Read xamtanga ኻወርየታኒዙ ሰቭ 8 Bible Online

ኻወርየታኒዙ ሰቭ 8 - xamtanga bible

ኻወርየታኒዙ ሰቭ 8

¹ኣይንድም እየሩሳልየም ዊነቍ ምመናኒል ኽየው ስድት ተሩ፤ ኻወርየታንድ ጭቝ እዳጛንድ ላጥድ እጝቅቅ ይዅዳስመ ሰማርየስታግልቅ ቢትንሽ።

²መንፈሳዊያን ኣቐቍ እቅም እስጢፋነውስት ዲቭ፤ ኽየው ሊዝም ሊዝ።

³ሳውል ግን ምመናንድዛት ድስጠ ከምሽ ጉ፤ ጝንዝ ጝን ጥዋ እውነ ግልወድየንትቅ ጒዛ ወኽኒ ጝንል ድዋ ዊኑ።

⁴ሲድሽሸቍ ምመናንድም ችጘው ብጣይልቅ እደረት ቃልድ ሲቭክ።

⁵ፊልበውስም ሰማርየት ኻትመይል ፊር ክርስቶስት ሲቭኩ።

⁶ንቕፀው ኽዝቭም ፊልበውስ ዊግተው ዊገድ ወሻንድ፣ ጘጝ ፃቫ ዊነቍ ታምራንድም ቓላንድ፣ እጝቅቅ ላው እዘን ኣቕ ኣስክስ ወሹ።

⁷ርኵሳን መንፈሳንድም ጝታድመድ ኣጕስ ሽጝ ቓፅጛ ንቕፀቍ እቂስ ፍጛ ዊን፤ ንቕፀቍ ለውሻሻንዝመ ኻካዛንዝም ቓድጛ ዊን።

⁸ኣቓንስቅም ጚ ኻትመየንትል ኽየው ዲስተ ኣቑ።

⁹ዊገድ ግን እንዝ ሚቅ ኣስማት ፃቫ ሰማርየት ኽዝቭድቅ ጊርምሳ ዊነው ሲሙን የነው ላው እጅር ዊኑ፤ ጘጝም፦ «ያን ኽየር የጝ» ያ ዊግታ ዊኑ።

¹⁰ኽየው እጥንድቅም እጝቅ፦ «እን እጅርድ ኽየው እደረት ኻይልድ የጝ» ያ ጝት ወሻ ዊኑ።

¹¹እክሰው ግርየም ጥቈለዝ ጊርምሳንስቅ ኣንክርሻ ቲክና ዊኑ።

¹²ዊገድ ግን ፊልበውስ እደረት ምጝግስትዝመ እየሱስ ክርስቶስት ሽዝ ኣምነነውዝ ሲቭከውድየንት ወሽጛንድ ግልቍድም እቍንድም ኣምንጝ ጣምቅሽ።

¹³ጝቕም ሲሙንም ኣምን ጣምቅሹ፤ ፊልበውስ ጅቅም ተቫቭርሽጠ ኪርሙ፤ ጘጝ ፃቨቍ ዲንቅሰቍ ታምራኒዝመ ምልክታኒዝም ቓላ ጭቕጘ ጊርምሹ።

