Read xamtanga ኻወርየታኒዙ ሰቭ 16 Bible Online

ኻወርየታኒዙ ሰቭ 16 - xamtanga bible

ኻወርየታኒዙ ሰቭ 16

¹ባውሎስም ደርቭየንስመ ልስጥራንስታል ችጙ፤ ጝግልም ጢመቲወስ ይሽተው ላው ምመን ዊኑ፤ ጝኘየን ኣይዅዳንወ ክርስቲያን ዊንች፤ ጚርድ ግን ግሪክቱ ኣኽዛቭ እጅር ዊኑ።

²ጢመቲወስም ልስጥራንስመ እቈኒወንስታ ምመናኒዝ ቀሰው ሽ ፃየው ዊኑ።

³ባውሎስም ጢመቲወስት ፃይ ፊርጠ በኑ፤ ኣቓንስቅም ጝግል ዊነቍ ኣይዅዳኒዝቍዝ የው ጝት ጊርዝሱ፤ ምላሰንድም ጢመቲወስ ቲር ግሪክቱ ኣቐጘ እጝቅቅ ኣርቕጘው ዊኑ።

⁴ባውሎስስመ ሲላስስም ጅልውጛ ችጘቍ ኻትምጢልቅ እየሩሳልየም ፅበቍ ኻወርየታኒዝመ ምክን ቃወጢዝ ዊስንጘው ውሳኒድ ለምርጝ ፃብጥጘ ማጥን ድቍጛ ዊን።

⁵ምመናንድም እምንትዝ ጣጝክርጛ ፊር፤ ጝታእግዘድም ግሪ ጨቨቅ ቈሺታ ንቕፃ ፊሩ።

⁶ባውሎስስመ ሲላስስ እደረት ቃልድ እስየስ ዊግታይጘጘ መንፈስ ቅዱስ ኪልክላንስቅ፣ ፍርግየስመ ገላትየስታት ዲቍጝ ፊር።

⁷ሚስየ ትጐም ችጛንድ ቢታንየ ትጐ ጥውጥጘ በን፤ ዊገድ ግን እየሱስት መንፈስድ ጝግል ጥውጥጘ ማጥን ፊቅዲየውም።

⁸ኣቓንስቅም ሚስየቱ ፃቭጝ ጢረዋደ ትጐ ጊም።

⁹ባውሎስም ጝጊስ ኻርዝ ላው መቀደውንየቱ እጅር፦ «ለው መቀደውንየ ትጐ ከትር ይናት ከቭሽ!» ያ ችብር ጨዋንድ ኻረ ኒቪይዝ ቓሉ።

¹⁰ባውሎስ እኒን እትለድ ቓለት ግረ በውዝ መቀደውንየ ትጐ ፊርነ በኑን፤ ምላሰንድም መቀደውንያኒዝ ወንጌል ሲቭክነ ማጥን እደረ ጭጘጘ ኣርቕናንስቅ የጝ።

¹¹ጢረዋደስም ሚርክቭዝ ተሳፍርሽን ቀጥተ ሳሙትራቅየ ትጐ ፊርኑን፤ ጛምርሲዝም ናቡሊ ትጐ ፊርኑን።

¹²ጝጊስም ጕን ፍልብስዩስ ችጝኑን፤ ፍልብስዩስ መቀደውንየስ ችጝሽረይ ረውምየት ቅምት ዊንደይ ኽይረይ ኻትመ ጚ፤ እኝቸን ኻትመየትልም ጐይን ዊትቍ ግርቅ ዲቍስኑን።

¹³ቅዳምሲንቭትዝም ፀለውት ችጝዘነው ስፍረ ብናንስቅ ኻትመይስ ፍን ደምዝና ላው ዊርቨል ጊምኑን፤ ኣይንድም ጝግል ጐይን ጝግል ኣኽቭሽጝ ዊነቍ እቍኒዝ ዊግትነ ኪርምኑን።

