Read xamtanga ኻወርየታኒዙ ሰቭ 22 Bible Online

ኻወርየታኒዙ ሰቭ 22 - xamtanga bible

ኻወርየታኒዙ ሰቭ 22

¹«ያቅልዝመ ይፅንዝ ክታችወ! ያን ኪስጨው ዊገይዝ ዊሰው ይዊገድየንት ወጭጥን» ዩ።

²ኽዝቭድም እቭራይስጥ ቋቈዝ ዊግታንድ ወሻንድ በውገት ሽ ዝም ዩ።

³ጘጝም እንት ዩ፦ «ያን ኪልቅየትወ ጠርሲስ የነይ ኻትመየትል እዅርጨር ኣይዅዳነው እጅር የጝ፤ ይሊግዘውድ ግን እንል እየሩሳልየም ኻትመይል የጝ፤ ይክንሰተድም ገማልያል የጝ፤ ይናኣቅሊዝ ኽግድ ጝልኲል ጐይ ጣጝቅቅ ክንጥኩን፤ ነን ክትን ፃቭርናንትጘ ያንም እደረስ ጭቕጘ መንፈሳዊ ቅናትዝ ቀንያ ዊኑን።

⁴እውነ ግልወድቅ እፅቋ ወኽኒ ጝንል ዲቍስ ይዋጐስ እን እምንትድ ለምረቍድዛትቅ ክርጥጚስቅ ሲድሳ ዊኑን።

⁵እንዝም ካኽነጣነ ኻልቀይዝመ ሽመቅሊዝቅ ይጭስ ሚዝርድጥቍ፤ ደማስቈ ፅበቍ እን እቅድዛይቅ ቐፃሽጥጘ የር እየሩሳልየም ትጐ እፅቋ ነስጨ ማጥን ጝታቕምቲስ ደማስቈት ኣይዅዳኒዝ ፃፍጝ ነይጘው ደብዳቢድ ለምጥ ፊጣ ዊኑን።

⁶«ደማስቈ ኻትመይል ችጝጨ ጓንድም፣ ቀትር ሰቲዝ ድጝግት ሲመይስ ኽየው ብርኻን ይብጣይል ምርቑ።

⁷ኣይንድም ዝቨይል ሊቩን፤ እግረም፦ ‹ሳውል! ሳውል! ውር ቃጥ የጝ ይት ሲድስረውድ?› የው ድመ ወጩን።

⁸ያንም፦ ‹ኣደረወ ክት ኣው የጝ?› ዩን፤ ጘጝም፦ ‹ያን ክት ሲድስረው ናዝሪትቱ እየሱስ የጝ› ዩ።

⁹ይጅቅ ዊነቍድ ግን ብርኻንድ ቓልጚ ይጅቅ ዊግተዊዙ ድመድ ወሺየቍም።

¹⁰ያንም፦ ‹ኣደረወ! ነን ውር ፃቭጨ በንረኵ› ዩን፤ ኣደረም፦ ‹ፈር ጕ! ደማስቈ ትጐ ፊጥ፤ ክት ፃቭተ ጥውሸውድየንትቅ ጝጊስ ድቍጥቍ› የው ዊግቱ።

¹¹እድየን ብርኻንድ ጭቕጘ ምርቑዝ ቓለነ ባንስቅ ይጅቅ ዊነቍ እቅድ ይናንድ ፃይጝ ቃውጛ ደማስቈ ችጝዝ።

¹²«ደማስቈስም እደረት ኽግድ ኣዘጘ ቲግየዝ ፃልየው ጝግል ፅበቍ ኣይዅዳንድቅ ሚዝርድጘው ኻናንየ ይሽተው ላው እጅር ዊኑ።

¹³ጘጝ እጅርድም ይጐ ተሩ፤ ይጋቢልም ችብር፦ ‹ይዝን ሳውልወ! ክእልጣንድ ቓልጝነ!› ዩ፤ ያንም ኣይንድ በውዝ ጝት ቓሉን።

¹⁴ኻናንየም፦ ‹ይናኣቅሊዝ ኣምላክ ጝፍቃድድ ኣርቕተ ማጥን፣ ጝፅድቅድም ቓልተ ማጥን፣ ጝምቸይስም ጝቃልድ ወሽተ ማጥን በውርስ ማርፅኩ።

