Read xamtanga ይዃንስት ወንጌል 7 Bible Online

ይዃንስት ወንጌል 7 - xamtanga bible

ይዃንስት ወንጌል 7

¹እንዝ ግረ እየሱስ ኣይዅዳንድ ጝት ቁጥጘ ደምዝጛ ዊንጛንስቅ ይዅዳ ኻግርድ በር ገሊለ ኻግሪል ጅልዋ ዊኑ።

²ኣይንድ ኣይዅዳንድ ደዘል ኣቕጝ ኪብርዝጘው በልድ ችጝ ዊኑ።

³እየሱስት ፅንም ጝጐ ኣልትጝ፦ «ክክንደጥድ ክት ፃቭረውድየንት ቓልጛንስ ማጥን እኒስ ጕር ይዅዳ ኻግሪል ፊጥ።

⁴ግልፅዝ ኣርቕሽትጠ በነው እጅር ጝሰቭድ ስውርዝ ሰራሻውም፤ ክትም እንዛትቅ ፃቭረር ኣረውዝየ፣ ክቕምት ኣልሚዝ ጋልፅተ ጥውሸኵ» ይ።

⁵በገዘ ጝፅንድ እኳ ኣምኒየቍ ዊንጛንስቅ እነይጝ ዊግት።

⁶እየሱስም፦ «ይግርየድ ገነ ችጚየውም፤ ክታጭስ ግን ግርየድ ዊትርቅ ሚቸው የጝ።

⁷ኣልም ክታት ሽክትጠ ቸላውም፤ ይት ግን ጝሰቭድ ጭቓ ኣቐጘ ሚዝርጠር ኣቓንስቅ ሽክተኵ።

⁸ክትን በሊል ፊጥን፤ ያን ግን ይግርየድ ገነ ችጚየው ኣቓንስቅ ፊጠቅም» ዩ።

⁹እኒንትም ዊግት ገሊለ እዳቑ።

¹⁰ዊገድ ግን እየሱስት ፅን በሊል ፊርጘት ግረ ጘጝ ቈሽ ግልፅዝ እትላ ኣዪጝቀ ስውርዝ በሊል ፊሩ።

¹¹ኣይዅዳንድም በሊዝ፦ «እድ እጅርድ ኣውል እኩ?» ይጛ ጝት ደምዝጛ ዊን።

¹²ኽዝቭድም ጝማጥን ሽዅሽዅተዝ ዊግታ ላው ላውድ፦ «ደግ እጅር የጝ» ግቨርድ ቈሽ፦ «ኣየውም ኽዝቭድ ቀሰው የጝ» ያ ዊኑ።

¹³ኣነጚ ኣይዅዳንድዛት ጐውተነውዝ ኣውማውቅ ግልፅዝ ዊግተውም ዊኒየው።

¹⁴በልድ ግቨርዳንድም፣ እየሱስ መቅደስ ጝኒል ፍ ክንስጠ ኪርሙ።

¹⁵ኣይዅዳንድም፦ «እን እጅርድ ክንዲጝቀ ኣወሽ መፃፋንድ ኣርቕጠ ቸሉ?» ይጛ ዲንቅሽጛ ዊን።

¹⁶እየሱስም፦ «ያን ክንሰው ክንድጝድ ይት እፃቐዊስ ችጝሸውጚ፣ ይቕምቲስ ችጝሸውም ኣየው።

¹⁷እደረት ፍቃድድ ፃቭጠ በነው ኣውማውቅ ፅብሽ እኒን ክንድጝድ እደረቲስ ችጝሸው፣ ዊንም ይጊስ ችጝሸው ኣቐጘ ቲዝ ኣርቕጡ።

¹⁸ጝቕምቲስ ችጝሸውድየንት ዊግተው እጅር፣ ጝቕምስ ክቭር በነኵ፤ ጝት እፃቐውድየን ኪብርጠ በነው እጅር ግን፣ ጘጝ እማንተው የጝ፤ ኻሽትም ጝግል እጀውም።

