Read xamtanga ኻወርየታኒዙ ሰቭ 19 Bible Online

ኻወርየታኒዙ ሰቭ 19 - xamtanga bible

ኻወርየታኒዙ ሰቭ 19

¹ኣብሉስ ቈረንተውስ ዊነው ግርየይዝ ባውሎስ ንየቱ ኻግሪዝ ፃቭ እፊሰውን ተሩ፤ ጝጊስም ላው ላው ምመናን ችጝ፣

²«ኣምንድርናንድ መንፈስ ቅዱስት ለምትርኑመ?» የው ዋቕሩ፤ ጛይም፦ «ለምሪነቅም፤ እንድያውም መንፈስ ቅዱስ ፅበጘ እኳ ወሺነቅም» ይ።

³ባውሎስም፦ «እደስለ ኣወየው ጥምቅትዝ ጣምቅሽርኑ?» ዩ፤ ጛይም፦ «ይዃንስት ጥምቅትዛ» ይ።

⁴ባውሎስም፦ «ይዃንስት ጥምቅትድሰ ንስኻ ጥወነውዙ ጥምቅት ኣቈ ዊነውድ፤ ጝቕም ይዃንስም እቅ ጝዝ ግረ ተረው እየሱስት ኣምንጥጘ ማጥን ዊግትኩ» ዩ።

⁵ጛይም እኒንት ወሽጛንድ ኣደረ እየሱስት ሽዝ ጣምቅሽ።

⁶ባውሎስም ጝናንጣንድ ጝታዲጊል እቝራንድ መንፈስ ቅዱስ ጛግል ጊሙ፤ ላጥ ቋቍጥዝም ዊግት፤ ትንቪትም ዊግት።

⁷እቅድም እጝቅቅ ፅጭ ሊጘ ኣጥጘ ዊን።

⁸ባውሎስም ምኵራቪል ጥዋ እደረት ምጝግስትዝ ማጥን ተከራክርሻ፣ ኣምንሳም ሻቘ ርፍ ምሉ ውርቅ ጐውቲጝቀ በውዝ በው ዊግታ ዊኑ።

⁹ላው ላውድ ግን ኽልክኝጥ ኣቕጝ ኣደረት ጒደነድ እቀ በዊል ሽክስጛ እምቢ ይጛንድ ጛጊስ እክልዱ፤ ምመናንድዛትም ጛጊስ ቲዝ ጢረውነ የነው ክንድጝ ጝኒዝ ኣደራሺል ፃቭ ግሪ ጨቨቅ ክንሳ ዊኑ።

¹⁰ባውሎስም ሊጘ ምት ኣጢስ እንት ሸው ክንሳ ዊኑ፤ ኣቓንስቅም እስየት ኣውራጀይዝቍ ኣይዅዳኒዝመ ግሪካን እቂዝቅ ኣደረት ቃልድየንት ወሽ።

¹¹እደረም ባውሎስት ናኒዝ ጭቕጘ ዲንቅሰቍ ታምራን ፃቫ ዊኑ።

¹²እንዝ ማጥን ባውሎስት ሰውነትድ ዳቐው ፃርቀድ፣ ዊንም ምኻረምድ ፊስጝ ፅውዝ ጅንጥድዛት ዳቕስጛንድ ጝታፅውዘድ ሊቃ ዊኑ፤ ርኵሳን መንፈሳንድም ፍጛ ዊን።

¹³ጅልውጛ እቂስ ጋኒናን ፊስጛ ዊነቍ ላው ላው ኣይዅዳንም፦ «ባውሎስ ሲቭከው እየሱስት ሽዝ ፍርናንስ ኣዝነኵን» ይጛ ጋኒናኒዝ ፃይሸቍ እቂል ኣደረ እየሱስት ሽድ ጭጝጥጘ ሚኵር።