¹⁵እኒንትቅ ፃቨውድም ክቓልደዊዝም ኣነ ወሽረዊዝቅ እቀ በዊልቅ ጝሚዝር ኣተ ማጥን የጝ።

¹⁶እደስለ ውር ፃቭተም ደይራ? ጕ! ጝሽድ ጭጝራ ጣምቅጭ፤ ክኽጥያቲስም እቓጭ› ዩ።

¹⁷«እድዝ ግረ እየሩሳልየም ዋጥር መቅደሲል ኣቕ ፃልያ እትለዝ ቓላ፦

¹⁸ኣደረ፦ ‹ክት ይቍዝ ሚዝርደውድየንትቅ ወሻቍም ኣቓንስቅም እየሩሳልየምስ ቃዝየዝ ፍ› የው ዊግታንድ ወጩን።

¹⁹ያንም ኣደረወ! ክት ኣምነቍድዛትቅ እፅቋ ድድብጨ ምኵራቫኒልቅ ጅልዋ ዊነጘ ኣርቕጘኵ፤

²⁰ክሚዝር እስጢፋነውስት ብርድ ቅብስጛንድም ያንም ጛጅቅ ቲስመም ጝታጋቢል ችብጥ ቍወቊ እቂዝ ኣልብድ ሊሚዳ ዊኑን ዩን።

²¹ኣደረም እለ እክልል ፅበቍ ኣኽዛቫኒል እፃጭር፤ ነንም ኣሽ ጕር ፊጥ ዩ።»

²²ኽዝቭድም እን ዊገይል ኣሽ ባውሎስት ዊገድ ወሻ ዊኑ፤ እንዝ ግረ ግን ጝቃልድ ኣጕስ ሸው፦ «እን እጅርድየንት እለ ዝቨይስ ድሽ፤ እነየው እጅር ዝቨት ዲጊል ፅብጠ ጥውሻውም» ያ ቓፁ።

²³ኽዝቭድም ቓፃ ጝኣልብድም ንየ ዊርውራ ብጥድዛትም ንየ ቡል ሻ ዊኑ።

²⁴ዊተድሪዝ ኣዘተድም እኒንትቅ ቓላንድ ባውሎስት ዊተድሪዝ ስፍረይል ድውጝ ኽዝቭድ ወረጘዝ እነይጛ ቓፅጘዊዝ ምላሰንድየንት ጊርፍሻ ሚርምርሽጠ ማጥን ኣዙ።

²⁵ባውሎስም ጝት ኣኽርዝ ጊትርጝ ጊርፍጥጘ ጕጛንድ ቓል፣ ጝጋቢል ችብር ዊነው ላዝ ኻልቀድየንት፦ «ረውምየት ዘይገድየንት ፍርድ እጀው ጊርፈነው ፍቃድ ኣዊስ ችጝርኑ?» ዩ።

²⁶ላዝ ኻልቀድም እኒንት ወሻንድ ዊተድሪዝ ኣዘተይል ፊር፦ «ክፃቭተ በንረዊስ ቋጥቭጭፈ! እን እጅርድ ኣቕሽ ረውምየት ዘይገ የጛ» ዩ።

²⁷ዊተድሪዝ ኣዘተድም ባውሎስት፦ «እስቲ ድቍፈ! ክት ረውምየት ዘይገመ?» የው ዋቕሩ፤ ጘጝም፦ «የያ» ዩ።

²⁸ዊተድሪዝ ኣዘተድም፦ «ያን እኒን ዘይግነትድ ችጘውድ ንቕፀቍ ጊንዝቫን ኪፍል የጝ» ዩ፤ ባውሎስም፦ «ያንስ እዅርጫንድ ኪርም ረውምየት ዘይገ የጝ» ዩ።

²⁹እንዝ ማጥን ሚርምርጥጘ ኣስልሽጝ ዊነቍድዛይ በውዝ ጝጊስ እክልድ፤ ዊተድሪዝ ኣዘተድም ባውሎስ ረውምየት ዘይገ ኣቐነውድ ወሻንድ ሰንሰለትዝ እፁስ ዊናንስቅ ጐውቱ።

³⁰ጛምርሲዝም ዊተድሪዝ ኣዘተድ ኣይዅዳንድ ባውሎስት ኪስጘዊዝ ምላሰንድ ወረጘ ኣቐጘ እርግጥድ ኣርቕጠ በን እክሱ፤ ካኽነጣነ ኻልቅጢዝመ ሸጐዊዝ ኣቫላንድም እጝቅቅ ኣኽቭሽጥጘ ማጥን ኣዙ፤ ባውሎስትም ደረጀይስ ጊምዝ ጝታበዊል ችብሱ።