¹⁹ሙሴ ክታጭስ ኽግ ነዪየውመ? ኣነጚ ክታጊስ ወሪትት ኽግድ ፋፅመው ላው እጅርም እጀው። ውር ቃጥ የጝ ይት ቁትርነ በንርነውድ?» ዩ።

²⁰ኽዝቭድም፦ «እፈ ጋኒናም ክተ! ኣው የጝ ቈሽ ክት ቁጡ በነውድ?» ይ።

²¹ጘጝም፦ «ያን ላው ጊርምሰው ሰቭ ሰራጩን፤ ክትንም ጝዝ ጊርምሽርኑ።

²²ሙሴ ጊርዝሽተነዊዙ ስረት ነዩ፤ እን ስረትድም ኣቅሊስ ችጝሸውጚ ሙሴ ነየውም ኣየው፤ ክትንም ቅዳምሲንቭትዝ እጅር ጊርዝርነኵ።

²³ነስየ ወሪትት ኽግድ ሸርሻየጘ እጅር ቅዳምሲንቭትዝ ጊርዝሽተው ኣቐውዝየ፣ እደስለ ያን እጅርዙ ዅለመነድቅ ቅዳምሲንቭትዝ ቓዛንድ ውር ቃጥ የጝ ኻልክሽርነውድ?

²⁴ጭቅ የው ፍርድ ፊርድጥንጚ እቀ በው ቓለነውዝ ፊርድትርነ» ዩ።

²⁵እየሩሳልየምትቍ እቂስም ላው ላውድ፦ «ቁጥጘ ደምዝጘው እጅርድ እኒን ኣየውቀ?

²⁶እንወ ጘጝ ኣደቫቫይዝ ዊግተኵ፤ ጛይ ግን ውረውረም ያቍ፤ ኻልቅጥድ ጘጝ ክርስቶስ ኣቐጘ ለምርጝመ ኣጢ?

²⁷ዊገድ ግን እን እጅርድ ኣዊስ ተረጘ ይን ኣርቕነኵን፤ ክርስቶስ ተራንድ ግን ኣዊስ ተረጘ ኣርቐው እጅርም እጀው» ይ።

²⁸እንዝ ማጥን እየሱስ መቅደስ ጝኒል ኣቕ ክንሳንድ ጝድመድ ኣጕስ ሸው፦ «የይ! ይት ኣርቕርነኵ፤ ኣዊስ ተጠጘም ኣርቕርነኵ፤ ዊገድ ግን ያን በገዘ ይስልጣንዝም ተጢቀር፤ ይት እፃቐውድ ጘጝ እማንተው የጝ፤ ክትንም ኣርቓይርነቅም።

²⁹ያን ግን ጝጊስ ተጣንስቅ ይት እፃቐውድም ጘጝ ኣቓንስቅ ጝት ኣርቐኵን» የው ዊግቱ።

³⁰ጛይም ኣይንድ ፃይጥጘ በን፤ ዊገድ ግን ጝግርየድ ገነ ችጚየው ኣቓንስቅ ኣውማውቅ ጝናኒዝ ዳቒየውም።

³¹ኣነጚ ኽዝቪስ ንቕፀቍ እቅ፦ «ክርስቶስ ተራንድ እኒን እጅርድ ፃቨቍ ምልክታኒዝቍ ታምራኒስ ዲቈውመ ፃቨወ?» ይጝ ጝት ኣምን።

³²ፈሪሳንድም ኽዝቭድ እየሱስትቍዝ ሽዅሽዅተዝ ዊግታንድ ወሽ፤ ካኽነጣነ ኻልቅጢጅቅም ኣቕጝ ጝት ፃይጛንስ ማጥን መቅደስ ጝኒዝቍ ዊተድርድዛት እፃቕ።

³³ኣይንድ እየሱስ፦ «ክታጅቅ ዊነውድ ዊቱ ግርየ የጝ፤ ጝዝለ ይት እፃቐዊዝጐ ፊጭር።

³⁴ክትን ይት ደምዝትርንቅ፤ ዊገድ ግን ችጛይርነቅም፤ ያን ፅበዊዝጐም ተርትርነ ቸላይርነቅም» ዩ።

³⁵ኣይዅዳንድም ጛስ ጛይ፦ «እን እጅርድ ይን ችጛይነው ስፍረ ኣውል ፊርጠ በን የጝ? ምናልቫች ግሪካነ ማኽሊል ቢትንሽጝ ፅበቍ ይናዊግኒል ፊር ግሪካንድዛት ክንስጠ በንመ ኣጢ?

