Read xamtanga ረውምየት እቂዝ 15 Bible Online

ረውምየት እቂዝ 15 - xamtanga bible

ረውምየት እቂዝ 15

¹ይን እምንትዝ ጠጝካራን ኣነቅድም እምንትዝ ጣጝክሪየቍድዛት መውርነ ጥውሸኵጚ ይናቕምት ዲስ ሽነ ጥውሻውም።

²ይናይታእጝቅቅ ይናፃምረድ ጝእምንቲዝ ጣጝክራንስ ማጥን ጝት ጣቅመዊዝመ ዲስ ሸው ዊገይዝ ፃቭነ ጥውሸኵ።

³ምላሰንድም ክርስቶስ እኳ ጝቕምት ዲስ ሺየውም፤ ዊገድ ግን፦ «ክት ዛሽጘው ዛንድ ይግል ችጙ» ይሽት ፃፍሸጘ፣ ጝግል ችጙ።

⁴ፀናቐነውዝመ ቅዱሳን መፃፋንድ ነይጘው ዲብሰነይዝ ቲስፈ ፃይነቅ ኣናንስ ማጥን ቀደም የው ፃፍሸውድቅ ይን ክንድናንስ ማጥን ፃፍሽኩ።

⁵ብርታትዝመ ፅናትዝ ነየው ኣምላክ ክርስቶስ እየሱስት ቲክንድርናንድ ክታማኽሊል ላው ኣቐነው ኽቭርዙ መንፈስ ነይነ።

⁶እንም ላው እዘን፣ ላው ቃልም ኣቕርን ይናኣደረ እየሱስ ክርስቶስቲር እደረት ኪብርዝርናንስ የጝ።

⁷ነስየ እደረስ ሚዝየነ ኣቓንስ ማጥን ክርስቶስ ክታት ለምረጘ ክትንም ክታስ ክታይ ለምረለምርሽትጥን።

⁸ምላሰንድም በውገትቍ ኣቅሊዝ ይውሽተው ቲስፈዙ ቃልድየንት ፀናዝጠ፣ እደረቱ እማንዝ ማጥን የው ክርስቶስ ጊርዝሽተነውዙ ኣገልጋይ ኣቐጘ ድቈኵን።

⁹እኒዝጘም ኣኽዛቭንድ እደረት ጝስቝርቲዝቍዝ ሚዝየንዝጛንስ ማጥን የጝ፤ እንም፦ «እንዝ ማጥን ኣኽዛቫኒዝ ማኽሊል ክት ሚዝየንዘኵን፤ ክሽⶔዝም ዚምረኵን» ይሽት ፃፍሸጘ የጝ።

¹⁰ቈሽም፦ «ኣኽዛቫን ክታትርነ! ጝኽዝቪጅቅ ዲስ ይጥን!» የኵ።

¹¹እንደ ገነም፦ «ኣኽዛቫን እጝቅ! ኣደረት ሚዝየንዝጥን፤ እጝቅ ኽዝቭም! ጝት ሚዝየንዝጥን» የኵ።

¹²ይሳያስም እኒዝጘ፦ «እጝቅ ኽዝቪልቅ ኒግሰው እስየይት ዚረይስ እዅርሸውድ ተርጡ፤ ኣኽዛቫንም ጝት ቲስፈ ፃቭጥቍ» የኵ።

¹³ክታቲስፈድ መንፈስ ቅዱስት ኻይልዝ ኽያ ፊራንስ ማጥን ቲስፈዙ ኣምላክ ክትን ጝት ኣምንድርናንስቅ ዲስተዝመ ዲግተዝ እቻዝ ነይነ።

¹⁴ይፅን ክታችወ! ክትን ክታቕም ደግነትዝ እቻቕርነቅ፣ ኣርቕትዝም ፃጅትርነቅ፣ ላውድ ላየድየንት ማኽረነውም ቸልድርነቅ ኣርነጘ ያን ይቕም ተረድጭኩን።

¹⁵እደረ ይጭስ ነየው ፃገይዝ ሚስርትዝ እንደ ገነ ክታት ኻስቭዝጨ በን ላው ላው ዊቂል ድፍርትዝ ፃፍኩን።

¹⁶ይጭስ እኒን ፃገድ ነይሽተውድም ኣኽዛቫኒዝ እደረቱ ወንጌልድየንት ኣውጀነውዝ ካኽኒዝጘ ኣቕ ክርስቶስ እየሱስት ኣግልግልጨ ማጥን የጝ፤ እንም ኣኽዛቫንድ መንፈስ ቅዱስዝ ቀድስሽትጝ እደረት ዲስ ሸው ምስዋይት ኣጛንስ ማጥን የጝ።

