍ ዊን።

¹¹እየሱስም ኣኰ ምጭድ ጒ እደረት ሚዝየንዝ በር ጐየቊዝ ጝታበንዘዊዝጘ ኣድሉ፤ ኻዝዝድዛትም ጘጝት ፃቭ ኣድሉ።

¹²እጝቅቅ ዅጝ እፍትጘት ግረ ጝክንደጥድዛት፦ «ቲርፈው ሚስ ላውቅ ሊቫየጘ እጝቅትቅ ጥቅልጥን» ዩ።

¹³ጛይም እቅድ ዅጘቍ ኣኰ ስቅም ሚጪስ ትርፈውድየንት ጥቅልጝ ፅጭ ሊጘ ሚስቫን እቻዝ።

¹⁴እቅድም ጘጝ ፃቨው ታምርድ ቓልጛንድ፦ «እርግጥ እኒን እጅርድ ኣልሚዝጐ ተረው ነቭይድ የጝ!» ይ።

¹⁵ጘጝም እቅድ ግድዝ ፊስጝ ኒግስጥጘ ኻስቭጘጘ ኣርቓንስቅ እንደ ገነ ጝለ ፈቀቅ የው ላው ኣበዝጐ ፊሩ።

¹⁶ኵናንድም ጝክንደጥድ ባኽሪዝጐ ጊም።

¹⁷ታኰዝ ተሳፍርሽጝም ቅፍርናዀም ትጐ ከርጥጘ ጕ፤ ጊዝያትድም ኵን ዊኑ፤ እየሱስም ገነ ጝታጐ ተሪየውም ዊኑ።

¹⁸ኣይንድ ኻይሉ ፊግየ ጣዛ ዊናንስቅ ባኽርድ ተናውጥሹ።

¹⁹ኣኰ ዊንም ዋልጠ ኪለው ሚትር[9] ባኽርድ ቂዝፍጛ ፊርጘት ግረ እየሱስ ባኽርድየንት ደዳ ታኰይዝጐ ኣልታንድ ቓልጝ ጐውት።

²⁰ጘጝ ግን፦ «ያን የጝ ጐውትርነ!» ዩ።

²¹ጛይም ጝት ለምርጝ ታኰይል ኣሳፍርዝጥጘ በን፤ ዊገድ ግን ታኰድ በውዝ ጛይ ፊርጘው ስፍረይል ችጙ።

²²ጛምርሲዝም ባኽሪዝ እጂ እዳቕጝ ዊነቍ እቅድ፣ ጝግል ዊነውድ ላው ታኰ ጭቝ ኣቐጘ፣ ጝዝም እየሱስት ክንደጥድ ጭቝ ተሳፍርሽጝ ፊርጘጘ፣ እየሱስ ጝቕም ግን ጛጅቅ ታኰይል ጥዊየው ኣቐጘ ቓልጝ ዊን።

²³ላጥ ታኵጥ ቈሽ ጥቭርያደውስስ ጕጝ ኣደረ እደረት ሚዝየንዝ ሚ ዀሰው ስፍረይዝጐ ተር።

²⁴እቅድም እየሱስም ኣነ ጝክንደጥድ ጝግል እጀቍ ኣጘጘ ቓልጛንድ ጛይ ታኵጢዝ ተሳፍርሽጝ ጝት ደምዝጛ ቅፍርናዀም ትጐ ፊር።

²⁵ጝትም ባኽሪዝ እጂስ ችጛንድ፦ «ክንሰተወ! እንል ኣውን ተትሩ?» ይ።

²⁶እየሱስም፦ «እማን እማን የኵን፤ ይት ደምዝርነውድ ዅርን እፍትርናንስቅጚ ታምርዙ ምልክት ቓልድርናንስቅም ኣየው።

²⁷ጨቅሸው ሚዝቍዝ ሰራሽትርነ፤ ኽሽስ እጅር ዅር ነየው ዘላልምዙ ርዅየ ኣቐው ዅረዝቍዝ ሰራጭጥን፤ ምላሰንድም እደረ ጝግል ደደደድሰው ማኽተምዝ ኻትትምኩ» ዩ።

²⁸እቅድም፦ «እደስለ እደረት ሰቭድ ሰራሸናንስ ማጥን ይናጭስ ጥውሸውድ ወረጘ የጝ?» ይ።

²⁹እየሱስም፦ «እደረት ሰቭድመ ጘጝ እፃቐዊዝ ኣምነነው የጝ» ዩ።

³⁰ጛይም፦ «ክት ቓልን ኣምንናንስ ማጥን ወረጘ ታምርዙ ምልክት ፃቭትር? ውርስ ሰራሽትር?

