Read xamtanga ኻወርየታኒዙ ሰቭ 24 Bible Online

ኻወርየታኒዙ ሰቭ 24 - xamtanga bible

ኻወርየታኒዙ ሰቭ 24

¹ኣኰ ግርቅ ኣቐት ግረ ካኽነጣነ ኻልቀ ኻናንየ ላው ላው ሽመቅልዝመ ጠርጠሉስ የነው ጠቨቀዝ ጅቅ ኣቕ ባውሎስት ኪስጠ ቂሳርየ ጊሙ፤ ባውሎስት ኪስጘው ዊገድየንትም ኻግር ቅመተ ፊልክስስ ኣልስ።

²ባውሎስም ጭጝሽ ኣልታንድ ጠርጠሉስ እንት ያ ኪስጠ ኪርሙ፦ «ኪብርደር ፊልክስወ! ክዚምኒዝ ኽየው ዲግተ ችጝንኵኑን፤ ከቀሰው ጭሰጭሰነይዝም ይናኽዝቭድ ተሻሽልሽኩ።

³ግሪ ጭቨቅ እን ቀሰው ክውልየተድየንት ችጝነው ስፍረይዝቅ ኽየው ሚዝየነዝ ለምርነኵን።

⁴ዊገድ ግን ጭቕጘ ሲለሲጝቀ እጅጝዝ ዊግጠው ዊገድየንት ክቀስነይዝ ወሽተ ማጥን ጨወኵን።

⁵«እን እጅርድ ኣልሚል ፅበቍ ኣይዅዳኒዝቅ ፅውዘ ኣቕ ኽምዘ ጕይሳ፣ ቈሽም ናዝራን የነቍ መናፍቃኒዝ ኻልቀ ኣቕ ችጝሽኩ።

⁶መቅደስ ጝንድየንትም ኣርክስጠ ሚኵራንድ ችጝን ፃይኑን፤ ይናኽጊዝጘም ፊርድነ በንን ዊኑን።

⁷ዊተድሪዝ ኣዘተ ሉሲወስ ተር ኽየው ኻይልዝ ይናናኒስ ቀም ፊሱ፤ ጝት ኪሰቍድዛትም ክጐ ተርጥጘ ማጥን ኣዙ።

⁸ነስየ ክት ክቕም ሚርምርድር ጝት ኪስነው ዊገድቅ እማን ኣቐጘ ኣርቕትር» ዩ።

⁹ኣይዅዳንድም፦ «እን ዊገድየን እማን የጝ» ይጛ ክሲዝ ቲስመም።

¹⁰ኻግር ቅመተ ፊልክስም ባውሎስት ዊግትጠ ማጥን ጝናኒዝ ጣቅሳንድ ባውሎስ እንት የው ዊሱ፦ «እክሰው ኽየው ዝምኒስ ኪርምር እን ኻግሪዝ ቅመተ ኣረጘ ኣርቐኵን፤ ኣቓንስቅም ዲስተዝ የጝ ይተከላክልሸነድ ክበዊል ኣልሰውድ።

¹¹ሲግጨ እየሩሳልየም ፈት ፅጭ ሊጘ ግርቂስ ዲቋውም፤ እኒንትም ክቕም ደደደድስተ ቸልትር።

¹²ይት ኪሰቍድዛይ መቅደስ ጝኒስ ኣውጅቅቅ ተከራክርጫንድ፣ ምኵራቪስም ኣነ ኻትመይስ ኣውማው ስፍረይስቅ ኽዝቭ ጒሰጒሳንድ ችጚየቍም።

¹³ነን ይት ኪስጘዊዝቅ ክጭስ ማስረጀ ኣልሰነው ቸላቍም።

¹⁴ዊገድ ግን ጛይ መናፍቅነይ ይጘው ኣደረት ጒደነይዝ ይኣቅልዝ ኣምላክ እደረት ኣምልከኵን፤ ወሪትት ኽግዝመ ነቭያታነ መፃፋኒዝ ፃፍሸውድም እጝቅትቅ ኣምነኵን።

