Read xamtanga ይዃንስት ወንጌል 8 Bible Online

ይዃንስት ወንጌል 8 - xamtanga bible

ይዃንስት ወንጌል 8

¹እየሱስ ግን ደቭረ ዘይት ፊሩ።

²ጛምርሲዝም ግረቨዝ መቅደስ ጝኒል ፊሩ፤ ኽዝቭድም እጝቅቅ ጝጐ ተሩ፤ ጘጝም ጐይ ክንስጠ ኪርሙ።

³ወሪትት ኽግ ክንሰጢዝመ ፈሪሳኒዝም ሽርሙጥነዝ ችጝሽረይ እውነት ፃይጝ ጝጐ ነስጝ ኽዝቪዝ ማኽሊል ችብስ።

⁴እየሱስትም፦ «ክንሰተወ! እኝቸን እውነየን ሻርሙጥራ ችጝሽች።

⁵ሙሴ እነየቍ እቍንድ ቕርጘዝ ድድብን ቍወናንስ ኽግጊዝ ኣዝኩ፤ ክትሰ ጝርማጥን ወረጘ ይራ?» ይ።

⁶እነየው ዋቕረ ኣልስጘውድ ጝት ኪሰነው ምላሰነ ችጛንስ ማጥን የጝ፤ እየሱስ ግን ፍጥ የው ጝናኒዝ ዝቨይል ፃፍጠ ኪርሙ።

⁷ጛይም ደግምግምጝ ዋቕርጛንድ፣ ኒየ ጭቅ የው በር፦ «ክታጊስ ኽጥያት እጀው እጅር በዊል ጝርት ቕርጘዝ ጣዝነ» ዩ።

⁸እንደ ገነም ፍጥ የው ዝቨይል ፃፉ።

⁹ጛይም እኒንት ወሽጛንድ ሽመቅሊስ ኪርምጝ ላው ላው ይጛ ፍጝ ፊር፤ እየሱስም እውነየን ጝበዊል ችብትረጘ ጝግል ጝለ እዳቑ።

¹⁰እንዝ ግረ ጭቅ የው፦ «እውነ ክተ! ክት ኪሰቍድ ኣውል እኵ? ክት ፊርደውድ እጀውመ?» ዩ።

¹¹ጚይም፦ «ኣደረወ! ላውም እጀው» ይች። እየሱስም፦ «ያንም ፊርጠቅም ፊጥ፤ ነስየ ሊጘት ኽጥያት ሰራሽተ» ዩ።

¹²እየሱስም እንደ ገነ ኽዝቪዝ፦ «ያን ኣልሚዙ ብርኻን የጝ፤ ይት ቲክነውድቅ ርዅየዙ ብርኻን ጝጭስ ኣጡ፤ ጥመዝም ዋጥርጥራውም» የው ዊግቱ።

¹³ፈሪሳንድም፦ «ክት ክቕምት ማጥን ሚዝርድራንስቅ ክሚዝርነይድ ለምርሻም» ይ።

¹⁴እየሱስም፦ «ያን ይቕምት ማጥን ሚዝርጥሽም ኣዊስ ተጠጘ፣ ኣውገም ፊጨጘ ኣርቐር ኣቓንስቅ የሚዝርነይድ እማን የጝ። ክትን ግን ኣዊስ ተጠጘ፣ ኣውገም ፊጨጘ ኣርቕርነው ዊገም እጀው።

¹⁵ክትን እቀ ኻሰቪዝጘ ፊርድርነኵ፤ ያን ግን ኣውማውትቅ ፊርጠቅም።

¹⁶ፊርጥሽም እኳ ይት ኣፃቐው ኣይር ይጅቅ ኣቓንስቅ፣ ይለም ኣይቀር ኣቓንስቅ ይፍርድድ ጭቅየው የጝ።

¹⁷ሊጘ እቅዙ ሚዝርነይድ እማን ኣቐጘ ክታኽጊዝ ፃፍሽኩ።

¹⁸ይቕምት ማጥን ሚዝርጠር ላውድ ያን የጝ፤ ላየ ይሚዝርድ ቈሽ ይት እፃቐው ኣይር የጝ» የው ዊሱ።

¹⁹ጛይም ኣይንድ፦ «ኪርድ ኣውል የጝ?» ይ። ጘጝም፦ «ይትም ኣነ ይርት ኣርቓይርነቅም፤ ይት ኣርቕርናን፣ ይርትም ኣርቕትርነ ዊንድርኑ» የው ዊሱ።

²⁰እየሱስ እኒንት ዊግተውድ መቅደስ ጝኒስ ጊንዝቭ ለምረነ ሳፁኒዝ ጋቢል ኣቕ ዊኑ፤ ኣቕሽም ጝግርየድ ገነ ችጚየው ኣቓንስቅ ኣውማውቅ ጝት ፃዪየውም።

