Read xamtanga ኻወርየታኒዙ ሰቭ 23 Bible Online

ኻወርየታኒዙ ሰቭ 23 - xamtanga bible

ኻወርየታኒዙ ሰቭ 23

¹ባውሎስም ሸጐውድየንት ትክ የው ቓል፦ «ይፅን ክታችወ! ያን ነኳን ኣሽ እደረት በዊል ይጊዝውድ ንፅዅ ኣቐጘ የጝ ፅበውድ» ዩ።

²ካኽነጣነ ኻልቀ ኻናንየ ግን፦ «ጝምቸድ ሽጥንፈይ» የው ባውሎስት ጋቢል ዊነቍ እቅድዛት ኣዙ።

³ኣይንድም ባውሎስ ካኽነጣነ ኻልቀድየንት፦ «ኑረዝ ሊስንሽረር ግድግደ ክተ! ክት ቈሽ እደረ ጣዝጡ፤ ኽግዝ ሚስርትዝ ፊርድተ ጐይር ፅብራመ ኽግ እጀው ጣዝጥን ይር ኣዝራ?» ዩ።

⁴ጝግል ዊነቍ እቅድም፦ «እፈ እደረት ካኽነጣነ ኻልቀድየንትመ እነሽር ዛሽራ?» ይ።

⁵ባውሎስም፦ «ይፅን ቈደይ ካኽነጣነ ኻልቀ ኣቐጘ ኣርቒቀርም፤ ምላሰንድም፦ ‹ክኽዝቪዝ ኻልቀይል ጭቓ ዊገ ዊግተ› ይሽት ፃፍሽኩ» ዩ።

⁶ባውሎስም ጝግል ዊነው ኽዝቭድየን ግቨርድ ሰዱቃን ግቨርድ ቈሽ ፈሪሳን ኣቐጘ ኣርቓንስቅ፦ «ይፅን ክታችወ! ያን ፈሪሳነዊስ እዅርጨር ፈሪሳነው እጅር የጝ፤ ነን ፍርድል ኣልጠውድም ክረቊዝ ጐነድ ቲስፈ ፃቫንስቅ የጝ» የው ሸጐዊዝ በዊል ቓፁ።

⁷እኒንት ዊግታንድም ፈሪሳኒዝመ ሰዱቃውያኒዝ ማኽሊል ኣምበጐሮ ጕይሽ ሸጐውድ ሊጘትል ቲተቲቱ።

⁸ምላሰንድም ሰዱቃንድ፦ «ክርጘይስ ጐነም፣ መላክም፣ መንፈስም፣ እጀውም» የቍ ጛይ፤ ፈሪሳንድ ግን፦ «እንዛይቅ እኵ» ይጝ ኣምነቍ ዊን።

⁹ኣይንድም ኽየው ቒቒተ ኣቑ፤ ፈሪሳነ ዊግኒስም ላው ላው ወሪትት ኽግ ክንሰጥድ ጕጝ፦ «ይን እን እጅሪስ ውረውረ ጭቓ ዊገም ችጚነቅ፤ መንፈስ ዊንም መላክመ ጝጭስ ዊግቱ ኣጢ? ይን ውር ኣርቕነቅ?» ይጛ ተከራክርሽ።

¹⁰ጐርድም ጭቕጘ ኪራ ፊራንድ ዊተድሪዝ ኣዘተድ ባውሎስት ብጭቅጭቃይጘጘ ጐውት ዊተድርድዛት፦ «ጊምጥን ባውሎስት እቂዝ ማኽሊስ ፍስርን ጠውሪዝ ሰፈሪል ድውጥን» የው ኣዙ።

¹¹ጛምርሲዝም ኻሪዝ ኣደረ ባውሎስት ጋቢል ችብር፦ «ኣይዝዀች! እየሩሳልየምስ ይማጥን ሚዝርድረጘ ረውምየስም ሚዝርድትር» ዩ።

¹²ቅሻንድም ኣይዅዳንድ ኣኽቭሽጝ፦ «ባውሎስት ቍዊጝቀ ኣረ ጣማይነቅም፤ ኣቝም ዝያይነቅም» ይጝ ፃረፃርሽት።

¹³እኒን ቅጥረይዝ ቲስመመቍድም ኣርቨይስ ንቕፀቍ እቅ ጛይ።

¹⁴ጛይም ካኽነጣነ ኻልቅጢዝመ ሽመቅሊዝጐ ፊርጝ፦ «ባውሎስት ቍዊጝቀ ዃይነጘ ዝያይነጘ ፃረ ፃርሽትንኵኑን።

¹⁵እንዝ ማጥን ክትን ሸጐዊጅቅ ቲስመምርን ኪው ሽርን ሚርምርድርነው ላየ መረጀ ፃይርነቅ ተክርን ባውሎስት ክታጐ በርስጠ ማጥን ዊተድሪዝ ኣዝተይል ኣምልክትጥን፤ ይንም እንል ችጚጝቀ ጒደነይስ ቁነ ኣስልሽንኵኑን» ይ።

