Read xamtanga ኻወርየታኒዙ ሰቭ 11 Bible Online

ኻወርየታኒዙ ሰቭ 11 - xamtanga bible

ኻወርየታኒዙ ሰቭ 11

¹ኻወርየታኒዝመ ይዅዳ ኻግሪል ፅበቍ ምመናኒዝም፣ ኣኽዛቫንድ ቈሽ እደረት ቃልድ ለምርጘጘ ወሽ።

²እንዝ ማጥን ቢጥሮስ እየሩሳልየም ትጐ ፋንድ ጝታማኽሊስ ጊርዝሽተነውዝ ኣምነቍ እቅ ቢጥሮስት ኒቕፍጛ፦

³«ክት ጊርሽቲየቍ ኣኽዛቫኒዝ ጝኒል ጥውር ጛጅቅ ዅርኵሩ» ይጝ ዊቅስ።

⁴ቢጥሮስ ግን ኣቐው ዊገድቅ በውረይስ ኪርም ቲረ ቲረዝ እንት ያ ኣስርድዘነው ኪርሙ።

⁵«ያን እዮቢ ኻትመይል ዊናንድ፣ ፃልያ ሲጝቀ ሚስጥጭ እትለ ቓሉን፤ ኽየው ገርደነ ኣልቨ ተከው እረቈ ሲዘት ማዘንዝ ፃይሽ ሲመይስ ጊመኵ።

⁶ያንም ጝት ትክ የር ቓላንድ ሲዘ ልኵጣንዝ ፃጘቍ እንሰስዝመ ኣረዊታንዝ፣ ቈሽም ዝቨዝቨ ዊትርሸቍ ፍጥርትዝመ ኪፍዝ ቢረቍ ዚልቅዝቅ ቓሉን።

⁷ኣይንድም ሲመይስ፦ ‹ቢጥሮስወ! ጕ ዝውራ ዃይ› የው ዊግታንድ ወጩን።

⁸ያንም፦ ‹ኣደረወ! ፃቨቅም፤ በርክሺየው፣ ዊንም ርኵስ ስየ ይመቸይል ችጝዝም ኣርቐቅ› ዩን።

⁹እድየን ድመድም፦ ‹እደረ በርከውድየንት ክት እርኵስ ይተ ጥውሻውም› የው ሲመይስ ዊሱ።

¹⁰እን ዊገድም ሸውን ደግምግምሹ፤ ጝዝለም እድየን ገርደነው ኣልቨ ተከው እረቈድ ሲመይ ትጐ ጥቅልሽ ፊሩ።

¹¹ኣይንድም ቂሳርየስ ይጐ እፃሸቍ ሻቘ እቅ ተርጝ ያን ዊነው ጝኒል ችጝ።

¹²መንፈስ ቅዱስም ውርቅ ኣወላውሊጝቀ ጛጅቅ ፊጨ ማጥን ይጭስ ድቁ፤ እንዛይ ዋልጠ ይፅንድም ይጅቅ ዊን፤ ላብጠም ፊርን እድ ቈርነሊወስ ይጘው እጅሪዝ ጝኒል ጥውኑን።

¹³ጘጝም መላክ ጝጝን ኣቒል ችብር እትለጘ፦ ‹እዮቢ ትጐ እቅ እፃቕር ቢጥሮስ ይሽተው ስሙንት ጭጝሽ።

¹⁴ጘጝ ክስመ ክበተሰቪዝ ቓድትርኑ ጒደነድ ክታጭስ ድቍጡ› የው ድቈጘም ይናጭስ ድቁ።

¹⁵ያንም ዊግተነው ኪርመጘ መንፈስ ቅዱስ በውገ ይናግል ጊመጘ ጛግልም ጊሙ።

¹⁶ኣይንድም፦ «ይዃንስ ኣቝዝ ጣምቁ፤ ክትን ግን ዊትቍ ግርቅዝ ግረ መንፈስ ቅዱስዝ ጣምቅሽትርንቅ» የው ኣደረ ዊግተው ቃልድ ትዝ ዩን።

¹⁷ነስየ እደረ ይን ኣደረ እየሱስ ክርስቶስት ኣምንናንድ ይናጭስ ነየውድየንት ጛጭስም ይወውዝየ፣ እደረት ኪልክልጨ ያን ኣው የጝ?»

