Read xamtanga ኻወርየታኒዙ ሰቭ 2 Bible Online

ኻወርየታኒዙ ሰቭ 2 - xamtanga bible

ኻወርየታኒዙ ሰቭ 2

¹ባለኻምሰ[2] የነው በሊዝ ግርየድ ችጛንድ፣ እጝቅቅ ላው ኣቕጝ ኣኽቭሽጝ ፅብጛ፦

²ድጝግትዝ ኻይሉ ኣውለንፋስ ተከው ድመ ሲመይስ ተር ጐይጝ ዊንጘው ጝንድየት እቻቑ።

³ልየዙ ለቕላቐ ተከቍ ላቓንም ጛጭስ እትል፤ ኣድልድልሽጝም ጝታይተላርትል ጐይ።

⁴እጝቅቅም መንፈስ ቅዱስዝ እቻቕ፤ መንፈስ ቅዱስም ዊግትጥጘ ማጥን ጛጭስ ኣድለጘ ጝሉ ጝሉ ቋቈዝ ዊግትጥጘ ኪርም።

⁵ኣይንድም ኣልሚዝቍ ኻግራኒስቅ ተረቍ ፀለውትኝጥ ኣይዅዳን እየሩሳልየም ዊን።

⁶እኒን ድመድ ወሽጛንድም ንቕፀው ኽዝቭ ኣኽቭሹ፤ እጝቅም ጝቕም ጝቕምቱ ቋጝቈይዝ ዊግትጛንድ ወሽ ጊርምሹ።

⁷ኽዝቭድም ጊርምሻ ዲንቅሻም ጝስመ ጝስ እንት ዩ፦ «እንዛይ እነይጛ ዊግተቍድ እጝቅቅ ገሊለትቍ እቅ ኣየቋ!

⁸እደስለ ጛይ ይን እጝቅቅ እዅርሽነው ይናይተቋጝቈይዝ ዊግትጛንድ ወሽነውድ ወረጘ የጝ?

⁹ይን ባርትየስ፣ መይድስ፣ ኢላምስ፣ መስበጠውምየስ፣ ይዅዳስ፣ ቀበደውቅየስ፣ ባንጠውስስ፣ እስየስ፣

¹⁰ፍርግየስ፣ ብንፍልየስ፣ ግቭፅስ እንዛጊስቅ ተርነቅ፣ ቀርየነት ጋቢዝቍ ሊቭየት ኣውራጅጢልም ፅብነቅ የጝ፤ ቈሽም ረውምየስ ተርነቅ ኣይዅዳን፣ ኣይዅዳኒዝ ኻይማነውትድ ለምርነቅ ኣኽዛቫንም እኵኑን።

¹¹እኒዝጘም ቀርጢስትቍ፣ ኣረቭትቍም እቅ እኵ፤ እንወ እንዛይቅ እደረት ኽየው ሰቭድ በገዘ ይናይታቋቈይዝ ዊግትጛንድ ወሽነኵን።»

¹²ኣቓንስቅም እጝቅቅ ጊርምሽጝ ዊግተነውድቅ ብጛንስቅ፦ «ኣርቀር! እን ዊገድ ወረጘ ኣጢ» ይ።

¹³ላው ላው እቅድ ግን፦ «ቝጥን ወይንዙ ሚዝ ዝይጝ ራቕጝኵ» ይጛ ቀልድ።

¹⁴ኣይንድ ቢጥሮስ ፅጭ ሊጘይጅቅ ኣቕ ጕ ችብሩ፤ ጝድመድም ኣጕስ ሸው እንት ዩ፦ «እፈ ይዅዳት እቅ! እየሩሳልየምም ፅብርነቅድ እጝቅ ክታትርነ! እኒንት ኣርቕትርነ ማጥን ያን ዊግጠው ዊገድ ወጭጥን!

