Read xamtanga ኻወርየታኒዙ ሰቭ 5 Bible Online

ኻወርየታኒዙ ሰቭ 5 - xamtanga bible

ኻወርየታኒዙ ሰቭ 5

¹ኻናንየ ይሽተው ላው እጅር ሰቢረ ይሽትረይ ጝውነ ጅቅ ኣቕ ቺዝጝ ቅዩ።

²ጝውነም ኣርቕራጐስ ቅይሽ ችጝሸው ጊንዝቪስ ግቨርድ እዳዝ ግቨርድ ኻወርየታኒዝ ልኲል ፊስ እቝሩ።

³ቢጥሮስ ግን እንት ዩ፦ «ኻናንየ! መንፈስ ቅዱስት ኻጝስተ፣ ቅይሸው ጊንዝቪስም ግቨርድ እዳዝተ ማጥን ውርጘ ሲጣን ክእዘኒል ጥዉ!

⁴ቂዪጝቀ በውገ ክቕምቱ ዊኒየውመ? ቂረት ግረስ ኣቕሽ ጊንዝቭድ በገዘ ክቕምቱ ኣየውቀ? እደስለ ውር ቃጥ እነየው ዊገ ኻስቭሩ? ነን ኻጝስረውድ እደረትጚ እጅርም ኣየው» ዩ።

⁵ኻናንየም እኒንት ወሸጘ በውዝ ሊቭ ጝግል ክሩ፤ እኒንት ወሸቍድም እጝቅቅ ኽየው ጐውትዝ ስርሽ።

⁶ውርጋጥም ጕጝ እርሸድ ጊንዝጝ ፊስጝ ዲቭ።

⁷ሻቘ ሰት ኣጠ ዲቈት ግረ ጝውነ ኣቐው ዊገድቅ ኣርቒጝቀ ተትር ጥውች።

⁸ቢጥሮስም፦ «እስቲ ድቋ! ክታቺዝጝድየንት ቅይርነውድ እንቝጥጘዝመ?» የው ዋቕሩ፤ ጚይም፦ «የይ እንዛዝ የጝ» ይች።

⁹ጘጝም፦ «ኣደረት መንፈስድ ኻጝስትርነ ኣወይርን ቲስመምርኑ? እንወ ክጕርየት ዲቭጝ ዋጥረቍ እቅድ ሚረይል ችጝጝኵ፤ ክትም ፊስጝ ዲቭጥቍ» ዩ።

¹⁰ጚይም በውዝ ጝልኲል ሊቭር ክርች፤ ውርጋጥድም ጥውጛንድ ክትር ዊንች፤ ጛይም ፊስጝ ጝርጕርየት ጋቢል ዲቭ።

¹¹ምመናንድም ኣጝነ እኒን ዊገድ ወሸቍ እቅድቅ ኽየው ጐውትዝ ስርሽ።

¹²ኻወርየታኒዝ ናኒዝም ንቕፀቍ ዲንቅሰቍ ታምራን ፃቭሽትጛ ዊን፤ ምመናንም እጝቅቅ ላው ኣቕጝ «ሰለሙንት ሚረ» የነይ ዋጥርጥረነየንትል ኣኽቭሽጛ ዊን።

¹³ጛዝለ ላጥ እቂስ ጛጅቅ ዲቭልቅሽጠ ዲፍረው ኣውማው እጅርም ዊኒየው፤ ኣነጚ ኽዝቭድቅ ጛት ኪብርዛ ዊኑ።

¹⁴ንቕፀቍ እቍንዝመ ግልቍዝም ኣደረት ኣምንጛ ግሪ ጨቨቅ ጛግል ቈሺትጛ ዊን።

¹⁵እንዝ ማጥን ቢጥሮስ ጝዝ ዲቋንድ ጝፃመድ እኳ ላው ላዊል ሊቭጠ ማጥን ይጝ ፅውዝጅንጥድዛት ኣረትዝመ ወሰከዝ መውርጛ ቢዘይል እቝርጛ ዊን።

