Read xamtanga ኻወርየታኒዙ ሰቭ 14 Bible Online

ኻወርየታኒዙ ሰቭ 14 - xamtanga bible

ኻወርየታኒዙ ሰቭ 14

¹ባውሎስስመ በርናቫስስም ክንድጘጘ እቈኒወንስ ኣይዅዳኒዝ ምኵራቪል ጥውጝ ቐናዝጝ ክንስጛንስቅ፣ ንቕፀቍ ኣይዅዳንዝመ ግሪካንዝ ኣምን።

²ኣምኒየቍ ኣይዅዳንድ ግን ኣኽዛቫንድዛት ምመናኒል ቂስቅስጝ ሽክሽጥጘ ፃቭ።

³ባውሎስስመ በርናቫስስም ኣደረትቍዝ ዲፍርጝ ዊግትጛ እክሰው ግርየ ጝግል ጐይ፤ ኣደረም ጝታናንጣኒዝ ታምርዙ ምልክትዝመ ዲንቅሰው ዊገዝ ፃቫ፣ ጛይ ዊግትጘው ፃገይዙ ቃልድየንት ደደደሳ ዊኑ።

⁴ኻትመይዙ ኽዝቭድም ቲተቲት ግቨርድ ኣይዅዳኒጅቅ ግቨርድ ቈሽ ኻወርየታኒጅቅ ኣቑ።

⁵እንዝ ግረ ኣይዅዳኒዘመ ኣኽዛቫኒዝ ጝታኻልቅጢጅቅ ኣቕጝ ኻወርየታንድዛት ጋልጥምጥጘ፣ ቕርጝዝም ድድብጥጘ በን።

⁶ጛይ ግን እኒንት ኣርቕጘጘ፦ «ደርቭየን፣ ልስጥራን» ይሽተቍ ሊቃወንየት ኻትምጢዝመ ጝታጅልወይዝቍ ኻግራኒዝጐ ሰይ።

⁷ጛይ ኻግራኒልም ወንጌል ሲቭኩ።

⁸ልስጥራንስም ጝልኵድ ሲለው ላው እጅር ዊኑ፤ እን እጅርድ እዅርሻንድ ኪርም ለውሻሽ ኣቓንስቅ ጝልኲዝ ፃጝም ኣርቓው ዊኑ።

⁹ጘጝም ባውሎስ ዊግታንድ ወሻ ዊኑ፤ ባውሎስም ጝት ትክ የው ቓላንድ፣ ቓደነል ችጝዘው እምንት ፃየው ኣቐጘ ኣስክሱ።

¹⁰ኣይንድም ጝድመድ ኣጕስ ሸው፦ «ቀጥ ይር ክልኲዝ ችብጭ» ዩ፤ ጘጝም በርደግ የው ጕ ጝልኲዝ ተግራ ዋጥርጥረነው ኪርሙ።

¹¹ኽዝቭድም ባውሎስ ፃቨውድ ቓላንድ ጝድመድ ኣጕስ ሸው ሊቃወንየት ቋቋይዝ፦ «ኣምላካንድ እቅ ተክጝ ይናጐ ጊምጝኵ» ያ ዊግቱ።

¹²በርናቫስት፦ «ዲየ» ባውሎስት ቈሽ ዋነ ዊግተተድ ጘጝ ዊናንስቅ፦ «ኸርምየን» ይጝ ሽ ፊስ።

¹³ኻትመይዝ ደዪል ፅበው ዲየት መቅደሲዙ ካኽንድም ቻቕን ቢል፣ ኣቨቨዝ ተስንቍ ኣክሊላንም ፃይ ኻትመይዝ ሚረይል ተር ኸዝቪጅቅ ኣቕ ባውሎስስመ በርናቫስስ ምስዋይት ኣልስጠ በኑ።

¹⁴ኻወርየታን በርናቫስስመ ባውሎስስ ግን እኒንት ወሽጛንድ ጝታኣልቨድ ቀድጝ ኽዝቪዝ ማኽሊዝጐ ውጢጛ ፊር፤ ጝታድመድም ኣጕስ ሽጝ እንት ይ፦

