Read xamtanga ኻወርየታኒዙ ሰቭ 7 Bible Online

ኻወርየታኒዙ ሰቭ 7 - xamtanga bible

ኻወርየታኒዙ ሰቭ 7

¹ካኽነጣነ ኻልቀድም እስጢፋነውስት፦ «እን ኪስሽትረው ዊገድ እማንመ?» የው ዋቕሩ።

²እስጢፋነውስም እንት የው ዊሱ፦ «ይፅንዝመ ይኣቅልዝ ክታችወ! ይናኣይር ኣቭርኻም ካራን ትጐ ተረነዊስ በውገ ገነ መስበጠውምየ ፅባ ክቭርዙ ኣምላክ እደረ ጝጭስ እትል፦

³‹ክኻግሪስ ፍር፣ ክዊግኒስም ቲትር፣ ያን ቓሊሰው ዝቨይዝጐ ፊጥ› ዩ።

⁴ጘጝም ከላውዲወንት ዝቨይስ ፍ ካራን ጐዩ፤ እግረም ጚር ክረት ግረ እደረ ቃው ነን ክትን ፅብርነው እን ኻግሪል ነሱ።

⁵ኣቕሽም ጝጊስ ላይ ፃብት ኵተ ዝቨትም ይዊየው፤ ዊገድ ግን ጘጝ ውርቅ ዅር እዅሪጝቀ ጝለ ፅባ፣ ጚ ዝቨየንት ጝጭስ፣ ጝዝግረም ጝዚረይዝ እርስት ፃቭ ይውጠ ቃል ጥዉ።

⁶እደረም እንደ ገነ እነይ ዊግቱ፦ ‹ክዚረድ ቀብራ ኻግርል ስድትኝጥ ኣቕጝ ፅብጥቍ፤ ሲዘ ላ ምትም ተሰቃይሽጛ በርነይዝ ቅምሽጥቍ።

⁷ኣነጚ እድየን በርነይዝ ቅመው ኽዝቭድየንት ቕፃርዝ ፊርድጭር፤ ጝዝግረ ጝጊስ ፍጝ እን ኻግሪል ኣቕጝ ይት ኣምልክጥቍ› ዩ።

⁸እንዝ ግረ ግዝርትዙ ኪዳን ይዉ፤ ኣቭርኻምም ይሳቅት እዅሩ፤ ሰውጠትረ ግርየይዝም ጊርዙ፤ እኒዝጘም ይሳቅ ያይቈቭት፣ ያይቈቭም ፅጭ ሊጘ ነገዲዝ ኣቅል ጝቝርድዛት ጊርዝ።

⁹«ያይቈቭት ቝር ይናኣቅልድም ጝታዝን ዮሴፍትል ቀንይጝ ግቭፅ ኻግሪል በርነይዝ ቅይጝ በርስ፤ እደረ ግን ጝጅቅ ዊኑ።

¹⁰ጝሚከረይስቅም ፊሱ፣ ግቭፅት ንጕስ ፈርወንት በዊልም መጐስዝመ ጥቨቭዝ ይዉ፤ ፈርወንም ግቭፅ ኻግሪል ጝጝኒዝቅ ኻልቀ ፃቭ ይሙ።

