Read xamtanga ረውምየት እቂዝ 12 Bible Online

ረውምየት እቂዝ 12 - xamtanga bible

ረውምየት እቂዝ 12

¹ይፅንወ! ነስየ ክታሰውነትድ ቅዱስ፣ እደረትም ዲስ ሸው፣ ፅበው ምስዋይትም ፃቭርን ኣልስርናንስ ማጥን እደረት እርኽርኸነይዝ ጨወኵን፤ እንም እማንተው ኣቐው ጒደነዝ እደረት ኣግልግለነው የጝ።

²ቀሰው፣ ዲስም ሸው፣ ፍፅምም ኣቐው፣ እደረት ፍቃድድ ወረጘ ኣቐጘ ፊትንድርን ኣርቕትርነ ማጥን ክታኣይምረዊዝ ታድስሽተነውዝ ላውጥሽጥንጚ እን ኣልሚዙ ኻሰቭድ ቲክንትርነ።

³እደረ ክታጭስ ነየው እምንቲዝቝጠ ክታቕምት ኣግቫቭዝ ኻስቭጥንጚ ነን ኣቕርነዊስ ኒየ ክታቕምት ንየስ ሽርን ኻስቫይርነጘ እደረ ይጭስ ነየው ፃገይዝ ክታይታእጝቅትቅ ማኽረኵን።

⁴ይናላው ኣካሊል ንቕፀቍ ኣካልዝቍ ክፍላን ፃይነቅ ኣነጘ እንዛይ ኣካልዝቍ ክፍላንድም ጝታተግባርድ ጝሉ ጝሉ ኣቐጘ፣

⁵ይንም ንቕፀቍ ኣቕን ፅብና ክርስቶስት ኣመካይነትዝ ላው ኣካል የጝ፤ ይናይታእጝቅቅም ላየ እጅሪዙ ኣካሊዝ ክፍላን የጝ።

⁶ይናጭስ ነይሽተው ፃገይዝጘ ቲተቲተው ይውት ፃይንኵኑን፤ ላው እጅርዝ ይውሽተው ይውትድ ትንቪት ዊግተነው ኣቕሽ ጝእምንቲዝጘ ዊግትነ።

⁷ኣግልግለነው ኣቕሽም ኣግልግልነ፤ ክንሰነው ኣቕሽም ክንስነ።

⁸ማኽረነው ኣቕሽ ማኽርነ፤ ይወነው ኣቕሽም ልግስነዝ ይውነ፤ ጭሰጭሰነው ኣቕሽም ቲግየዝ ጭሰጭስነ፤ ስቝርት ፃቨነው ኣቕሽም ዲስተዝ ሳቝርነ።

⁹ተክዘነ እጀው እማንተው ፍቅር ፃይርነቅ ኣጥን፤ ጭቓ ዊገድየንት ሽክትጥን፤ ቀሰው ኣቐው ዊገድየንት ኪው ሽርን ፃይጥን።

¹⁰ክታስ ክታይ ዚንዙ ፍቅርዝ ቀነቀንጭጥን፤ ክታእጝቅቅ ላየድየንት ክታቕምቲስ ዲቍሰነውዝ ክታስ ክታይ ኪብረኪብርሽትጥን።

¹¹ኣደረት ኣግልግልድርናንስ ማጥን መንፈስዝ ቃጥልሽርነቅ ኣጥንጚ እኒን ቲግየይስ እግርገ ይትርነ።

¹²ቲስፈዝ ዲስ ይጥን፤ ሚከረዝ ታግሽትጥን፤ ፀለውትዝ ፀናጥን።

¹³ቺግርሸቍ ቅዱሳኒዝ ክታፃይርነዊስ ኣድልጥን፤ ኣብንም ለምጥን።

¹⁴ክታት ሲደሰቍድዛት ጊቭርጥን፤ ጊቭርጥንጚ እፅትርነ።

¹⁵ዲስ የቊጅቅ ዲስ ይጥን፤ ሊዘቊጅቅ ሊዝጥን።

¹⁶ክታስ ክታይ ላው ኻሰቭዝ ቲስመምርን ፅብጥን፤ ነቅሸቍ እቂጅቅ ላው ኣቕርን ፅብጥንጚ ኲርትርነ፤ ክታቕምትውዝ ማክኽሽትርነ።

¹⁷ኣውማው እጅርዝቅ ጭቓ ዊገይዝቍዝ ጭቓ ዊስትርነ፤ እጝቅ እጅርዝ በዊልቅ ቀሰው ኣቐው ዊገድ ፃቨነውዝ ቲጊጥን።

¹⁸ቸልድርናንስ እጝቅ እጅር ጅቅቅ ዲግተዝ ፅብጥን።

¹⁹ይወደጃንወ! ቍጠድ እደረስ በጥንጚ ክታቕም ቢቅልድትርነ፤ ምላሰንድም፦ «በቀል ይው የጝ፤ በቀሊዝ ፊንተድ ይቕም ዊስጭር» ይሽት ፃፍሽኩ።

²⁰ኽሽስ፦ «ክፃለትድ ግድርድሽ ዀሽ፤ ዝቛንድሽ ዚሽ። ክት እኒንት ፃቨነውዝም ጝኣውሪል ልይ ኻኽመ ኪምርትር»

²¹ጭቓ ዊገድየንት ቀሰው ዊገ ፃቨነውዝ ኻቕጚ ጭቓ ዊገድ ክት ኻቒነ።