Read xamtanga ኻወርየታኒዙ ሰቭ 20 Bible Online

ኻወርየታኒዙ ሰቭ 20 - xamtanga bible

ኻወርየታኒዙ ሰቭ 20

¹ኽምዘድም ኪበጘ ባውሎስ ምመናንድዛት ላው ፃቭ ጭጝስ ማኽር በር ጛት ሲነቭሽ መቀደውንየ ትጐ ፊሩ።

²ፊራንድም ጘጝ ዲቈቍ ኻግራኒዝቍ ምመናንድዛት ኽየው ምኽርዙ ቃልዝ በርታዛ ግሪክ ችጙ።

³ጝግልም ሻቘ ርፍ ሳብጠጘ ሚርክቭዝ ተሳፍርሽ ሰውርየ ትጐ ፊርጠ ኻስቩ፤ ዊገድ ግን ኣይዅዳንድ ጝት ቁጥጘ ኣስልሽጘጘ ወሻንስቅ መቀደውንየቱ ፃቭ ዋጥርጠ ዊስኑ።

⁴በርየቱ ባጥሩስት ዅር ሱሲባጥሩስ፣ ተሰለቅየትቍ ኣርስጥረኰስስመ ሲኰንዱስስ፣ ደርቭየንቱ ጋይወስ፣ እስየትቍ ትጪቈስስመ ጥረፊመስስ፣ ጢመቲወስም ኣቕጝ እንዛይቅ ባውሎስ ጅቅ ላብጠ ፊር።

⁵ጛይም ይናበውገ ቀድምጝ ፊርጝ ጢረዋደ ኣቕጝ ይናት ሊሚድ።

⁶ይን ግን ቅጣ ዀነው በልድ ዲቈት ግረ ፍልብስዩስስ ሚርክቭዝ ተሳፍርሽን ጛይ ፅብጘዊል ጢረዋደ ኣኰ ግርቅዝ ችጝኑን፤ ጝግልም ጛጅቅ ላጝጠ ግርቅ ሳብጥኑን።

⁷ሸወጪዙ በወትረ ግርየይዝም ሚ ቈርስነ ላው ኣቕን ኣኽቭሽን ፅብና፣ ባውሎስ ጛምርሲዝ ፊረው ኣቓንስቅ ኣኽቭሸቊዝ ዊግታ ዊኑ፤ ዊግተነውድም ኻረ ግቨር ኣጢስቅ ሊጊሱ።

⁸ኣኽቭሽን ዊነው ዲቭሪልም ንቕፀቍ መቭራታን ዊን።

⁹ኣውጣኪስ የነው ላው ውርጋጠ እፈረም ምሽዅቲዝ ዲጊል ጐይ ዝመውራ ዊኑ፤ ባውሎስም ጝዊገድ ሊጊሳንድ እድ እፈረድ ዝመውዝ ጭቕጘ ፅጐውሻንስቅ ሸወትረ ዲቭሪስ ኪርም ጊም ሊቩ፤ እቅም ውጥይጝ ጕይጛንድ ክር ዊኑ።

¹⁰ባውሎስም ጊም ጝዲጊል ኣቕ ኣቅቭ በር፦ «ጝፈውጥድ ፊየቍም ኻሚትርነ» ዩ።

¹¹እንዝ ግረ ባውሎስ ዲቭሪል ዋጥር ሚድ ኪል ምመናኒጅቅ ኹ፤ እቂዝም ቅሽጢስቅ ዊግታ ጭ ግረቨዝ ጕ ፊሩ።

¹²እቅድም እድ ቓደው እፈረድየንት ዳኽነ ኣቑዝ ፊስ፤ እንዝ ማጥንም ጭቕጘ ዲስ ይ።

¹³ይን ግን ባውሎስት ለምርነ ማጥን ቀድምን ሚርክቭዝ ተሳፍርሽን ኣሰን ትጐ ፊርኑን፤ እንት ሽነውድም ባውሎስ ኣሰን ልኰ ጒደነዝ ፃቭ ፊርጠ በን ይናት ሚርክቭዝ ቀድምን ፊርነ ማጥን ኣዛንስቅ የጝ።

¹⁴ኣሰንስም ዲምቅሽናንድ ሚርክቭል ጥውን ጝጅቅ ላብጠ ሚሊጢን ፊርኑን።

¹⁵ጝኣምርሲዝም ጝጊስ ጕን ሚርክቭዝ ኪዩ የነው ደስየቲዝ በውዝ በዊል ችጝኑን፤ ጛምርሲዝ ቈሽ ጕን ሳሙስ ትጐ ከርኑን፤ ትረጊሊዩም ጭን ጝኣምርሲዝ ሚሊጢን ጥውኑን።

¹⁶ባውሎስም እስየ ሳብጣየጘ በን እፊሰውንት ዲቍ ፊርጠ ኻስቩ፤ ምላሰንድም፦ ባለኻምሰ በልድ እየሩሳልየም ግሪጠ በን ደርታንስቅ የጝ።