¹¹ኣይንት ኰሪዝም ግቭፅስመ ከናንት ኻግራኒልቅ ኽየው ኰር ግርየ ተሩ፤ ይናኣቅልድም ዀነው ብጝ ቺግርሽ።

¹²ያይቈቭም ግቭፅስ ኣር ችጝሽጘኵ የነው ጂጘ ወሻንድ ይናኣቅል ጝቝርት ሊን ግቭፅ ኻግሪል እፃቕ በርሱ።

¹³ሊጘት ፊርጛንድ ቈሽ ዮሴፍ ጝቕምት ጝፅንስ ኣርቕሱ፤ ፈርወንም ዮሴፍት ዊግንድዛት ኣርቑ።

¹⁴እንዝ ግረ ዮሴፍ ጚር ያይቈቭስመ ላጝጥርጝን ኣኰ ኣቐቍ ጝበተሰቭድቅ ጭጝስ ግቭፅ ኻግሪል ነሱ።

¹⁵ያይቈቭም ግቭፅ ትጐ ጊሙ፤ ጘጝም፣ ይናኣቅልድም ጝግል ክር።

¹⁶ጝታእርሸድም ሰክየም ፊስጝ ኣቭርኻም ኢሙርት ቝሪስ ጝቍርሻንዝ ጅቨው መቃቭሪል ዲቭ።

¹⁷«እደረ ኣቭርኻምስ ጥወው ቃል ኪዳንድ ፋፅምሸው ግርየድ ችጝጠ ጓንድ፣ ግቭፅ ዊነው ይናኽዝቭድ እቀጘ ንቕፃ ፊሩ።

¹⁸እንዝ ግረ ዮሴፍት ኣርቓው ላየ ንጕስ ግቭፅትል ኒግሱ።

¹⁹ጘጝም ይናዊግኒል ተኰልዝ ጕ እዅርሸቍ ኽፃናታድዛትቅ ክርጥጘ ማጥን ቢዘይል ፊስጛ ማልጥጘ ይናኣቅልድዛት ኣስገድድዙ።

²⁰ኣይንድም ሙሴ እዅርሹ፤ ጘጝም እደረት በዊል ዲስ ሸው ኽፃን ዊኑ፤ ጚርት ጝኒል ሻቘ ርፍ ሊግዙ።

²¹ቢዘ ማልሽታንድም ፈርወንት ቝረ ችጝር ጝርዅር ፃቭር ሊጊስች።

²²ሙሴም ግቭፅት ጥቨቭድቅ ክንዱ፤ ጝዊገይዝም ጝሰቪዝም በርታቑ።

²³«ጝእድሚድ ኣርቨ ምት ኣቓንድም ጝፅን እስራየላንድዛት ገቭስጠ በኑ።

²⁴እንዝ ግረ ላው ግቭፅቱ እጅር ጝዊግኒስ ላውድ ጣዛንድ ቓል፣ ቢድልሸው ጝዝኒዝ ከቭ እድ ግቭፅቱ እጅርድየንት ቍዉ።

²⁵ሙሴም፦ ‹እደረ ይግዝ ፃቭ ጛት ፊስጠጘድ ይፅን ልብትጥቍ› የው ኻስቫ ዊኑ፤ ጛይ ግን ልብቲየቍም።

²⁶ጝኣምርሲዝ ቈሽ ሊጘ እስራየላን ጛስ ጛይ ጐርትጛንድ ችጙ፤ ጛትም ኣርቅስጠ በን፦ ‹እፈ እቅ ክታትርነ ውረ ክትንሰ ዚን ኣይርነቅቀ እደስለ ውረ ክታስ ክታይ ጐርትርና?› ዩ።

²⁷ጛጊስም ጝዝንድየንትት ድድባ ዊነው ላውድ ሙሴት፦ ‹እግልፈ! ክት ውር ድውሱ? ክት ይናዲጊል ፊርደተ ደጘ ፃቭ ይመውድ ኣው የጝ?

²⁸ዊንስ ታትነ ግቭፅቱ እጅርድየንት ቁረጘ ይትም ቁተ በንርመ?› የው ትክቩ።

²⁹ሙሴም እኒን ዊገድ ወሸጘ ሰይ ምድያም ኻግሪል ስድትኘ ኣቕ ጐዩ፤ ጝጊስም ሊጘ ዅል እዅሩ።

³⁰«ጝግል ኣርቨ ምት ፅበት ግረም ሲነት ኣበይዙ በራኸይስ እደረት መላክ ልየዝ ኻውየው ቍጥቋጠይል ኣቕ ሙሴስ እትሉ።

³¹ሙሴም እኒንት ቓላንድ ጊርምሽ እን እትለውድየንት ቐናዝ ሚርምርጠ ኣልት ያንድ እደረት ድመድየን፦

³²‹ያን ክኣቅልዝ ኣምላክ ኣቭርኻምት ኣምላክ፣ ይሳቅት ኣምላክ፣ ያይቈቭት ኣምላክ የጝ› ዩ። ሙሴም ጐውትዝ ቀጥቀጥ ዩ፤ ትክ ይን ቓለነው ድፍርትም ችጚየውም።