¹⁶ቈሽም እየሩሳልየምት ጅልወይዝቍ ኻትምጢስ ፅውዝጅንጥዝመ ርኵሳን መንፈሳኒዝ ተሰቃይሸቍድዛትቅ ነሰጛ ንቕፀው ኽዝቭ ኣኽቭሻ ዊኑ፤ ተረቍድም እጝቅቅ ቓድጛ ዊን።

¹⁷ካኽነጣነ ኻልቀይዝመ ጝጅቅ ዊነቍ ሰዱቃኒዝ ዊግንድ ግን ጭቕጘ ቀኒጛንስቅ ፃለትነይዝ ጕ።

¹⁸ኻወርየታንድዛትም ፃይጝ ኽዝቪዙ ወኽኒ ጝኒል ጐይስ።

¹⁹እደረት መላክ ግን ኻሪዝ ወኽኒ ጝኒዙ ቢለድ ብዝ፦

²⁰«ፊጥን መቅደስ ጝኒዙ ኣደቫቫይል ችብትርን እኒን ርዅየዙ ቃልድየንት ኽዝቪዝ ድቍጥን» ዩ።

²¹ኻወርየታንድም መላክድ ኣዘጘ ቅሸነይዝ ጕጝ ፊርጝ መቅደሲዝ ኣደቫቫይል ችብርጝ ኽዝቪዝ ክንሰነው ኪርም። ካኽነጣነ ኻልቀይዝመ ጝጅቅ ዊነቊዝ ግን ተርጝ ኣይዅዳኒዙ ሸጐዊዝመ እስራየልት ሽመቅሊዝዛት እጝቅትቅ ላው ፃቭጝ ኣኽቭ፤ ኻወርየታንድዛትም ነስጥጘ ማጥን ወኽኒ ጝኒዝጐ እቅ እፃቕ።

²²እፃሸቍድም ወኽኒ ጝኒል ፊር፤ ኻወርየታንድዛት ግን ችጚየቍም፤ ዋጥርጝ ፊርጝም እንት ይጝ ድቍ፦

²³«ወኽኒ ጝንድ ኪው የው ቘልፍሸጘ፣ ዘቨኝጥድም ሚረይል ችብርጘጘ ችጝኑን፤ ብዝን ጥውናንድ ግን ኣቒል ላው እጅርም ችጚነቅ» ይ።

²⁴መቅደሲዝቍ ዊተድሪዝ ኣዘተይዝመ ካኽነጣነ ኻልቀይዝም እኒን ዊገድ ወሽጛንድ፦ «እን ዊገድ ወረጘ የጝ!» ይጛ ግራ ጥውጛንስቅ ጛቍዝ ዊግተነውድቅ ብ።

²⁵እንዝ ግረ ላው እጅር ተር፦ «እንወ ወኽኒ ጝንል ድውርነቍ እቅድዛይ መቅደስ ጝኒዙ ኣደቫቫይል ችብርጝ ኽዝቭድ ክንስጘኵ» የው ድቁ።

²⁶ዊተድሪዝ ኣዘተድም ዊተድር ፃይ ፊር ፃይጝ ነስ፤ ኣነጚ ኽዝቭድ ቕርጘዝ ድድባየጘ ጐውትጛንስቅ ኻይልዝ ኣዪጝቀ ኻጝስጛ መለዝ የጝ ነስጘውድ።

²⁷ኻወርየታንድዛትም ነስጝ ሸጐዊዝ ማኽሊል ችብስ፤ ካኽነጣነ ኻልቀድም እንት የው ዋቕሩ፦

²⁸«ሊጘት እየሱስት ሽዝ ክንሳይርነጘ ጣጝቅቅሲነቃ? ክትን ግን ክታክንድጚዝ እየሩሳልየም ኻትመድየንትቅ ችጝዝርኑ፤ ይናት እድ እጅሪዝ ብርቍ ፃቭትርነ በንርነኵ» ዩ።

²⁹ቢጥሮስስመ ላጥ ኻወርየታኒዝም እንት ይ፦ «እጅርዝ ኣዚተነዊስ እደረስ ኣዚትነ ጥውሸኵ!