¹⁴ኣይዅዳኒዝ ካኽነጣነ ኻልቀ ኣቐው ኣስቂወት ላጝጠ ግልቍ ዅልድም እንት ሽጛ ዊን።

¹⁵ርኵስ መንፈስድየን ግን፦ «እየሱስት ኣርቐኵን፤ ባውሎስትም ኣርቐኵን፤ እረ ክትን ኣውታይ ጛያ?» ዩ።

¹⁶ርኵስ መንፈሲዝ ፃይሸው እጅርድየንም ጛት በጕር ኻንቑ፤ ጭቕጘም በርታቑ፤ ጛይም ኻቐነ ብጛንስቅ፣ ልኻንዝ ልኻን ኣቕጝ ጘጝ ጝኒስ መጥማጥ ሰይጝ ፊር።

¹⁷እን ዊገድም እፊሰውን ፅበቍ ኣይዅዳኒዝመ ግሪካንዝቅ ወይሽታንስቅ እጝቅቅ ጐውት፤ ኣደረ እየሱስት ሽድም ጭቕጘ ኪብሩ።

¹⁸ኣምንጝ ዊነቊስም ንቕፀቍ እቅ ተርጛ ጝታጭቓ ሰቭድ ነዚትጛ ግልፅዝ ዊግት።

¹⁹ንቕፀቍ ኣስማትኝጥም ጝታኣስማታነ መፃፋንድዛት ኣኽቭጝ ኽዝቪዝቅ በዊል ልየዝ ቃጥል፤ እን ቃጥልሸቍ መፃፋኒዝ ወየድም ቲምንሻንድ ኣኵርጝን ሽኽ ቍርሻን ኣቑ።

²⁰እነየውዝም ኣደረት ቃልድ ፈራቓ፣ ኻቓም ፊሩ።

²¹እንቅ ኣቐት ግረ፣ ባውሎስ መቀደውንየስመ ኣካይየስ ፃቭ ዲቍ እየሩሳልየም ፊርጠ ጝመንፈሲዝ ኻስቭ፦ «ጝግል ችጝ በጥ ረውምየት ቈሽ ቓልጨ» ዩ።

²²እንዝ ማጥን ጝት ኣግልግለቍ እቂስ ሊጘድ ጢመቲወስስመ እርስጠንስ መቀደውንየ እፃቕ ጘጝ ጝቕም እስየ ዊትቍ ግርቅ ሳብጡ።

²³ኣይንድም ክርስትነ ኻይማነውትዝቍዝ ኽየው ኽምዘ ጉ።

²⁴ላው ድሚጥረውስ ይሽተው ኣንጥርኘ እጅር ኣርጠምስቱ መቅደስ ጝኒዙ ምስልድየንት ብረትዝ ተሳ ኣንጥርኝጢዝ ንቕፀቍ ትርፍ ችጝሳ ዊኑ።

²⁵እን እጅርድ እንዛይ ኣንጥርኝጢዝመ እን ሰቪዝ ውላቐቍ ላጥ እቅድዛትም ኣኽቭ እንት ዩ፦ «እፈ እቅ ክታትርነ! ይን ኻቭት ችጝነውድ እን ሰቪዝ ኣቐጘ ክታቕም ኣርቕርነኵ።

²⁶እን ባውሎስድ ቈሽ፦ ‹እቀ ናንዝ ተሲተቍ ቅርፃንድ ኣምላካንም ኣየቍ› ያ እፊሰውንት ጭቝ ኣዪጝቀ ምሉ እስየት ኣውራጀይዙ ኽዝቪስ ኽይጠድቅ ኣምንሳ ቀሰጘ ይኸው ቓልድርነዊዝመ ወሽርነዊዝ የጝ።

²⁷እንዝ ኣይንትዝ ይናሰቪዝ ነቅሸነውድ ጭቝ ኣዪጝቀ እስየስመ ኣልሚዝ ኽዝቭድቅ እጝቅ ኣምልክጘይ ኽይረይ ኣምላክ ኣርጠምስት መቅደስ ጝንድ ወየ እጀው እዳጠ የጝ፤ ቈሽም ጭቕጘ ጊነው ጝርክቭሪስም ተዋርድሽች የነት የጝ።»

