Read xamtanga ኻወርየታኒዙ ሰቭ 28 Bible Online

ኻወርየታኒዙ ሰቭ 28 - xamtanga bible

ኻወርየታኒዙ ሰቭ 28

¹ዝቨል ዳኽነዝ ችጝነት ግረ ችጝነይ ደስየትሸን መላጥየ የነይ ኣረጘ ኣርቕኑን።

²ደስየትሸንትል ፅበቍ ኣረማውያንድም ይናጭስ ዲንቅሰው ደግነት ፃቭ፤ ኣይንድ ስወ ሊቭ ኪበ ዊናንስቅ ልየ ኻውሽጝ ለምር።

³ባውሎስም ንቕፀቍ ጭራር ሊቅማ ልየይል ድዋንድ ጭራረይል ዊነው ሲቭረ ልየይዝ ብረድ ወይሳንስቅ ጝጊስ ፍ ጝናኒል ጣጥምሹ።

⁴ደስየትሸንትቍ ኣረማውያንድም ሲቭረድ ባውሎስት ናኒል ጣጥምሽ ቓልጛንድ ጛስ ጛይ፦ «እን እጅርድ እማንም ኒቭስ ቍወተ የጝ! ባኽሪስ ዳኽነዝ ፈት እኳ ኣምላክት ፍርዲስ ኣምልጥ ርዅየዝ ፅበነው ቸሊየውም» ይ።

⁵ባውሎስ ግን ሲቭረድየንት ልየይል ኣርግፍ ማሉ፤ ውረውረ ቘጨም ችጚየው።

⁶እቅድም፦ «ነንስ ነን ጝሰውነትድ ኣቕርጡ፤ ዊንም ድጝግትዝ ክር ሊቭጡ» ይጛ ሊሚድጛ ዊን። ዊገድ ግን እክሰው ሰት ልሚድጝ ውረውረ ቘጨቅ ቺጚየው ኣቐጘ ቓልጛንድ ጝታኻሰቭድ ላውጥጝ፦ «እን እጅርድ ኣምላክ የጝ» ይ።

⁷ይን ዊነው ስፍረይዝ ጋቢል ደስየትሸንት ቅመው ብብልየስ የነው እጅሪዝ ስፍረ ዊኑ፤ እን እጅርድየን ይናት ኣቭንወ ለምር ሻቘ ግርቅ ሸገ ፃቭ ኣቭኑዙ።

⁸ኣይንድ ብብልየስ ቲር ብረዝመ ጐይተዝ ፅዊት ኽሪ ዊኑ፤ ባውሎስም ጝጐ ጥው ፃልይ በር ጝናንድየንት ፅዊተዊዝ ዲጊል እቝር ቓዙ።

⁹እነየው ዊገ ኣቐጘ ቓልጛንድንም ደስየትሸንትል ዊነቍ ላጥ ፅውዝጅንጥድቅ ተርጛ ቓድ።

¹⁰እቅድም ይናት ጭቕጘ ኪብርዝ፤ ፊርነ ኣስልሽናንድም ይናበንዘውድየንትቅ ሚርክቪል ድው።

¹¹ማልታት ደስየትሸንትል ሻቘ ርፍ ዲቍስነት ግረ፤ ጫረድ ጚ ደስየትሸንትል ጫቕ ዊነው እስክንድርየቱ ሚርክቪል ጥውን ጕኑን፤ ጘጝ ሚርክቪዝ ዲጊልም ዲየስቈረውስ የነቍ ማንጥ ኣምላካኒዙ ኣርመ ዊኑ።

¹²ስራኵስ ኻትመይል ችጝናንድም ጝግል ጥውን ሻቘ ግርቅ ጐይኑን።

¹³ጝጊስም ጕን ሚርክቭዝ ርየጊዩም ትጐ ችጝኑን፤ ጝግል ላው ግርየ ዲቍስን በርን ደቩቪዝ ፊግየ ጣዛንስቅ ጕን ሊጘትረ ግርየይዝ ቡቲሉስ ትጐ ፊርኑን።

¹⁴ቡቲሉስስም ምመናን ችጝናንስቅ ጝታጐ ጥውኑን፤ ጛይም ጛጅቅ ላጝጠ ግርቅ ሳብጥነ ማጥን ጨው፤ እንዝ ግረም ጕን ረውምየ ፊርኑን።

¹⁵ረውምየት ምመናንድም ይናተረነድ ወሽጛንድ ኣፍዩስ ፋሩስትል ኣሽመ፦ «ሻቘ ጨነ» የነው ስፍረይል ኣሽ ይናት ለምርጥጘ ተር። ባውሎስም ጛት ቓላንድ ዲብሽት እደረት ሚዝየንዙ።

