Read xamtanga ኻወርየታኒዙ ሰቭ 9 Bible Online

ኻወርየታኒዙ ሰቭ 9 - xamtanga bible

ኻወርየታኒዙ ሰቭ 9

¹ሳውል ግን ነኳን ኣሽ ኣደረት ምመናንድዛት ቍውጠ ፊክራ፣ ነንም ካኽነጣነ ኻልቀይል ፊሩ።

²ኣደረት ጒደነድ ቲክነቍ ግልቍም ኣጝነ እቍን ጝጊስ ችጝሽ፣ እፅቋ እየሩሳልየም ትጐ ነስጠ በን ደማስቈ ፅበቍ ምኵራቫኒዝ ደብዳቢ ፃፍጠ ማጥን ካኽነጣነ ኻልቀድየንት ጨዉ።

³ፊራም ደማስቈ ትጐ ችጝጠ ጓንድ፣ ድጝግት ጝጅልወይል ሲመይስ ብርኻን ምርቑ።

⁴ጘጝም ዝቨይል ሊቩ፤ ኣይንድም፦ «ሳውል! ሳውል! ውር ቃጥ የጝ ይት ሲድስረውድ?» የው ድመ ወሹ።

⁵ሳውልም፦ «ኣደረወ! ክት ኣው የጝ?» ዩ። ጘጝም፦ «ያን ክት ሲድስረው እየሱስ የጝ፤ ሰለይዙ ጫፍድ ደድር ችብትራን ክቕምስ ወስጡዋ!» ዩ።

⁶ጘጝም ዲንቅሻ፣ ጐውትዝም ቈጥቈጥ ያ፦ «ኣደረወ! ነን ውር ፃቫንስ በንረኵ?» ዩ። ኣደረም፦ «ጕር ኻትመይል ጢ፤ ክት ፃቭተ ጥውሸውድየንትቅ ጝጊስ ድቍጥቍ» ዩ።

⁷ሳውል ጅቅ ፃጛ ዊነቍ እቅድ ግን፣ ድመድ ውሽጛ ኣውማውትቅ ቓሊየቍም። ኣቓንስቅም ዊግተነውቅ ብጛንስቅ ድደይዝጘ ኣቕጝ ችብር።

⁸ሳውልም ሊቨው ስፍረይስ ጕ ጝልጣንድ ብዛንድ ውረውረም ቓለነው ቸልየው፤ ኣቓንስቅም ጝናንድ ፃይጝ ቃውጛ ደማስቈ ኻትመይል ችጝዝ።

⁹ሻቘ ግርቅም ውረውረቅ ዂጝቀ ዝዪይጝቀ ኻርቭ ሳብጡ።

¹⁰ደማስቈስም ኻናንየ የነው ላው ኣደረት ክንደተ ዊኑ፤ ኣደረም፦ «ኻናንየ!» የው ጭጙ፤ ጘጝም፦ «ኣደረወ! እንወ እኩና!» ዩ።

¹¹ኣደረም፦ «ጕ፤ ‹ጭቅ የው› ይሽተው ጒደነይዝ ፃቭር ይዅዳ የነው እጅሪዝ ጝኒል ሳውል ይሽተው ላው ጠርሲስቱ እጅር ደምዝ፤ ጘጝ ጝግል ኣቕ ፃልያ ጐይኩ።

¹²ቈሽም ኻናንየ የነው እጅር ጘጝ ፅበው ስፍረይል ተር ጝናንድ ጝዲጊል እቝራንድ ጝልጣንድ ቢትጥጘት እትለዝ ቓልኩ» ዩ።

¹³ኻናንየም፦ «ኣደረወ! እን እጅርድ እየሩሳልየም ፅበቍ ክቅዱሳኒል ውር ቝጠ ቘጨ ችጝዘጘ ንቕፀቍ እቂስ ወጭኩን።

¹⁴ነንም ኣሽ ክሽድ ጭጘቍድዛትቅ እፁጠ ማጥን ካኽነጣነ ኻልቅጢስ ስልጣን ለምር የጝ እንል ተረውድ» ዩ።

¹⁵ኣደረም፦ «ዝም ይር ፊጥ፤ እን እጅርድ ኣኽዛቫኒዝመ ንጕሳኒዝ፣ ቈሽም እስራየልት ኽዝቪዝ በዊልቅ ይሽድ መውርጠ ማጥን ይቕምስ ማርፅኩን።

