Read xamtanga ኻወርየታኒዙ ሰቭ 4 Bible Online

ኻወርየታኒዙ ሰቭ 4 - xamtanga bible

ኻወርየታኒዙ ሰቭ 4

¹ቢጥሮስስመ ይዃንስስ ኽዝቪዝ ዊግትጛ ሲጝቀ ካኽነጣኒዝመ[3] መቅደሲዝ ዘቨኝጢዝ ኻልቀይዝ፣ ሰዱቃንም ኣቕጝ ድጝግትዝ ጝታጐ ተር።

²ጛይም ኻወርየታንድዛይ ኽዝቪዝ እየሱስ ክርጘይስ ጐጘዝመ ጝቍዝም ክርጘይስ ጐነ ፅበጘ ክንስጙዝ ኻልክሽ።

³እንዝ ማጥን ቢጥሮስስመ ይዃንስስ ፃይ፤ ሰትድም ኵን ዊናንስቅ ቅሽጢስቅ ወኽኒ ጝኒል ጭስ።

⁴ኣነጚ ቢጥሮስታይ ዊግትጘው ቃልድ ወሸው ኽዝቪስ፣ ንቕፀቍ እቅ ኣምን፤ ኣምነቍ እቂስም ግልቍዙ እግዘድ ኣኰ ሽኺዝጐ ንየስ ዩ።

⁵ጛምርሲዝም ኣይዅዳነ ኻልቅጢዝመ ሽመቅሊዝ፣ ወሪትት ኽግ ክንሰጢዝም ኣቕጝ እየሩሳልየም ኣኽቭሽ።

⁶ኣኽቭሸቊዝ ማኽሊስም ካኽነጣነ ኻልቀ ኻነስመ ቀያፈስ፣ ይዃንስመ እስክንድረውስስ፣ ካኽነጣነ ኻልቀይዝ ዚምዳንድቅ ዊን።

⁷ጛይም ሊጘ ኻወርየታንድዛት ጝታማኽሊል ችብስጝ፦ «እኒንት ፃቭርነውድ ውርት ኻይልዝመ ኣውት ሽዝ የጝ?» ይጝ ዋቕር።

⁸ኣይንድም ቢጥሮስ መንፈስ ቅዱስዝ እቻቕ እንት የው ዊሱ፦ «እፈ ኽዝቭዝ ኻልቅጥዝመ ሽመቅልዝ ክታትርነ!

⁹ነን እኒን ለውሻሽ እጅሪዝ ኣቐው ቀሰው ዊገይዝቍመ ኣወይ ቓድጠ ቸለጘዝ ይን ዋቕርሽነውዝየ፣

¹⁰ክትን ሲቅልድርነው፣ እደረ ግን ክርጘይስ ጒሰው ናዝሪትቱ እየሱስ ክርስቶስት ሽዝ ቓድ ክታበዊል ችብረጘ ክትንም ኣነ እስራየልት ኽዝቭድቅ ኣርቕነ።

¹¹ክትን ግምብኝጥ ነቅርን ማልድርነው፣ እደረ ግን ማይዘንዝ ኣውር ፃቨው ቕርጘድ ጘጝ የጝ።

¹²ቓደነው ላየዝ ኣውማውዝቅ ችጝሻውም፤ ይን ቓድነ ማጥን እደረ እጅርዝ ይወው እን ሽⶔዝለ፣ ላየ ሽ ሲመይት ሳይስ እጀውም።»

¹³እቅድም ቢጥሮስስመ ይዃንስስ እነሽጝ ድፍርትዝ ዊግትጛንድ ወሽጛንድ፣ መፃፍ ክንዲየቍ መኻይማን ዊንጘጘ ኣርቕጛንስቅ ዲንቅሽ፤ እየሱስ ጅቅም ዊንጘጘ ኣርቕ።

¹⁴እድ ቓደው እጅርድም ጝግል ጛጅቅ ችብር ቓልጛንስቅ ዊግተነውድቅ ብ።

¹⁵እንዝ ማጥን ቢጥሮስስመ ይዃንስስ ሸጐዊስ ቢዘ ፊስጝ እነይጛ ማኽርኽርሽ፦

¹⁶«ነስየ እንዛይ እቅድዛት ውር ፃቭናን ቺዝጡ? እየሩሳልየም ፅበዊዝቅ እን እቂዝ ናኒዝ ፃቭሽተው ታምርድ ኣርቕሽትኩ፤ ኣቓንስቅም እኒንት ጭቭስን ኣዳዘነው ችልሻውም።

¹⁷ኣቕሽም እን ዊገድ ነስየ ኽዝቪልቅ ፈራቓ ፊራየጘ እን እቅድም ሊጘት ኣውማውስቅ እን ሽዝ ዊግታይጘጘ ጣጝቅቅስነ» ይ።

¹⁸ጛትም ጭጝጝ ሊጘት እየሱስት ሽዝ ኣውማስቅ ዊግታይጘጘ፣ ክንሳይጘጘም ኣዝ።

¹⁹ቢጥሮስስመ ይዃንስስታይ ግን ዊስጝ፦ «እደረስ ኣዚተነው በርን ክታጭስ ኣዚትነ እደረት በዊል ጥውሽጡመ? እስቲ ክታቕም ፊርድጥን!

