Read xamtanga ኻወርየታኒዙ ሰቭ 10 Bible Online

ኻወርየታኒዙ ሰቭ 10 - xamtanga bible

ኻወርየታኒዙ ሰቭ 10

¹ቂሳርየ የነው ኻግሪል፦ ‹ኢጣሊቅየት ክፍለ ጠውር› ይሽተው ሰራዊቲል ቈርነሊወስ የነው ላው ላዝ ኻልቀ እጅር ዊኑ።

²ጘጝ እጅርድ እጝቅ ጝበተሰቪጅቅ እደረት ኣምልከው መንፈሳዊ እጅር ዊኑ፤ እቅዝ ጭቕጘ ማፅውተው፣ ቈሽም ዊትርቅ እደረ ትጐ ፃልየው እጅር ዊኑ።

³ላው ግርየ ፃይጨ ሰት ኣጠይዝ እደረት መላክ ጝጐ ተር፦ «ቈርነሊወስወ!» የው ጭጛንድ እትለዝ ቓሉ።

⁴ጘጝም ዳጝግፅ ትክ የው ቓላ፦ «ኣደረወ! ውረይ» ዩ። መላክድም፦ «ክፀለውቲዝመ ክምፅዋቲዝ እደረት በዊል ኻስቭሽ ኣርግኩ።

⁵ነንም እዮቢ ትጐ እቅ እፃቕር ቢጥሮስ ይሽተው ስሙንት ነስሽ።

⁶ጘጝ ቀርቭር ፈቀው ባኽር ደዪይዙ ስሙንት ጝን ኣቭንወ ጐይኩ፤ ክት ፃቭተ ጥውሸውድቅ ጘጝ ድቍጡ» ዩ።

⁷ቈርነሊወስም ጝት ዊግሰው መላክድ ፊረጘ ጝኣሽከራኒስ ሊጘይዝመ ጝጭስ ኣምንሽተቍ ዊተድሪስ እደረት ጐውተው ላውድ ጭጙ።

⁸ጛጭስም ኣቐው ዊገድቅ እጝቅትቅ ድቍ በር እዮቢ ትጐ እፃቑ።

⁹እድ እፃሸቍ እቅድም ጝኣምርሲዝ ኻትመየትል ችጝጥጘ ጕጘጘ ዋልጠ ሰት ኣጠ ኣቓንድ ቢጥሮስ ፃልይጠ ዲቭሪል ክብዩ።

¹⁰ኣይንድም ግድርዳንስቅ ዀነው ሚ በኑ። ጝምዘትም ኣስልሻ ሲጝቀ እትለ ቓሉ።

¹¹ሲመይም ቢት ላው ገርደነ ኣልቨ ተከው እረቈ ሲዘት ማይዘኒዝቅ ፃይሽ ዝቨይዝጐ ጊማንድ ቓሉ።

¹²ጘጝ ኣልቨይልም ሲዘ ልኵጣንዝ ፃጘቍ ቲተቲተቍ እንሰስድ፣ ዝቨዝቨ ዊትርሽጛ ፃጘቍዝመ ሲመይቱ ቢረቍ ዚልቅድቅ ዊን።

¹³ኣይንድም፦ «ቢጥሮስ! ጕ እንዛት ዝውራ ዃይ» የው ድመ ጝጐ ተሩ።

¹⁴ቢጥሮስም፦ «ኣደረወ! እኒንትስ ፃቨቅም፤ ያን ቅዱስ ኣየው ርኵስ ኣቐው ስየ ዅም ኣርቐቅ» ዩ።

¹⁵እድየን ድመድ ግን ሊጘት ጝጐ ተር፦ «እደረ ንፅዅ ፃቨውድየንት ክት እርኵስ ይተ ጥውሻውም» ዩ።

¹⁶እነያ ሸውን ደግምግመት ግረ እድየን ገርደነ ኣልቨ ተከው እረቈድ ሲመይ ትጐ ፊስሽቱ።

¹⁷ቢጥሮስም፦ «እን እትለይዝ ጝትርጕምድ ወረጘ ኣጢ?» ያ ጝኻሳቪዝ ጨጝቅሻ ሲጝቀ ቈርነሊወስ እፃቐቍ እቅድዛይ ስሙንት ጝንድ ዋቕርጛ ተርጝ ሚረይል ችብር።