³⁰ክትን ቃነል ሲቅልድርን ቍውርነው እየሱስት ይናኣቅልዝ ኣምላክ እደረ ክርጘይስ ጕሱ።

³¹እደረ እኒን እየሱስት እስራየላኒዝ ንስኻዝመ ኽጥያቲስ ይቅር ይሽተነውዝ ይውጠ ማጥን እጝቅት ንየቱ ቓዘተም ፃቭ ኪብርዝ ጝለዊል ጐይስኩ።

³²ይንም እን ዊገይዝ ሚዝረጫን የጝ። ቈሽም እደረ ጝጭስ ኣዚተቍዝ ይወው መንፈስ ቅዱስ ሚዝር የጝ» ይ።

³³ጛይም እኒንት ወሽጛንድ ጭቕጘ ቈጣሽ፤ ቍውጥጘም በን።

³⁴ዊገድ ግን ኽዝቪዝቅ ኪብረው ላው ገማልያል የነው ወሪትት ኽግ ክንሰተ ኣቐው ፈሪሳነው እጅር ጕ ሸጐዊዝ ማኽሊል ችብር ኻወርየታንድዛት ቢዘይል ፊስጝ ዊቱ ዊንዝጥጘ ማጥን ኣዙ።

³⁵ሸጐዊዝም እንት የው ዊግቱ፦ «እፈ እስራየልት እቅ ክታትርነ! እንዛይ እቂል ሚንትርነ ፃቭትርነ ኻስቨነዊስ በውገ ክታቕምስ ጣጝቅቅጭጥን።

³⁶እንዝ ሚቅ ቲወዳስ የነው እጅር፦ ‹ያን ኽየር ኣጨ› የው ጕ ዊኑ፤ ሲዘ ላ ኣጥጘ እቅም ጝት ዲግፍጝ ቲክንጝ ዊን፤ ዊገድ ግን ጘጝም ክሩ፤ ጝት ቲክነቍድም ቢትንሽ፤ ዊገድም ዊኒየጘ ኣቕ እዳቑ።

³⁷እንዝ ግረ ቈሽ ኽዝቭ እጊታንት ኰሪዝ ይዅዳ የነው ገሊለቱ እጅር ጕ ንቕፀቍ እቅ ቲክንዝ ሺፍቱ፤ ኣነጚ ጘጝም ድዙ፤ ጝት ቲክንጝ ዊነቍድም ቢትንሽ።

³⁸እንዝ ማጥን ነንም ያን ክታት ዊግጠውድ፣ እንዛይ እቅድዛት በጥን ዳቕትርነ፤ ጛይ ሰራሽጘውድ እቀ ኻሰቭ ኣቕሽ ድዝጡ።

³⁹እደረት ኻሰቭ ኣቕሽ ግን ወሰገቨ እደረ ጅቅ ጐርትርነ ኣሽጚ ጛት ድስትርነ ቸላይርነቅም» ዩ።

⁴⁰ጛይም እኒን ምኽርድ ለምር፤ ኻወርየታንድዛትም ጭጝስጝ ጊርፍዝ፤ ሊጘትም እየሱስት ሽዝ ዊግታይጘጘ ጣጝቅቅስጝ በርጝ እክስጝ በርስ።

⁴¹ኻወርየታንድም እየሱስት ሽዝ ውርድየት ለምረነውዝ ኣቭቃጛንስቅ ዲስ ይጛ ሸጐዊስ ፍጝ ፊር።

⁴²ግሪ ጨቨቅም መቅደስ ጝኒስም ኣነ ኪውዝ ኪውቅ እየሱስ ጘጝ ክርስቶስ ኣቐጘ ሲቭከነውዝመ ክንሰነውዝ በርየቍም ዊን።