Read xamtanga ይዃንስት ወንጌል 9 Bible Online

ይዃንስት ወንጌል 9 - xamtanga bible

ይዃንስት ወንጌል 9

¹እየሱስም ጒደነይዝ ዲቋንድ ኻርቨ ኣቕ እዅርሸው እጅር ችጙ።

²ጝክንደጥድም፦ «ክንሰተወ! እን እጅርድ ኻርቨ ኣቕ ፋጥርሻንስ ማጥን ኽጥያት ሰራሸውድ ኣው የጝ? ጘጝ ጝቕምመ? ዊንስ ጝኣቅልድ ጛይ?» ይጝ ዋቕር።

³ጘጝም፦ «እደረት ሰቭድ ጝዝ ጋልፅሽትጠ የጝጚ ጘጝ ዊንም ጝኣቅልድ ኽጥያት ሰራሺየቍም።

⁴ኣውማውቅ ሰራሽ ቸላው ኻር ተራ ኣቓንስቅ፣ ጊርቅ ፅባ ይት እፃቐዊዙ ሰቭድ ሰራጨ ጥውሸኵ።

⁵ኣልሚል ፅባ ኣልሚዙ ብርኻንድ ያን የጝ» ዩ።

⁶እኒንት ዊግት በር ዝቨይል ትፍ የው ጝብፅቕኒዝ ጭቀ ፃቩ፤ እጅሪዝ እልጣንድም ጭቀይዝ እቓስ፦

⁷«ፊትር ሰሊዀም ጣምቅሸነው ምኝጪስ እቓጭ» ዩ። ሰሊዀም የነውድ፦ «እፃሸው» የነት የጝ፤ እጅርድየንም ፊር እቓር በር ቓለው ኣቕ ዋጥሩ።

⁸ጝግፂዝመ እንዝ ሚቅ ጨዋንድ ቓልጝ ዊነቊዝም፦ «እን እጅርድ እድየን ጐይ ጨዋ ዊነውድ ኣየውቀ?» ይ።

⁹ግቨርድ፦ «የይ ጘጝ የጝ» የ፤ ላጥድ ቈሽ፦ «ጝት ተከኵጚ ጘጝም ኣየው» ይ፤ ጘጝ ኣቓንድ፦ «ያን ይቕም የጝ» ዩ።

¹⁰ጛይም፦ «እደስለ ክእልጣንድ ኣወይጝ ቢት?» ይጝ ዋቕር።

¹¹ጘጝም፦ «እየሱስ የነው እጅር ጭቀ ሊውስ ይእልጣንድ እቓስ በር፦ ‹ሰሊዀም ፊትር እቓጭ› ዩ፤ ያንም ፊጥ ቓጡን፤ ይእልጣንድም ቢት» ዩ።

¹²ጛይም፦ «ጘጝ እጅርድ ኣውል እኩ?» ይ። ጘጝም፦ «ኣርቀር! ኣርቒቀርም» ዩ።

¹³እንዝ ግረ ኻርቨ ዊነው እጅርድየነት ፈሪሳኒል ፊስ።

¹⁴እየሱስ ጭቀ ሊውስ ኻርቨይዝ እልጣንድ ቓዘው ግርየድ ቅዳምሲንቭት ዊኑ።

¹⁵እንዝ ማጥን ፈሪሳንድ፦ «ኣወይር ቓድሩ?» ይጝ ዋቕር፤ ጘጝም፦ «ይእልጣኒል ጭቀ ፃቩ፤ ያንም ፊጥ ኣቚዝ ቓጡን፤ ቓለነውም ቸሉን» ዩ።

¹⁶ኣይንድ ፈሪሳኒስ ላው ላውድ፦ «እን እጅርድ እደረቲስ ተረውም ኣየው፤ ምላሰንድም ቅዳምሲንቭት ኪብርዛውም» ይ፤ ላጥድ ቈሽ፦ «እደስለ ኽጥያትኘ እጅር ኣወሽ እነየው ታምርዙ ምልክት ፃቭ ቸልጣ?» ይ፤ ጛስ ጛይም ቲተቲት።

¹⁷እንዝ ማጥን ኻርቨ ዊነው እጅርድየንት ዊስጝ፦ «ክትሰ ክእልጣንድ ብዘው እጅሪዝቍዝ ወረጘ ይራ?» ይጝ ዋቕር። ጘጝም፦ «ያንሰ ነቭይ የጝ የኵና» ዩ።

¹⁸ኣይዅዳንድም ጝኣቅልድዛት ጭጝጝ ዋቕርጥጚስቅ ጘጝ ኻርቨ ኣቕ እዅርሸውድ ኣቐጘ ኣምኒየቍም ዊን።

¹⁹ጝኣቅልድዛትም፦ «ክትን፦ ‹ኻርቨ ኣቕ እዅርሹ› ይርነው ክታዅርድ እኒንመ? ነን ኣወይም ቓዱ?» ይጝ ዋቕር።

²⁰ጛይም፦ «ጘጝ ይናዅር ኣቐጘ፣ ኻርቨ ኣቕም እዅርሸጘ ኣርቐነኵን።

²¹ነን ግን ኣወይ ቓለነው ቸለጘ፣ ኣውም ጝት ቓዘጘ ኣርቓይነቅም፤ ጝቕምት ዋቕርጥን፤ ጘጝ ኽየው እጅር ኣቓንስቅ ጝቕምስ ዊግተነው ቸለው የጝ» ይ።

