Read xamtanga ረውምየት እቂዝ 13 Bible Online

ረውምየት እቂዝ 13 - xamtanga bible

ረውምየት እቂዝ 13

¹ኣውማው እጅርድቅ ስልጣን ጒጢዝ ቅምሽጠ ጥውሸኵ፤ ምላሰንድም እደረቲስ ይውሽቲየውዝየ ስልጣን እጀውም፤ ነን ፅበቍ ስልጣን ጕይጥድም እደረቲስ ይምሸቍ ጛይ።

²እንዝ ማጥን ስልጣን ጕርየይል ኣምፀውድቅ እደረ ይወው ስረትድየንት ተቃውምሸኵ፤ እነየው ዊገ ፃቨው እጅርድቅ በገዘ ጝቕምትል ፍርድ ነሰኵ።

³ቅመትድ ጭቓ ፃቨው እጅርዝጚ ቀሰው ፃቨውዝ ጐውሳቍም፤ ስልጣን ጕርየድ ጐውታይረጘ በንረኵመ? እደስለስ ቀሰው ዊገ ፃቭ፤ ጘጝም ክት ሚዝየነዝጡ።

⁴ጘጝ ክጭስ ቀሰው ዊገ ፃቨው እደረት ኣገልጋይ የጝ፤ ጭቓ ዊገ ፃቭረውዝየ ግን ጐውጭ፤ ምላሰንድም ጘጝ ጊነዝም ሰይፍ ከምርየው፤ ጭቓ ፃቨቍድዛት ቐፃቐነውዝ ቕፃርዙ መሰሪ ኣቐው እደረት ኣገልጋይ የጝ።

⁵እንዝ ማጥን ስልጣን ጕርየዝ ቕፃር ጐውተነውዝ ጭቝ ኣዪጝቀ ኽሊነዙ ወቀሰዝ ማጥንም ቅምሽትርነ ጥውሸው የጝ።

⁶ግቭር ኪፍልድርነውድም እንዝ ማጥን የጝ፤ ስልጣን ጕይጥ እኒን ሰቪል ውላቐቍ እደረት ኣገልጋያን ጛይ።

⁷እጝቅዝቅ ጝጥውሸው ጥውሸድየንት ይውጥን፤ ግቭር ጥውሸዊዝ ግቭር ኪፍልጥን፤ ቀረጥ ጥውሸዊዝ ቀረጥ ኪፍልጥን፤ ጐውትጥነ ጥውሸውድየንት ጐውትጥን፤ ኪብርዝጥነ ጥውሸውድየንትም ኪብርዝጥን።

⁸ክታስ ክታይ ቀነቀንሸነው ኣቕሽጚ ኣውማውትልቅ ቢን ፃይርነቅ ኣትርነ፤ ላየ እጅርድየንት ቀነው እጅር ኽግድየንትቅ ፋፅምኩ።

⁹«ሻርሙጥተ፣ ቁተ፣ ስተ፣ ኻሽትዝ ሚዝርድተ፤ ቀብራውድ ማርቕፅተ» የቊ ትዛዛኒዝመ ላጥ ትዛዛኒዝ እጝቅቅ፦ «ክፃምረድየንት ክቕምትጘ ፃቭር ቀን» የው እኒን ላው ትዛዚዝ ጥቅልሽጝኵ።

¹⁰ፍቅር ጝፃምረይል ጭቓ ዊገ ፃቫውም፤ ኣቓንስቅም ፍቅር ኽግዙ ኻትሸነ የጝ።

¹¹ነንቱ ዚምንድየንት ኣስክስርና እኒንት ፃቭጥን፤ ይናቓድትድየን በውገ ኣምነው ግርየይስ ሽ ነን ይናጐ ኣልታንስቅ ክታዝምወይስ ነቃትርነ ጥውሸው ግርየድ ነን የጝ።

¹²ኻርድ ዲቍጠ፣ ጊርቅድም ኪርምጠ ጕኩ፤ እንዝ ማጥን ጥመይዙ ሰቭድየንት ማልን ብርኻኒዙ ጠውር መሰሪድየንት ሲርነ።

¹³ጊርቅዝ ፃጝናንትጘ ኣግቫቭዝ ፃጝነ፤ ቅጥ እጀው ዚቨነውዝመ እራቐነውዝ ኣቒነ፤ ሸርሙጠነውዝመ ሺኵነነውዝ፣ ክርክርዝመ ቅንየዝም ኣቒነ።

¹⁴ኽሽስ ይናኣደረ እየሱስ ክርስቶስት ሲትጥን፤ ክታስየይዙ ምርቕፀድየንትም ፋፅምነ ይርን ኻስቭትርነ።