Read xamtanga ኻወርየታኒዙ ሰቭ 15 Bible Online

ኻወርየታኒዙ ሰቭ 15 - xamtanga bible

ኻወርየታኒዙ ሰቭ 15

¹ላው ላው እቅም ይዅዳስ ኣንፀውክየ ፊርጝ፦ «ወሪትት ኽግድ ኣዘጘ ጊርዝሽቲርነውዝየ ቓዳይርነቅም» ይጛ ምመናንድዛት ክንስጥጘ ኪርም።

²ባውሎስስመ በርናቫስስም እን ዊገይዝቍዝ ጛይ እቂጅቅ ኪርክርሽጛ ኽየው ጐርል ጥው፤ እንዝ ግረ ባውሎስስመ በርናቫስስ ላጥ ላው ላው ኣንፀውክየት ምመናኒጅቅ ኣቕጝ እየሩሳልየም ፊርጝ እን ዊገይዝቍዝ ኻወርየታኒዝመ ምከን ቃወጢዝ ኣልስጥጘ ማጥን ዊስንሹ።

³ጛይም ምከንሸንስ እፃሽጝ ኣኽዛቫን ኣወይጝ እደረ ትጐ ዋጥርጘጘ ድቍጛ ፊንቅየስመ ሰማርየስታዝ ፃቭጝ ፊር፤ እን ጂጘድም ምመናንድዛትቅ ዲስ ሹ።

⁴እየሩሳልየም ችጛንድም ምመናኒዝመ ኻወርየታኒዝ፣ ምከን ቃወጢዝም ኣቕጝ ለምር፤ ባውሎስታይም እደረ ጛጅቅ ኣቕ ፃቨውድየንትቅ ጂጝዝ።

⁵ዊገድ ግን ፈሪሳን ዊነቍ ምመናኒስ ላው ላውድ ጕጝ፦ «ኣኽዛቫንድ ጊርዝሽትጥጘ፣ ወሪትት ኽግድም ፋፅምጥጘ ማጥን ኣዝትርነ ጥውሸኵ» ይ።

⁶ኻወርየታኒዝመ ምከን ቃወጢዝም እን ዊገይዝቍዝ ማኽርሽጥጘ ኣኽቭሽ።

⁷ኽየው ክርክር ፃቭጘት ግረ ቢጥሮስ ጝታማኽሊስ ጕ እንት ዩ፦ «ይፅን ክታችወ! ኣኽዛቫን ወንጌልዙ ቃልድ ይምቸይስ ወሽጝ ኣምንጥጘ ማጥን እንዝ ሚቅ እደረ ክታማኽሊስ ይት ማርፀጘ ክታቕም ኣርቕርነውድ የጝ።

⁸እጅርዝ እዘንድየንት ኣርቐው እደረ ጛት ለምረጘ፣ መንፈስ ቅዱስት ይናጭስ ነየጘ ጛጭስም ይወነውዝ ሚዝርዱኩ።

⁹ጝታእዘንድ እምንትዝ ዊር ሻንስቅ ይናስመ ጛስ ማኽሊስ ወረውረም ቲዚየው።

¹⁰ነስየ ይንም ኣነ ይናኣቅልድቅ መውርነ ቸሊነው መውርድየንት ምመናኒዝ ጅውሪል መውስትርነ ውር ቃጥ የጝ እደረት ፊትንትንድርነውድ?

¹¹ይንም ቓድነውድ ጝታጘ ኣደረ እየሱስት ፃገዝ ኣቐጘ ኣምነኵን።»

¹²ኣይንድም ኽዝቭድ ዝም የው በርናቫስመ ባውሎስስታይ እደረ ኣኽዛቫኒዝ ማኽሊል ጝታናኒዝ ፃቨቍ ታምራኒዝመ ዲንቅሰቍ ዊቂይዝቍዝ ዊግትጛንድ ወሻ ዊኑ።

¹³ጛይ ዊግትጝ ኻትጘት ግረ ያይቈቭ ጕ ችብር እንት ዩ፦ «ይፅንወ! ወጭጥን!

¹⁴እደረ ኣኽዛቫኒስ ጝሽዝ ጭጝሸው ኽዝቭ ማርፃንስ ማጥን ኣወሽ በውርስ ገቭሰጘ ስሙን ኣስርድዝኩ።

¹⁵ቈሽም እንት ይሽት ፃፍሸው ነቭያታኒዙ ቃልድ እኒጅቅ ቲስመመኵ፦

¹⁶‹ኣደረ እንት የኵ፦ እንዝ ግረ ዋጥርጭር፤ ፋይተው ዳዊትት ጝንድየንትም ተስጭር፤ ፋይረውድየንትም እንደ ገነ ፃግን ችብስጭር።

¹⁷እንት ሸውድም ላጥ እቅዝመ ይሽዝ ጭጝሸቍ ኣኽዛቫንድቅ እደረት ደምዝጥጘ ማጥን የጝ የኵ እኒንትቅ ፃቨው እደረ።

¹⁸በውግስ ኪርም እደረት ሰቭድቅ ጝቕምስ ኣርቕሽተው የጝ።›

¹⁹«እንዝ ማጥን ያን ይጨ በነውድ እደረ ትጐ ዋጥረቍ ኣኽዛቫንድዛት ቺግርዛይነጘ የጝ።

²⁰ኽሽስ፦ ‹ጣወትዝ ኣርክሽተው ዅረ ዅትርነ፣ ሻርሙጥትርነ፣ ጝብርድ ቅብሪጝቀ ኻንቕሽ ከረው እንሰሰይዙ ስየዝመ ብርዝ ዅትርነ› ይን ጛጭስ ፃፍነ ጥውሸኵ።