¹⁴ጛይ እቍኒዝ ማኽሊስ ትያጥረውን ኻትመይዝወ ሰረው ኻር ኣልቨ ኒግትረይ፦ «ሊድየ» ይሽትረይ ላይ እውነ ዊንች፤ እኝቸን እውነየን እደረት ኣምልክረይ እጅር ዊንች፤ ኣደረም ጝርእዘንድ ብዛንስቅ ባውሎስ ዊግተው ዊገድ ወሽራ ዊንች።

¹⁵ጚይም ጝር በተሰቪጅቅ ጣምቅሽረት ግረ፦ «ኣደረት ኣምነጘ ደደደድስርነውዝየ ላቝጥን ይጝን ጥውርን ጐይጥን» ይር ኪው ሽር ጨውች።

¹⁶ላው ግርየ ፀለውት ችጝዘነ ስፍረል ፊርና ሲጝቀ ጣቍለነውዝ ትንቪት ዊግሰው ጋኒን ጨይ ላይ ኣገልጋይ ተትር ጒደነይስ ዲምቅሽች፤ እኝቸን ኣገልጋይ እፈረየን ጣቍልዳ ጝርኣደርጢዝ ትርፍ ችጝስራ ዊንች።

¹⁷ባውሎስስመ ይናስም ቲክንዳ፦ «እንዛይ እቅድ ኣወይን ቓደናንስ ድቈቍ ልውል እደረት ኣገልጋያን ጛይ!» ይራ ቓፅራ ዊንች።

¹⁸ንቕፀቍ ግርቅም እንት ይራ ደግምግምች፤ ባውሎስም ጭቕጘ ኻውክሻንስቅ ጝርጐ ዋጥር የው መንፈስድየንት፦ «ኣደረ እየሱስት ሽዝ ጝርጊስ ፍተ ማጥን ኣዘኵን» ዩ፤ ኣይንድም መንፈስድ ጝርጊስ ሊቅ ፉ።

¹⁹ጝርኣደርጥድም ጊንዝቭ ችጛ ዊንጘው ጝታቲስፈድ ሊቅ ፊረጘ ቓልጛንድ ባውሎስስመ ሲላስስ ፃይጝ ጒዝጛ ደጝጥድ ችጝሸጘው ኣርየ ስፍረይል ፊስ።

²⁰ደጝጢዝ በዊልም ኣልስጝ እንት ይ፦ «እንዛይ እቅድ ኣይዅዳን ኣቕጝ ፅብጛ ይናኻትመድየንት ኻውክጘኵ።

²¹ይን ረውምየት እቅ ለምርነም ኣነ ፃቭነቅ ጥውሻው ልምድ ክንስጘኵ።» ይ።

²²ኽዝቭድም ጛጅቅ ላው ኣቕ ባውሎስስመ ሲላስስታል ጉ፤ ደጝጥድም ጝታኣልብድ ጊፍጝ፦ «ፈርጥን ግብዝ ድድብጥን» ይጝ ኣዝ።

²³ባውሎስስመ ሲላስስም ጭቕጘ ድድብሽጘት ግረ ወኽኒ ጝኒል ድው፤ ወኽኒ ጝንድ ኻየው ዊተድረድየንትም፦ «ጣጝቅቅሽር ሊምጭ» ይጝ ኣዝ።

²⁴ዊተድረድም እኒን ትዛዝድ ለምረት ግረ ወኽኒ ጝኒዝ ኣቒቱ ክፍሊል ድው ጝታልኵጣንድዛት ግንድዝመ ግንድዝ ማኽሊል ጣብቅ እፅቁ።

²⁵ኻረ ግቨር ኣቓንድም ባውሎስስመ ሲላስስ ፃልይጛ ዚምርጛ እደረት ሚዝየንዝጛ ዊን፤ ላጥ እፁሸቍ እቅም ጛት ወሽጛ ዊን።

²⁶ኣይንድም ድግጝግት ወኽኒ ጝኒዙ ሚስርትድ ናውፅሽትጢስቅ ዝቨድ ጭቕጘ ቀጥቀጥ ዩ፤ ወኽኒ ጝኒዝቍ ቢልድም በውዝ ሊንስ ቢት፤ እጝቅቅ እፁሽጝ ዊንጘው ሰንሰለትድም ጝቕም እኪሩ።