¹⁷እንዝ ማጥን እደረት ኣግልግለነውዝ በቃቓንስቅ ክርስቶስ እየሱስትቍዝ ማክኽጨኵን።

¹⁸ኣኽዛቫንድ እደረስ ኣዚተቍ ኣጛንስ ማጥን ዊግጠዊዝመ ፃቨው ዊገይዝቅ መንፈስ ቅዱስት ኻይልድ ጋልፅሽተነውዝ፣ ምልክታንዝመ ታምራንዝም ፃቭሽተነውዝ፣ ክርስቶስ ይግል ኣቕ ሰራሸው ሰቪዝለ ላየ ዊገ ዊግጨ ዲፍረቅም፤ እነይም እየሩሳልየምስ ኪርም እልዋሪቈን ኣሽ ክርስቶስት ወንጌልድየንት ኻትት ሲቭክኩን።

²⁰ላየ እጅር ሚስርተው ሚስርቲል ተሳይቀጘ የር ክርስቶስ ጭጝሺየቍ ኻግራኒል ወንጌል ሲቭክጨ ይዊትርቅቱ በን ዊኑ።

²¹ኽሽስ፦ «እንዝ ሚቅ ጝቍዝ ድቍሽቲየቍ እቅ ጝት ቓልጥቍ፤ ጝማጥን ወሺየቍድም ኣስክስጥቍ» ይሽት ፃፍሸጘ የጝ።

²²ነኳን ኣሽ ክታጐ ተጢቀውድ፣ ቀደም የር ዊግጠዊዝ ምላሰንዝ የጝ።

²³ነን ግን እንዛይ ኻግራኒል ሰራሸነው ስፍረ እጀር ኣቓንስቅ፣ እክሰው ግርየዝ ኪርምም ክታት ቓለነው በን ፃቀር ኣቓንስቅ፣

²⁴እስበይን ፊጣንድ እኒን እቅድድ ፋፅምጨ ኻስቨኵን፤ ዲቋንድም ክታት ቓልጨ፣ ክታጅቅም ዊቱ ግርየ ጐይ ይሲለ ፈት ግረ ክትንም ይጒደነይዝ በንዘውድየንት ከቭትርነ ቲስፈ ፃቨኵን።

²⁵ነን ግን እየሩሳልየም ፅበቍ ቅዱሳኒዝ ኣቐው ርዳተ ፃቅ ጝጐ ፊጣ የጝ።

²⁶ምላሰንድም መቀደውንየ፣ ኣካይየም ፅበቍ ክርስቲያናንድ እየሩሳልየምትቍ ቅዱሳኒዝ ማኽሊል ፅበቍ ድኺዝ እርዳተ ፃቭጥጘ ዊስንጝኵ።

²⁷እርግጥ ጛጭስ ቢን ፃየቍ ኣጛንስቅ እርዳተ ፃቭጥጘ ዊስንጝኵ፤ ኣኽዛቫንድ ኣይዅዳኒዙ መንፈሳዊ በረከትድ ኣድልሸቍ ኣጘውዝየ፣ ጛይ ችጘው እን ኣልሚዙ በረከትድ ኣይዅዳኒጅቅ ኣድልሽጥጘ ቢን ፃየቍ ጛይ።

²⁸እንዝ ማጥን እኒን እርዳተድየንት እየሩሳልየም ችጝዝ ኣስርክቭዘነዊዙ ሰቭድየንት ኻተት ግረ እስበይን ፊጣንድ ጝዝ ጝዝም ክታግል ጥውጭር።

²⁹ክታግል ተጣንድ ክርስቶስት በረከትድየንት እቻዝ ፃቅ ተጨጘ ኣርቐኵን።

³⁰ይፅን ክታችወ! ይማጥን እደረትጐ ፃልየነውዝ ይትግሊዝ ከቭርነቅ ኣቕርናንስ ማጥን ይናኣደረ እየሱስ ክርስቶስት ሽዝመ መንፈስ ቅዱስት ፍቅርዝ ጨወኵን።

³¹ይዅዳ ፅበቍ ኣምናቍ እቂዝ ናኒስ ቓጣንስ ማጥን እየሩሳልየምስ ፃቨው ይኣግልግለውትድም ጝግል ፅበቍ ቅዱሳኒዝ ለምርን ፃየው ኣቓንስ ማጥን ፃልይጥን።

³²እንም እደረት ፍቃድዝ ክታጐ ዲስተዝ ተጥ ክታጅቅ ፈዋንስ ማጥን የጝ።

³³ዲግተዙ ኣምላክ ክታእጝቅጅቅ ኣነ፤ ኣሚን።