Read xamtanga ረውምየት እቂዝ 16 Bible Online

ረውምየት እቂዝ 16 - xamtanga bible

ረውምየት እቂዝ 16

¹ክንክራወስ ፅብረይ ምከንሸንት ኣገልጋይ ኣረይ ይናስን ፈቨንት ክታኻደረ የኵን።

²ጝርት ቅዱሳኒዝ ጥውሸው ለምርንዝ ኣደረት ሽዝ ለምትርናንስ፣ ጚ ክታጊስ በንረው ኣውማው ዊገድየንትቅም ፃቭርናንስ ማጥን ኻስቭዘኵን፤ ምላሰንድም ጚ ንቕፀቍ እቅዝ፣ ይጭስም ጭቕጘ ዲግፍረይ ዊንች።

³ክርስቶስ እየሱስት ሰቪዝ ይጅቅ ላብጠ ሰራሸቍ ኣቂለስመ ብርስቅለስ ዲግተ ኣልስጥን።

⁴ጛይ ጝታርዅየሸንት ይማጥን ክርጘል ዲቍስጝ ይው፤ ያን ጭቝ ኣዪጝቀ ኣኽዛቫኒዝቍ ምከንጣንድቅ ጛት ሚዝየንዝጘኵ።

⁵ጝታጝኒል ፅብረይ ምከንሸንስም ዲግተ ይውጥን። እስየ ኻግሪዝቊስ ክርስቶስት ኣምነነውዝ ኣፍሉ ኣቐው ይወደጅ ኣጥየንጠውንስ ዲግተ ኣልስጥን።

⁶ክታጭስ ጭቕጘ ዝላረይ ማርየስ ዲግተ ኣልስጥን።

⁷ይጅቅ እፁሽጝ ዊነቍ ይዚምዳን ኣንድራኒቈንስመ ዩልየንስ ዲግተ ኣልስጥን፤ ጛይ ኻዋርየታኒዝ ማኽሊስ ጝታሽድ ጭጝሸው፣ ክርስቶስት ኣምነነውዝም ይት ቀድመቍ ጛይ።

⁸ኣደረ እየሱስቱ ኣቐነውዝ ያን ቀነው ብልያንጠውንስ ዲግተ ኣልስጥን።

⁹ክርስቶስት ሰቪዝ ይናጅቅ ላብጠ ሰራሸው ኢሩቫነውንስመ ቀንሸው ይወደጅ ስንጣክንስ ዲግተ ኣልስጥን።

¹⁰ክርስቶስቱ ኣቐነውድ ፊትንሽ ሚዝርሽተው እጠልየንስ ዲግተ ኣልስጥን፤ ኣርስጣቫሉት በተሰቪስ ኣቐቊዝም ዲግተ ኣልስጥን።

¹¹ይዚምድ ኸረውድየነስ ዲግተ ኣልስጥን፤ ኣደረትቍ ኣቐቍ ንርቀሱት በተሰቪዝ ዲግተ ኣልስጥን።

¹²ኣደረት ኣገልግለነውዝ ቲግይጝ ሰራሸቍ እቍን ብረፊመነስመ ጢረፊመሰስ ዲግተ ኣልስጥን፤ ኣደረት ኣግልግለነውዝ ጭቕጘ ዝላረይ ቀንሽረይ እውነ ጠርሲደስ ዲግተ ኣልስጥን።