³³እደረም፦ ‹ክፃብጣንድ ጭውዝ፤ ክት ችብትረይ ስፍረየን ቀድስሽትረይ ዝቨ ጚ።

³⁴ግቭፅ ፅበው ይኽዝቪዙ ሚከረድ እርግጥዝ ቓልኩን፤ ጝታጭጝቅቲዙ ሊዝድም ወጭኩን፤ ኣቓንስቅም ጛት ቓዝጨ ጊምኩን፤ ነንም ለው! ያን ክት ግቭፅ እፃጨ የጝ› ዩ።

³⁵«‹ይናዲጊል ፊርደተ ደጘ ፃቭ ክት ይመውድ ኣው የጝ?› ይጝ ኻዲጘው እኒን ሙሴት፣ እደረ ቍጥቋጠይል ኣቕ እስለው መላኪዝ ኣመካይነትዝ ታድገው ደጘ ፃቭ ጝታጐ እፃቑ።

³⁶ጘጝም ጛት ግቭፅስ ፊሱ፣ ግቭፅስ፣ እርትራት ባኽሪስመ ኽልም የው በራኸይስቅ ጊርምሰቍ ዊቅዝመ ታምርዝቍ ምልክታንዝ ፃቫ ኣርቨ ምት ቃዉ።

³⁷እስራየልት ኽዝቪዝም፦ ‹እደረ ይት ተከው ነቭይ ክታማኽሊስ ጕይስጡ› የው ዊግተውድ እኒን ሙሴ የጝ።

³⁸እን እጅርድ ሲነት ኣበይስ ዊግተው መላኪጅቅ፣ ይናኣቅሊጅቅም ኣቕ ኽልም የው በራኸይል ኣኽቭሽ ዊነው ኽዝቪጅቅ ዊነውድ የጝ፤ ርዅየዝቍ ቃላንድዛት እደረቲስ ለምር ይናጭስ ነየውድም እኒን ጝቕም የጝ።

³⁹«ይናኣቅልድ ግን ጝት ተቃውምሽጚ ጝጭስ ኣዚቲየቍም፤ ጝታእዘኒዝም ግቭፅ ትጐ ዋጥር።

⁴⁰ኣረውንትልም ፊርጝ፦ ‹ይናበው በዊል ፃጘቍ ኣምላካን ተሽ፤ ግቭፅስ ቃው ፊሰው እድየን ሙሴድ ውር ኣቐጘ ኣርቓይነቅም› ይ።

⁴¹ኣይንድም ኒውዙ ምስል ጣወት ተስጝ ምስዋይት ኣልስ፤ ጝታናኒዙ ሰቪዝም ዲስ ይ።

⁴²እደረ ግን ጛጊስ ቲቱ፤ ሲመይት ሰራዊተንድዛትም ኣምልክጥጘ ማጥን ዲቍስ ይዉ፤ እንም ነቭያታኒዙ መፃፊዝ፦ ‹እፈ እስራየልት ኽዝቭ ክታትርነ! ኣርቨ ምት ኽልም የው በራኸይል ዊንድርናንድ፣ ይጭስ ምስዋይትዝመ ሚቨዝ ኣልስርኑመ?

⁴³ኽሽስ ኣምልክትርነ ሰራሽርነቍ መለኵት ድⶖኳንዝመ «ረፈም» ይሽተው ክታጣወት ፅግለወይዝ ምስልድየንት ንየስ ንየስ ሽርኑ፤ ኣቓንስቅም ያን ቈሽ እለ ባቢሎንቲስ እድጐ መራሽርን ሲድሽትርነ ፃቭጭር› ይሽት ፃፍሽ ዊነጘ የጝ።

