Read xamtanga ኻወርየታኒዙ ሰቭ 12 Bible Online

ኻወርየታኒዙ ሰቭ 12 - xamtanga bible

ኻወርየታኒዙ ሰቭ 12

¹ኣይንት ዚምኒዝ ንጕስ ኺረውድስ ምመናኒስ ላው ላውድ ሲድሳ ሚከረ ቓሊስጠ ኪርሙ።

²ይዃንስት ዝን ያይቈቭትም ሰይፍዝ ቍውሱ።

³እን ሰራሸው ዊገድም ኣይዅዳንድዛት ዲስ ሸጘ ቓሉ፤ ኣቓንስቅም ቢጥሮስት ቈሽ ፃይሱ፤ እንም ኣቐውድ ቅጣ ዀነው በሊዙ ሳብጢዝ የጝ።

⁴ቢጥሮስት ወኽኒ ጝኒል ድውስ በር ሲዘ ሲዘ ዊተድር ኣጛ ሊሚደቍ ሲዘት ምድቭ ዊተድርዝ ኣስርክቭዙ፤ እንት ሸውድም ኣይዅዳኒዙ ፈዝየ በልድ ዲቈት ግረ ፊስ ጛዝ ፊርድስጠ በን የጝ።

⁵ቢጥሮስም ወኽኒ ጝንል እፁሽ ጐዩ፤ ኣነጚ ምመናንድ ጝማጥን ኪው ሽጝ እደረ ትጐ ፃልይጛ ዊን።

⁶ኺረውድስም ቢጥሮስት ኽዝቪል ኣልስጠ ኻስቭ ፅባ ቢጥሮስ ጘጝ ኻሪዝ ሊጘ ሰንሰለታንዝ እፁሽ ሊጘ ዊተድርዝ ማኽሊል ኽሪ ዊኑ፤ ላጥ ዊተድር ቈሽ ወኽኒ ጝኒዙ ሚረድ ችብርጝ ሊሚድጛ ዊን።

⁷ኣይንድም ኣደረት መላክ ቢጥሮስትል ተር እትሉ፤ ቢጥሮስ ዊነው ክፍልድም ጭቕጘ ኣቭርኹ፤ መላክድም ቢጥሮስት ጒድንድ ዳቕ ቂስቅስ በር፦ «ጕ ቃዚ!» ዩ፤ ኣይንድም ሰንሰለታንድ ጝናንጣኒስ እኪርጝ ሊቭ።

⁸መላክድም፦ «ክኣልቨድ ሲጭ! ከምጭ! ክፃብጣንድም ዲ» ዩ፤ ቢጥሮስም ኣዚተጘ ፃቩ፤ መላክድም፦ «ክኵተድ ሲትር ይት ቲክን» ዩ።

⁹ቢጥሮስም ጝት ቲክን ወኽኒ ጝኒስ ፉ፤ ኒቪ ቓለኵን የው ፅበኵጚ መላክድ ፃቨውድቅ እማንተው ኣቐጘ ኣርቒየውም።

¹⁰በውረ ዘቪዝመ ሊጘትረ ዘቪዝ ዲቍጝ ኻትመይዝጐ ፊሰው ጒደነይል ችጝሸው ብረትዝ ዲቭሽተው ሚረይል ችጝ፤ ሚረድም እጅር ዳቒጝቀ ጝቕም ጛጭስ ቢቱ፤ ጛይም ጝዝ ፍጝ ላይ ሳብረ ጒደነስ ዲቍጝ ፊር፤ መላክድም ድጝግትዝ ቢጥሮስቲስ ቲት ፊሩ።

¹¹ቢጥሮስም ውንታንድ፦ «ኣደረ ጝመላክድ በርስ ኺረውድስት ናኒስመ ኣይዅዳንድ ነስጥጘ በንጘው ሚከረይስ ቓዘጘ እማን ገነ ነን ኣርቑን!» ዩ።

