Read xamtanga ኻወርየታኒዙ ሰቭ 17 Bible Online

ኻወርየታኒዙ ሰቭ 17 - xamtanga bible

ኻወርየታኒዙ ሰቭ 17

¹ባውሎስስመ ሲላስም ኣንፊቡሊስስመ ኣብሉንየቱ ፃቭጝ ዲቍጝ ተሰለቅየ ትጐ ፊር፤ ጝግልም ኣይዅዳነ ምኵራቭ ዊኑ።

²ባውሎስም ጝክንደጘ ምኵራቪል ጥዉ፤ ሻቘ ቅዳምሲንቭታንም ቅዱሳን መፃፋንድ ጣቅሳ ኣይዅዳኒዝ ዊግቱ።

³ክርስቶስ ሚከረ ለምርጠጘ፣ ክርጘይስም ጕጠጘ ቲርጕማ፦ «እኒን ነን ያን ክታጭስ ሲቭከው እየሱስድ ጘጝ ክርስቶስ የጝ» ያ ኣስርድዛ ዊኑ።

⁴ላው ላው ኣይዅዳንም ወሽጘው ቃልድ ለምርጝ ባውሎስስመ ሲላስስታጅቅ ተቫቭርሽ፣ ቈሽም ንቕፀቍ እደረት ኣምልከቍ ግሪካን እቅዝመ ጘጝ ኻትመይዝቍ ኪብረቍ እክሰቍ እቍንዝ ተረድሽጝ ባውሎስታጅቅ ተቫቭርሽጝ።

⁵ኣይዅዳንድ ግን ቀንይጝ ሰቭ እጀቍ ቀመኝጥድዛት ኣኽቭጝ፣ ኻትመይል ኽምዘ ጕይስ፣ ባውሎስስመ ሲላስስታትም ፊስጝ ኽዝቭ ማኽሊል ችብስጥጘ በንጝ ባውሎስታይ ዊንጘው እያሱንት ጝንድየንት ኪብ።

⁶ዊገድ ግን ጛት ብጛንድ እያሱንስመ ላው ላው ምመናኒዝዛት ፃይጝ ኻትመይዝቍ ደጝጢል ችብስጥጘ ጒዝጛ ፊስጝ፦ «እንዛይ ኣልምድየንትቅ ኻምዘቍ እቅድዛይ ነን ቈሽ እንል ተርጝኵ።

⁷እያሱንም ጛት ጝጝኒል ለምርኩ፦ ‹እየሱስ የነው ላየ ንጕስ እኩ› ይጛ ቂሳርት ትዛዝድ ተቃውምሽጘኵ» ይጛ ቓፅ።

⁸ኽዝቪዝመ ኻትመይዝ ሽማንድም እኒንት ወሽጛንድ ሺብርሽ።

⁹እግረም እያሱንስመ ላጥድዛት ወዝ ጭጝስጝ በርስ።

¹⁰ኣይንድም በውዝ ምመናን ባውሎስስመ ሲላስስ ኻርዝ በርየ ትጐ በርስ፤ ጛይም ጝግል ችጛንድ ኣይዅዳነ ምኵራቪል ጥው።

¹¹በርየ ፅበቍ ኣይዅዳንድ ተሰለቅየ ፅበቍ ኣይዅዳኒስቅ ቀሰቍ ኣስክሰቍ ዊን፤ ኣቓንስቅም፦ «እን ዊገድ እነየውመ ኣጢ» ይጛ ግሪ ጨቨቅ መፃፋንድ ሚርምርጛ ባውሎስታይ ክንስጘው ቃልድየንት ኽየው ዲስተዝ ለምር።

¹²እንዝ ማጥን ጛጊስ ንቕፀቍድ ኣምን፤ ቈሽም ንቕፀቍ ኪብረቍ ግሪካን እቍንዝመ ግልቍዝም ኣምን።

¹³ተሰለቅየት ኣይዅዳንድ ግን ባውሎስ በርየስ ቈሽ እደረት ቃልድየንት ክንሰጘ ኣርቕጛንድ፣ ጝግል ተርጝ ኽዝቭድ ቂስቅስጝ ኽምዘ ጕይስ።

¹⁴ኣይንድም ምመናንድዛይ ባውሎስት ቃዝየዝ ባኽሪዙ ደርቸይዝጐ በርስ፤ ሲላስስመ ጢመቲወስስ ግን ጝግል እዳቕ።

¹⁵ባውሎስት ስቭዘቍ እቅድም ኣቲነ ኣሽ ችጝዝ፤ ጝዝ ግረም፦ «ሲላስስመ ጢመቲወስስ ቃዝየዝ ይጐ ተርጝነ» የው ባውሎስት ትዛዝድየንት ለምርጝ በርየ ትጐ ዋጥር።

¹⁶ባውሎስም ኣቲነ ኣቕ ሲላስስመ ጢመቲወስስ ሊሚዳ ኻትመድ ጣወትዝ እቻቐጘ ቓል፣ ጝመንፈሲዝ ኽፅፅ ዩ።

¹⁷ኣቓንስቅም ምኵራቪል ፊራ፣ ኣይዅዳኒዝመ እደረት ጐውተቍ ግሪካኒጅቅ፣ ኣርየይልም ፊራ ችጘቍ እቂጅቅቅ እልት እልት ተከራክርሻ ዊኑ።