³¹‹ጛይ ዅጛንስ ማጥን ሲመይስ ሚ ይዉ› ይሽት ፃፍሸጘ ይናኣቅልድ በራኸይስ መነ ዅጝኵ» ይ።

³²እየሱስም፦ «እማን እማን የኵን! ሲመይስ ሚ ነየውድ ሙሴም ኣየው፤ እማንተው ሚድ ሲመይስ ነየውድ ይር የጝ።

³³እደረት ሚድ ሲመይስ ጊመው፣ ኣልሚዝም ርዅየ የወው የጝ» ዩ።

³⁴ጛይም፦ «ኣደረወ! እደስለስ እነየው ሚድ ዊትርቅ ነቅ» ይ።

³⁵እየሱስም፦ «ርዅየዙ ሚድ ያን የጝ፤ ይጐ ተረውድቅ ስሪስቅ ግድርዳውም፤ ይት ኣምነውድም ስሪስቅ ዝቛንዳውም።

³⁶ዊገድ ግን ያን ክታጭስ ዊግጠጘ፣ ይት ቓልድርንም እኳ እምኒርነቅም።

³⁷ኣይር ይጭስ ነየውድቅ ይጐ ተረኵ፤ ይጐ ተረውድየንትም ስሪስቅ ቢዘ በርሰቅም።

³⁸ያን ሲመይስ ጊመውድ ይት እፃቐዊዙ ፍቃድድ ፃቫንስ የጝጚ ይቕምቱ ፍቃድድ ፃቫንስም ኣየው።

³⁹ይት እፃቐዊዙ ፍቃድድም ጘጝ ይጭስ ነየቊስቅ ላው እኳ ድሲጝቀ ኻትሸነ ግርየዝ ክርጘይስ ጒሳንስ የጝ።

⁴⁰ይርት ፍቃድድ፣ ዅርት ቓል ጝት ኣምነውድቅ ዘላልምዙ ርዅየ ችጛንስ የጝ፤ ያንም ኻትሸነይዙ ግርየይዝ ክርጘይስ ጒስጭር።»

⁴¹ኣይዅዳንድም እየሱስ፦ «ሲመይስ ጊመው ሚድ ያን የጝ» ያንስቅ ኣጕርምርምጛ፦

⁴²«እኒን ዮሴፍት ዅር እየሱስ ኣየውቀ? ጚር ጝኘትስ ኣርቕነኵን ኣየውቀ? እደስለ ነን፦ ‹ሲመይስ ጊሙን› የውድ ወረጘ የጝ?» ይ።

⁴³እየሱስም፦ «ክታስ ክታይ ኣጕርምርምትርነ።

⁴⁴ይት እፃቐው ኣይር ዊትረውድ ኣየውዝየ ይጐ ተርጠ ቸለው ኣውማውም እጀው፤ ይጐ ተረውድየንትም ኻትሸነ ግርየይዝ ክርጘይስ ጒስጭር።

⁴⁵ነቭያታነ መፃፊዝ፦ ‹እጝቅቅ እደረቲስ ክንደቍ ኣጥቍ› ይሽት ፃፍሽኩ፤ እንዝ ማጥን ኣውማው ኣይርቲስ ወሸውዝመ ጝጊስ ክንደውዝድቅ ይጐ ተርጡ።

⁴⁶እደረቲስ ተረዊዝለ እደረት ቓለው ኣውማውም እጀው፤ ኣይርት ቓለውድ ጘጝ ጭቝ የጝ።

⁴⁷እማን እማን የኵን! ይት ኣምነውድቅ ዘላልምዙ ርዅየ ችጝጡ።

⁴⁸ርዅየዙ ሚድ ያን የጝ።

⁴⁹ክታኣቅልድ በራኸይስ መነ ዅ፤ ኣነጚ ክር።

⁵⁰ዊገድ ግን እጅር ክራየጘ ዃንስ ማጥን ሲመይስ ጊመው ሚድ እኒን የጝ።

⁵¹ሲመይስ ጊመው ርዅየ ይወው ሚድ ያን የጝ፤ ኣውማው እጅር እኒን ሚስ ዃን ዘላልም ፅብጡ፤ እኒን ሚድም ኣልሚዝቅ ርዅየ ኣቓንስ ማጥን ያን ይወው ይስየድ የጝ» ዩ።

⁵²ኣይንድም ኣይዅዳንድ፦ «እን እጅርድ ጝስየድየንት ይን ዅናንስ ማጥን ኣወሽ የጝ ነይጠ ቸለውድ?» ይጛ ጛስ ጛይ ጭቕጘ ተክራክርሽ።