¹⁷ኣይንድም ሚሊጢን ኣቕ እፊሰውን ትጐ እጅር እፃቕ ምከኒዝቍ ምከን ቃወጥድዛት ጝጐ ጭጝሱ።

¹⁸ጛይም ተርጛንድ እንት ዩ፦ «እስየ ተጠው ግርየይስ ኪርም ነኳን ኣሽ ዊትርቅ ክታማኽሊል ኣወይ ዊነጘ ክታቕም ኣርቕርነውድ የጝ።

¹⁹ውርም እኳ ኣይዅዳነ ሲረይስ ጐው ሚከረ ለምጣንም፣ ይእርድ ቅብሳ ኣደረት ቃልድ ትኽትነዝ ኣግልግለነውድ በጢቀርም።

²⁰ኣኸቨዝም ኣነ ጝንጥዝ ጝንጥቅ ዋጥርጥራ ክታጭስ ጣቅመውድየንትቅ ክንሱንጚ ውርም እዳዚቀር።

²¹ኣይዅዳንድም ኣጝነ ኣኽዛቫንድዛይ እጝቅቅ እደረ ትጐ ዋጥርጝ ንስኻ ጥውጛንስመ ይናኣደረ እየሱስ ክርስቶስት ኣምንጛንስ ማጥን ጣጝቅቅስኩን።

²²«ነንም ያን ጝግል ችጛንድ ወረጘ ችጝጨት ኣርቒቅሽም፤ እየሩሳልየም ፊጨ ማጥን መንፈስ ቅዱስ ኣዝኩ።

²³ኣነጚ ኻትመዝ ኻትመ ዋጥርጥራንድቅ መንፈስ ቅዱስ፦ ‹እፅወዝመ ሚከረዝ ለምርትር› ያ ይቕምስ ድቈኵ።

²⁴ያን ግን ይኣግልግለነዊዝመ ኣደረ እየሱስ ነየው ሰቪዝ ኻትጪስቅ ኣሽ ክጠር ኣቕሽ እኳ ግድ እጀርም፤ ይኣግልግለውትድም እደረት ፃገዙ ወንጌልድ ኣቭዝርሰነው የጝ።

²⁵«ነኳን ኣሽ ክታማኽሊል ዋጥርጥራ ክንሳ ዊንኩን፤ ነስየ ግን ይጋፅድ ሊጘት ቓላይርነጘ ኣርቐኵን።

²⁶እንዝ ማጥን ክታማኽሊስ ላይ ኒፍስ እኳ ድዝርሻ ያን ዲቈቅ ኣቐጘ ንጭ ክታት ጣጝቅቅስኩን።

²⁷ምላሰንድም እደረት ፍቃድድ ውርቅ እዳዚጝቀ ክታእጝቅዝቅ ድቍኩን።

²⁸በገዘ ጝብርድ ቅብስ ቓዘይ እደረት ምከንሸንት ሊሚድትርነ ማጥን መንፈስ ቅዱስ ክታት ባባሳን ፃቭ ይምኩ፤ እደስለስ መጝገይዝም ኣነ ክታቕምስ ጣጝቅቅጭጥን።

²⁹ያን ፊጠት ግረ መጝገይዝ ኣርኽርኻቍ ተኵለይዝጘ ጨካኛን እቅ ክታማኽሊል ጡጥጘት ኣርቐኵን።

³⁰ክታማኽሊስ እኳን ላው ላው እቅ ጕጝ ጠማም ክንድጝ ክንስጛ ምመናንድዛት ጝታቕም ትጐ ዊትርጥቍ።

³¹ኣቓንስቅም ሻቘ ምት ምሉ ይእርድ ቅብሳ ኻር ጊርቅ ክታእጝቅትቅ ማኽረጘ ኻስቭርና ጣጝቅቅጭጥን።

³²«ነንም እደረስ፣ ቈሽም ኻንፀነውዝመ ቅዱሳኒዝ ማኽሊል ርስት ዊርስጠ ቸለው ጝፃገይዙ ቃሊዝ ክታት ኽድር ይውኩን።

³³ያን ኣውማውቲስም ቍርሽ ዊንም ዊርቀ ዊንም ኣልቨ ማርቕፂቀርም።

³⁴እንዛይ ይናንጣኒዝ ሰራጫ ይቕምትም ኣነ ይፃምጥድዛት ከቫ ዊነጘ ክታቕም ኣርቕርነኵ።

³⁵‹ለምረዊስ ሽ ይወውድ በርክሸው የጝ› የው ኣደረ እየሱስ ዊግተው ቃልድ ኻስቭርና ክታናኒዝ ሰራሽርና ቺግርሸቍድዛት ከቭትርነ ማጥን እጝቅትቅ ይቕም ፃቭ ቓሊስኩን።»

³⁶እንት የው በር ጝታእጝቅጅቅ ኣቕ ግርቨቭሽ ፃልዩ።

³⁷ጛይም እጝቅቅ ጭቕጘ ሊዝጛ ባውሎስት ቕልመድ ጣጥምጝ ፃይጝ እምቝ።

³⁸እጝቂስቅ ጭቕጘ ኻዝንጘውድ ቈሽ፦ «ነስየ ይጋፅድ ሊጘት ቓላይርነቅም» ያንስቅ የጝ፤ ባውሎስትም ሚርክቪል ኣሽ ስቭዝ።