¹⁶ያንም ይሽዝ ዋቐ ሚከረ ለምርጠጘ ቓሊስጭር» ዩ።

¹⁷ኻናንየም እድ ኣዚተው ጝኒል ፊር ጥዉ፤ ጝናንድም ሳውልት ዲጊል እቝር፦ «ይዝን ሳውልወ! እንጐ ተትራ ጒደነይስ እትለው ኣደረ እየሱስ ክእልጣንድ ቢትጥጘ ማጥን፣ መንፈስ ቅዱስዝም እቻተ ማጥን ይት ክጐ እፃቕኩ» ዩ።

¹⁸ኣይንድም በውዝ ሳውልት እልጣኒስ ቓፍ ተከው ሚንትርነ ቓቪት ሊቩ፤ እንደ ገነም ቓለነው ቸሉ፤ ጘጝም ጕ ጣምቅሹ።

¹⁹እንዝ ግረ ኣረ ጣም በርታቑ፤ ደማስቈ ፅበቍ ምመናኒጅቅም ዊትቍ ግርቅ ሳብጡ።

²⁰በውዝም እየሱስ እደረት ዅር ኣቐጘ ምኵራቫኒልቅ ሲቭከነው ኪርሙ።

²¹ወሸቍ እቅድም ጊርምሽጛ፦ «እን እጅርድ እየሩሳልየምስ እን ሽድ ጭጘቍድዛትቅ ሲድሳ ዊነው ኣየውቀ? ቈሽስ ጛት እፅቋ ካኽነጣነ ኻልቅጢል ፊስጠ ኣየውቀ እንጐ ተረውድ?» ይ።

²²ሳውል ግን በርታቓ ፊሩ፤ ደማስቈ ፅበቍ ኣይዅዳኒዝም እየሱስ ጘጝ ክርስቶስ ኣቐጘ ኣስርድዛ ጝታምቸድ ዲቭሳ ዊኑ።

²³እነያ ንቕፀቍ ግርቅ ዲቍጘት ግረ ኣይዅዳንድ ሳውልት ቁጥጘ ማኽርኽርሽ።

²⁴ጘጝ ግን ጝታኻሰቭድ ኣርቕ ዊኑ፤ ጛይም ጝት ቁጥጘ ኻትመይዝ ሚረድ ኻር ጊርቅ ሊሚድጛ ዊን።

²⁵ዊገድ ግን ጝክንደጥድ ኻሪዝ ቅርጫትዝ ፃቭጝ ግምቢዝ ሳ ጊምዝጝ በርስ።

²⁶ሳውልም እየሩሳልየም ችጛንድ፣ ምመናኒጅቅ ዲቭልቅሽጠ ሚኵሩ፤ ጛይ ግን ክርስቶስት ኣምነጘ ኣምነነው ብጛንስቅ እጝቅቅ ጐውት።

²⁷በርናቫስ ግን ፊስ ኻወርየታኒል ኣልሱ፤ ጒደነይስም ኣወሽ ኣደረት ቓለጘ፣ ኣደረም ጝጭስ ዊግተጘ፣ ቈሽም ደማስቈስ ኣወሽ እየሱስት ሽዝ ዲፍር ሲቭከጘ ጛጭስ ኣስርድዙ።