¹²እኒንት ደደደድሰት ግረ ንቕፀው ኽዝቭ ኣኽቭሽ ፃልየው ማርቈስ ይሽተው ይዃንስትኘት ጝኒል ፊሩ።

¹³ጝግል ችጘጘም ቢለድ ኳኳ ሹ ኣይንድም ረውድየ ይሽትረይ ላይ ኣገልጋይ ቢለድ ኳኳ ሸውድ ኣው ኣቐጘ ወሽተ ሚረይዝጐ ኣልትች።

¹⁴ቢጥሮስ ኣቐነውድ ጝድመይዝ ኣርቕረጘም ዲስተዝ ክትራንስቅ ብዚጝቀ ውጥይር ኣቒል ጥውር፦ «ቢጥሮስ ቢዘይል ችብርኩ» ይር ድቍች።

¹⁵ጛይም፦ «እፈ ጕቝትሩመ?» ይ፤ ጚ ግን ቢጥሮስ ኣቐጘ ደግምግምር ድቍች፤ ኣይንድም፦ «እደስለስ ቢጥሮስት መላክድ ኣጠት» ይ።

¹⁶ቢጥሮስ ግን ቢለድ ኒቒስ ኳኳ ሹ፤ ጛይም ቢለድ ብዝጝ ጝት ቓልጛንድ ጊርምሽ።

¹⁷ጘጝም ዝም ይጥጘ ማጥን ጝናኒዝ ጣቅቅስ እደረ ኣወሽ ወኽኒስ ፊሰጘ ድቁ፤ «እኒንትም ያይቈቭስመ ላጥ ምመናኒዝ ድቍጥን» የው ጛጊስ ቲት ላየ ስፍረል ፊሩ።

¹⁸ጛምርሲዝም ዊተድርድዛይ ግረቨዝ ጕጝ፦ «ቢጥሮስ ኣውል ጥዉ» ይጛ ኻውክሽጥጘ ኪርም።

¹⁹ኺረውድስም ቢጥሮስት ደሚስ ባንድ ዘቭድ ሊሚደቍ ዊተድርድዛት ሚርምር በር ቍውሱ፤ እንዝ ግረ ኺረውድስ ይዅዳስ ጊም ቂሳርየ ትጐ ፊር ጐዩ።

²⁰ኣይንድም ኺረውድስ ጢረውስስመ ሲዱነ ኻግራኒዝቍ እቂጅቅ ጐርት ዊኑ፤ ጛይም ዀነው ኣረ ችጘውድ ንጕሲዙ ቅምቲስ ኣቓንስቅ ላው ኣቕጝ ተርጝ ኣርቅሽጥጘ ጨው፤ ንጕሲዙ ባለሟል ኣቐው ብላስጠስ የነው እጅርድየንትም ጛጅቅ ኣቕ ከቭጠ ማጥን ቀሰው ሽ።

²¹ቃፅርጘው ግርየድ ችጛንድም ኺረውድስ ጝልቭሰ ምጝግስትድ ሲር ዙፋኒል ጐይ ኽዝቪዝ ዊግቱ።

²²ኽዝቭድም፦ «እኒን እደረት ድመ የጚ እጅርዙ ድመም ኣየው» ያ ቓፁ።

²³ኺረውድስም እደረስ ክቭር ይዊጝቀ በራንስቅ ኣደረት መላክ ኣይንድ ጣዝ ማሉ፤ ጘጝም ጝሰውነትድቅ ኽፀ ፍር ዀሽት ክሩ።

²⁴እደረት ቃልድ ግን ጭቕጘ ፈራቓ ፊሩ።

²⁵በርናቫስስመ ሳውልስም ጝታውላድ ችጝዝጝ እየሩሳልየምስ ዋጥር፤ ማርቈስ ይሽተው ይዃንስትም ጛጅቅ ፃይጝ ተር።