¹⁸«እፊቈረሳን፣ እስጠዊካን» የነቍ ፈላስማነ ዊግኒስም ላው ላውድ ተርጛ ባውሎስ ጅቅ ተከራክርሽጛ ዊን፤ ጛጊስም ግቨርድ እን፦ «ለፍላፊድ ውር ይጠ በነኵፈ!» ይ፤ ገቨርድ ቈሽ፦ «ላጥ ኣርቒነቍ ኣብን ኣምላካንዝቍዝ ዊግተኵ ተከኵ» ይ፤ እንት ይጘውድም ባውሎስ እየሱስስመ ጝክርጘይስ ጐነይዝቍዝ ኣቭዝርተ ኣቐው ወንጌልድየንት ሲቭካንድ ወሽጛንስቅ የጝ።

¹⁹እንዝ ማጥን ባውሎስት፦ «ኣርየስፋጐስ» የነው ኣኸቨ ኣኽቭሸነው ኣርወይል ፊስጝ፦ «እኒን ክት ክንስረው ኣይር ክንድጝድየንት ወረጘ ኣቐጘ ይን ኣርቕናን ቀንትርመ?

²⁰ላው ላው ይን ኣርቒነቍ ኣብን ዊቅ ዊግትራንድ ወሽንኵኑን፤ እደስለስ እን ኣብን ዊቂዝ ጝታወረጝትድ ቈሽን ወሽነ በነኵን» ይ።

²¹እንት ይጘውድም ኣቲነት እቂዝመ ላየ ኻግሪስ ተርጝ ጝግል ፅበቍ እቂዝ ኣይር ዊገ ዊግተነውዝመ ወሸነውዝ ጭቝ ኣቕሽጚ ላየ ውላዝ ግርያቍ ዊንጛንስቅ የጝ።

²²ባውሎስም፦ «ኣርየስፋጐስ» የነው ስፍረይል ኣኽቭሸው ኣኸቨይል ችብር፦ «ኣቲነት እቅ ክታትርነ! እጝቅ ዊገይዝቅ ጣወታን ኣምልከነው ቀንድርነቅ ኣቕርነጘ ቓለኵን።

²³ምላሰንድም ኣምልክርነው ስፍረይልቅ ዋጥርጥራ ቓላንድ፦ ‹ኣርቕሽታው ኣምላክዝ› ይሽት ፃፍሸው መሰውየ ችጙን፤ ነስየ ያን ድቍጨ በነውድ እኒን ክትን ኣርቒጝቀ ኣምልክርነው ኣምላክድየንት የጝ።

²⁴ኣልሚዝመ ኣልሚል ፅበው ፍጥርትድቅ ፋጥረው ኣምላክ ጘጝ ሲመይስመ ዝቨዝ ኣደረ የጝ፤ ኣቓንስቅም እቀ ናንዝ ተስኑ መቅደስል ጐያውም።

²⁵ጘጝ እቅዝቅ ርዅየዝመ ፈውጥዝ ላየ ላየድቅም የወው ኣቓንስቅ ጝጭስ ጒድለው ሚንትርነም እጀው፤ እቀ ከቨም በናውም።

²⁶እቀ ዚረድቅ ላው እጅሪስ ፋጥር ዝቨይልቅ ጐይጥጘ ፃቩ፤ ጝታዚምኒዝመ ጝታጐይተይዝ ደርቸድም ዊስኑ።

²⁷እኒንትም ፃቨውድ ምናልቫች እደረት ደምዝጛ ተመራምርሽጛም ችጘቍ ኣጝሽ የው የጝ፤ ኣቕሽም ጘጝ ይናጊስ እክልድ ፅበኵ የነትም ኣየው።

²⁸ምላሰንድም ክታዊግን ቅንየ ጒጢስ ላው ላውድ፦ ‹ይን እጝቅቅ ጝዚረ የጝ› ይጝ ዊግትጘጘ ይን ርዅየ ችጝነውድም፣ ፍሉሉውነውድም፣ ፅብነድውም ጝቍዝ የጝ።

²⁹ነስየ ይን ጝዚረ ኣነውዝየ፦ ‹እደረ እቀ ብልኽትዝመ ጥቨቭዝ ዊርቀይስ፣ ዊንም ቍርሸይስ ዊንም ቕርጘይስ ተሲተው ቅርፅ ተከኵ› ይን ኻስቭነ ጥውሻውም።

³⁰እደረ እንዝ ሚቅ ኣርቒጝቀ ሰራሽተውድየንትቅ ኣቕልዝ ዲቍስ ነን ግን እጝቅቅ ንስኻ ጥውጥጘ ኣዝኩ።

³¹ጘጝ ጝቕም ማርፀው እጅሪዝ ፃቭም ኣልሚልቅ እማንዝ ፊርድጠ ግርየ ቃፅርኩ፤ እኒንትም እድ ማርፀው እጅርድየንት ክርጘይስ ጒሰነውዝ ኣርቕስኩ።»

³²ጛይም፦ «ክርጘይስ ጐነ» የው ቃልድ ወሽጛንድ እቘርጛ ቂልድ፤ ላጥድ ቈሽ፦ «እን ዊገድ እንደ ገነ ላየ ግርየዝ ወሽነ በነኵን» ይ።

³³እንዝ ገረ ባውሎስ ጝታማኽሊስ ፍ ፊሩ።

³⁴ላው ላው እቅ ግን ባውሎስ ዊግተውድየንት ኣምንጛንስቅ ቲስመምጝ ቲክን፤ እን ኣምነቍ እቂስ ማኽሊልም ዲወናሲወስ ይሽተው ኣርየስፋጐስት ፍርድ ጝኒዙ ኣቫልዝመ ደማሪስ የነይ እውነስ፣ ላጥ እቅም ዊን።