²¹እኒንትቅ ኣዘው ወሪትት ኽግድ ኣቕሽ፣ ኽፅምስ ኪርም ቅዳምሲንቭት ጨቨቅ ኣንቭቭሻ፣ ኻትም ጨቨቅም ሲቭክሻ ዊነው የጝ» ዩ።

²²ኣይንድ ኻወርየታኒዝመ ምከን ቃወጢዝ እጝቅ ምመናኒጅቅ ኣቕጝ ጝታማኽሊስ ዊትቍ እቅ ማርፅጝ ባውሎስስመ በርናቫስስታጅቅ ፃቭጝ ኣንፀውክየ እፃጥጘ ቲስመም፤ ምመናኒዝ ማኽሊስም ዋንጥ ዊነቍ በርስያን ይሽተው ይዅዳስመ ሲላስስ ማርፅ።

²³ደብዳቢም ፃፍጝ ጛጭስ እፃቕ፤ ፃፍሸው ደብዳቢድም እንት የው ዊኑ፦ «ይን ክታፅን ኣነቅ ኻወርየታኒስመ ምከን ቃወጢስ እፃሽተው ደብዳቢ፤ ኣንፀውክየ፣ ሰውርየ፣ ኪልቅየም ፅብርነቅ ኣኽዛቫኒዝ ዊግናን ኣቕርነቅ ይናፅንስ ችጝነ፤ ዳኽነ እኵርኑመ!

²⁴ይን ኣዚነቍ ላው ላው እቅ ይናጊስ ክታጐ ተርጝ ኻውክጛ ክታት ግራ ድውስጘጘ ወሽንኵኑን።

²⁵እንዝ ማጥን ዊትቍ እቅ ማርፅን ጝታርዅየሸንት ኣደረ እየሱስ ክርስቶስት ሽዝ ዲቍስጝ ይወቍ ቀንሸቍ ይናፅን ባውሎስስመ በርናቫስስስታጅቅ እፃነ ማጥን ላው እዘንዝ ቲስመምኑን።

²⁷ይን ዊስነውድየንት ጛይም ጝታቃሊዝ ድቍጥጘ ማጥን ይዅዳስመ ሲላስስ እፃቕንኵኑን።

²⁸ጣወትዝ ኣርክሽተው ዅረ ዅትርነ፤ ሻርሙጥትርነ፤ ጝብርድ ቅብሪጝቀ ኻንቕሽ ክረው እንሰሰዙ ስየዝመ ብርዝ ዅትርነ፤ እኒዝለ ላየ ፅጐወው መውር መውሳይነጘ ይናስመ መንፈስ ቅዱስስ ፊቅድንኵኑን፤ እንዛይ ኪልክልሸቊስ እክልድርናን ቀሰው የጝ፤ ዳኽነዝ ኣጥን።»

³⁰እድ እፃሸቍድም ኣንፀውክየ ፊር፤ ኽዝቭድም ኣኽቭጝ ደብዳቢድየንት ይው።

³¹ኽዝቭድም ኣንቭቨት ግረ ደብዳቢስ ችጝሸው ምኽሪዝቍዝ ጭቕጘ ዲስ ዩ።

³²ይዅዳስመ ሲላስስም ነቭያታን ዊንጛንስቅ ምመናንድዛት ንቕፀው ምኽርዝ ማኽርጝ ፀናዝ።

³³ጝግልም ጛጅቅ እክሰቍ ግርቅ ሳብጥጘት ግረ ምመናንድዛት ሲነቭሽጝ ጛት እፃቐቍ ኻወርየታኒዝጐ ዋጥርጝ ፊር።

³⁴ሲላስ ግን ጝግል እዳጠ በኑ።

³⁵ባውሎስስመ በርናቫስስም ላጥ ንቕፀቍ እቅጅቅ ኣቕጝ ክንስጛ ሲቭክጛም ኣንፀውክየ ጐይ።

³⁶ዊትቍ ግርቅዝ ግረ ባውሎስ በርናቫስት፦ «ዋጥርን እንዝ ሚቅ ኣደረት ቃልድ ድቍነቍ ኻትምጢዝቍ ምመናንድዛት ገቭስነ፤ ኣወይጝ ፅብጘጘም ቓልነ» ዩ።

³⁷በርናቫስም ማርቈስ ይሽተው ይዃንስት ላብጠ ጛጅቅ ፊስጠ በኑ።

³⁸ባውሎስ ግን ጝት ፃይን ፊረነው በኒየውም፤ ምላሰንድም ማርቈስ ብንፍልየስ ጛጊስ ቲት እዳቕ ዊናንስቅ ኣግልግለነውልም ጛጅቅ ፊሪጝቀ እዳቓንስቅ የጝ።

³⁹እንት ይጛ ኽየው ክርክርል ጥውጛንስቅ ጛስ ጛይ ቲተቲት፤ ኣቓንስቅም በርናቫስ ማርቈስት ፃይ ሚርክቭዝ ተሳፍርሽ ቈብረውስ ትጐ ፊሩ።

⁴⁰ባውሎስ ግን ሲላስት ማርፁ፤ ባውሎስም ምመናንድዛይ ጝት እደረት ፃገዝ ዲቍስጝ ይውጘት ግረ ጛጊስ ቲት ፊሩ።

⁴¹ምመናንድዛትም በርታዛ ሰውርየስመ ኪልቅየስ ፃቭ ዲቁ።