Read xamtanga ኻወርየታኒዙ ሰቭ 13 Bible Online

ኻወርየታኒዙ ሰቭ 13 - xamtanga bible

ኻወርየታኒዙ ሰቭ 13

¹ኣንፀውክየት ምመናኒልም ነቭያታንዝመ ክንሰጥዝ ዊን፤ ጛይም፦ ነግየር ይሽተው በርናቫስ፣ ስሙን፣ ቀርየነቱ ሉኪወስ፣ ገሊለት ቅመው ኺረውድስት ባለሟል ምናኺስመ ሳውልስ ጛይ።

²ጛይም ፃምጛ፣ እደረትም ኣምልክጛ ሲጝቀ መንፈስ ቅዱስ፦ «በርናቫስመ ሳውልስ ያን ጛይ ሰራሽጥጘ ማጥን ማርፀው ሰቪል ቲዝጥን» ዩ።

³ጛይም ፃምጘት ፃልይጘት ግረ ጝታናንጣንድዛት ጝታዲጊል እቝርጝ ሲነቭትዝ።

⁴በርናቫስመ ሳውልስም መንፈስ ቅዱስዝ እፃሽጝ ሰለውቅየ ትጐ ጊም፤ ጝጊስም ሚርክቭዝ ፃቭጝ ቈብረውስ ትጐ ፊር።

⁵ስልማነ ችጛንድም ኣይዅዳኒዝ ምኵራቪል እደረት ቃልድ ሲቭክ፤ ይዃንስም ጛጅቅ ኣቕ ጛት ከቫ ዊኑ።

⁶ቈብረውስት ደስየትሸንትቅ ጅልውጝ ባፉ ችጛንድ፣ ጝጊስ በርያሱስ ይሽተው ላው ኣይዅዳነው እጅር ችጝ፤ ጘጝ እጅርድ ጠቋይ፣ ቈሽም ኻሽወረ ነቭይ ዊኑ።

⁷ጘጝም ሰርግዮስ ባውሎስ የነው ጚ ኻግርሸንት ቅመው ኣስክሰው እጅሪጅቅ ዊኑ ፅበውድ፤ ጘጝ ሽም እጅርድም በርናቫስመ ሳውልስ ጝጐ ጭጝስ እደረት ቃልድ ወሽጠ በኑ።

⁸የልማስ ይሽተው ጠቋይ በርያሱስ ግን ሽምድየንት ኣምናየጘ ፅጋስጠ በን፣ በርናቫስስመ ሳውልስታት ተቃውምሹ።

⁹«ባውሎስ» ይሽተው ሳውል ግን መንፈስ ቅዱስዝ እቻቕ ትክ የው ቓል በር እንት ዩ፦

¹⁰«እፈ ፅድቅዙ ፃለት፣ ተጝኰልዝመ ጭቕትዝም እቻረር ዲቪሎስት ዅር ክተ! ጭቅየው እደረት ጒደነድ ጣምዘነውድ በራርመ?

¹¹ነንም ኣደረት ናንሸን ክጐ ተትርኵች፤ ኻርቨም ኣትር፤ ክእድሚል ኣሽም ኰረዙ ብርኻንድ ቓላርም» ዩ፤ ኣይንድም ጭገገዝመ ጥመዝ ጊም ጝእልጝጣንድዛት ሺፍኑ፤ በውዝም ደም ደም ያ ጝናንድ ፃይ ቃወው እጅር ደምዝጠ ኪርሙ።

¹²ሽምድም ኣቐው ዊገድ ቓላንድ ወሸው ኣደረት ክንድጚዝቍዝ ዲንቅሻ ኣምኑ።

¹³እንዝ ግረ ባውሎስስመ ጝፃምጢዝ ባፉስ ጕጝ ብንፍልየስ ችጝሽረይ በርግየን ትጐ ፊር፤ ይዃንስ ግን ጛጊስ ቲት እየሩሳልየም ዋጥር ፊሩ።

¹⁴ጛይ ግን በርግየንቲስ ጕጝ ብስድየስ ችጝሽረይ ኣንፀውክየ ትጐ ፊር፤ ቅዳምሲንቭት ግርየይዝም ላው ምኵራቭል ጥውጝ ጐይ።

¹⁵ወሪትት ኽግዝመ ነቭያታኒዝ መፃፋንድ ኣንቭቭሽጘት ግረ፤ ምኵራቪዝ ኻልቅጥድ፦ «ይናፅንወ! ኽዝቭድ ማኽረው ቃል ፃይርን ፅብርንሽ ዊግትጥን» ይጝ እፃቕ።

¹⁶ባውሎስም ጕ ጝናኒዝ ኽዝቭድ ጣቅስ በር እንት ዩ፦ «እስራየልት እቅ፣ ክትንም እደረት ኣምልክርነቅ ኣኽዛቫንም ክታችወ! ወጭጥን!

