Read xamtanga ኻወርየታኒዙ ሰቭ 3 Bible Online

ኻወርየታኒዙ ሰቭ 3 - xamtanga bible

ኻወርየታኒዙ ሰቭ 3

¹ላው ግርየ ቢጥሮስስመ ይዃንስስ ፀለውት ሰቲዝ መቅደሲዝጐ ፊርጛ ዊን፤ ሰትድም ፃይጨ ሰት ኣቕ ዊኑ።

²ኣይንድ እዅርሻንድ ኪርም ለውሻሽ ኣቕ እዅርሸው ላው እጅር ዊኑ፤ ጝትም መቅደሲል ጥወቍ ፈቊስቅ ምፅዋት ጨውጠ ማጥን እቅ መውርጝ ነስጛ ግሪ ጨቨቅ፦ «ቀስረይ» የነይ መቅደሲዝ ሚረየንትል እቝርጛ ዊን።

³ጘጝም ቢጥሮስስመ ይዃንስስ መቅደሲዝጐ ጥውጥጘ ጕጛንድ ቓል ጛጊስ ምፅዋት ጨዉ።

⁴ቢጥሮስም ይዃንስ ጅቅ ኣቕ፣ ጝት ትክ የው ቓል በር፦ «እስቲ ይናጐ ቓላ!» ዩ።

⁵ጘጝም ላው ሚንትርነ ነይጥቍ የው ማርቕፅ ጛት ጛት ቓልጠ ኪርሙ።

⁶ቢጥሮስም፦ «ዊርቀዝመ ቍርሸዝ እጀርም፤ ይፃቀውድ ግን ነቅጭር፤ ኣደረ እየሱስ ክርስቶስት ሽዝ ጕር ክልኲዝ ዋጥርጥር» ዩ።

⁷ዊስም ጘጝ እጅሪዙ ለወ ናንድ ፃይ ጒሱ፤ ኣይንድም ጝልኲዝመ ጝቍርጭምጭምቲዝ ፀናቑ።

⁸ፍር የውም ችብሩ፤ በውዝም ተግረነው ኪርሙ፤ እድጐስመ እንጐስም በጕራ፣ እደረትም ሚዝየንዛ ጛጅቅ መቅደሲል ጥዉ።

⁹ኽዝቭድም እጝቅቅ ጘጝ ተግራ እደረትም ሚዝየንዛ ዋጥርጥራንድ ቓል፣

¹⁰እንዝ ሚቅ፦ «ቀስረይ» የነይ መቅደሲዝ ሚረየንትንል ኣቕ ምፅዋት ጨዋ ዊነው እጅርድ ኣቐት ኣርቑ፤ ጝጭስ ኣቐው ዊገይዝቍዝም ጭቕጘ ጊርምሹ።

¹¹ቓደው ጨወረ እጅርድም ቢጥሮስስመ ይዃንስስታል ልቅጥ የው ፅባ ኽዝቭድቅ ጊርምሽ ጛይ ዊንጘው «ሰለሙንት ዋጥርጥረነ» ይሽተው ስፍረይዝጐ ውጥያ ተሩ።

¹²ቢጥሮስም እኒንት ቓላንድ እንት የው ክንሱ፦ «እፈ እስራየልት ኽዝቭ ክታትርነ! ውር ቃጥ የጝ እንዝ ጊርምሽርነውድ? ቈሽስ ውረይ ይናቕምት ኻይልዝመ ይን ሰራሽነው ቀሰው ሰቪዝ እን እጅርድ ቓዝነጘ ፃቭርን ይናት ትክ ይርን ቓልድርነውድ?

¹³ይናኣቅል ኣቭርኻም፣ ይሳቅ፣ ያይቈቭታ ኣምላክ ጝዅር እየሱስት ኪብርዙ፤ ክትን ግን ክርጠ ማጥን ክርጘል ዲቍስርን ይውርኑ፤ ቢላጠውስ እኳን እክስጠ በናን ክትን፦ ‹በናይነቅም› ይርኑ።

¹⁴ቅዱሲዝመ ፃድቂዝ ኻድይርን ኒቭስ ቍወተድየንት እክስጠ ማጥን ጨውርኑ።

¹⁵ርዅየ ችጝሸነድየንት ቍውርኑ፤ እደረ ግን ጝት ክርጘይስ ጕሱ፤ ይንም እን ዊገይዝ ሚዝረጫን የጝ።

¹⁶እኒን ክትን ቓልድርነው ኣርቕርነው እጅርድም ቓደውድ እየሱስት ሽዝ ችጝሸው እምንትዝ የጝ፤ እየሱስት ሽዝ ኣምናንስቅም ክትን እጝቅቅ ቓልድርናንትጘ ምሉ ትኽነ ችጝኩ።

¹⁷«ነንም ይፅን ክታችወ! ክትን እየሱስትል ችጝዝርነውድቅ ክታኻልቅጢዝጘ ኣርቒጝቀ ፀቭርነጘ ኣርቐኵን።

¹⁸እደረ ግን እንዝ ሚቅ፦ ‹ክርስቶስ ሚከረ ለምርጡ› የው ነቭያታኒዙ ምቸይዝ ዊግተጘ ፋፅሙ።

¹⁹ነስየ ክታኽጥያትድ ዲምስስሽጠ ማጥን ንስኻ ጥውርን እደረ ትጐ ዋጥርጥን።

²⁰ቈሽም እደረቲስ ዲብሽተነው ግርየ ክታጐ ተርጡ፤ እደረም በውርስ ክታጭስ ማርፀው መሲኽድየንት፣ የነትም እየሱስት ክታጐ እፃጡ።

²¹ጘጝም ሲመይ ዊነውድ እደረ በውርስ ቅዱሳን ነቭያታኒዙ ምቸይዝ ዊግተጘ እጝቅትቅ ኣይር ፃቭጢስቅ የጝ።

²²ሙሴም፦ ‹እደረ ኣምላክ ይት ጕሳንትጘ ክታፅኒዝ ማኽሊስ ነቭይ ጕስጡ፤ ጘጝ ድቈውድየንትቅ ወጭጥን።

²³እድየን ነቭይድ ድቈው ዊገድ ወሻው እጅርድቅ፣ ኽዝቪስ ቲት ድዝነ› የውኩ።

²⁴ሊጘትም ሳሙየልቲስ ኪርም ዊነቍ ነቭያታንድቅ እን ዚምኒዝ ማጥን ዊግትጝኵ።

²⁵ክትን ነቭያታነ ዅል የጝ፤ እኒዝጘም እድረ ኣቭርኻምስ፦ ‹ኣልሚዝ ኽዝቭድቅ ክዚረይዝ በርክሽጡ› የው ይናኣቅሊጅቅ ጥወው ቃል ኪዳኒዝ ዅል የጝ።

²⁶እንዝ ማጥንም እደረ ክታት ክታጭቕቲስቅ ዊሳ በርክጠ በን ጝዅርት ክታጭስ በርሱ።»