²⁰ይንስ ቓልነዊዝመ ወሽነዊዝ ዊግተነውዝ እግርገም ያይነቅ» ይ።

²¹ጛይም ቢጥሮስስመ ይዃንስስታት ቐፃቐነው ምላሰን ብጛንስቅ ጐውስውስጝ በርጝ በርስ፤ ምላሰንድም ኽዝቭድ ኣቐው ዊገይዝቍዝ እደረት ሚዝየንዛ ዊናንስቅ የጝ።

²²እድ ቓደው እጅሪዝ እድሚድ ኣርቨ ምቲዝ ንየ ኣቕ ዊኑ።

²³ቢጥሮስስመ ይዃንስስም እኪርጘት ግረ ጝታፃምጢል ዋጥርጝ ካኽነጣነ ኻልቅጢዝመ ሽመቅሊዝ ዊግትጘውድየንትቅ ድቍ።

²⁴ጛይም እኒንት ወሽጛንድ ላው ኣቕጝ ጝታድመድ ኣጕስ ሽጝ እደረ ትጐ እንት ይጛ ፃልይ፦ «ሲመይስመ ዝቨስ፣ ባኽራኒዝመ ጝታኣቒል ፅበቍድቅ ፋጥርደር ልውል ኣደረወ!

²⁵ክኣገልጋይ ኣቐው ይናኣይር ዳዊትት ምቸይዝ መንፈስ ቅዱስዝ እንት ይር ዊግትርኵሩ፦ ‹ኣኽዛቫንድ ውር ቃጥ የጝ ኣጕርምርምጘውድ? ኽዝቭድስ ውር ቃጥ የጝ ጊነዝ ቃጥረውድ?

²⁶ዝቨት ንጕሳንድ ሲልፍሽ፤ ቅመትድም ላው ኣቕጝ ኣኽቭሽ፤ እደረትል ቈሽም ጝመሲኺል ፃለትነይዝ ጕ።›

²⁷«እርግጥም ኺረውድስስመ በንጥየንቱ ቢላጠውስስ፣ ኣኽዛቫንድም እስራየልት ኽዝቪጅቅ ላው ኣቕጝ እኝቸን ኻትመየትል ኣኽቭሽጝ ክት ቀቫረው ክዅር ቅዱስ እየሱስትል ፃለትነይዝ ጕ።

²⁸ጛይ እኒንትቅ ፃቭጘውድም ክቕም በገዘ ክኻይልዝመ ክፈቃድዝ ኽፅም ዊስንድር ዊንደውድየን ፋፅምሽጠ ማጥን የጝ።

²⁹ኣደረወ! ነንም ጛይ ጐውስውስጘውድየንት ቓል! ይን ክኣገልጋያንድ ክቃልድ ፍፅም ድፍርትዝ ዊግትነ ማጥን ፃቭ።

³⁰ክዅር ቅዱስ እየሱስት ሽዝም ቓዘነውዝመ ዲንቅሰቍ ታምራንዝ ፃቭተ ማጥን ክናንድ ዘርጋቕ» ይ።

³¹እነይጝ ፃልይጘት ግረ ጛይ ኣኽቭሽጝ ዊንጘው ጝንድ ናውፅውሽቱ፤ እጝቅቅም መንፈስ ቅዱስዝ እቻቝ፤ እደረት ቃልድየንትም ድፍረትዝ ዊግት።

³²ምመናንድም ላው እዘንዝመ ላው ኻሰቭዝ ቲስመመነውዝ ፅብጛ ዊን፤ ጝታፃይጘው ጊንዝቭድቅ ላብጠቱ ዊኑጚ ጛጊስ፦ «እኒን ይው የጝ» የው ላው እጅርም ዊኒየው።

³³ኻወርየታንድም ኣደረ እየሱስት ክርጘይስ ጐነድ ኽየው ኻይልዝ ሚዝርድጛ ዊን፤ ጝታእጝቅልቅም ኽየው እደረት ፃገ ዊኑ።

³⁴ቺዝጝ፣ ዊንም ጝን ፃየቍድቅ ቅይጛ ጊንዝቭድ ነስጛ ዊንጛንስቅ ጝታማኽሊል ቺግርሸውም ዊኒየው።

³⁵ጊንዝቭድም ነስጛ ኻወርየታኒዝ ልኲል እቝርጛ ዊን፤ ጛይም እጝቅዝቅ ጝበነዘዊዝጘ ኣድልጛ ዊን።

³⁶ላው ቈብረውስቱ ዮሴፍ ይሽተው ለዊት ዊግነ እጅር ዊኑ፤ ጝትም ኻወርየታንድ፦ ‹በርናቫስ› ይጝ ሽ ፊስ፤ ዲበሰዝ ዅር የነት የጝ።

³⁷ጘጝ እጅርድም ጝዝቨድ ቂ ጊንዝቭድ ኻወርየታኒዝ ይዉ።