²¹እየሱስም እንደ ገነ፦ «ያን ፊጭር፤ ክትንም ይት ደምዝትርንቅ፤ ክታኽጥያቲዝም ክርትርንቅ፤ ያን ፊጠዊዝጐ ክትን ተረነው ቸላይርነቅም» ዩ።

²²ኣይዅዳንድም፦ « ‹ያን ፊጠዊዝጐ ክትን ተረነው ቸላይርነቅም› የውድ ጝቕምት ቁጡመ ኣጢ? ኣርቀር!» ይ።

²³ጘጝ ግን፦ «ክትን ሳይስ የጝ፤ ያን ግን ኒየይስ የጝ፤ ክትን እን ኣልሚስ የጝ፤ ያን ግን እን ኣልሚስም ኣይቀር።

²⁴ክታኽጥያቲዝ ክርትርነጘ ድቍኩን፤ ‹ያን ጘጝ የጝ› ያንድ ያን ጘጝ ኣቐጘ ኣምኒርነውዝየ ክታኽጥያቲጅቅ ኣርነጘ ክርትርንቅ» ዩ።

²⁵ጛይም፦ «ክት ኣው የጝ?» ይ። ጘጝም፦ «ነኳን ኣሽ ድቈርድ ያን ጘጝ የጝ።

²⁶ያን ክታት ዊግጠው ፊርጠውም፣ ንቕፀው ዊገ ፃቀር የጝ፤ ዊገድ ግን ይት ኣፃቐውድ ኣምንሸው የጝ፤ ጝጊስ ወጨውድየንት ኣልሚዝ ድቈኵን» ዩ።

²⁷ጛይ ግን ጚርት ማጥን ድቋ ኣቐጘ ኣስክሲየቍም።

²⁸እንዝ ማጥን እየሱስ፦ «እጅር ዅርት ሚስቅሊል ንየስ ሽርናንድ ያን ጘጝ ኣቐጘ ኣርቕትርንቅ፤ እኒዝጘም ኣይር ይት ክንሰጘ ዊግጠርጚ በገዘ ይፍቃድዝ ውረውረቅ ፃቨቅ ኣቐጘ ኣይንድ ኣርቕትርንቅ።

²⁹ይት እፃቐውድ ይጅቅ የጝ፤ ዊትርቅ ጝት ዲስ ሸውድየንት ፃቨር ኣቓንስቅ ይት ይለ በሪየውም» ዩ።

³⁰እኒንትም ዊግተጘ ንቕፀቍ እቅ ጝት ኣምን።

³¹እየሱስም ጝት ኣምነቍ ኣይዅዳንድዛት፦ «ክትን ይቃሊዝ ፀናቕር ፅብርንሽ ኣማንዝ ይክንደጥ ኣትርንቅ።

³²እማንትም ኣርቕትርንቅ፤ እማንም ክታት ኻርነይ ፊስጡ» ዩ።

³³ጛይም ዊስጝ፦ «ይን ኣቭርኻምት ዚረ የጝ፤ ኣውማውስም በር ኣቕን ኣርቓይነቅ፤ እደስለ፦ ‹ኻርነይ ፍትርንቅ› ይረኵሳ?» ይ።

³⁴እየሱስም፦ «እማን እማን የኵን! ኽጥያት ሰራሸውድቅ ኽጥያትዙ በረ የጝ።

³⁵በረ ዊትርቅ በተሰብ ጅቅ ፅባውም፤ ዅር ግን ዊትርቅ በተሰቭ የጝ።

³⁶ነስየ ዅር ክታት ኻርነይ ፊስሽ እማንዝ ኻርነይ ፍትርንቅ።

³⁷ኣቭርኻምት ዚረ ኣቕርነጘ ኣርቐኵን፤ ዊገድ ግን ይቃልድ ለምራይርነቅ ኣቕርናንስቅ ይት ቁትርነ በንርነኵ።

³⁸ያን ይርቲስ ቓለውድየንት ዊግጠኵን፤ ክትንም ክታይርቲስ ወሽርነውድየንት ፃቭርነኵ» የው ዊሱ።

³⁹ጛይም፦ «ይናኣይርድስ ኣቭርኻም የጝ» ይ፤ እየሱስም፦ «ኣቭርኻምት ቝር ኣቕርናንስ፣ ኣቭርኻም ሰራሸው ሰብድየንት ሰራሽትርነ ዊንድርኑ።

⁴⁰እደረቲስ ወጭ እማን ዊግጠርድየንት ቁትርነ ደምዝርነኵ፤ ኣቭርኻም ግን እንት ሺየውም።

⁴¹ክትን ፃቭርነውድ ክታይር ፃቨውድየንት የጝ» ዩ። ጛይም፦ «ይን ሽርሙጥነዝ እዅርሽነቅ ድቃልም ኣይነቅ፤ ላው ኣይር ፃይነቅ የጝ፤ ጘጝ ይናኣይርድም እደረ የጝ» ይ።