⁴⁴«እደረ ሙሴስ ቓሊሰው ምስሊዝ ሚስርትዝ ተሲትረይ ሚዝርዝወ ድⶖኳን ይናኣቅሊጅቅ በራኸይል ዊንች።

⁴⁵ይናኣቅልድም እኝቸን ድⶖኳንሸንት ለምርጘት ግረ፣ እደረ እየሱት ቃወትነይዝ ኣኽዛቫኒዝ ኻግራንድዛት ጛጭስ ዊርሳንድ ፃይጝ ጥው፤ ዳዊትት ዚምኒል ኣሽም ጝግል ፅብች።

⁴⁶ዳዊትም እደረት በዊል መጐስ ችጛንስቅ ያይቈቭት ኣምላክት ጨነ ጝን ተስጠ በን እደረት ጨዉ።

⁴⁷ዊገድ ግን እደረት ጨነ ጝን ተሰውድ ሰለሙን የጝ።

⁴⁸ኣነጚ እጝቅት ንየቱ እደረ እቀ ናንዝ ተሲተው ጝንል ፅባውም።

⁴⁹እንም ነቭይ፦ ‹ሲመይ ይዙፋን የጝ፤ ዝቨም ይልኲዝ ደደነ ጚ፤ እደስለ ኣወየው ጝን የጝ ይጭስ ተስርነውድ? ዊንስ ይጭስ ፈወነ ኣቐው ስፍረድ ኣውየን የጝ? የኵ ኣደረ።

⁵⁰እኒንትቅ ተስረይሸን ይናንሸን ኣይረይቀ?› የው ዊግተጘ የጝ።

⁵¹«እፈ ክታእዘንድ ዲፍንሸው፣ ክታቀርዝድም ወሻው ቕልመ ዲንድነቍ ክታትርነ! ክትንም ክታኣቅልታጘ መንፈስ ቅዱስት ዊትርቅ ተቃውምሽርነኵ።

⁵²ነቭያታኒስ ክታኣቅልድ ጅግዚጘውድ ኣው የጝ? ፃድቂዙ ተረነድየንት በውግስጝ ዊግተቍድዛት ቍዉ፤ ነን ቈሽ ክትን ጝት ዲቍስርን ይውርን ቍውርኑ።

⁵³መላካኒዝ ኣመካይነትዝ ወሪትት ኽግ ክታጭስ ነይሽታንም፣ ለምትርኑጚ ፋፅሚርነቅም።»

⁵⁴ሸጐዊዙ ኣኸቨይል ዊነቍድም እኒንት ወሽጛንድ ጭቕጘ ኻልክሽ፤ ጝታእርቍጣንድዛትም ገጫዝ።

⁵⁵እስጢፋነውስ ግን መንፈስ ቅዱስዝ እቻቕ ሲመይ ትጐ ትክ የው ቓላንድ እደረት ክቭርድየንት ቓሉ፤ እየሱስትም እደረት ለዊል ችብር ቓሉ።

⁵⁶እንዝ ማጥን፦ «እንወ ሲመይ ቢት እጅር ዅርም እደረት ለዊል ችብር ቓለኵን!» ዩ።

⁵⁷ኣይንድም ጝታድመድ ኣጕስ ሽጝ ቓፅጛ ጝታቀርዝጣንድ ዲቭጝ ላው ኣቕጝ ጘጝ ፅበዊዝጐ ውጢጛ ፊር።

⁵⁸ኻትመይስ ቢዘ ፊስጝም ዲጕጥዝ ድድብጥጘ ኪርም፤ ጝግል ዊነቍ ሚዝረጫንም ጝታኣልብድዛት ሊሚድጠ ማጥን ሳውል የነው ውርጋጠዝ ልኲል እቝር።

⁵⁹እስጢፋነውስም ዲጕጢዝ ድድብሻ ሲጝቀ፦ «ኣደረ እየሱስወ! ይኒፍስሸንት ለምጫ!» ያ ፃልዩ።

⁶⁰ኣይንድም ግርቨቭሽ ጝድመድ ኣጕስ ሸው ኣደረወ! እኒን ጝታኽጥያትድየንት እግዝተ! የው ዊግቱ፤ እኒንት የው ዊግተጘም በውዝ ክሩ፤ ሳውልም እስጢፋነውስት ክርጘይዝ ቲስመም ዊኑ።