¹⁷እኒን እስራየልት ኽዝቪዝ ኣምላክድ ኽፅምትቍ ይናኣቅልድዛት ማርፁ፤ ግቭፅ ፅብጛም ጛት ንየስ ንየስ ሹ፤ ጝኻይሉ ናኒዝም ጝጊስ ፊሱ።

¹⁸በራኸይዝም ኣርቨ ምት ኣጠ ዚምን ጛት ኣጝክቭክቩ።

¹⁹ጝዝ ግረም ከናን ዊነቍ ላጝጠ ምጝግስታንድዛት ጅግዝ ጝታዝቨድ ጛጭስ ርስት ፃቭ ዊርሱ።

²⁰ነቭይ ሳሙየልትል ኣሽ ሲዘ ላዝ ኣኵርጝን ምት ፊርደቍ መስፍናን ይዉ።

²¹ጝዝለም ንጕስ ኒግስጠ ማጥን እደረት ጨው፤ እደረም ብንያምት ዊግኒስ ቂስት ዅር ሳወልት ኒግሱ።

²²ሳወልት ሳቕረት ግረ ቈሽ ዳዊትት ኒግሱ፤ እደረ ጝቕምም፦ ‹ይእዘነው እጅር፣ ያን በንውድየንትቅ ፃቨው እስየይት ዅር ዳዊትት ችጙን› የው ጝማጥን ሚዝርዱ።

²³እደረም ቲስፈዙ ቃል ጥው ዊነጘ፣ እን እጅሪዝ ዚረይስ ቓዘተ ኣቐው እየሱስት እስራየልስ ነሱ።

²⁴እየሱስ ተረነዊስ በውገ ይዃንስ እስራየልት ኽዝቭድቅ ንስኻ ጥው ጣምቅሽጠ ማጥን ሲቭክ ዊኑ።

²⁵ይዃንስም ጝእፃሸውድየንት ፋፅምጠ ጓንድ፦ ‹ይት ኣው ይርንኵርኑ? ያን ኣሽ መሲኽም ኣይቀር፤ ዊገድ ግን ጝፃብጣንድ ፊሰነውዝ እኳ ጥውጨቅ ኣቐው ይእግርገይል ላየ ተርጡ› ያ ዊኑ።

²⁶«እፈ ኣቭርኻምት ዚረይስ እዅርሽነቅ ይናፅንዝመ እደረት ኣምልክርነቅ ኣኽዛቫንዝ ክታችወ! እኒን ቓደነዙ እፃድ ተረውድ ይናጭስ የጝ።

²⁷እየሩሳልየምትቍ እቂዝመ ጝታኻልቅጢዝ ግን፣ እየሱስስመ ቅዳምሲንቭት ጨቨቅ ኣንቭቭሸቍ ነቭያታኒዙ ቃልድ ኣርቒየቍም፤ ኣነጚ እየሱስት ክርጠ ፊርድጛንስቅ እንዛይ መፃፋኒዙ ቃልድየንት ኣርቒጝቀ ፋፅም።

²⁸ክርጘል ችጝዘው ላው ምላሰን እኳ ብጛና፣ ቍውጠ ማጥን ቢላጠውስት ጨው።

²⁹ጝቍዝ ፃፍሸውድቅ ፋፅምጘት ግረም ሲቅልጘው ቃነይስ ጊምዝጝ መቃቭርል ዲቭ።

³⁰እደረ ግን ጝት ክርጘይስ ጒሱ።

³¹ገሊለስ ኪርምጝ እየሩሳልየም ኣሽ ጝጅቅ ተረቍ እቂዝ ንቕፀቍ ግርቅ እትሉ፤ ጛይም ነን ኽዝቪዝ በዊልቅ ሚዝረጫን ጛይ።

³²ይንም እደረ ይናኣቅሊዝ ይወው ቲስፈይዙ ቃልድየንት ክታጭስ ኣቭዝርተ ድቍነኵን።

³³ሊጘትረ መዝሙሪዝ፦ ‹ክት ይዅር የጝ፤ ያን ክት ንጭ እዅርኩን› ይሽት ፃፍሸጘ፣ እደረ እየሱስት ክርጘይስ ጒሰነውዝ ይናኣቅሊዝ ጥወው ቲስፈይዙ ቃልድየንት ይን ጝታቝሪዝ ፋፅምኩ።

³⁴ቈሽም ቢስብሰነውል ችጛየጘ እደረ ክርጘይስ ጒሰጘ ኣስርድዝጠ በን፦ ‹ዳዊትስ ይውሽተው ኣምንሽተው ቅዱስ ቲስፈድ ነቅጭር› የውኩ።