¹⁵ሰትድ ገነ ግረቨዝ ሻቘ ሰት የጝ፤ ክትን ኻስቭርናንትጘ እንዛይ እቅድ እራቐቍም ኣየቍ።

¹⁶ዊገድ ግን እኒን ኣቐውድ ነቭይ እዩየል እንት የው ዊግት ዊነውድ ፋፅምሽጠ ማጥን የጝ፦

¹⁷‹እደረ እንት የኵ፤ ኻትሸነ ግርየይዝ፣ እጅር ዅሪልቅ ይመንፈስድ ቅብስጭር፤ ክታቝር እቍኒዝመ ግልቊዝ ትንቪት ዊግትጥቍ፤ ክታውርጋጥድም እትለ ቓልጥቍ፤ ክታሽመቅልድም ኒቪ ኒቪትጥቍ።

¹⁸ቈሽም ኣይንት ወራቲዝ፣ ይኣገልጋያን እቍኒዝመ ግልቊዝ፣ ይመንፈስድ በርስጭር፤ ጛይም ትንቪት ዊግትጥቍ።

¹⁹ንየ ሲመይስ ዲንቅሰቍ ዊቅ ቓሊስጭር፤ ሳ ዝቨይስም ታምራን ፃቭጭር፤ ብርዝመ ልየዝ፣ ጢየዙ ጭገግዝም እትልጡ።

²⁰ኽየው ጊርምሰው እደረት ግርየድ ተረነዊስ በውገ፣ ኰረድ ጥመ ኣጡ፤ ኣርቨድም ብሪዝጘ ሰርጡ።

²¹ኣደረት ሽድ ጭጘውድቅም ቓድጡ።›

²²«እስራየልት እቅ ክታትርነ! እኒን ቃልድ ወጭጥን፤ ክትን ክታቕም ኣርቕናንትጘ ናዝሪትቱ እየሱስ እደረቲስ ተረጘ ክታጭስ ኣርቕሽተው እጅር ዊኑ፤ እደረም ክታማኽሊል ጝናኒዝ ጊርምስቍ ታምራንዝመ ምልክታንዝ ፃቫ ጝማጥን ሚዝርድኩ።

²³እኒን እጅርድየንት እደረ ጝኣርቕቲዝ ኽፅም ዊስነጘ ክታናኒል ዲቍስ ነዩ፤ ክትንም ኽጥያትኝጥ እቅዝ ናኒዝ ሲቅልድንርን ቍዉርኑ።

²⁴እደረ ግን ክርጘዙ ጣርድየንት ድስ ክርጘይስ ጕሱ፤ ክርጘ ጝት ፃይ እዳዝጠ ቸሊየውም።

²⁵ዳዊት ጝማጥን እንት የው ዊግትኩ፦ ‹ኣደረት ዊትርቅ ይበዊል ቓለኵን፤ ጘጝ ይለዊል ኣቓንስቅ ኻውክጨቅም።

²⁶ኣቓንስቅም ይእዘንድ ዲስ ዩ፤ ይኣንደቨትድም ዲስተዝ እቻቑ፤ ክረው ኣቐው ይስየድም ቲስፈዝ ፅበኵ።

²⁷ይኒፍስሸንት ሲወል በራርም፤ ያን ክቅዱስትም መቃቭርል ቢስብስ እዳጨ ፃቫርም።

²⁸ርዅየዙ ጒደነድ ይጭስ ኣርቕስሩ፤ ክበዊልም ፃቭር ይት ዲስተዝ እቻዝረኵ።›

²⁹«ይፅን ክታችወ! ይናኣቅሊዝ ኻልቀ ዳዊት ክር ዲብሽተጘ፣ ጝመቃቭርድም ነኳን ኣሽ ይናበዊል ፅበጘ እርግጥዝ ዊግትጨ ቸለኵን።

³⁰ዊገድ ግን ዳዊት እኒንት ዊግተውድ ነቭይ ኣቓንስቅ፣ እደረ፦ ‹ክዚረይስ ላውድ ክዙፋኒል ጐይስጭር› የው ቲስፈዙ ቃል ፃርዝ ይው ዊነጘ ኣርቓንስቅ የጝ።

