Read xamtanga ረውምየት እቂዝ 10 Bible Online

ረውምየት እቂዝ 10 - xamtanga bible

ረውምየት እቂዝ 10

¹ይፅን ክታችወ! እስራየላኒዝ ይእዘኒዙ በንድ፣ እደረትም ጨወውድ፣ ጛይ ቓድጛንስ ማጥን የጝ።

²ምላሰንድም ትክክልኘ ኣርቕትዝ ኣየውጚ እደረስ ቀንየቍ ኣጘጘ ሚዝርድጨ ቸለኵን።

³እደረቲስ ችጝሸው ፅድቅድ ኣርቒጝቀ ጝታቕምቱ ፅድቅ ሚስርትጥጘ በንጛንስቅ እደረት ፅድቂዝ ቅምሺየቍም።

⁴ኣምነቍድቅ ፃድቅጛንስ ማጥን ክርስቶስ ኽግዙ ኻትሸነ የጝ።

⁵ሙሴ ኽግዝ ኣመካይነትዝ ኣቐው ፅድቅድየንት ጋልፃንድ፦ «እንዛት ፋፅመው እጅርድቅ እንዛዝ ርዅየዝ ፅብጡ» የኵ።

⁶እምንቲስ ኣቐው ፅድቅድ ግን እንት የኵ፦ «ክእዘኒዝ፦ ‹ኣው ሲመይ ፍጡ ኣጢ?› ይተ» እኒን ክርስቶስት ጊምዘናንስ የጝ።

⁷ዊንም፦ «ክእዘኒዝ፦ ‹ሲወልትል ኣው ጊምጡ ኣጢ?› ይተ» እንም ክርስቶስት ክርጘይስ ፊሰንናንስ የጝ።

⁸ዊገድ ግን ወረጘ የኵ? «ቃልድ ክጋቢል እኩ፤ ክምቸይዝመ ክእዘኒዝ ኣቒልም የጝ» የኵ፤ እኒን ቃልድም ይን ሲቭክነው እምንትዙ ቃልድ የጝ።

⁹«እየሱስ ኣደረ የጝ» ይር ክምቸይዝ ሚዝርድራን፣ እደረም ጝት ክርጘይስ ጕይሰጘ ክእዘኒዝ ኣምንዳን ቓድትር።

¹⁰ምላሰንድም ፃድቅረውድ ክእዘኒዝ ኣምንድር የጝ፤ ቓድረውድም ክምቸይዝ ሚዝርድር የጝ።

¹¹መፃፍ ዊግተጘ፦ «ጝዝ ኣምነውድቅ ኣይቭታውም።»

¹²ኣይዅዳኒዝመ ኣኽዛቫኒዝ ማኽሊል ቲተ እጀውም፤ ላው ኣደረድ እጝቅት ኣደረ የጝ፤ ጝት ጭጘቍድዛትም ቐናዝ በርከኵ።

¹³ምላሰንድም፦ «ኣደረት ሽድ ጨጘውድቅ ቓድጡ» ይሽትኩ።

¹⁴እደስለ ኣምኒጘውድየንት ኣወሽጝ የጝ ጭጝጘውድ? ወሺጝቀስ ኣወሽጝ የጝ ጝት ኣምንጘውድ? ሲቭከው እጀውስ ኣወሽጝ የጝ ወሽጘውድ?

¹⁵እፃሺጘውዝየስ ኣወሽጝ የጝ ሲቭክጘውድ? እንም፦ «ኣቭዝርተ ነሰቍ ልኵጣንድ ውርጘ ዲስ ሸቍ ጛይ!» ይሽት ፃፍሸጘ የጝ።

¹⁶ዊገድ ግን ወሸቍድቅ ኣቭዝርተዙ ቃልድየንት ለምሪየቍም፤ ይሳያስም፦ «ኣደረወ! ይናሚዝርነይድየንት ኣው ኣምኑ?» የውኩ።

¹⁷እደስለስ እምንት ችጝሸውድ ኣቭዝርተይዙ ቃልድ ወሸነውዝ የጝ፤ ኣቭዝርተይዙ ቃልድም ችጝሸውድ ክርስቶስት ማጥን ዊግተው ክንድጚስ የጝ።

¹⁸እስቲ ዋቕርጨ፤ እስራየላንድ ወሺየቍ ኣቕጝመ ኣጢ? እርግጥ ወሽጝኵ፤ «ጝታድመድ ዝቨት ደርቸይል ኣሽ፣ ጝታቃልድም ኣልሚዙ ደርቸይል ኣሽ ወይሽቱ» ይሽት ፃፍሽኩ።

¹⁹እንደ ገነም ዋቕርጨ፤ እስራየላንድ ኣስክሲየቍ ኣቕጝመ ኣጢ? እደያይነጘመ ሙሴ በውግስ፦ «ነቅሽተው ኽዝቭዝ ጛት ቀንይስጭር፤ ኣስክሳው ኽዝቭዝም ጛት ኻልክስጭር» የውኩ።

²⁰ይሳያስም ዲፍር፦ «ይት ደምዚየቊዝ ችጝጩን፤ ይት ዋቕሪየቊዝም ይቕምት ጋልፁን» የው እደረት ቃልድየንት ዊግትኩ።

²¹እስራየላኒዝቊዝ ግን፦ «ኣዚታው፣ ቀሰውም ያው ኽዝቪዝጐ ይናንድየንት ግርየ ምሉ ዘርጋቑን» የኵ።