⁵³እየሱስም እንት ዩ፦ «እማን እማን የኵን፤ እጅር ዅርዙ ሰየድ ዂርነውዝየ፣ ጝብርድም ዝዪይርነውዝየ፣ ክታቐምትል ርዅየ እጅርነቅም።

⁵⁴ይስየድ ዀው፣ ይብርድም ዝየውድቅ ዘላልምዙ ርዅየ ችጝጡ፤ ያንም ኻትሸነ ግርየይዝ ክርጘይስ ጕይስጭር።

⁵⁵ይስየድ እማንተው ዅረ የጝ፤ ይብርድም እማንተቍ ዝይን ጛይ።

⁵⁶ይስየድ ዀው፣ ይብርድም ዝየውድቅ ይጅቅ ፅብጡ፤ ያንም ጝጅቅ ፅብጭር።

⁵⁷ፅበው ኣይር ይት እፃቐጘ፣ ያንም ጝቍዝ ፅበው ኣቐጘ፣ ይት ዀውድም ይቍዝ ርዅየዝ ፅብጡ።

⁵⁸ሲመይስ ጊመው ሚድ እኒን የጝ፤ ክታኣቅልድ በራኸይስ ዅጘው መነይዝጘም ኣየው፤ ጝት ዀቍድ ክርጝኵ፤ እኒን ሚድ ዀውድ ግን ዘላልም ርዅየዝ ፅብጡ።»

⁵⁹እየሱስ እኒንት ዊግተውድ ቅፍርናዀም ምኵራቪስ ክንሳድ ዊኑ።

⁶⁰ጝክንደጢስም ንቕፀቍድ እኒንት ወሽጛንድ፦ «እኒን ለምርጥነ ቺግርዘው ቃል የጝ፤ እኒንትስ ኣው የጝ ለምርጠ ቸለውድ?» ይ።

⁶¹እየሱስም ጝክንደጥድ እን ዊገይዝቍዝ ጛስ ጛይ ኣጕርምርማጛንድ ጝመንፈሲዝ ኣርቕ፦ «እኒንመ ክታት ፅጋሱ?

⁶²እጅር ዅር በውገ ዊነው ስፍረይል ዋጥር ኣርጋንድ ቓልድርናን ወረጘ ይትርነ የጝ?

⁶³እደረት መንፈስ ርዅየ ይወኵ፤ እቀ ኻይል ግን ውርም ጣቅማው፤ ያን ክታጭስ ድቈው ቃልድየን መንፈስ የጝ፤ ርዅየም የጝ።

⁶⁴ኣነጚ ክታማኽሊስ ላው ላው እምናቍ እቅ እኵ» ዩ። እየሱስ እንት የው ዊግተውድ ጝት ኣምናቍድ ኣውታይ ኣጘጘ፣ ጝት ዲቍስ ይውጡድም ኣው ኣቐጘ፣ በውገይስ ኪርም ኣርቕ ዊናንስቅ የጝ።

⁶⁵እየሱስም እንደ ገነ፦ « ‹ኣይር ጝጭስ ፊቅደው እጅርድ ኣየውዝየ ኣውማውቅ ይጐ ተርጠ ቸላውም› የር ድቈውድ እንዝ ማጥን የጝ» ዩ።

⁶⁶እንዝ ምላሰንዝ ጝክንደጢስ ንቕፀቍድ እግርገ ዋጥር፤ ጝዝለ ጝት ቲክኒየቍም።

⁶⁷እየሱስም ፅጭ ሊጘ ክንደጥድዛት፦ «ክትንሰ ፊርትርነ በንርኵመ?» የው ዋቕሩ።

⁶⁸ስሙን ቢጥሮስም፦ «ኣደረወ! ኣውትጐ ፊርና? ክት ርዅየዙ ቃል ፃይርኵሩ።

⁶⁹ይንስ ክት ቅዱስ እደረት ዅር ኣረጘ ኣምንንኵኑን፤ ኣርቕንምኵኑን» ዩ።

⁷⁰እየሱስም፦ «ክትን ፅጭ ሊጘድ ያን ማርፅኩን፤ ኣነጚ ክታጊስ ላውድ ዳቪለውስ የጝ» ዩ።

⁷¹እኒንት የውድ ስሙንት ዅር ኣስቈረትቱ ይዅዳት ማጥን የጝ፤ ጘጝ ውርም እኳ ፅጭ ሊጘይስ ላውድ ኣቕሽም እየሱስት ዲቅስ ይውጡድ ጘጝ ዊናንስቅ የጝ።