Read xamtanga ኻወርየታኒዙ ሰቭ 6 Bible Online

ኻወርየታኒዙ ሰቭ 6 - xamtanga bible

ኻወርየታኒዙ ሰቭ 6

¹ምመናኒዝ እግዘድ ንቕፃ ፊራ ዊነው ኣይንት ወራቲዝ፣ ግሪክስ ተረቍ ኣይዅዳንድ ይዅዳት ኻግሪዝቍ ኣይዅዳኒል ኣጕርምርም፤ ምላሰንድም ግሪ ጨቨቅ ኣድለነው እርዳተይስ ጝታልጀጊርዳንድዛት ቸለል ይጛ ዊንጛንስቅ የጝ።

²እንዝ ማጥን ፅጭ ሊጘ ኻወርየታንድዛይ እጝቅትቅ ኣኽቭጝ እንት ይ፦ «ይን መድ ኣድልነ ማጥን እደረት ቃልድ ክንሰነው በርነ ጥውሻውም።

³ይናፅን ክታችወ! ጝታባኽሪዙ ቀስነይዝ ሚዝርሽተቍ መንፈስ ቅዱስዝመ ጥቨቭዝ እቻቐቍ ላጝጠ እቅ ማርፅጥን፤ ይንም እኒን ሰቪል ጛት ይምንቅ።

⁴ይን ግን ፃልየነውዝመ እደረት ቃልድ ኣግልግለነውዝ ቲጊንቅ» ይ።

⁵እን ዊገድም ጝታእጝቅትቅ ዲስ ሹ፦ ኣቓንስቅም እምንትዝመ መንፈስ ቅዱስዝ እቻቐው እስጢፋነውስት፣ ፊልበውስት፣ ብረኰረስት፣ ኒቃሩነት፣ ጢመነት፣ በርምየናስመ ኣይዅዳነ ኻይማነውቲል ጥው ዊነው ኣንፀውኪየቱ ኒቈላወስት ማርፅ።

⁶እንዛትም ነስጝ ኻወርየታኒዝጐ ኣልስ፤ ጛይም ፃልይጝ ጝታናንጣንድዛት ጝታዲጊል እቝርጝ በርክ።

⁷እደረት ቃልድም ፈራቓ ፊሩ፤ እየሩሳልየምስም ምመናኒዙ እግዘድ ንቕፃ ፊሩ፤ ካኽነጣኒስም ንቕፀቍ ኣምንጝ ኣደረ ትጐ ዋጥር።

⁸እስጢፋነውስም ፃገዝመ ኻይልዝ እቻቕ ኽዝቪዝ ማኽሊዝ ታምራንዝመ ዲንቅሰቍ ምልክታንዝ ፃቫ ዊኑ።

⁹ኣይንድም «ኻርነይ ፈቊዙ» ይሽተው ምኵራቪዝቍ እቅ ቀርየነስ፣ እስክንድርየስ፣ ቈሽም ኪልቅየስመ እስየት ኣውራጅጢስቅ ተረቍ እቅ እስጢፋነውስት ተቃውምሽጛ ተከራክርሽጥጘ ኪርም።

¹⁰ኣነጚ እስጢፋነውስ ዊግታ ዊነው ጥቨቪዝመ መንፈሲዝ ተቋቍምሸነው ቸሊየቍም።

¹¹ኣይንድ፦ «ሙሴትም እደረትም ዛሻ ጭቕ ዊቅ ዊግታንድ ወሽንኵኑን» ይጝ ዊግተቍ እቅ ስውርዝ ኣስል።

¹²እንት ሽጝም ኽዝቭድየንት፣ ሽመቅልድዛት፣ ሙሴት ኽጊዝ ክንሰጥድዛትም ቂስቅስ፤ እስጢፋነውስትም ፃይጝ ሸጐዊል ኣልስ።

¹³እዛይ ኻሽትዝ ሚዝርድጥጘ ማጥን ኣስልጘቍ እቅድዛትም ነስጝ ችብስ፤ ጛይም፦ «እን እጅርድ እኒን ቅዱስ ስፍረድም ኣነ ወሪትት ኽግድየንት ዛሸነውድ ስሪስቅ በረለም።

¹⁴‹ናዝሪትቱ እየሱስ እኒን መቅደስ ጝንድ ፋዝጡ፣ ሙሴ ዲቍስ ነየው ይናስረትድየንትም ላውጥጡ› ያ ዊግታንድ ወሽንኵኑን» ይጛ ሚዝርድ።

¹⁵ሸጐዊል ጐይጝ ዊነቍድቅ እስጢፋነውስት ትክ ይጝ ቓልጛንድ ጝጋፅድ መላክ ተክ እትሉ።