Read xamtanga ኻወርየታኒዙ ሰቭ 21 Bible Online

ኻወርየታኒዙ ሰቭ 21 - xamtanga bible

ኻወርየታኒዙ ሰቭ 21

¹ጛጊስም ቲትነት ግረ ሚርክቭል ጥውን ቀጥተ፦ «ቈስ» የነይ ደስየትሸን ትጐ ፊርኑን፤ ጛምርሲዝም፦ «ሩድ» የነይ ደስየትሸንትል ችጝኑን፤ ጝጊስም ባጥራ የነይ ኻትመየንትጐ ፊርኑን።

²ጝጊስም ፊንቅየ ትጐ ፊረው ሚርክቭ ችጝናንስቅ ጝዝ ተሳፍርሽን ይናጒደነድ ቃጥልኑን።

³ቈብረውስትም ቓልናንድ ጝርት ፃግቭይዝጐቱ በርን፣ ሰውርየ ትጐ ፊርኑን፤ ሚርክቭድ ጝጭነትድ ጢረውስት ወደቪል ኣርግፈው ዊናንስቅ፣ ይንም ጝግል ችጝናንድ ጊምኑን።

⁴ጝጊስም ምመናንድ ችጝን ጛጅቅ ላጝጠ ግርቅ ጐይኑን፤ ጛይም መንፈስ ቅዱስዝ ሚሪሽጝ ባውሎስት እየሩሳልየም ፊራየጘ ድቍ።

⁵ጝግል ሳብጥነቍ ግርቅድ ኣቢትጛንድም፣ ጛጊስ ቲትን ይናጒደነድ ቃጥልኑን፤ እጝቅቅም ጝታቍኒዝመ ጝታቝሪዝጅቅ ኣቕጝ ኻትመይዝ ደዪል ኣሽ ስቭዝ፤ ባኽሪዝ ደዪልም ኣቕን ግርቨቭሽን ፃልይኑን።

⁶እንዝ ግረ ሲነቫቭትሽን ሚርክቪል ጥውኑን፤ ጛይም ጝታይታጝን ዋጥር።

⁷ጢረውስስም ጕን ባኽር ጒደነድ ኻትናንድ፣ በጠሊማይስ ችጝኑን፤ ጝጊስም ምመናን ችጝን ድምቅሽነት ግረ ጛጅቅ ላው ግርየ ግሪኑን።

⁸ጛምርሲዝም ጝጊስ ጕን ቂሳርየ ችጝኑን፤ ጝጊስም ላጝጠ ዘቝንጢስ ላውድ ኣቐው ፊልበውስት ጝን ጥውን ጝጅቅ ጐይኑን።

⁹ጝጭስም ትንቪት ዊግተቍ ድጝግላን ሲዘ እቍን ጝቝር ዊን።

¹⁰ንቕፀቍ ግርቅ ጝግል ጐይነት ግረ ኣጋቨውስ ይሽተው ላው ነቭይ እጅር ይዅዳስ ተሩ።

¹¹ይናጐም ኣልት ባውሎስት ቅናትድየንት ጒ ጝቕምት ልኵጣኒዝመ ናንጣኒዝ እፅቍ በር፦ «መንፈስ ቅዱስ፦ ‹እኒን ቅናቲዝ ወነድየንት ኣይዅዳንድ እየሩሳልየምስ እነሽጝ እፅቍጝ በርጝ ኣኽዛቫኒዝ ዲቍስጝ ይውጥቍ› የኵ» ዩ።

¹²ይናስመ ጝግል ዊነቍ እቂዝም ባውሎስት፦ «ኣለቀይ እየሩሳልየም ፊርተ» ይን ጨውኑን።

¹³ባውሎስ ግን፦ «ወረጘ የጝ እነይርን ሊዝርና ይጊዝውድ ብርቝ ብርቝ ሽርነውድ? ያን ኣቕሽ ይኣደረ እየሱስት ሽዝ እየሩሳልየምስ እፁሸነው ጭቝ ኣዪጝቀ ክረነውዝም ኣስልጭኩን» ዩ።