¹⁸ጛይም እኒንት ወሽጛንድ ዊግተነው ዊገ ብጝ ዝም ይ፤ «እደስለሰ እደረ ኣኽዛቫኒዝ ርዅየል ኣቭቃዘው ንስኻ ይዉ የነት ቃየው!» ይጛ እደረት ሚዝየንዝ።

¹⁹እስጢፋነውስትል ተረው ሚከረይዝቍዝ ቢትንሸቍ ምመናንድም ፊንቅየስ፣ ቈብረውስስመ ኣንፀውክየስታል ኣሽ ጅሉጛ ኣደረት ቃልድ ክንስ፤ ኣነጚ ኣይዅዳኒዝ ጭቝጚ ላጥ እቅዝ ድቊየቍም።

²⁰ጝታማኽሊስ ግን ቈብረውስስመ ቀርየነስ ተረቍ ላው ላው እቅ ኣንፀውክየ ትጐ ፊርጝ ኣደረ እየሱስት ወንጌልድየንት ግሪካኒዝ ሲቭክ።

²¹ኣደረት ናንሸንም ጛጅቅ ዊንች፤ ጭቕጘ ንቕፀቍ እቅም ኣምንጝ ኣደረ ትጐ ዋጥር።

²²እን ጂጘድም እየሩሳልየም ፅበቍ ምመናኒል ችጙ፤ ጛይም በርናቫስት ኣንፀውክየ ትጐ እፃቕ።

²³ጘጝም ጝግል ችጛንድ እደረ ጝፃገድ ኽዝቪዝ ይወጘ ቓል ዲስ ዩ፤ ቈሽም ጝታእዘኒዙ ፍቃድዝ ኣደረት ኣምነነውዝ ፀናጥጘ ማጥን እጝቅትቅ ማኽሩ።

²⁴ጘጝም መንፈስ ቅዱስዝመ እምንትዝ እቻቐው ቀሰው እጅር ዊኑ፤ ጭቕጘ ንቕፀቍ እቅም ኣደረ ትጐ ዋጥርጝ ጝታጅቅ ቈሺት።

²⁵እንዝ ግረ በርናቫስ ሳውልት ደምዝጠ ጠርሲስ ትጐ ፊሩ።

²⁶ጝት ችጛንድም ኣንፀውክየ ትጐ ፃይ ተሩ።

²⁷ጝታቪልም ጝግል ፅበቍ ምመናኒጅቅ ኣቕጝ ላብጠ ኣምረ ምሉ ንቕፀው ኽዝቭ ክንስ፤ ምመናንም ኣፍለ ኣንፀውክየስ፦ ‹ክርስቲያን› ይሽት።

²⁸ኣይንት ወራቲዝ ላው ላው ነቭያታን እየሩሳልየምስ ጕጝ ኣንፀውክየ ትጐ ጊም፤ ጛጊስም ኣጋቨውስ ይሽተው ላውድ ጕ፦ «ኣልሚልቅ ኽየው ኰር ተርጡ» የው መንፈስ ቅዱስዝ ቃውሽ ዊግቱ፤ እን ትንቪትድም ቂሳር[5] ቀላውዲወስት ዚምኒዝ ፋፅምሹ።

²⁹ምመናንም ኣይንድ ይዅዳ ፅበቍ ምመናኒዝ ጝታይተኣቅሚዝጘ ፊሰ ፊስጝ እርዳተ ይውጥጘ ዊስን።

³⁰እንዝ ማጥን እን ፊስጘው እርዳተድየንት በርናቫስመ ሳውልስታናኒል በርስጝ ይዅዳት ምክን ቃወጢዝ[6] ይው።