³⁶‹ይት ደምዝትርንቅ፤ ዊገድ ግን ችጛይርነቅም፤ ያን ፊጠዊልም ተርትርነ ቸላይርነቅም› የውድ ወረጘ የነት የጝ?» ይ።

³⁷በሊዙ ኻትሸነ ኣቐው ኽየው ግርየይዝ እየሱስ ችብር ጝድመድ ኣጕስ ሸው፦ «ኣውማው ዝቛንደው ፅብሽ ይግል ተር ዝይነ።

³⁸ይት ኣምነውድቅ መፃፍ ዊግተጘ ርዅየዙ ኣቘ ምኝጭ ጝጊዝዊስ ፍልቅጡ» ዩ።

³⁹እኒንት የውድ ጝት ኣምነቍድ ለምርጥጙ መንፈስ ቅዱስት ማጥን የጝ፤ እየሱስ ገነ ኪብሪየው ኣቓንስቅ መንፈስ ቅዱስ ገነ ጊሚየውም ዊኑ።

⁴⁰እንዝ ማጥን ኽዝቪስ ላው ላውድ እኒንት ወሽጝ፦ «እርግጥ እኒን እጅርድ ኣልሚል ተረው ነቭይድ የጝ» ይ።

⁴¹ላጥድም፦ «እኒን ክርስቶስ የጝ» ይ፤ ላጥድ ቈሽ፦ «ክርስቶስ ተረውድ ገሊለስመ ውረ?

⁴²መፃፍ ክርስቶስ ዳዊትት ዚረይስ፣ ዳዊት ፅበይ ኻትመ በተልኺምስ ተርጠጘ ዊግተኵ ኣየውቀ?» ይ።

⁴³እንዝ ኣይንትዝ እየሱስትቍዝ ኽዝቭድ ጝስመ ጝስ ቲተቲቱ።

⁴⁴ላው ላውድም ጝት ፃይጥጘ በን፤ ዊገድ ግን ጝናኒዝ ዳቐው እጅርም ዊኒየው።

⁴⁵እንዝ ግረ ዊተድርድ ካኽነጣነ ኻልቅጢዝመ ፈሪሳኒዝጐ ፊር፤ ጛይም፦ «ውረ ጝት ነሲርነቅ?» ይ።

⁴⁶ዊተድርድም፦ «እን እጅርድ ዊግተዊዝጘ ኣውማው እጅርም ዊግት ኣርቓው» ይጝ ዊስ።

⁴⁷ፈሪሳንድም፦ «ክትንም ቀትርኑ የነትመ?

⁴⁸ኣየውጚ? ካኽነጣነ ኻልቅጢስመ ፈሪሳኒስ ጝት ኣምነው እጅር እኩመ?

⁴⁹ዊገድ ግን ወሪትት ኽግድየንት ኣርቓው እኒን ኽዝቭድ እፂተው የጝ» ይ።

⁵⁰ጝታማኽሊስም ላውድ እንዝ ሚቅ ኻርዝ እየሱስትል ተር ዊነው ኒቈዲመስ፦

⁵¹«ይናኽግድመ በዊል ላው እጅር ኪስሽተው ዊገድ ጝቕምቲስ ወይሽቲጝቀ፣ ወረጘ ፃቨጘም ኣርቒጝቀ ዝም የው ፊርደወ?» ዩ።

⁵²ጛይም ዊስጝ፦ «ክትምመ ገሊለትወ? ነቭይ ገሊለስ ጓው ኣቐጘ ሚርምርድር ኣርቕ» ይ።

⁵³እንዝ ግረ እጝቅቅ ጝታይታጝን ፊር።