¹⁵«እፈ እቅ ክታትርነ! ውር ማጥን የጝ እንት ሽርነውድ? እረ ይንም ክታጘ እቅ የጛ! እንል ተርነውድም ክትን እኒን ጊነቱ ዊገይስ እክልድርን ሲመይዝመ ዝቨዝ፣ ባኽርዝመ ጝዝ ኣቒል ፅበቍድቅ ፋጥረው ዘላልም ፅበው እደረ ትጐ ዋጥርትርነ ማጥን ወንጌል ሲቭክነ የጝ።

¹⁶እደረ ዲቈቍ ዚምናኒዝ ጛት ሸጘ ፊርጥጘ ማጥን ኣኽዛቫንድዛት በር በሩ።

¹⁷ኣቕሽም ሲመይስ ስወ ማለነውዝ፣ ኣዝምረ ፍረነ ወቅትዝመ ዀነው ዚየነውድቅ ነየነውዝ ይናእዘንድ ዲስ ሻ ቀሰው ኣምላክ ኣቐጘ ጝቕምስ ሚዝርሰው ቀሰው ሰቭ ፃቨነውድ በሪየውም» ይ።

¹⁸ኻወርየታንድም እንቝጠ ዊገ ዊግትጝ ኽዝቭድ ጛጭስ ምስዋይት ሰዋቓይጘጘ ግድዝ ማሊስ።

¹⁹ኣይዅዳንድ ግን ኣንፀውክየስመ እቈኒወንስ ጝታጐ ተርጝ ኽዝቭድ ኻጝስ፤ ባውሎስትም ቕርጘዝ ድድብጝ በርጝ ክረው ተኩዝ ኻትመይስ ቢዘ ጒዝጝ ፊስ።

²⁰ባውሎስ ግን ጝክንደጥድ ተርጝ ጝት ኪብጝ ፅብጛ ሊቭ ዊነው ስፍረይስ ጕ ኻትመይል ጥዉ፤ ጛምርሲዝም በርናቫስ ጅቅ ኣቕ ደርቭየን ትጐ ፊሩ።

²¹ባውሎስስመ በርናቫስስም ደርቭየንስ ወንጌል ሲቭክጝ ንቕፀቍ እቅ ኣምንስጝ ምመናን ፃቭጘት ግረ ልስጥራንስመ እቈኒወንታዝ ዲቍጝ ኣንፀውክየ ትጐ ፊር።

²²እንዛይ ኻግራኒዝቅም ምመናንድዛት ጝታእምንቲዝ ፀናጥጘ ማጥን ማኽርጛ፦ «ኣይዝዀጥን፤ ጣጝክርጥን፤ እደረት ምጝግስቲል ጥውነ ማጥን ኽየው ሚከረ ለምርነ ጥውሸኵ» ይ።

²³ጛይ ኻግራኒል ፅበቍ ምመናኒልቅ ምከን ቃወጥ ይም፤ ጛትም ፃምጝ ፃልይጝ በርጝ ጝታኣመንጘው ኣደረስ ኽድር ይው።

²⁴እንዝ ግረ ብስድየቱ ዲቍጝ ብንፍልየ ትጐ ፊር።

²⁵በርገይንስም ኣደረት ቃልድ ክንስጝ በርጝ ኣጣልየ ትጐ ጊም።

²⁶ኣጣልየስም ጕጝ ሰውርየትወ ኣንፀውክየ ትጐ ሚርክቭዝ ፊር፤ ኣንፀውክየ፣ ነኳን ኣሽ ሰራሽጘው ሰቪዝ ማጥን እንዝ ሚቅ ኣደረት ፃገዝ ኽድር ይውሽትጘይ ኻትመየን ጚ።

²⁷ጝግል ችጘት ግረም ምመናንድቅ ሊንስ ኣኽቭጝ እደረ ጛጅቅ ኣቕ ሰራሸው ሰቪዝመ ኣኽዛቫንም ጝት ኣምንጥጘ ማጥን ኣወሽ እምንትዙ ሚረድ ብዘጘ ድቍ።

²⁸ጝግልም ምመናኒጅቅ እክሰው ግርየ ጐይ።