⁴²እየሱስም እንት ዩ፦ «ክታይርድ እደረ ኣቓንስ፣ ይት ቀንትርን ዊንድርኑ፤ ምላሰንድም ያን ተጠውድ እደረቲስ ፍ የጝ፤ ጘጝ እፃቑጚ ያን በገዘ ይስልጣንዝም ተጢቀር።

⁴³ያን ዊግጠውድየንት ኣስክሳይርነውድ ወረጘ የጝ? ምላሰንድም ይቃልድየንት ወሸነው ቸላይርነቅ ኣቕርናንስቅ የጝ።

⁴⁴ክትን ክታይር ዳቪለውስት ቝር የጝ፤ ጝበንድየንትም ፋፅምትርነ በንርነኵ፤ ጘጝ በውገይስ ኪርም ኒቭስ ቍወተ ዊኑ፤ እማን ጝጅቅ እጀው ኣቓንስቅ እማን ጅቅ ችብራውም፤ ጘጝ ኻሽወረ፣ ኻሽትዝ ኣይርም ኣቓንስቅ ኻሽት ዊግታንድ በገዘ ጝቕምቲስ ፊስ ዊግተኵ።

⁴⁵ያን ግን እማን ዊግጠር ኣቓንስቅ ይት ኣምናይርነቅም።

⁴⁶ክታጊስ ያን ኽጥያትኘ ኣቐነውድ ቓሊስጠ ቸለው እጅር እኩመ? እማን ዊግጠር ኣቐውዝየ ውረ ይት ኣምናይርነቅ?

⁴⁷እደረቲስ ኣቐው፣ እደረት ቃልድ ወሸኵ፤ ክትን ግን እደረቲስ ኣይርነቅ ኣቕርናንስቅ እደረት ቃልድ ወሻይርነቅም።»

⁴⁸ኣይዅዳንድም፦ « ‹ክት ሳምራነው የጝ፤ ጋኒንዝም ፃይሽርኵሩ› ይነውድ እማን ኣየውቀ?» ይ።

⁴⁹ጘጝም፦ «ያንስ ይርት ኪብርዘኵንጚ ጋኒንም እጀር፤ ክትን ግን ይት ኣዋርዝርነኵ።

⁵⁰ያን ይቕምስ ክቭር በነቅም፤ ያን ኪብርጨ በነው ላየ እኩ፤ ፊርደውድም ጘጝ የጝ።

⁵¹እማን እማን የኵን! ይቃልድ ሊሚደውድቅ ስሪስቅ ክርጘ ቓላውም» ዩ።

⁵²ኣይዅዳንድም፦ «ጋኒኒዝ ፃይሽረር ኣረጘ ገነ ነን ኣርቕኑን፤ ኣቭርኻም ክሩ፤ ነቭያታንድም ክር፤ ክት ግን፦ ‹ይቃልድየንት ሊሚደውድቅ ስሪስቅ ክርጘ ቓላውም› ይረኵ።

⁵³ኣየውጚ? ክረው ይናኣይር ኣቭርኻምቲስመ ክት ዲቍረራ? ነቭያታንድም ክርጝኵ፤ እደስለ ክት ክቕምት ኣው ይተ በንር የጝ?» ይ።

⁵⁴እየሱስም፦ «ያን ይቕምት ኪብርዛን ይክቭርድ ወየ እጀውም፤ ይት ኪብርዘውድ ግን ክትን ይናኣምላክ ይርነው ይር የጝ።

⁵⁵ኣነጚ ጝት ኣርቓይርነቅም፤ ያን ግን ጝት ኣርቐኵን፤ ኣርቐቅም ያን፣ ክታጘ ኻሽወረ ኣጨ ዊኑን፤ ዊገድ ግን ጝት ኣርቐኵን፤ ጝቃልድም ሊሚጠኵን።

⁵⁶ክታይር ኣቭርኻም ጝበንድ ይግርየድ ቓልን ዲስ የነው ዊኑ፤ ቓልም ዲስ ዩ» ዩ።

⁵⁷ኣይዅዳንድም፦ «ገነ ኣኵርጝን ምት ኣኳ ኣቒረርድመ ኣቭርኻምት ቓልዱ?» ይ።

⁵⁸እየሱስም፦ «እማን እማን የኵን! ኣቭርኻም እዅርሸነዊስ በውገ ያን እኩን» ዩ።

⁵⁹ጛይም ኣይንድ ጣዝጥጘ ቕርጘ ጕይ፤ እየሱስ ግን ጛጊስ ሲውርሹ፤ መቅደስ ጝኒስም ጝታማኽሊዝ ፃቭ ፍ ፊሩ።