Read xamtanga ኻወርየታኒዙ ሰቭ 26 Bible Online

ኻወርየታኒዙ ሰቭ 26 - xamtanga bible

ኻወርየታኒዙ ሰቭ 26

¹ኣግሪባም ባውሎስት፦ «ክቕምት ማጥን ዊግትራንስ ፊቅድሽኩ» ዩ፤ ባውሎስም ጝናንጣንድ ዘርጋቕ እንት ያ ዊግትጠ ኪርሙ።

²«ንጕስ ኣግሪባወ! ኣይዅዳንድ ይት ኪስጘዊዙ ዊገድ እጝቅትቅ ዝርዝርዝ ክጭስ ድቈነው እድል ችጛንስቅ ጭቕጘ ዲስ የርኩን።

³ምላሰንድም ክት ኣይዅዳኒዙ ስረቲዝመ ክርክሪዝ ቐናዝር ኣርቕረር ኣራንስቅ የጝ፤ ኣቓንስቅም ዊግጣንድ ኣቕልዝ ወሽተ ማጥን ጨወኵን።

⁴«ገነ መሉሲጝቀ ኪርም እየሩስሳሌምስም ኣነ ይዊግኒዝ ማኽሊል ዊነው ይፅብጘድቅ ጛይ ቐናዝጝ ኣርቕጘኵ።

⁵እማንተውድ ዊግጥጘ በነቍ ኣጝሽ ይናኻማነውቲዙ ስረቲዝ ጣጝቅቅሸቍ ፈሪሳነ ዅሊዝጘ ኣቕ ፅበጘ በውጊስ ኪርምጝ ኣርቕጘኵ።

⁶ነንም እንል ኪስጭ ኣልጠውድ እደረ ይናኣቅሊዝ ይወው ቃል ኪዳኒዙ ቲስፈይዝቍዝ የጝ።

⁷እኒን ቃል ኪዳኒል ችጝጥጘ፣ ፅጭ ሊጘ ይናዊግንድ ኻር ጊርቅ እደረት ኣምልክጛ ቲስፈዝ ሊሚድጛ ዊን፤ ያንም ኣይዅዳኒዝ ኪስጨውድ እኒን ቲስፈይዝቍዝ የጝ።

⁸እደረ ክረቍድዛት ጒሰው ኣቐጘ ክታት ኣምንሰቅ የውድ ወረጘ የጝ?

⁹«ያን ይቕምም ናዝሪትቱ እየሱስት ሽድ ቐናዝ ተቃውምጭጨ ጥውሸኵ የር ኣምን ዊኑን።

¹⁰እየሩሳልየምስም እኒንት ፃቩን፤ ካኽነጣነ ኻልቅጢስም ስልጣን ለምጥ ንቕፀቍ ቅዱሳን እፁስኩን፤ ጛት ቁጛንድም ቍወቊጅቅ ቲስመምኩን።

¹¹እክሰው ግርየም ምኵራቭዝ ምኵራቭ ጅልዋ ቐፃሳ ጝታምንትድ ኻዲጥጘ ፃቭኩን፤ ጭቕጘም ቈጣጫ እለ ቢዘ ኻግራኒዝ ኻትምጢልቅ ቲክንክን ፊጣ ሲድሳ ዊኑን።

¹²«እን ውላይዝም ላው ግርየ ካኽነጣነ ኻልቅጢስ ስልጣንዝመ ትዛዝ ለምጥ ደማስቈ ትጐ ፊጣ ዊኑን።

¹³ኰረ ግቨሪዝም ጒደነይል ፅባ ንጕስወ! ይስመ ይጅቅ ዊነቊዝ ማኽሊል ኰረይስቅ ጭቕጘ ኣቭርቅርቀው ብርኻን ሲመይስ ምርቓንድ ቓሉን።

¹⁴ይንም እጝቅቅ ዝቨይል ሊቭን ፅብና እቭራይስጥ ቋቈዝ፦ ‹ሳውል! ሳውል! ውር ቃጥ የጝ ይት ሲድስረውድ? ቲክልሸው ሰለድ ደድር ችብትራን ክቕምስ ወስጡዋ!› የው ድመ ወጩን።

¹⁵ያንም፦ ‹ኣደረወ! ክት ኣው የጝ› ዩን፤ ጘጝም፦ ‹ያን ክት ሲድስረው እየሱስ የጝ።

¹⁶ነንም ጕር ክልኲዝ ችብጭ፤ ነን ይት ቓልደዊዝመ እንዝ ግረም ቓሊሰው ዊገይዝቅ ሚዝርድረር ኣገልጋይ ኣተ ማጥን ይምጨ በን የጝ ንጭ ክጭስ እትለውድ።