¹⁵ጛይ ቲስፈ ፃቭጛንትጘ ያንም ፃድቃኒዝመ ኽጥያትኝጢዝ ክርጘይስ ጕጥጘጘ እደረቲስ ቲስፈ ፃቀር የጝ።

¹⁶እንዝ ማጥን እደረስመ እጅርዝ በዊልቅ ንፅዅ ኽሊነ ፃቀር ኣጨ ልቕርጠኵን።

¹⁷«እየሩሳልየምስ ፊጠት እክሰው ዚምን ዲቈት ግረ ይዊግን ድኺዝ ይወነው እርዳተዝመ ሚቨዝ ፃቅ እየሩሳልየም ተጡን።

¹⁸መቅደስ ጝኒስም ዊር የነዊዝ ስረትድ ፋፅም እኒንት ፃቫ የጝ ጛይ ይት ችጘውድ፤ ኣይንድ ኽዝቭ ይጅቅ ኣኽቭሺየውም፤ ኽምዘም ጕይሺየውም።

¹⁹ዊገድ ግን እስየስ ተረቍ ላው ላው ኣይዅዳን እኵ፤ ጛይ ይት ኪሰነው ዊገ ፃይጝ ፅብጝሽ ጝታዊገድ ክበዊል ኣልሰነው ቸልጘኵ።

²⁰ዊንም እንል ፅበቍድ ሸጐዊል ኣልጣንድ ይጊስ ችጘው በደል ፅብሽ ነን ዊግትጝነ።

²¹እርግጥ ኣይንድ ይቃልድ ኣጕስ ሸር፦ ‹ክርጘይስ ጐነ የር ዊግጡዝ ንጭ ፊርድጥጘ ክታበዊል ችብጥኩን› የር ቓፅ ዊግጥኩን፤ እንዝለ ግን ላየ ፃቨው ዊገ እጀውም።»

²²ፊልክስ ግን ኣደረት ጒደነድ ዳኽነ ፃቭ ኣርቕ ዊናንስቅ፦ «ዊተድሪዝ ኣዘተ ሉሲወስ ተራንድ ክታዊገይዝ ውሳኒ ይውጭር» የው መለዝ ሲነቭሱ።

²³ጝት ሊሚደው ላዝ ኻልቀድየንትም፦ «ባውሎስት እቀጘ ኻርነይ ኪልክሊጝቀ ሊምጭ፤ ጝወደጃንድም ጥውጛ ዋቕርጛንድ ኪልክልተ» ዩ።

²⁴ዊትቍ ግርቅ ዲቍጘት ግረ ፊልክስ ድሩሲለ የነይ ኣይዅዳንወ ጝውነየንጅቅ ኣቕ ተሩ፤ ባውሎስትም ወኽኒ ጝኒስ ጭጝስ እየሱስ ክርስቶስት ኣምነነዊዝቍዝ ዊግታንድ ወሹ።

²⁵ፊልክስም ባውሎስ ፅድቅዝቍዝመ ጛቕምት ቅመነውዝቍዝ፣ ተረው ፍርዲዝቍዝም ዊግታንድ ጐውት፦ «ነንትውድ ኣጥጘች፤ ሚቻንድ ላየ ግርየዝ ጭጝስጭር» የው ዊስ በርሱ።

²⁶ፊልክስም ባውሎስ ጕበው ነይጡ የው ቲስፈ ፃቫንስቅ ንቕፀቍ ግርቅ ጭጝሳ ዊግሳ ዊኑ።

²⁷ሊጘ ምት ኣቐት ግረ በርቅዮስ ፊስጠውስ ፊልክስት ልኲል ቲኪሹ፤ ፊልክስም ኣይዅዳንድ ዲስ ሽጠ በን ባውሎስት እፁሸጘ በሩ።