²²ጝኣቅልድ እነይጝ ዊግትጘውድ ኣይዅዳንድ እየሱስት፦ «ክርስቶስ የጝ»[10] የው ኣምነው እጅር ችጝሽሽ ምኵራቢቪስ ፊስጥጘ ዊስንጝ ዊንጛንስቅ ጛት ጐውትጝ የጝ።

²³እንዝ ማጥን የጝ፦ «ጘጝ ኽየው የጝ፤ ጝቕምት ዋቕርጥን» ይጘውድ።

²⁴ፈሪሳንድም ኻርቨ ዊነው እጅርድየንት ሊጘት ጭጝጝ፦ «እፈ እጅር ክተ! እደረት ኪብርዝ፤ እን እጅርድ ኽጥያትኘ ኣቐጘ ይን ኣርቕነኵን» ይ።

²⁵ጘጝም፦ «ያና ጘጝ ኽጥያትኘ እጅር ኣቐነውድ ኣርቐቅም፤ ዊገድ ግን ያን ኻርቨ ዊነጘ፣ ነንም ቓለነው ቸለጘ፣ ላው ዊገ እኒንት ጭቝ ኣርቐኵን» ዩ።

²⁶ጛይም፦ «ወረጘ የጝ ፃቨውድ? ክእልጥጛንድስ ኣወሽ የጝ ብዘውድ?» ይ።

²⁷ጘጝም፦ «በውርስ ድቁን፤ ክትን ግን ወሽትርነ በኒርነቅም፤ እደስለ ውር ፃቭትርነ ሊጘት ወሽትርነ በንርና? ክትንምመ ጝክንደጥ ኣትርነ በንርኑ?» ዩ።

²⁸ጛይም ኣይንድ፦ «እን እጅሪዝ ክንደተድስ ክት የጝ፤ ይንስ ሙሴት ክንደጥ የጝ።

²⁹እደረ ሙሴት ዊግተጘ ኣርቕነኵን፤ እን እጅርድ ግን ኣዊስ ተረጘ እኳ ኣርቓይነቅም» ይጛ ዛሽ።

³⁰ጘጝም፦ «ክትን ጝት ኣዊስ ተረጘ ኣርቐቅ የነውድ ዲንቅሰው ዊገ የጝ፤ ኣነጚ ይእልጣንድ ብዘውድ ጘጝ የጝ።

³¹እደረ ጝት ጐውተቊዝመ ጝፍቃድድ ፋፅመቊዛት ወሸኵጚ ኽጥያትኝጥድ ወሻየጘ ኣርቕነኵን።

³²‹ኻርቨ ኣቕ እዅርሸው እጅሪዝ እልጣንድ ቓዙ› የነው ዊገ ኣልም ፋጥርሸት ኪርም ወይሽትም ኣርቓው።

³³እን እጅርድ እደረቲስ ኣየው ኣቓን ውርቅ ፃቭጠ ቸላውም ዊኑ» ዩ።

³⁴ጛይም፦ «እፈ ክዅለመነድቅ ኽጥያትዝ ስርሽር እኵርሽረር ክተ! ክትመ ይናት ክንስተ በንሩ?» ይጝ ምኵራቪስ ቢዘ ጅግዝ።

³⁵እየሱስም እጅርድየንት ጅግዝጘጘ ወሹ፤ ጝት ችጛንድም፦ «ክት እደረት ዅርት[11] ኣምንትርመ? ዩ።

³⁶እጅርድየንም፦ «ኣደረወ! ጝት ኣምንጨ ማጥን ጘጝ ኣው የጝ?» ዩ።

³⁷እየሱስም፦ «ቓልድርኵሩ፤ ነንም ክጅቅ ዊግተውድ ጘጝ የጝ» ዩ።

³⁸እጅርድየንም፦ «ኣደረወ! ኣምነኵን» የው ሲግዱ።

³⁹እየሱስም፦ «ያን ኻርብድ ቓልጛንስ፣ ቓለቍድ ቈሽ ኻርብጛንስ እን ኣልሚል ፍርድዝ ተጥኩን» ዩ።

⁴⁰ጝግል ዊነቍ ፈሪሳኒስም ላው ላውድ እኒንት ወሽጛንድ፦ «እደስለ ይንም ኻርብ የጝ የነትመ?» ይ።

⁴¹እየሱስም፦ «ኻርብ ኣቕርናንስ ኽጥያትም ኣጠ ዊኒየው፤ ነን ግን ቓልነኵን ይርነቅ ኣቕርናንስቅ ክታኽጥያትድ ፅበጘ ፅብጡ» ዩ።