²⁷ወኽኒ ጝንድ ኻየው ዊተድረድም ጝዝመዊስ ነቃቕ ወኽኒ ጝኒዝቍ ቢልድ ቢትጘጘ ቓላንድ እፁሸቍድ ኣምልጥጘው ተኩዝ ጝቕምት ቍውጠ ከምር ዊነው ጝሰይፍድየንት ጭውዙ።

²⁸ባውሎስ ግን ጝድመድየንት ኣጕስ ሸው፦ «እፈ ይን እጝቅቅ እንል እኵኑና! ክቕምትል ሚንትርነ ቘጨ ችጝዝረራ!» ዩ።

²⁹ኣይንድም ዊተድረድ መቭራት ነስስ በጕር ኣቒ ጥዉ፤ ቈጥቈጥ ያም ባውሎስስመ ሲላስስታ ልኲጣኒል ጝግምባሪዝ ሊቩ።

³⁰ጛትም ቢዘ ፊስ፦ «ያኣደርጥ ክታችወ! ቓድጨ ማጥን ወረጘ ፃቭጨ ጥውሸኵ?» ዩ።

³¹ጛይም፦ «ኣደረ እየሱስት ኣምን፤ ክትም ክበተሰቭድም ቓድትርንቅ» ይ።

³²ኣደረት ቃልድየንትም ጝጭስመ ጝጝኒል ዊነቊዝቅ ድቍ።

³³እን ወኽኒ ጝን ኻየው ዊተድረድም ጘጝ ኻሪዝ ፊስ ጝታልኻንድ እቓሱ፤ ኣይንድም በውዝ ጝስመ ጝበተሰቪዝ እጝቅቅ ጣምቅሽ።

³⁴እንዝ ግረ ባውሎስስመ ሲላስስ ጝጝን ፊስ መድ ኣልሱ፤ ጘጝም ጝበተሰቪጅቅ እደረት ኣምናንስቅ ዲስተዝ ክሩ።

³⁵ቅሻንድም ደጝጥድዛይ፦ «እዛይ እቅድዛት እክስር በርሽ» ይጝ ቡሊሳን እፃቕ።

³⁶ወኽኒ ጝንድ ኻየው ዊተድረድም፦ «ደጝጥድዛይ እኪትርን ፊርትርነ ማጥን ኣዝጝኵ፤ ነስየ ዲግተዝ ፊጥን» የው ባውሎስስ ድቁ።

³⁷ባውሎስ ግን፦ «ይን ረውምየት ዘይግጥ ኣቕን ፅብና ፍርድ እጀው ኽዝቭዝ ማኽሊል ድድብጝ ወኽኒ ጝንል ማል፤ ነን ቈሽ ስውርዝመ ፊስጝ በርስጥጘ በንጛ? ኣቓውም! ጝታቕም ተርጝ ፊስጝነ!» ዩ።

³⁸ቡሊሳንድም እኒንት ዊስጝ ደጝጢዝ ድቍ፤ ደጝጥድም ባውሎስስመ ሲላስስ ረውምየት ዘይግጥ ኣጘጘ ኣርቕጛንድ ዳጝግፅ።

³⁹ኣቓንስቅም ጝታቕም ተርጝ ይቅርተ ዋቕርጝ በርጝ ወኽኒ ጝኒስ ፊስ፤ ኻትመይስም ሊቅጝ ፊርጥጘ ማጥን ጨው።

⁴⁰ባውሎስስመ ሲላስስም ወኽኒ ጝኒስ ፍጝ ልድየት ጝን ፊር፤ ጝጊስም ምመናንድዛት ችጝጝ በርታዝጝ በርጝ ኻትመድየንት ሊቅጝ ፊር።