¹⁴ይናምኽርድም ለምጠቅ ያንድ፦ «ነስየ ኣደረት ፍቃድ ኣነ» ይን በርኑን።

¹⁵እንዝ ግረ ይናጐዝድ ኣስልን እየሩሳልየም ፍኑን።

¹⁶ቂሳርየ ዊነቍ ላው ላው ምመናንም ይናጅቅ ተር፤ ጛይም ጥውን ጐይነ ማጥን ምናሰንት ጝን ሚርይ፤ ምናሰን ቀደም ይጝ ኣምነቍ ምመናኒስ ዊነው ጝእዅርሽንድ ቈብረውስቱ ኣቐው እጅር ዊኑ።

¹⁷እየሩሳልየም ችጝናንድም ምመናንድ ዲስተዝ ለምር።

¹⁸ጛምርሲዝም ባውሎስ ይናጅቅ ኣቕ ላብጠ ያይቈቭት ዲምቅሽነ ፊርኑን፤ ምከን ቃወጥድም እጝቅቅ ጝግል ዊን።

¹⁹ባውሎስም እጝቅዝቅ ዲግተ ይው በር እደረ ጝኣግልግለውቲዝ ኣኽዛቫኒዝ ማኽሊል ፃቨውድየንትቅ ላውዝ ላው ፃቭ ድቁ።

²⁰ጛይም እኒንት ወሽጛንድ እደረት ሚዝየንዝ፤ ባውሎስትም እንት ይ፦ «ይናዝንወ! ንቕፀቍ ሽኽዝ እጊተቍ ኣይዅዳን ኣምንጘጘ፣ እጝቅቅም ወሪትት ኽጊዝ ቀንየቍ ኣጘጘ ኣርቕረኵ።

²¹ክት ኣኽዛቫኒል ፅበቍ ኣይዅዳንድዛት፦ ‹ክታቝርድዛት ጊርዝትርነ፤ ዊነው ልምድድም ፋፅምትርነ› ይራ ወሪትት ኽግድ ሸርስረጘ ፃቭሽት ጅጚተውድየንት ወሽጝኵ።

²²ነስየ ውር ፃቭናን ቺዝጡ? ክት ተትረጘ ቈሽ ወሺጝቀ እዳቓቍም።

²³እንዝ ማጥን ይን ድቍነውድየንት ፃቭ፤ ይናማኽሊስ ስለት ፃየቍ ሲዘ እቅ እኵ።

²⁴ጛት ፃይር ጛጅቅ ኣቕር ዊር የነዊዝ ስረትድ ፋፅም፤ ጝታኣውርድም ላፅጥጘ ማጥን መቅደስ ጝኒዝ ይወነቍ ሚቨድ ጝታማጥን ኪፍል፤ እኒንት ፃቭረውዝየ ክማጥን ጅጚተውድቅ ኻሽት ኣቐጘ፣ ክት ክቕምም ወሪትት ኽግድ ፋፅምረር ኣረጘ ኣርቕጥቍ።

²⁵ኣኽዛቫን ዊነቍ ምመናኒዝ ግን፦ ‹ጣወትዝ ምላሰን ኣርክሽተው ዅረ ዅትርነ፣ ጝብርድ ቅብሪጝቀ ኻንቕሽ ክረው እንሰሰይዙ ስየዝመ ብርዝ ዅትርነ፣ ሻርሙጥትርነ› ይን ዊስነው ውሳኒዙ ደብዳቢድ በርስንኵኑን» ይ።

²⁶ባውሎስም ጛምርሲስ እቅድዛት ፃይ ፊር ጛጅቅ ኣቕ ዊር የነዊዙ ስረትድ ፋፅሙ፤ እግረም ዊር የነዊዙ ስረትድ ኻትሸነ ግርየይዝመ ጝታይታምስዋይትድ ኣልስጘው ግርየድየይዝ ኣርቕስጠ መቅደስ ጝኒል ጥዉ።