²⁸ሳውልም ጛጅቅ ጐዩ፤ እየሩሳልየም ኻትመይልም ዋጥርጥራ ኣደረ እየሱስት ሽዝ ዲፍር ዊግታ ዊኑ።

²⁹ግሪክስ ተረቍ ኣይዅዳኒጅቅቅ ዊግሻ ተከራክርሻ ዊኑ፤ ጛይ ግን ቁጥጘ በን።

³⁰ምመናን ግን እኒንት ኣርቕጛንድ ቂሳርየ ትጐ ጊምዝጝ ጠርሲስ ትጐ በርስ።

³¹ይዅዳታል፣ ገሊለታል፣ ሰማርየታልም ዊነቍ ምመናንድም ዲግተ ችጝጝ ዳኽነዝ ጐይ፤ ጣጝክርም፤ እደረትም ጐውትጛ መንፈስ ቅዱስዝም ዲብሽትጛ እግዘዝ ንቕፅጛ ፊር።

³²ቢጥሮስም ኻግርዝ ኻግር ጅልዋንድ ልደ ፅበቍ ቅዱሳንድዛት ቈሽ ገቭስጠ ጊሙ።

³³ጝጊስም ሰውጠ ምት ምሉ ፅውዝጅነ ኣቕ ኽሪ ፅበው ይንየ የነው ለውሻሽ እጅር ችጙ።

³⁴ቢጥሮስም፦ «ይንየወ! እየሱስ ክርስቶስ ቓዝጡ፤ ጕር ክኣረትድ ወፃቕ» ዩ። ይንየም ኣይንድ ብድግ የው ጉ።

³⁵ልዳስመ ሳረውነት እቅድቅ እኒንት ቓልጝ ኣደረ እየሱስት ኣምን።

³⁶እየብየስም ጣቪተ ይሽትረይ ላይ ኣምንደይ እውነ ዊንች፤ ጝርሽዙ ትርጕምድ ዱርቀ[4] የነት የጝ፤ እኝቸን እውነየን ዊትርቅ ቀሰው ሰቭ ሰራሽረይ፣ ምፅዋትም ማፅውትራ ፅብረይ ቀስረይ እጅር ዊንች።

³⁷ጚይም ኣይንት ሳብጢዝ ክርች፤ እቅድም እርሸድ እቓስጝ ዲቭሪል ፍስጝ እቝር።

³⁸ልደ እየብየስ ጣቀት ኣራንስቅ፣ ምመናንድም ቢጥሮስ ልደ ፅበጘ ወሽጛንድ ሊጘ እቅ እፃቕጝ፦ «ኣለቀይ ይናጐ ለው ቃዚ» ይጝ ጨው።

³⁹ቢጥሮስም ጕ ጛጅቅ ፊሩ፤ ጝግል ችጛንድም እርሸድ ፅበው ዲቭሪል ክቢስ፤ ልጀጊርዳንድቅ ጝት ኪብጝ ሊዝጛ ዱርቀ ጛጅቅ ፅብራ ሰራሽረቍ ጥብቁዋኒዝመ ኣልቢዝዛት ቓሊስ።

⁴⁰ቢጥሮስም እጝቅትቅ ቢዘይል ፊስ ጝግርቪዝ ግርቨቭሽ ፃልዩ። እርሸይዝጐም ኣልት የው፦ «ጣቪተ ጕ!» ዩ፤ ጚይም ጝርእልጣንድ ብዝች፤ ቢጥሮስትም ቓልድር በትር ጭቅ ይር ጕር ጐይች።

⁴¹ጘጝም ጝርናንድ ፃይ ጒስ ችብሱ፤ ልጀጊርዳኒዝመ ላጥ ቅዱሳንድዛትቅ ጭጝ ርዅየዝ ጝታጭስ ኣስረክቭዙ።

⁴²እን ዊገድም እየብየ ኻግሪልቅ ኣርቕሽቱ፤ ንቕፀቍ እቅም ኣደረ እየሱስት ኣምን።

⁴³ቢጥሮስም ላው ስሙን ይሽተው ቀርቭር ፈቀተ እጅርዝ ጝንል ኣቕ እክሰው ግርየ እየብየ ፅቡ።