¹⁶ዊገድ ግን ባውሎስስ ጝስንት ዅር እኒን ዊገድ ወሻንስቅ በውዝ ዊተድሪዙ ሰፍረይል ጥው ባውሎስስ ድቁ።

¹⁷ባውሎስም ላዝ ኻልቅጢስ ላውድየንት ጭጝ፦ «እኒን እፈረድ ዊተድርዝ ኣዘተይዝ ዊግተው ዊገ ፃይኩ ፊስር ዲምቅ» ዩ።

¹⁸ላዝ ኻልቀድም ዊተድሪዝ ኣዘተይል ፊስ፦ «እፁሸው ባውሎስ እኒን እፈረድ ዊተድሪዝ ኣዘተይዝ ድቈነው ዊገ ፃየው የጝ፤ ፊስርቀ ዲምቅሳር የው ይት ጨዉ» ዩ።

¹⁹ጘጝም እፈረይዝ ናንድ ፃይ ገለል የው ስፍረል ፊስ፦ «ይጭስ ድቍተ በንረው ዊገድ ወረጘ የጝ?» የው ዋቕሩ።

²⁰እፈረድም፦ «ኣይዅዳንድ ባውሎስት ኪው ሽጝ ሚርምረቍ ተክጝ ኣምር ሸጐዊል ኣልስተ ማጥን ክት ጨውጥጘ ቲስመምጝኵ።

²¹ክት ግን ቀሰው ይተ፤ ምላሰንድም ኣርቨይስ ንቕፀቍ እቅ፦ ‹ጝት ቁዊጝቀ ዃይነቅም ዝያይነቅም› ይጝ ፃረፃርሽትጝ ጝት ቁጥጘ ጒደነይል ጭቭርጝኵ፤ ነንም ኣስልሽጝ ክዊሰድየንት የጝ ሊሚድጘውድ» ዩ።

²²ዊተድሪዝ ኣዘተድየንም እኒንት ወሽ በር እፈረድየንት፦ «እኒንት ይጭስ ድቍረጘ ኣውማውስቅ ጋልፅረር» የው ኣዝ ሲነቭሱ።

²³እንዝ ግረ ዊተድሪዝ ኣዘተድ ላዝ ኻልቅጢስ ሊጘድ ጭጝ፦ «ኵኑ ሻቘ ሳይዝ ቂሳርየ ፊረቍ ሊጘ ላ ዊተድር፣ ላጝጥርጝን ፈረስኝጥዝመ ሊጘ ላ ኣጭነ ዊርውረቍ ዊተድርዝ ኣስልጥን።

²⁴ባውሎስስም ፊርዘ ኣስልድርን ቂሳርየት ቅመተ ፊልክስትል ዳኽነዝ ችጝዝጥን» ዩ።

²⁵ፊልክስስም እንት የው ደብዳቢ ፃፉ።

²⁶«ቀላውዲወስ ሉሲወስቲስ እፃሽተው ደብዳቢ፤ ኪብርደር ኻግር ቅመተ ፊልክስስ ችጝነ! ዳኽነ እኵሩመ?

²⁷እኒን እጅርድየንት ኣይዅዳንድ ፃይጝ ቁጥጘ በንጝ ዊን፤ ያን ግን ረውምየት ዘይገ ኣቐጘ ኣርቕ ዊናንስቅ ይዊተድሪጅቅ ችጝ ቓዙን።

²⁸ጝት ኪስጘዊዙ ምላሰንድም ኣርቕጨ በን ጝታሸጐዊል ኣልስ ዊኑን።

²⁹ዊገድ ግን ጝታኽጊዝቍዝ ተከራክርሸነውጚ ክርጘልም ኣነ እፁሸነውል ችጝዘው ላየ ዊገ ችጚቀርም።

³⁰ኣይዅዳንድ ግን እኒን እጅርድየንት ቁጥጘ ቃጥርጘጘ ወጫንድ በውዝ ክጐ በርሱን፤ ጝኪሰትድዛትም ጝታዊገድየንት ክጭስ ኣልስጥጘ ማጥን ኣዙን፤ ዳኽነዝ ኣቕ።»

³¹ዊተድርድዛይም ኣዚትጘጘ ባውሎስት ኻር ፊስጝ ኣንቲባጥሪስ ችጝዝ።

³²ጛምርሲዝም ፈረስኝጥድዛት ባውሎስት ችጝዝጥጘ ፃቭጝ ላጥድ ጝታጠውር ሰፈሪል ዋጥር።

³³ፈረስኝጥድም ባውሎስት ቂሳርየ ችጝዝጝ ደብዳቢድ ኻግር ቅመተይዝ ይው፤ ባውሎስትም ጝበዊል ችብስ።

³⁴ኻግር ቅመተድም ደብዳቢድ ኣንቭቭ በር ባውሎስት፦ «ኣውየን ኣውራጀይል የጝ ክኻግርድ?» የው ዋቕሩ፤ ኪልቅየቱ እጅር ኣቐጘ ኣርቓንድም፦

³⁵«ክኪሰጥድ ኣልትጛንድ ክዊገድ ቓልጭር» ዩ፤ ኺረውድስት ግቢል ኣቕም ሊሚድሽጠ ማጥን ኣዙ።