¹³ኣደረት ኣግልግለነውዝ ጭቕጘ ኣረሰው ሩፈውንስመ ይት ጝርዅርትጘ ፃቭር ቀንደይ ጝኘስ ዲግተ ኣልስጥን።

¹⁴ኣስቀሪጠንስመ ኣፍለሰንበስ፣ ኺሩሚንስም፣ ባጥረቫንስም፣ ኸርመንስም፣ ጝታጅቅ ፅበቍ ዚኒዝም ዲግተ ኣልስጥን።

¹⁵ፍልየጐንስመ ዩልየስ፣ ንየርየስመ ጝርስንስ፣ እኒዝጘም ኣልንጠንስመ ጛጅቅ ፅበቍ ቅዱሳኒዝቅ ዲግተ ኣልስጥን።

¹⁶ቀድስሽተው እምቘእምቝሽተነውዝ ክታስ ክታይ ዲምቅጭጥን፤ ክርስቶስትቍ ምከንጣንድቅ ክታጭስ ዲግተ ኣልስጘኵ።

¹⁷ይፅን ክታችወ! ቲተቲተነው ፋጥረቊስ፣ ክንድርነው ክንድጝድየንት ተቃውምሸነውዝ ፅጋሰቊስም ጣጝቅቅሽርናንስ ማጥን ኻስቭዘኵን፤ ጛጊስ እክልድጥን።

¹⁸እንዛት ተከቍ እቅድዛይ ኣግልግልጘውድ ይናኣደረ እየሱስ ክርስቶስት ኣዪጝቀ ጝታቕምት ጊዝውድየንት የጝ፤ ሊስልሰው ላቕዝመ ተክዘነቊ ዊቅዝ ገርኻን እቅድዛት ኻጝስጘኵ።

¹⁹ክታኣዚተነውድየንት እጝቅቅ ወሽጝኵ፤ ያንም እንዝ ጭቕጘ ዲስ የርኩን፤ ዊገድ ግን ቀሰው ዊገይዝ ጥቨቭኝጥ ኣትርነ፣ ጭቓ ዊገይዝ ቈሽ ገርኻን ኣትርነ በነኵን።

²⁰ዲግተዝ ኣምላክም ሲጣንድየንት ክታልኲዝ ሳይል በውዝ ቃጥቅጡ። ይናኣደረ እየሱስ ክርስቶስት ፃገድ ክታጅቅ ኣነ።

²¹ይጅቅ ሰራሸው ጢመቲወስ፣ እኒዝጘም ይዚምዳን ኣቐቍ ሉቂወስ፣ እየሱን፣ ሱሲቢጥረውስም ክታጭስ ዲግተ ኣልስጘኵ።

²²እኒን እፃድየንት ፃፈር ያን ጠርጢወስም ኣደረት ሽዝ ዲግተ ኣልሰኵን።

²³ይስመ እንል ፅበቍ ምመናንድዛትቅ ኣቭንውዘው ጋይወስ ዲግተ ኣልሰኵ፤ ኻትመይዙ ጕምጃብየትዝ ሽም ኣቐው ይርስጠውስ፣ ይናዝን ቍኣስጥረውስም ዲግተ ኣልስጘኵ።

²⁴[ይናኣደረ እየሱስ ክርስቶስት ፃገድ ክታእጝቅጅቅ ኣነ፤ ኣሚን።][3]

²⁵ያን ክታት ክንሰው፣ እየሱስ ክርስቶስትም ሲቭከው ወንጌሊዝ ኣመካይነትዝ ክታት ፀናዝጠ ቸለው ኣምላክስ ክቭር ኣነ፤ ሲቭከውድም ዲቈቍ ዚምናኒዝ ሲውርሽ ዊነው፣ ነን ግን ጋልፅሽተው ምስጢሪዝ ሚስርትዝ የጝ።

²⁶እኒን ምስጢርድ ጋልፅሽተውድም ኽዝቭ እጝቅ ኣምን እደረስ ኣዚታንስ ማጥን ዘላልምዙ ኣምላክት ትዛዝዝ ነቭያታነ መፃፋኒዝ ፃፍሸዊዝ ሚስርትዝ ዊኑ።

²⁷ጝለ ጥቨቭኘ ኣቐው ኣምላክስ እየሱስ ክርስቶስት ኣመካይነትዝ ዘላልም ክቭር ኣነ፤ ኣሚን።