¹⁷እስራየልት ኽዝቪስመ ጝታጐ እፃጨ በነቍ ኣኽዛቫነ ናኒስቅ ቓዝጭር።

¹⁸ክትም ጝታእልጣንድ ብዝር ጥመይስ ብርኻኒዝጐ ፊስትር፤ ሲጣንዝ ቅምሸነዊስም እደረ ትጐ ዊስትር፤ ጛይም ጝታኽጥያቲስ ይቅር ይሽጥቍ፤ ይት ኣምነነውዝም ቅዱሳኒጅቅ ርስት ችጝጥቍ።›

¹⁹«ንጕስ ኣግሪባወ! እንዝ ማጥን ያንም ሲመይስ እትለውድየን ኣዛንድ እምቢ ዪይቀርም።

²⁰ዊገድ ግን በዊል ደማስቈ ፅበቍ እቅድ፥ እግረም እየሩሳልየምስመ ይዅዳት ኻግሪል ፅበቍድቅ ቈሽም ኣኽዛቫንድዛይቅ ንስኻ ጥውጝ እደረ ትጐ ዋጥርጥጘ ማጥን ክንሱን፤ ንስኻ ጥውጘጘ ቓሊሰው ሰቭ ፃቭጥጘ ማጥንም ድቁን።

²¹እንዝቍዝም ኣይዅዳንድ መቅደስ ጝኒል ፅባ ፃይጝ ቁጥጘ በን።

²²እደረት ከቨድ ግን ነን ኣሽ ይጊስ ቲቲየውም፤ ኣቓንስቅም ኽየቊዝም መልቊዝም ሚዝርጣ ችብጥዅን፤ ነቭያታኒዝመ ሙሴስ፦ ‹ኣጡ! ፋፅምሽጡ!› ይጝ ዊግትጘዊዝለ ላየ ዊገ ዊግጢቀርም።

²³ጛይም፦ ‹ክርስቶስ ሚከረ ለምርጡ፣ ክርጘይስ ጐነውዝም በወትረ ኣቕ ጕ ቓድትዙ ብርኻንድ እስራየልት ኽዝቪዝመ ኣኽዛቫኒዝ ሲቭክጡ› ይጝ ዊግትጝ ዊን።»

²⁴ባውሎስም እኒንት ዊግታ ሲጝቀ ፊስጠውስ ዊገድየንት ቀቭ ማኽሊል ጥው፦ «እፈ ባውሎስ! ነንስ ጕቝትሩ፤ ክክንድጚዙ ንቕፀድ ጕቝረነውል ችጝዝኩ» ዩ።

²⁵ባውሎስም እንት ዩ፦ «ኪብርደር ፊስጠውስወ! ያን እማንዝመ ትክክልኘ ዊገዝ ዊግጠኵንጚ ጕቝርትስ እጀርም።

²⁶እኒን ያን ዊግጠው ዊገድየንት ንጕስድ ኣርቘኵ፤ ኣቓንስቅም ጝበዊል ኣቕ ይእዘንድ እቻዝ ዊግጠኵን፤ ቈሽም እን ዊገድ ስውርዝ ፃቪነው ኣቓንስቅ ንጕሲስ ሲውርሽጡ የር ኻስቨቅም።

²⁷ንጕስ ኣግሪባወ! ነቭያታንድ ኣምንደኵ ኣየውመ? ኣምንደር ኣረጘ ኣርቐኵን» ዩ።

²⁸ኣግሪባም ባውሎስት፦ «እነሽር ይት ዊቱዝ ክርስቲያን ፃቭተ በንርመ?» ዩ።

²⁹ባውሎስም፦ «ዊቱዝም ኣነ ንቕፀቍዝ ክት ጭቝ ኣዪጝቀ ንጭ ይዊገድ ወሸቍድቅ እኒን ይእፅወድ ኣየት፣ ይጘ ኣጥጘ ማጥን እደረት ጨወኵን» ዩ።

³⁰እንዝ ግረ ንጕስድ፣ ኻግር ቅመተ ፊስጠውስስመ በርኒቅየስ ጛጅቅ ጐይጝ ዊነቍድም እጝቅቅ ጐይጘዊስ ጕ።

³¹ጝጊስ ጕጝ ፊርጛንድም ጛስ ጛይ፦ «እን እጅርድ እኳንስ ክረነውላ እፁሸነውል ችጝዘው ዊገም እጀው» ይ።

³²ኣግሪባም ፊስጠውስት፦ «እን እጅርድ ቂሳርትል ይግቫኝ ዪየው ኣቓን ኻርነይዝ ሊቅሽትጠ ዊኑ» ዩ።