¹⁴እየሩሳልየም ዊነቍ ኻወርየታንድም ሰማርየት እቅድ እደረት ቃልድ ለምርጘጘ ወሽጛንድ ቢጥሮስስመ ይዃንስስ ጝታጐ እፃቕ።

¹⁵ጛይም ጝግል ችጛንድ መንፈስ ቅዱስት ለምርጥጘ ማጥን ሰማርየት እቂዝ ፃልይ።

¹⁶ምላሰንድም ሰማርየት እቅድ እየሱስት ሽዝ ጣምቅሽጝ ዊንጚ መንፈስ ቅዱስ ገነ ጛጊስ ላው እጅርል እኳ ጊሚየውም ዊኑ።

¹⁷እንዝ ማጥን ቢጥሮስስመ ይዃንስስ ጝታናንጣንድዛት ጛታዲጊል እቝር፤ ጛይም ኣይንድ መንፈስ ቅዱስት ለምር።

¹⁸ሲሙንም ኻወርየታንድ ጝታናንጣንድ ጛታዲጊል እቝርጘቍ እቅድቅ መንፈስ ቅዱስት ለምርጛንድ ቓል ጛጭስ ቍርሻን ፃይ ተር፦

¹⁹«ይናንድ ጝዲጊል እቝረው እጅርድየንቅ መንፈስ ቅዱስት ለምርጠ ማጥን ይጭስም እኒን ስልጣንድ ነቅጥን» ዩ።

²⁰ቢጥሮስ ግን፦ «እደረት ይውትድየንት ጊንዝቭዝ ጅቭተ በንርኵሩ፤ ኣቓንስቅም ክኪንዝቭድ ክቕም ጅቅ ድዝነ።

²¹ክእዘንድ እደረት በዊል ጭቅየውም ኣየው፤ ኣቓንስቅም ክት እን ዊገይስ እድል ፊንተ እጅረርም።

²²ነንም እን ክጭቕቲስ ኣኑሽር ንስኻ ጢ፤ ምናልቫች ክእዘኒዝ ኻስቭረውድየንት ይቅር ይጡ ኣቕሽ እደረት ጨው።

²³ምላሰንድም ማረው ቅንየዝ እቻቕር ኣመፂዙ ሰንሰለትዝ እፁሽረጘ ቓለኵን» ዩ።

²⁴ሲሙንም፦ «እን ዊግትረዊስቅ ሚንትርነ ይግል ችጛየጘ ክታቕም ይማጥን ኣደረት ጨውጥን» ዩ።

²⁵ቢጥሮስስመ ይዃንስስም እደረት ቃልድ ሚዝርድጝ ቐናዝጝም ድቍጘት ግረ ንቕፀቍ ሰማርየት ኻግራኒልቅ ወንጌል ሲቭክጛ እየሩሳልየም ዋጥር።

²⁶ኣደረት መላክም ፊልበውስት፦ «ጕር እየሩሳልየምስ ደቩቭዝጐቱ ፃቭር ጋዘ ትጐ ጊምዘው በራኸይዙ ጒደነይዝ ፊጥ» ዩ።

²⁷ጘጝም ጕ ፊሩ። ጒደነይስም ላው ኽንደክየ የነይ የጥብየት ንግስትት ባለሟል፣ ጝርጊንዝቪልቅም ይምሸው ኣዘተ ጀንደረቨ እጅር ችጙ፤ ጘጝ እጅርድየን እየሩሳልየም ሲግድጠ ፊር ዊኑ።

²⁸እየሩሳልየምስም ዋጥራንድ ጝሰረገለይል ጐይ ነቭይ ይሳያስት መፃፍድ እንቭቫ ዊኑ።

²⁹ኣይንድ መንፈስ ቅዱስ ፊልበውስት፦ «ፊጥ እኒን ሰረገለይል ኣልትር ዲምቅጭ» ዩ።

³⁰ፊልበውስም ውጢ ሰረገለይል ኣልት ዲምቅሽ በር፦ «እኒን ኣንቭቭረው መፃፊዙ ጝትርጕምድየንት ኣርቕረኵመ?» ዩ።

³¹ጀንደረቨድም፦ «ኣስርድዘው እጅር ችጚጝቀ ኣወሽ ኣርቕጨ?» ዩ፤ ፊልበውስትም፦ «ለው እንል ሰረገለይል ክብይር ጐይ» የው ጨዉ።

³²ጀንደረቨድ ኣንቭቫ ዊነው መፃፊዙ ቃልድም እንት የውድ ዊኑ፦ «ዝውጥነ ሸመነው ቢገይዝጘ ሸምሹ፤ ጝፅቭቀድ ቀቭጛንድ ዝም የው ቃፉሪዝጘ፣ ጘጝም ጝምቸድ ብዚየውም።

³³ተዋርድሹ፤ ጭቅ የው ፍርድም ችጚየውም፤ ጝርዅየድ ዝቨቲስ እክልስጝኵ፤ ኣቓንስቅም ጝዚረዝቍዝ ዊግትጠ ቸለውም እጀው።»

³⁴ጀንደረቨድም ፊልበውስት፦ «ነቭይድ እኒንት ዊግተውድ ኣውት ማጥን የጝ? ጝቕምት ማጥንመ ዊንስ ላየ እጅርዝ ማጥን የጝ? ኣለቀይ ድቍ» ዩ።

³⁵ፊልበውስም ኣይንድ ዊግትጠ ኪርሙ፤ ጘጝ መፃፊዙ ቃሊስ ኪርም፣ እየሱስት ማጥን ወንጌልድ ሲቭኩ።

³⁶ፃጛም ኣቝ ፃየው ስፍረል ችጝ፤ ጀንደረቨድም፦ «እንወ እንል ኣቝ እኩ፤ እደስለ ጣምቅጫይቀጘ ይት ኪልክለው ዊገድ ወረጘ የጝ?» ዩ።

³⁷ፊልበውስም፦ «ክፍፅም እዘኒዝ ኣምንደውዝየ ጣምቅሸነው ቸልደኵ» ዩ፤ ጘጝም፦ «እየሱስ ክርስቶስ እደረት ዅር ኣቐጘ ኣምነኵን» ዩ።

³⁸ሰረገለድየንትም ችብርጠ ማጥን ኣዙ፤ ጝታቪልም ኣቕጝ፣ ኣቚል ጊም፤ ፊልበውስም ጀንደረቨድየንት ጣምቁ።

³⁹ኣቚስም ፍጛንድ መንፈስ ቅዱስ ፊልበውስት ናጥቅ ፊሱ፤ ጀንደረቨድየንም ጝዝለ ሊጘት ቓሊየውም፤ ኣቕሽም ኽየው ዲስተዝ ጝጒደነድ ፊሩ።

⁴⁰ፊልበውስ ግን ኣዛጠውንስ ችጝሹ፤ ቂሳርየ ችጝጢስቅም ጅልዋ ኻትምጢዝቅ ወንጌልድየንት ሲቭካ ዊኑ።