Read xamtanga ኻወርየታኒዙ ሰቭ 25 Bible Online

ኻወርየታኒዙ ሰቭ 25 - xamtanga bible

ኻወርየታኒዙ ሰቭ 25

¹ፊስጠውስም ጝቅምቲል ጥው ሻቘ ግርቅ ሳብጠት ግረ፣ ቂሳርየስ ጕ እየሩሳልየም ፊሩ።

²ካኽነጣነ ኻልቅጢዝመ ኣይዅዳኒዝ ሽመቅልድም ፊስጠውስትል ኣልትጝ ባውሎስት ኪስ።

³ጛጭስም ኣድልው ባውሎስት እየሩሳልየም ነስጠ ማጥን ኪው ሽጝ ጨው፤ እንት ይጘውድም ጒደነይል ጭቭርጝ ባውሎስት ቁጥጘ በንጝ የጝ።

⁴ፊስጠውስ ግን፦ «ባውሎስ ቂሳርየ ወኽኒ ጝንል እፁሽ የጝ ፅበውድ፤ ያንም ነን ቃዝየዝ ዋጥር ፊጨ የጝ።

⁵እንዝ ማጥን ክታስልጣን ጕይጥድ ይጅቅ ቂሳርየ ተርጝ ባውሎስ ቢድለው በደል ፅብሽ ጝጊስ ኪስጝነ» የው ዊሱ።

⁶ፊስጠውስም ሰውጠ ዊንም ፅቃ ኣጥጘ ግርቅ ጛጅቅ ሳብጠት ግረ ቂሳርየ ጊሙ፤ ጛምርሲዝም ችለውትል ጐይ፦ «ባውሎስት ነስጥን» የው ኣዙ።

⁷ባውሎስም ኣልታንድ እየሩሳልየምስ ተረቍ ኣይዅዳንድ ጝት ኪብጝ ችብርጝ ማስረጀ ችጛይጘቍ ንቕፀቍ ኻይልቍ ክሳን ኣልስ።

⁸ባውሎስም፦ «ያን ኣይዅዳኒዝ ኽግድም ኣነ መቅደስ ጝንድ ዊንም ቂሳርት ቢድለው በደልም እጀር» የው ጝተከላክልሸነድ ኣልሱ።

⁹ፊስጠውስ ግን ኣይዅዳንድ ዲስ ሽጠ በን ባውሎስት፦ «እን ዊገድየንት እየሩሳልየም ፊትር ይበዊል ተፋርድሽተ በንረኵመ?» ዩ።

¹⁰ባውሎስ ግን፦ «ተፋርድጨ ጥውሸው ቂሳርት ፍርድ ወምበሪዝ በዊል ችብጥኩን፤ ክት ክቕምም ኣርቕራንትጘ ኣይዅዳንድዛት ውርም ቢድሊቀር።

¹¹በደለኘ ኣቕሽ፣ ዊንም ክርጘል ችጝዘው ጭቓ ዊገ ሰራጭ ፅብሽ፣ ክጠቅምም የቅ፤ ጛይ ይት ኪስጘው ክስድ ጊነ ኣቐውዝየ ግን ኣውማውቅ ይት ጛጭስ ዲቍስ ይውጠ ቸላውም፤ ቂሳርትል ይግቫኝ የርኩን» ዩ።

¹²ኣይንድም ፊስጠውስ ጝማኽረቲጅቅ ማኽርሽ በር፦ «ፈር ቂሳርትል ይግቫኝ ይረውዝየ ፊርትር» ዩ።

¹³ዊትቍ ግርቅዝ ግረ ንጕስ ኣግሪባስመ በርነቂስስ ፊስጠውስት ወዝ ዳኽነ ተትረት ይጥጘ ቂሳርየ ተር።

¹⁴ጝግልም ንቕፀቍ ግርቅ ሳብጥ፤ ፊስጠውስም ባውሎስት ዊገድ ጒ ኣግሪባስ እንት የው ድቁ፦ «ፊልክስ እፁ በረው ላው እጅር እንል እኩ።

