Read xamtanga ኻወርየታኒዙ ሰቭ 18 Bible Online

ኻወርየታኒዙ ሰቭ 18 - xamtanga bible

ኻወርየታኒዙ ሰቭ 18

¹እንዝ ግረ ባውሎስ ኣቲነስ ጕ ቈረንተውስ ትጐ ፊሩ።

²ጝጊስም ኣቂለ የነው ባንጡስቱ ኣይዅዳነው ጅር ችጙ፤ ጘጝም ኣይዅዳንድቅ ረውምየት ሊቅጥጘ ማጥን ቂሳር ቀላውዲወስ ኣዝ ዊናንስቅ ጝውነ ብርስቅለ ጅቅ ጣቅ ግርቅዝ ጣልየንስ ተረው እጅር ዊኑ፤ ባውሎስም ጝታጐ ፊር ዲምቅሹ።

³ጝሰቭድም ጝታጘ ድኳን ሳቐነው ዊናንስቅ ጛጅቅ ጐይ ላው ኣቕጝ ሰራሽጛ ዊን።

⁴ቅዳምሲንቭት ጨቨቅም ምኵራቪል ጥዋ ኣይዅዳኒዝመ ግሪካኒዝ ኣስርድዛ ዊግታ ዊኑ።

⁵ሲላስስመ ጢመቲወስስ መቀደውንየስ ተርጛንድም ባውሎስ እደረት ቃልድ ክንሰነውዝ ቲግያ፦ «እየሱስ ጘጝ ክርስቶስ የጝ» ያ ኣይዅዳኒዝ ሚዝርዳ ዊኑ።

⁶ዊገድ ግን ኣይዅዳንድ ተቃውምሽጝ ዛሽጛ እምቢ ይጛንድ ጝኣልቨይዙ ኣወረድየንት ኣርግፍ፦ «ነስየ እደረ ፊርዲሽ ክታቕምስ ወሱ! ያን ክታብሪስ ንፅዅ የጝ! ነስየ ኣኽዛቫኒዝጐ ፊጭር» ዩ።

⁷ጝጊስም ፍ ቲተውስ እየስጡስ ይሽተው እደረት ኣምልከው እጅርዝ ጝንል ፊሩ፤ ጘጝ እጅሪዝ ጝንድ ምኵራቭዝ ጋቢል ዊኑ።

⁸ቀርስበስ ይሽተው ምኵራቪዝ ኻልቀ እጅርድም ጝበተሰቪጅቅ ኣደረት ኣምኑ፤ ንቕፀቍ ቈረንተውስት እቅም ባውሎስ ዊግታንድ ወሽጝ ኣምንጝ ጣምቅሽ።

⁹ኣደረም ባውሎስት ኻር እትለዝ ጋልፅሽት እንት ዩ፦ «ኣይዝዀች ጐውተ! ዊግጭ ዝም ይተ።

¹⁰ያን ክጅቅ እኩን፤ ኣውማውም ክግል ጕ ቘጨ ችጝዝጠ ቸለው እጅር እጀውም፤ እኝቸን ኻትመየንትል ንቕፀቍ እቅ ፃቀር የጝ» ዩ።

¹¹እንዝ ማጥን ባውሎስ እደረት ቃልድ ክንሳ ጛጅቅ ላው ኣምረዝመ ግቨርዝ ጝግል ጐዩ።

¹²ጋሊወስ ኣካይየስ ኻግር ቅመተ ኣቕ ይምሻንድ፣ ኣይዅዳንድ ላብጠ ተቫቭርሽጝ ባውሎስትል ጕ፤ ጝትም ፍርድ ሸጐዊል ፊስጝ ችብስጝ፦

¹³«እን እጅርድ ኽግድ ፊቅዳው ጒደነዝ እቅ እደረት እምልክጥጘ ማጥን ቀሰኵ» ይ።

¹⁴ባውሎስም ዊግትጠ ኣስልሽ ፅባ ጋሊወስ ኣይዅዳኒዝ እንት ዩ፦ «እፈ ኣይዅዳን ክታትርነ! ኣልስርነው ክስድ ኣመፅ ዊንም ኽየው ወኝጀል ኣቓን ወጨ ዊኑን።

