Read xamtanga ረውምየት እቂዝ 11 Bible Online

ረውምየት እቂዝ 11 - xamtanga bible

ረውምየት እቂዝ 11

¹ነስየ እደረ ጝኽዝቭድ ማሉንመ? የር ዋቕርጨ፤ እረ ማልየውማ! ያን ይቕም ብንያምት ነገድ ኣቭርኻምት ዚረ ኣቐር እስራየላነው ቃይቀር!

²እደረ በውርስ ኣርቐው ጝኽዝቭድ ማሊየውም፤ መፃፍ ይልያስት ማጥን ዊግተውድየንት ኣርቓይርነቅመ? ጘጝ እስራየላንድዛት እደረትል ኪስ ዊኑ።

³ኪሳንድም፦ «ኣደረወ! ክነቭያታንድዛት ቍውጝኵ፤ ክመሰዊጥድዛትም ፋዝጝኵ፤ ያንም ይለ እዳቕኩን፤ ይትም ቍጥጘ ደምዝጘኵ» ዩ።

⁴ዊገድ ግን እደረ ጝጭስ ወረጘ የው ዊሱ?፦ «በኣልስ[2] ሲግዲየቍ ላጝጠ ሽኽ እቅ ይቕምስ እዳዝኩን» ዩ።

⁵እን ዚምኒዝም ጘጝት ፃገዝ ማርፅሽተቍ ዊትቍ እኵ።

⁶ነስየ እደረ ማርፀውድ ፃገዝ ኣቐውዝየ ሰቭዝም ኣየው የነት የጝ፤ ሰቭዝ ኣቓንመ ፃገድ ፃገ ኣቐነውድ እዳጠ ዊኑ።

⁷እደስለ ወረጘ የጝ? እስራየላንድ በንጘውድየንት ችጚየቍም፤ ማርፅሽተቍድ ግን በንጘውድየንት ችጝ፤ ላጥድም ጝታእዘንድ ኽልክኘ ፃቭ።

⁸«ጝታእልጣንድ ቓላይጘጘ፣ ጝታቀርዝጣንድም ወሻይጘጘ፣ እደረ ነኳን ኣሽ ዲንዝዝሰው መንፈስ ጝታግል ማሉ» ይሽት ፃፍሸጘ የጝ።

⁹ዳዊትም፦ «ጝታመድድ ጛት ፃየው ፅውረ፣ ፅጋም፣ ቕፃርም ኣነ።

¹⁰ጝታእልጣንድ ቓላይጘጘ ገርድሽጝነ፤ ጝታይውድም ዘላልም ጓቭጥሽነ» የውኩ።

¹¹እስቲ እንደ ገነ ዋቕርጨ! ጛይ ፅጋርጘውድ ዋጥርጝ ቓዳይጘጘ ኣሽመ? እረ ኣየውማ! እስራየላኒዙ በደሊዝ ምላሰንዝ ኣኽዛቫን ቓደነው ችጝ፤ እንም ኣቐውድ እስራየላንድዛይ ቀኒጛንስ ማጥን የጝ።

¹²ዊገድ ግን እስራየላኒዙ በደልድ ኣልሚዝ በረከት ኣቐውዝየ፣ ጝታሊቨነውድም ኣኽቭዛቫኒዝ በረከት ኣቐውዝየ፣ ጝታቓደነውድሰ ውርቝጠ በረከት ነስጠ ዊኑ?

¹³እፈ ኣኽዛቫን ክታትርነ! ክታጭስ ዊግጠኵን፤ ያን ኣኽዛቫኒዝ ኻወርየ ኣቓንስቅ ይኣግልግለውትድ ቲግየዝ ፋፅመኵን።

¹⁴እንም በገዘ ይዊግን ኣቐቍ እስራየላንድ ቀኒጥጘ ማጥን ጛት ጕየ ጕይስ ምናልቫች ጛጊስ ዊትቍድ ቓድጝሽ የር ቲስፈ ፃቨነውዝ የጝ።

¹⁵ጛይ ሊቨነውድ ኣልሚዝ ኣርቅሸነው ችጝሰውዝየ ጛይ ለምርሸነውድሰ ክርጘይስ ጕን ርዅየዝ ፅበነው የነት ኣጠ ኣቕሽጚ ላየ ወረጘ ይሽትጣ?