²⁷ላጝጠ ግርቅድም ኻትሽጥጘ ጕጛንድ እስየስ ተረቍ ኣይዅዳንድ ባውሎስት መቅደስ ጝኒስ ቓልጛንድ ኽዝቭድ ኣድምስጝ ፃይ።

²⁸«እስራየልት እቅ ክታትርነ! ላቝጥን ከቭስጥን፤ ይናኽዝቪዝመ ይናኽጊዝ፣ እኒን ቅዱስ ስፍረድየንትም ዛሻ ችጘው ኻግሪል ፅበው ኽዝቭድየንትቅ ክንሰው እጅርድ እኒን የጝ፤ እንም ኣቐቅ የው ቈሽ ኣኽዛቫንድዛት መቅደስ ጝኒል ድው እኒን ቅዱስ ስፍረድየንት ኣርክስኩ» ይጛ ቓፅጥጘ ኪርም።

²⁹እንት ይጘውድም እንዝ በውገ እፊሰውንቱ ጥረፊመስት ጝጅቅ ኻትመይስ ቓልጝ ዊንጛንስቅ ባውሎስ መቅደስ ጝኒል ጝት ፃይ ጥወው ተኩዝ የጝ።

³⁰ኻትመድም ምሉዝ ኻሚቱ፤ ኽዝቭድም ጝፅበው ፅበው ስፍረይስቅ ውጥያ ተሩ፤ ባውሎስትም ጒዝጛ መቅደስ ጝኒስ ፊስ፤ በውዝም መቅደስ ጝኒዝ ሚልድ ዲብሽት።

³¹ኽዝቭድም ባውሎስት ቍውጠ በን ፅባ ኣይንድ በውዝ፦ «እየሩሳልየም ኻትመየን ኻሚትርኵች» የው እፃ ረውማነ ጠውር ኣዘተይዝ ችጙ።

³²ጘጝም ኣይንድ በውዝ ላዝ ኻልቀዝመ ዊተድርዝ ፃይ ውጥያⶖ ኽዝቪል ጊሙ፤ ጛይም ኣዘተይዝመ ዊተድሪዝ ቓልጛንድ ባውሎስት ድድበነውድ በር።

³³ኣዘተድም ኣልት ባውሎስት ፃይ ሊጘ ሰንሰለታንዝ እፁሽጠ ማጥን ኣዙ፤ እግረም፦ «ክት ኣው የጝ፤ ፃቭረው ዊገድስ ወረጘ የጝ?» የው ዋቕሩ።

³⁴ኽዝቭድም ላውድ ላው ዊገ ዊግታንድ፣ ላየድ ቈሽ ላየ ዊገ ዊግታ ቓፃ ዊናንስቅ፣ ኣዘተድ ውረውረ ዊገቀ ወሽጠ ቸሊየውም፤ ኣቓንስቅም ባውሎስት ዊተድሪዝ ስፍረይል ፊስጥጘ ማጥን ኣዙ።

³⁵ኽዝቭድም ኻሚት ትክቭክቭሻ ዊናንስቅ ባውሎስ ደረጀይል ችጛንድ ዊተድርድ መውርጝ ፊስጥጘ ግድ ኣቑ።

³⁶ኽዝቭድም፦ «እለ ቁጥን!» ያ እግርገ እግርገይል ቲክና ዊኑ።

³⁷ዊተድርድም ባውሎስት ጝታኻፅሪል ድውጥጘ ኣልስጛንድ ባውሎስ ዊተድሪዝ ኣዘተድየንት፦ «ላው ዊገ ድቍጨ ማጥን ፊቅድትርመ?» ዩ፤ ጘጝም፦ «ግሪክ ቋቈ ኣርቕረኵመ?

³⁸ኣየውጚ? ክት እንዝ ሚቅ ኽምዘ ጕይስር ሲዘ ሽኽ እቅ ሺፍትዝር በራኸ ጥውር ዊንደር እጅርድ ኣይረርቀ» ዩ።

³⁹ባውሎስም፦ «ያንስ ኪልቅየትወ ጠርሲስ የነይ ጭቕጘ ኣርቕሽረይ ኻትመትል ፅበር ኣይዅዳነው እጅር የጝ» ዩ።

⁴⁰ዊተድሪዝ ኣዘተድም ፊቅዳንድ ባውሎስ ደረጀይል ችብር ኽዝቭድ ዝም ይጠ ማጥን ጝናኒዝ ጣቅሱ፤ ኽዝቭድም ዝም ያንድ እቭራይስጥ ቋቈይዝ ዊግተነው ኪርሙ።