¹⁵ዊገድ ግን ክታክርክርድ ቃላንዝመ ሽንዝ ቈሽም ክታኽግዝ ማጥን ኣቐውዝየ ክታቕም ኣርቕጥን፤ ያን እነየው ዊገል ጥውን ፊርደነው በነቅም» ዩ።

¹⁶እንት የውም ጛት ፍርድ ሸጐዊስ ፊሱ።

¹⁷ኣይንድም እጝቅቅ ምኵራቪዝ ኻልቀ ሰስተንስት ፃይጝ ሸጐዊዝ በዊል ድድብ፤ እንቅ ኣቓንድ ጋሊወስ ግድም እጀው ዊኑ።

¹⁸ባውሎስም ጝፅኒጅቅ ኣቕ ንቕፀቍ ግርቅ ቈረንተውስ ሳብጠት ግረ ጛት ሲነቭሽ ሚርክቭዝ ተሳፍርሽ ሰውርየ ትጐ ፊሩ፤ ኣቂለስመ ብርስቅለስም ጝጅቅ ፊር፤ ቈሽም ስለት ሲልሽ ዊናንስቅ ፊረነዊስ በውገ ክንክራወስ የነው ስፍረል ኣቕ ጝኣውርድ ላይቱ።

¹⁹እፊሰውን ችጛንድም ኣቂለስመ ብርስቅለስ ጝግል በሩ፤ ጘጝ ግን ምኵራቪል ጥው ኣኹደኒዝ ዊግታ ዊኑ።

²⁰ጛይም እክሰው ግርየ ጛጅቅ ሳብጠ ማጥን ጨውጝ ዊን፤ ጘጝ ግን ኣነም ዪየው።

²¹ዊገድ ግን ጛት ሲነብሻንድ፦ «እደረት ፍቃድ ኣቕሽ ክታጐ ዋጥር ተጭር» ዩ፤ ጝዝለም ሚርክቭዝ ተሳፍርሽ እፊሰውንስ ፊሩ።

²²ቂሳርየ ችጛንድም እየሩሳልየም ትጐ ክብዩ፤ ጝጊዝቍ ምመናንድዛትም ዲምቅሽ በር ኣንፀውክየ ጊሙ።

²³ኣንፀውክየም ዊትቍ ግርቅ ሳብጥ በር ጝጊስ ጕ ገላትየታዝ፣ ፍርግየታዝ፣ ፃቭ ኻግርዝ ኻግር ጅሉልዋ ምመናንድዛት በርታዙ።

²⁴ኣይንድ እስክንድርየስ እዅርሸው ኣብሉስ የነው ላው ኣይዅዳነው እጅር እፊሰውን ተሩ፤ ጘጝም ቅዱሳን መፃፋንድ ጣጝቅቅ ክንደው፣ ቈሽም ዊገ ኣርቐው እጅር ዊኑ።

²⁵እን እጅርድ ኣደረት ጒደነድ ክንደው ዊኑ፤ መንፈስዝ ቃጥልሻ ኣደረ እየሱስት ማጥን ትክክልዝ ክንሳ ዊኑ፤ ኣነጚ ጘጝ ኣርቐውድ ይዃንስት ጥምቅትድየንት ጭቝ ዊኑ።

²⁶ምኵራቪስም ዲፍር ዊግጥጠ ኪርሙ፤ ብርስቅለስመ ኣቂለስም ጝት ወሽጛንድ ጝታጝን ፊስጝ እደረት ጒደነድ በውገይስ ሽ ግልፅዝ ድቍ።

²⁷ኣብሉስም ኣካይየ ፊርጠ በናንድ ምመናንድዛይ ጝኻሰቭድ ዲግፍ፤ ኣካይየት ምመናንድም ጝት ለምርጥጘ ማጥን ደብዳቢ ፃፍጝ ጝጭስ ይው፤ ኣካይየ ችጛንድም ኣደረት ፃገዝቍዝ ኣምንጝ ዊነቍድዛት ቐናዝ ከቭሱ።

²⁸እየሱስ ጘጝ ክርስቶስ ኣቐጘ ቅዱሳን መፃፋንድዛት ጋልፃ ኣይዅዳንድዛት እቀ በዊል ፃቭ ተከራክርሻ ለጣቓ ዊኑ።