¹⁶ረውምየ ችጝናንድም ባውሎስ ጝት ሊሚደው ዊተድረጅቅ ጝለ ጐይጠ ማጥን ፊቅድሹ።

¹⁷ሻቘ ግርቅ ኣቐት ግረ ባውሎስ ረውምየ ፅበቍ ኽየቍ ኽየቍ ኣይዅዳንድ ጝጐ ጭጝሱ፤ ጛይም ተርጝ ኣኽቭሽጛንድ እንት የው ዊግቱ፦ «ይፅንወ! ያን ይናኽዝቭድም ኣነ ይናኣቅሊዝ ስረቲል ፃቨው በደልም እጀር፤ ኣነጚ ውረውረቅ ፃቪጝቀ እየሩሳልየምስ እፅቍጝ ረውማኒዝ ዲቍስጝ ይው።

¹⁸ጛይም ሚርምርጝ ቍውሰው ሚንትርነ በደል ብጛንስቅ ኻርነይዝ በርስጥጘ በንጝ ዊን።

¹⁹ኣይዅዳንድ ግን፦ ‹ኻርነይዝ ሊቅሻውም› ይጝ እምቢ ይጛንድ ቂሳር ትጐ ይግቫኝ ይጨ ግድ ኣቑጚ ያን ይኽዝቭድ ኪሰው ዊገም ዊኒየው።

²⁰እንዝ ማጥን ክታት ቓልጨ፣ እኒንትም ድቍጨ በን የጝ ጭጝሰውድ፤ እኒን ሰንሰለቲዝ እፁጨውድ እስራየልት ቲስፈይዝቍዝ የጝ» ዩ።

²¹ጛይም፦ «ይዅዳ ኻግሪስ ክማጥን ፃፍሸው ደብዳቢ ይናጐ ችጚየውም፤ ጝጊስ ተረቍ እቂስም ክማጥን ጭቓ ጂጘ ነሰው ዊንም ዊግተው እጅርም እጀው።

²²ኣነጚ እኒን ክት ፃይረው ኻይማነውትድየንት ኻግረ ጨቨቅ ፅበቍ እቅድቅ ተቃውምሽጘው ኣቐጘ ኣርቕነኵን፤ ኣቓንስቅም ክኻሰቭድ ወረጘ ኣቐጘ ወሽነ በንነኵን» ይ።

²³ላየ ግርየዝም ዊግሽጥጘ ግርየ ቃፅርጝ ፊር፤ ግርየድ ችጛንድ ኣይዅዳንድ ንቕፀቍ ኣቕጝ ባውሎስ ፅበው ጝኒል ተር፤ ጘጝም ግረቨዝ ኪርም ኵኑ ኣሽ እደረት ምጝግስትት ኣቭራርዛ ሚዝርዱ፤ ወሪትት ኽግዝመ ነቭያታነ መፃፋንድዛትቅ ጣቅሳ እየሱስት ማጥን ኣስርድዝ ድቁ።

²⁴ኣይንድም ላው ላውድ ባውሎስ ዊግተውድየንት ኣምንጝ ለምር፤ ግቨርድ ግን ኣምኒየቍም።

²⁵ጛይም ጛስ ጛይ ቲስመሚጝቀ ቲተቲት። ባውሎስም ኻትሸነይዝ ላው ዊገ እንት የው ዊግቱ፦ «መንፈስ ቅዱስ ነቭይ ይሳያስት ምቸይዝ ይናኣቅሊዝ እንት የው ዊግተውድ ልክ የጝ።

²⁶‹እን ኽዝቪዝጐ ፊትር እንት ይር ድቍ፤ ወሸነውድስ ወሽርነኵ፤ ግን ኣስክሳይርነቅም፤ ቓለነውስ ቓልድርነኵ፤ ግን ልብ ያይርነቅም።

²⁷ምላሰንድም እን ኽዝቪዝ እዘንድ ዲንድንኩ፤ ጝታቀርዝጣንድም ዲቍርጝኵ፤ ጝታእልጣንድም ኻርቭጝኵ፤ እደሰለሰ ያን ቓዝጨ ማጥን ኣቈ፣ ጝታእልጣኒዝ ቓልጝ፣ ጝታቀርዝጣኒዝ ወሽጝ፣ ጝታእዘኒዝም ኣስክስጝ፣ ይጐ ዋጥርጥጘ ዊን!›

²⁸ነስየ እደረት ቓዝኒዙ እፃድ ኣኽዛቫኒዝጐ ፊረጘ ኣርቕጥን፤ ጛይም ቀሰው ይጝ ለምርጥቍ።»

²⁹ባውሎስም እኒንት ዊግተት ግረ ኣይዅዳንድ ጛስ ጛይ ጭቕጘ ተከራክርሽጛ ፍጝ ፊር።

³⁰ባውሎስም ክራይሸው ጝኒል ሊጘ ምት ጐዩ፤ ጝጐ ተረቍ እቅድቅ ዲስተዝ ለምራ ዊኑ።

³¹ኣውማውቅ ኪልክሊጝቀ እደረት ምጝግስትት ማጥን ዲፍር ሲቭካ እየሱስ ክርስቶስት ማጥን ግልፅልፅሸው ክንሳ ዊኑ።