¹⁸ጝታድመድም ኣጕስ ሽጝ፦ «ቢጥሮስ ይሽተው ስሙን የነው ኣቭን እጅር እንል እኩመ?» ይጝ ዋቕር።

¹⁹ቢጥሮስም እድ ቓለው እትለድየንት ጕያ ማላ ሲጝቀ መንፈስ ቅዱስ፦ «እንወ ሻቘ እቅ ክት ደምዝጘኵ።

²⁰ጕ ጊምር ዲምቅጭ፤ እን እቅድዛት እፃቐርድ ያን የጝ፤ ኣቓንስቅም ጣርጥሪጝቀ ጛጅቅ ፊጥ» ዩ።

²¹ቢጥሮስም ጊም፦ «ክትን ደምዝርነው እጅርድ ያን የጝ፤ ክታተትርነዊዝ ምላሰንድ ወረጘ የጝ?» ዩ።

²²እቅድም፦ «ይን ተርነውድ ቈርነሊወስ የነው ላዝ ኻልቀ እጅሪስ እፃሽን የጝ፤ ጘጝ እጅርድ ፃድቅ፣ መንፈሳዊ፣ ቈሽም ኣይዅዳነ ኽዝቭድም ጭቕጘ ኪብርዝጘው እጅር የጝ። ክት ጝጝኒል ጭጝስ ክት ይረውድየንትቅ ወሽጠ ማጥን ቅዱስ መላክ ጝጭስ ድቁ» ይ።

²³ቢጥሮስም እቅድዛት ለምር ኣቒ ጝኒል ድው ኣቭኑዙ። ጛምርሲዝም ጕ ጛጅቅ ፊሩ፤ እዮቢ ፅበቍ ምመናኒስም ላው ላው እቅ ጝጅቅ ላው ኣቕጝ ፊር።

²⁴ጛምርሲዝም ቂሳርየ ችጝ፤ ቈርነሊወስም ጝዚምዳኒዝመ ጝፃምጢዝቅ ኣኽቭ ጐይ ሊሚዳ ዊኑ።

²⁵ቢጥሮስም ጝግል ችጛንድ ቈርነሊወስ ለምር ጝልኲል ሊቭ ሲግዱ።

²⁶ቢጥሮስ ግን፦ «ያንም ክጘ እጅር የጝ፤ በጭ ጕ» የው ጒሱ።

²⁷ቢጥሮስም ጝት ዊግሳ ኣቒ ጥዋንድ ንቕፀቍ እቅ ኣኽቭሽጝ ዊን።

²⁸ኣይንድም እነይ ዊግቱ፦ «ኣይዅዳነው እጅር ላየ ዊግን ጅቅ ዲምቅሽጠም ኣነ ተቫቭርሸጠ ይናኽግድ ፊቅዳየጘ ክታቕም ኣርቕርነውድ የጝ፤ ዊገድ ግን ያን ኣውማውትቅ፦ ‹ርኵስ› ዊንም፦ ‹ቅዱስ ኣየው› ያይቀጘ እደረ ቓሊስኩ።

²⁹ኣቓንስቅም ክትን ጭጝርናንድ ውርቅ ኣወላውሊጝቀ ክታጐ ተጡን፤ ነስየ ውር ማጥን ጭጝርነጘ ኣርቕጨ በነኵን» ዩ።

³⁰ቈርነሊወስም እንት ዩ፦ «ንጭ ሲዘ ግርቅ ልክ እኝቸን ፃይጨ ሰትሸንስ ይጝን ኣቕ ፀለውት ፃቫ ሲጝቀ ድጝግት ፃረው ብርቕርቕ የው ኣልቨ ሲረው ላው እጅር ተር ይበዊል ችብሩ።

³¹እንት የውም ዊግቱ፦ ‹ቈርነሊወስወ! እደረ ክፀለውትድ ወሽኩ፤ ድኺዝ ይውረው ክምፅዋትድም ለምርኩ።

³²ነንም እዮቢ ትጐ እቅ እፃቕር ቢጥሮስ ይሽተው ስሙንት ጭጝሽ፤ ነን ጘጝ ባኽር ደዪል ፅበው ስሙን የነው ቀርቭር ፈቀተ እጅሪዝ ጝኒል ኣቭንወ ጐይኩ› ዩ።