³¹ኣቓንስቅም ክርስቶስ ሲወል እዳቓይየጘ፣ ጝስየድም መቃቭርል ቢስብስ እዳቓይየጘ፣ በውርስ ቓል ጝክርጘይስ ጐነዊዝቍዝ ዊግቱ።

³²እኒን እየሱስት እደረ ክርጘይስ ጕይሱ፤ ይንም እጝቅቅ እን ዊገይዝ ሚዝረጫን የጝ።

³³እንዝ ማጥን ጘጝ እደረት ለዊል ጐይ መንፈስ ቅዱስት ቲስፈድ ኣይርቲስ ለምር እኒን ነን ክትን ቓልድርነዊዝመ ወሽርነዊዝ ቅብሱ።

³⁴ዳዊት ሲመይ ፊየውም፤ ጘጝ ጝቕም ግን እንት የው ዊግትኩ፦ ‹እደረ ይኣደረት፣

³⁵ክፃለታንድ ክልኲዝ ደደነ ፃቭጪስቅ ይለዊል ጐይ› ዩ።

³⁶ነስየ እኒን ክትን ሲቅልድርን ቍውርነው እየሱስት እደረ ኣደረም ክርስቶስም ፃቨጘ፣ እስራየልት ዊግነድቅ ኣርቕነ።»

³⁷እቅድም እኒንት ወሽጛንድ ጝታእዘንድ ኽዝንዝ ጣይቱ፤ ቢጥረውስስመ ላጥ ኻወርየታኒዝዛትም፦ «ይናፅን ክታችወ! እደስለ ውር ፃቭናን ቺዝጡ?» ይጝ ዋቕር።

³⁸ቢጥሮስም፦ «ንስኻ ጥውጥን! ክታኽጥያትድም ይቅር ይሽትጠ ማጥን ክታይታእጝቅቅ እየሱስ ክርስቶስት ሽዝ ጣምቅጭጥን፤ እደረ ነየው መንፈስ ቅዱስትም ለምርትርንቅ።

³⁹ምላሰንድም እደረት ቲስፈይዙ ቃልድ ክታስመ ክታቝርዝ፣ ቈሽም ይናኣምላክ እደረ ጝቕም ትጐ ጭጘቍ እክሊል ፅበቊዝቅም የጝ» ዩ።

⁴⁰ላጥ ንቕፀቍ ቃላንዝም ሚዝርዳ፦ «እንዛይ ጠማማን ዅሊል ተረው ቍጠይስ ክታቕምት ቓዝጥን» የው ጣጝቅቅሱ።

⁴¹ጛጊስም ንቕፀቍ እቅድ ወሽጘው ቃልድየንት ለምርጝ ጣምቅሽ፣ ኣይንድም ሻቘ ሽኽ ኣጥጘ እቅ ጛግል ቈሺት።

⁴²ጛይም ኻወርየታኒዙ ክንድጝድ ወሽጛ፣ ላብጠ ሚ ቈርስጛ፣ ፀለውትዝም ቲጊጛ ዊን።

⁴³ኻወርየታኒዝ ናንጣኒዝም ንቕፀቍ ዲንቅሰቍ ታምራን ፃቭሽትጛ ዊንጛንስቅ እጅርድቅ ጐውትዝ ስርሹ።

⁴⁴ኣምነቍድም ላብጠ ኣቕ፤ ጝታፃይጘውድቅም ላብጠቱ ፃቭ።

⁴⁵ጝታዝቨይዝመ ጝታጥሪቲዝም ቅይጛ እጝቅዝቅ ጝበንዘዊዝጘ ኣድልጛ ዊን።

⁴⁶ግሪ ጨቨቅም መቅደሲል ላብጠ ኣኽቭሽጛ፣ ጝታጝንጢልም ላብጠ ሚ ቈርስጛ፣ ጝታእዘንድ ጭቕጘ ዲስ ያ ዅጛ ዊን።

⁴⁷እደረትም ሚዝየንዝጛ፣ እቀ በዊልቅ መጐስ ፃየቍ ዊን፤ ኣደረም ቓደቍ እቅ ግሪ ጨቨቅ ጛግል ቈሽሻ ዊኑ።