¹⁵ያን እየሩሳልየም ፊጥ ዊናንድ ካኽነጣነ ኻልቅጢዝመ ኣይዅዳነ ሽመቅሊዝ እን እጅርድየንት ኪስጘዊዝ ዊገድ ጕይ ጝት ፊርድጨ ማጥን ጭቕጘ ኪው ሽጝ ጨው።

¹⁶ያን ግን፦ ‹ኪስሽተው እጅር ጝት ኪሰቊዝ በዊል ጅቭር ጝኪስሽተው ዊገይዝ ተከላክልሸነ ይዊጝቀ ዲቍስን ይወነው ረውማነ ስረትም ኣየው› የር ዊሱን።

¹⁷እንዝ ማጥን ኪሰጥድ እንል ተርጛንድ ያንም ደዪጝቀ ጛምርሲዝ ችለውትል ጐይ፦ ‹እድ እጅርድየንት ነስጥን› የር ኣዙን።

¹⁸ኪሰጥድ ግን ጝጋቢል ችብርጝ ዊግትጛንድ ያን ኣጡ የር ጊምት ዊነዊዝ ቝጠ ክስል ችጝዘው ዊገም ነሲየቍ።

¹⁹ዊገድ ግን በገዘ ጝታኻይማነውትዝመ ባውሎስ ጕኩ የው እየሱስ ይሽተው ክረው እጅሪዝቍዝ የጝ ተከራክርሽጛ ዊንጘውድ።

²⁰ያንም እን ዊገድየንት ኣወሽ ሚርምርጨጘድ ቺግርጫንስቅ ባውሎስት፦ ‹እየሩሳልየም ፊትር እን ዊገድ ጝግል ኣቕር ተከራክርሽተ በንረኵመ?› የር ዋቕሩን።

²¹ጘጝ ግን ጝዊገድ ቂሳርስ ቓሊስጠ በን ይግቫኝ ያንስቅ ቂሳር ትጐ በርስጪስቅ ወኽኒ ጝኒል ዊንጠ ማጥን ኣዙን።»

²²ኣግሪባም ፊስጠውስት፦ «ያንምቃል እድ እጅርድ ዊግታንድ ወጨ በና ዊኑን» ዩ፤ ፊስጠውስም፦ «ኣምር ወሽትር» ዩ።

²³ጛምርሲዝም ኣግሪባስመ በርኒቅየስ ጝታምጝግስታነው ኣልቨድ ሲርጝ ዊተድር ኣዘቲዝመ ኻትመይዝቍ መኳንንታኒዝ ኣጅቭሽጝ ኽየው ግርማ መጐስዝ ፍርድ ጝኒል ጥው፤ ፊስጠውስም ባውሎስት ጭጝስ ነስሱ።

²⁴እንት የውም ዊግቱ፦ «ንጕስ ኣግሪባወ! እንል ይናጅቅ ፅብርነቅ እቅድም እጝቅቅ! ነስየ ኣይዅዳንድ፦ ‹እን እጅርድ ርዅየዝ ፅብጠ ጥውሻውም› ይጛ ቓፅጛ እየሩሳልየምስም እኒስም ፊርድጨ ማጥን ዋቕርጘው እጅርድ እኒን ቓልድርነውድ የጝ።

²⁵ያን ግን ክርጘዝ ቐፃሰው ውርም በደል ችጚቀር፤ ጘጝ ቂሳር ትጐ ይግቫኝ ያንስቅ ረውምየ ትጐ በርስጨ ዊስንኩን።

²⁶ኣነጚ ጝማጥን ይኣደረ ቂሳርትል ፃፈነው ትክክልኘ ዊገ ችጚቀርም፤ ኣቓንስቅም ሚርምርሸት ግረ ፃፈነው ዊገ ችጝጨ በን ክታበዊል፣ እኒስ ዲቈም ንጕስ ኣግሪባወ! ክበዊል ኣልስኩን።

²⁷ምላሰንድም እፁሸው እጅር ንየቱ ኣካልል በርሰናንድ ጘጝ ኪስሽተዊዙ ምላሰንድ ጋልፂነውዝየ ኻጝልት የጝ።»