¹⁶ላው ምኰተይስ በኵራት ኣቐው ምኰተድ ቅዱስ ኣቐውዝየ እዳቐው ምኰተድቅ ቅዱስ የጝ፤ ስርድ ቅዱስ ኣቐውዝየ ጫፋንድም ቅዱሳን ጛይ።

¹⁷እጝግረይዙ ዊረይዝ ጫፋኒስ ላው ላውድ ኪልድሽጛን ክትም በራኸዙ ዊረ ኣቕር ፅብራ ጝታስፍረይል ጥውር ቃጥልሽረውዝየ፣ ዊረይዙ ስሪስ ችጝሸው በረከቲስም ኣድልሽረር ኣረውዝየ፣

¹⁸እዛይ ጫፊኒል ማክኽሽተ፤ ማክሽርሽ ግን ስርድ ክት መውረኵጚ ክት ስርድየንት መውራር ኣረጘ ኣስክዝ።

¹⁹ክት፦ «ጫፋንድ ክልድሽጘውድ ያን ጥዋንስ ማጥን የጝ» ይትር ኣጠት።

²⁰ልክ የጝ፤ ጛይ ኪልድሽጘውድ ኣምነቅ ይጛንስቅ የጝ፤ ክትም እምንትዝ ችብትርኵሩ፤ እደስለስ ጐውጭጚ ማክኽሽተ።

²¹ምላሰንድም እደረ ጝታተፈጥረዊዝ ጫፋን ዊነቊዝ ኣርኽርኺየውዝየ ክጭስም ኣርኽርኻውም።

²²ነስየ እደረት ቀስነይዝመ ጝጭክነይዝ ቓል፤ ጝጭክነድ ቓሊሰውድ ሊቨቊል የጝ፤ ጝቀስነይድ ቓሊሰውድ ግን ክት ጝቀስነይዝ ፀናቕር ፅብርሽ ክግል የጝ፤ ኣለዝየ ግን ክትም ቀቭሽትር ሊቭትር።

²³ጛይም ኣምነቅ የነውዝ ፀናቕጝ ፅቢጝሽ ዋጥርጝ ጥውጥቍ፤ እደረም ጛት ዊስ ድውጠ ቸለኵ።

²⁴በራኸዙ ኣቐው ዊረይስ ቀቭሽትረር ክት፣ ክተፈጥረዊዙ ኣየው እጝግረይዙ ዊረይል ጥውረር ኣረውዝየ፣ ጝታተፈጠረዊዝ እጝግረይዙ ዊረይዝ ጫፋን ኣቐቍ ጛይሰ ኣወይጝ ጝታበውገቱ ስፍረይል ዋጥርጝ ቲክልሻቍ?

²⁵ይፅን ቈደይ! ኣርቐጥ ኣቕርነው ተኪነ፤ ያን ኣርቕትርነ በነው ላው ሚስጢር እኩ፤ እስራየላኒስ ግቨርድ ኽልክኝጥ ኣጘውድ ኣኽዛቫንድ ምሉዝ እደረ ትጐ ዋጥርጥጚስቅ የጝ።

²⁶እንዝ ማጥን እስራየላንድ እጝቅቅ ቓድጥቍ፤ እንም፦ «ቓዘተ ፂወንቲስ ፍጡ፤ ያይቈቭት ዚረይስም ኽጥያትድ እክልስጡ።

²⁷ያን ጝታኽጥያትድ ጛጊስ እክልሳንድ ጛጅቅ ጥወው ቃል ኪዳንድ እኒን የጝ» ይሽት ፃፍሸጘ የጝ።

²⁸ወንጌሊዙ ቃሊዝጘ ኣቓንድ፣ ክትን ጣቅምሽርናንስ ማጥን ጛይ እደረት ፃለታን ጛይ፤ ማርፅሽተነዊዝ ግን በውገትቍ ጝታኣቅሊዝቍዝ እደረት ወደጃን ጛይ።

²⁹ምላሰንድም እደረ ማርፅ ጝፃገይዙ ይውትድ ይወት ግረ ጝኻሰቭድ ላውጣውም።

³⁰ክትንም እንዝ ሚቅ እደረስ ኣዚታይርነቅ ዊንድርነጘ ጛይ ኣዚጠቅ ይጛንስቅም ክትን ስቝርት ችጝርነጘ፣

³¹እደረ ጛጭስ ስቝርት ፃቫንስቅ ጛይም ስቝርት ችጛንስ ማጥን ነን ኣዚታቍ ዅል ኣቕጝኵ።

³²ምላሰንድም እደረ እጝቅዝቅ ስቝርት ይዋንስ ማጥን እጝቅትቅ እምቢትኝጥ ፃቭኩ።

³³እደረት ፃጀድ፣ ጥቨቭድ፣ ኣርቕትድም ውርጘ ኽየው የጝፈ? ጝፍርድድ ሚርምርሻውም፤ ጝጒደነድም ፊልየ እጀውም።

³⁴«ኣደረት እዘንድ ኣርቐውድ ኣው የጝ? ጝት ማኽረውድስ ኣው የጝ?»

³⁵ዊስ ይዋንስ ማጥንስ እደረስ እዱሰው እጅርድ ኣው የጝ?»

³⁶ምላሰንድም እጝቅ ዊገድቅ ችጝሸውድ ጝጊስ፣ ጝዝ፣ ጝጭስ፣ የጝ፤ ጝጭስ ዘላልም ኣልም ኣሽ ክቭር ኣነ! ኣሚን!