³³ያንም በውዝ ክጐ እቅ እፃቑን፤ ክትም ተረነውድ ቀሰው ፃቭሩ፤ ነስየ እደረ ይናጭስ ዊግተ ማጥን ኣዘውድየንትቅ ወሽነ ማጥን ይን እጝቅቅ እደረት በዊል ኣኽቭሽንኵኑን» ዩ።

³⁴ቢጥሮስም እንት ያ ዊግትጠ ኪርሙ፦ «እማንም እደረ እጅርስ እጅር ቲዘ ቲዛየጘ ኣድሉዋየጘም ገነ ነን ኣርቑን።

³⁵ኣውማው ኻግርዙ እጅርቅም ኣቕሽ እደረት ጐውተው፣ ጝት ዲስ ሸውድየንትቅም ፃቨው ኣቐውዝየ እደረ እን እጅርድየንት ለምረው የጝ።

³⁶እደረ ዲግተይዙ ወንጌልድየንት ይናእጝቅት ኣደረ እየሱስ ክርስቶስስ ፃቭ እስራየላኒዝ እፃቑ።

³⁷ይዃንስ ክንሰው ጥምቅቲዝ ግረ ገሊለስ ኪርም ይዅዳ ኻግሪል ኣሽ ኣቐው ዊገድቅ ክታቕም ኣርቕርነኵ።

³⁸እደረ ናዝሪትቱ እየሱስት መንፈስ ቅዱስዝ ቀቫቑ፤ ኻይልም ይዉ፤ እደረ ጝቕምም ጝጅቅ ዊናንስቅ ቀሰው ሰቭ ሰራሻ፣ ዲቪሎስስ ቅምሸቍድቅ ቓዛ፣ እስራየላኒዝቍ ኻግራኒልቅ ጅልዉው።

³⁹ይዅዳት ገጠሪዝመ እየሩሳልየም ኻትመይዝቅ ጘጝ ሰራሸው ዊገይዝቅ ይን ሚዝረጫን የጝ፤ ጝትም ቃነል ሲቅልጝ ቍዉ።

⁴⁰ዊገድ ግን እደረ ጝት ሸወትረ ግርየይዝ ክርጘይስ ጕይስ እትልዙ።

⁴¹እትለውድም እጝቅዝቅ ኣዪጝቀ፣ ክርጘይስ ጐት ግረ ጝጅቅ ኣቕን ዅነቅ ዝይነቅ፣ ጝሚዝረጫንም ኣነቅ ይናጭስ የጝ፤ እደረ ይናት እንዝ ማጥን ማርፅ ዊኑ።

⁴²ጘጝ ርዅየዝ ፅበቊዝመ ክረቍዝቅ ፊርድጠ ማጥን እደረ ዊስነጘ ክንስናንስመ ሚዝርድናንስ ማጥን ጝቕም ይናት ኣዝኩ።

⁴³ጝዝ ኣምነውድቅ ጝሽⶔዝ ጝኽጥያቲስ ይቅርተ ችጝጠጘ ኒቪያታንድቅ ሚዝርድጝኩ።»

⁴⁴ቢጥሮስ ገነ እኒንት ዊግታ ሲጝቀ ቃልድ ወሸቍ እቂልቅ መንፈስ ቅዱስ ጊሙ።

⁴⁵ቢጥሮስ ጅቅ ተርጝ ዊነቍ እየሱስት ኣምነቍ ኣይዅዳንድም እደረ ኣኽዛቫኒዝ መንፈስ ቅዱስት ይወጘ ቓልጛንድ ጊርምሽ።

⁴⁶እኒንት ኣርቕጘውድም ኣኽዛቫንድ መንፈስ ቅዱስ ይወቍ ላጥ ቈⶖቍጥዝ ዊግትጛንድ ወሽጛንስቅ የጝ።

⁴⁷ቢጥሮስም ኣይንድ፦ «ይን መንፈስ ቅዱስት ለምርነጘ እንዛይ እቅድም ለምርጘውዝየ ኣው የጝ ጛት ኣቝዝ ጣምቅሻይጘጘ ኪልክልጠ ቸለውድ?» ዩ።

⁴⁸እንዝ ማጥን፦ «እየሱስ ክርስቶስት ሽዝ ጣምቅጭጥን» የው ኣዙ፤ ጛይም እንዝ ግረ ጛጅቅ ሳብጠ ማጥን ጨው።