³⁵ላየ ስፍረዝም፦ ‹ቅዱስ ክዅርድየንት ቢስብሰነውል ችጝጠ በራርም› ይሽት ፃፍሽኩ።

³⁶«ዳዊት ኣቕሽ በገዘ ጝዚምኒዝ እደረት ፍቃድድ ኣግልግል ኻተት ግረ ክር ጝኣቅሊጅቅ ዲቭሽትኩ፤ ጝሲየድም ቢስብስኩ።

³⁷እየሱስ ግን እደረ ክርጘይስ ጒሳንስቅ ቢስብሰነውል ችጚየውም።

³⁸ነስየ ይናፅን ክታችወ! ኽጥያቲስ ይቅርተ ችጝሸውድ እየሱስት ሽዝ ኣቐጘ ክታጭስ ሲቭክሸጘ ኣርቕጥን።

³⁹እየሱስት ኣምነውድቅ ሙሴት ኽጊዝ ችጝሻው ፅድቅድየንት ችጝጡ።

⁴⁰ነስየ ነቭያታንድ፦ ‹እፈ ፈዝኝጥ ክታትርነ! ቓልጥን! ዲንቅጭጥን! ድዝጥንም! ኣውማውቅ ዊግትሽ ኣምናይርነው ሰቭ ክታዚምኒዝ ሰራጭር› ይጝ ዊግትጘው ቃልድ ክታግል ችጛየጘ ጣጝቅቅጭጥን።»

⁴¹

⁴²ባውሎስስመ በርናቫስም እኒንት ክንስጝ በርጝ ምኵራቪስ ፍጛንድ፣ እቅድ እን ዊገድ ተረው ቅዳም ሲንቭቲዝ እንደ ገነ ደግምጝ ክንስጥጘ ማጥን ጨው።

⁴³ምኵራቪዙ ኣኸቨድ ቢትንሸት ግረም ንቕፀቍ ኣይዅዳንዝመ ኣይዅዳኒዝ ኻይማነውቲል ጥወቍ መንፈሳዊያን እቅ ባውሎስስመ በርናቫስስታት ቲክን፤ ባውሎስስመ በርናቫስስም እቅድዛት ክንስጛ እደረት ፃገዝ ፀናቕጝ ፅብጥጘ ማጥን ማኽር።

⁴⁴ሊጘትረ ቅዳምሲንቭቲዝም ዊትቍ እዳጛንትለ ኻትመይዙ ኽዝቭድቅ እደረት ቃልድ ወሽጠ ጊልብርሽ ተሩ።

⁴⁵ኣይዅዳንድ ግን ንቕፀው ኽዝቭ ቓልጛንድ ቅንየዝ እቻቕ፤ ባውሎስ ዊግተው ዊገድየንትም ተቃውምሽጛ ዛሸነው ኪርም።

⁴⁶ባውሎስስመ በርናቫስም ዲፍርጝ እንት ይጝ ዊግት፦ «እደረት ቃልድ በውገ ክታጭስ ድቍሽትጠ ጥውሸኵ፤ ክትን ግን እምቢ ይርን ዘላልምት ርዅየ ክታጭስ ጥውሻየጘ ክታቕም ፊርድርነውዝየ ቀሰው! ይንም ኣኽዛቫኒዝጐ ፊርንቅ።

⁴⁷ምላሰንድም ኣደረ ይናት፦ ‹ቓድትድየንት ኣልሚዙ ደርቸይል ኣሽ ችጝዝተ ማጥን ኣኽዛቫኒዝ ብርኻን ፃቭኩን› የው ኣዝኩ» ይ።

⁴⁸ኣኽዛቫንድም እኒንት ወሽጛንድ ዲስ ይ፤ ኣደረት ቃልድየንትም ኪብርዝ፤ ዘላልምት ርዅየዝ ኣስልሸቍድቅ ኣምን።

⁴⁹ኣደረት ቃልድም ጛይ ኻግራኒልቅ ፈራቑ።

⁵⁰ኣይዅዳንድ ግን ኣደረት ኣምልከቍ ኻፍታመን እቍኒዝመ ኻትመይዝ መኳንንታድዛት ቂስቅስጝ ባውሎስስመ በርናቫስስታል ስድት ጕይስጝ ጝታኻግሪስ ጅግዝ።

⁵¹ባውሎስስመ በርናቫስስም ጝታልኵጣኒዙ ኣወረድ ኣይዅዳኒል ኣርግፍጝ[7] እቈኒወን ትጐ ፊር።

⁵²ምመናንድም ዲስተዝመ መንፈስ ቅዱስዝ እቻቕ።