²⁸እቅድም እኒንት ወሽጛንድ ጭቕጘ ቈጣሽጝ፦ «እፊሰውንትወ ኣርጠሚስ ኽይረይ ጚ» ይጛ ቓፀነው ኪርም።

²⁹ኻትመድም ኽምዘዝ ዲቭልቅልቅሹ፤ ኽዝቭድም ኣቨረዝ ላው ኣቕ ጝእዅርሽንድ መቀደውንየቱ ኣቐው ጋይወስስመ ኣርስጥረኰስ ይሽተቍ ሊጘ ባውሎስት ፃምጥድዛት ጒዝጛ ኽዝቭ ኣኽቭሽ ዋርደ ቓለነ ስፍረይል ፊስ።

³⁰ባውሎስም ኽዝቪዝጐ ፊር ጥውጠ በኑ፤ ምመናንድ ግን ፊራየጘ ኪልክል።

³¹እስየት ደጝጢስም ጝት ቀነቍ ላው ላውድዛይ፦ «ኣለቀይ ዋርደ ቓሊሰነ ስፍረይል ጥውር እትልደር!» ይጝ ባውሎስ ትጐ እፃ በርስ።

³²ኣኸቨድም ጭቕጘ ኻሚታንስቅ እክሰው ኽዝቭድ ውር ማጥን ኣኽቭሸጘ እኳን ኣርቒየውም ዊኑ፤ ኣቓንስቅም ላውድ ላው ዊግታንድ እድየን ቈሽ ላየ ዊግታ ጝስመ ጝስ ኣልቅሻ ቓፃ ዊኑ።

³³ኣይዅዳንድም እስክንድረውስት ኽዝቪዝ ማኽሊስ ትክቭጝ በዊዝጐ ፊስ፤ ኽዝቪዝ ማኽሊስም ላው ላውድ ቐናዝ ተከራክርሽጠ ማጥን ማኽር፤ ጘጝም ተከራክርሽጠ በን ኽዝቭድ ዝም ይጠ ማጥን ጝናኒዝ ሚርዩ።

³⁴ዊገድ ግን እስክንድረውስ ኣይዅዳነው ኣቐጘ ኽዝቭድቅ ኣርቓንድ፦ «እፊሰውንትወ ኣርጠሚስ ኽይረይ ጚ» ያ እጝቅቅ ላው ኣቕ ሊጘ ሰት ኣጠ ቓፁ።

³⁵ኻትሸነይዝም ኻትመይዙ ዋነ ፃፈተድ ኽዝቭድ ዝም ሸው እንት ዩ፦ «እፊሰውንት እቅ ክታችወ! ኽይረይ ኣርጠሚስት መቅደስ ጝኒዝመ ሲመይስ ጊመው ጝርምስሊዝ ልሚደተድ እፊሰውንት ኽዝቭድ ኣቐጘ ኣርቓው እጅርድ ኣው የጝ?

³⁶እንዝ ማጥን እኒን ኻቅድ ኻድየው እጅር እጀው ኣቓንስቅ ዝም ይጥን፤ ደርተነውዝ ሚንትርነ ዊገ ፃቫይርነጘም ጣጝቅቅጭጥን።

³⁷መቅደስ ጝኒዝ ንቭርት ዚርፊየቍ፣ ይናኣምላክትም ዛሺየቍ እንዛይ እቅድዛት ጊነዝ እንል ኣሽ ነስርንኵርኑ።

³⁸ድሚጥረውስስመ ጝጅቅ ፅበቍ ኣንጥርኝጥድ ግን ፃይጘው ኣቪቱተ ፅብሽ ፍርድ ይወነቍ ግርቅ እኵ፤ ጛግዝ ኣልትጝ ኪሰነው ቸልጥቍ።

³⁹እኒን ኣዪጝቀ ላየ ኣልስትርነ በንርነው ዊገ ፅብሽ ኽጋዊ ጒደነዝ ቓሊሽትጡ።

⁴⁰ኣለዝየ ንጭ ኣቐው ዊገይዝ፦ ‹ኽምዘ ጕይስርንኵርኑ› ይሽትን ኪስሽታይነጘ ጐውሰኵ፦ ‹እኒን ኽምዘድ ውር ምላሰንዝ የጝ ጐውድ› ይሽትን ዋቕርሽናን ይውነው ትክክልኘ ዊሰ እጅነቅም» ዩ።

⁴¹እኒንትም ዊግት ኣኸቨድየንት ቢትኑ።