Read xamtanga ረውምየት እቂዝ 2 Bible Online

ረውምየት እቂዝ 2 - xamtanga bible

ረውምየት እቂዝ 2

¹እፈ ላየ እጅሪል ፊርድረር እጅር ክተ! ክት ክቕምስ ምላስረው ዊገም እጅረር፤ እድየን ክት ፊርድረው እጅርድየን ፃቨውድየንት ክትም ፃቭረኵ ኣቓንስቅ ላየ እጅርድየንት ፊርድረው ፍርዲዝ ክቕምትም ፊርድረኵ።

²እነየው ዊገድ ፃቨቍ እቂልም እደረ ፊርደው ፍርድድ ጭቅየው ኣቐጘ ኣርቕነኵን።

³ነስየ እኒንት ፃቨቍ እቂል ፊርድራ ክት ክቕም ጝት ሰራሽረር እጅር ክተ! እደረት ፍርዲስ ኣምልጥትር ተከኵመ?

⁴ዊንስ እደረት ደግነትድ ክት ንስኻል ቃወው ኣቐጘ ኣርቒጝቀ ጝደግነቲዙ፣ ጝቸልጘይዙ፣ ጝኣቕሊዙ፣ ፃጀድየንት ነቅራንመ?

⁵ዊገድ ግን ዲንድነው፣ ንስኻም ጥዋው ክእዘኒዝ ምላሰንዝ እደረት ጭቅየው ፍርድድ ጋልፅሽተው ግርየይዝ ክቕምትል ቍጠድ ኣኽቭረኵ።

⁶እደረ ኣውማውስቅ ጝሰቭ ጝሰቪዝጘ ይውጡ።

⁷ቀሰው ሰቭ ሰራሸነውዝ ፀናቕጝ ሚዝየነ፣ ክቭር፣ ድዛው ርዅየም በነቊዝ፣ ዘላልምዙ ርዅየ ይውጡ።

⁸ዊገድ ግን ጝታቕምቱ ኣርወድ ጭቝ ደምዘቍ፣ እማንድየንት በርጝ ጭቕትድየንት ቲክነቊዝቅ ጛግል ቍጠዝመ መቅሰፍትዝ ችጝጡ።

⁹በዊል ኣይዅዳኒል፣ ጝዝግረ ቈሽ ኣኽዛቫኒል ጭቓ ሰራሸቍ እቂልቅ ሚከረዝመ ጭጝቅትዝ ችጝጡ።

¹⁰ዊገድ ግን በዊል ኣይዅዳኒዝ ጝዝግረ ቈሽ ኣኽዛቫኒዝ ቀሰው ሰቭ ሰራሸቍ እቂዝቅ ሚዝየነ፣ ክቭር፣ ዲግተም ኣጡ።

¹¹ምላሰንድም እደረ ኣውማውስቅ ኣድልዋውም።

¹²ኽግ እጀቍ ኣቕጝ ኽጥያት ሰራሸቍድቅ ኽግ እጀው ድዝጥቍ፤ ኽግ ፃይጝ ፅብጛ ኽጥያት ሰራሸቍድቅ ኽግዝ ፊርድሽጥቍ።

¹³እደረት በዊል ፃድቃን ኣቐቍድ፣ ኽጊዝ ኣዚተቍድጚ ኽግድየንት ወሸቍድም ኣየቍ።

¹⁴ኽግ እጀቍ ኣኽዛቫንድ ኽግድየን ኣዘውድየንት ጝታተፈጥረዊዝ ሰራሽጛንድ፣ ኽግ እጀቍ ኣጝሽም እኳ ጛይ ጝታቕምስ ኽግ ጛይ።

¹⁵ጝታኽሊነድም ጛጭስ ሚዝርደኵ፤ ጝታኻሰቭድም ሊን ሊንድ ጛት ኪስኵ፤ ሊን ሊንድ ቈሽ ዲግፈኵ፤ ኣቓንስቅም ኽግድ ጝታእዘኒል ፃፍሸው ኣቐጘ ጝታቕም ቓሊስጘኵ።

¹⁶እንም ያን ወንጌሊዝ ክንሳንትጘ እደረ እቀ እዘኒል ሲውርሸውድየንት እየሱስ ክርስቶስት ኣመካይነትዝ ፊርደው ግርየይዝ ግልፅ ኣጡ።

¹⁷ነስየ ክት፦ «ያን ኣይዅዳነው እጅር የጝ» ይረኵ፤ ኽግዝ ተማምንሽረኵ፤ እደረትቍዝም ማክኽሽረኵ።

¹⁸ጝፍቃድድም ኣርቕረኵ፤ ኽግድ ክንድራንስቅ እጝቂስቅ ቺዘውድየንት ማርፅር ፃይርኵሩ።

¹⁹ክቕምትም ኻርቢዝ ቃወተ፣ ጥመይል ፅበቊዝም ብርኻን ኣረጘ፣

²⁰ኣርቓቊዝ ማኽረተ፣ ኽፃናታኒዝም ክንሰተ ኣረጘ ኻስቭረኵ፤ እኒዝጘም፦ «ኽጊዙ ኣርቕቲዝመ እማኒዝ እጝቅትቅ ፃቅኩን» ይረኵ።

²¹እደስለ ላጥድ ክንስረርድ ውርቃጥ ክቕምት ክንሳር? ስተ ይረርድመ ክቕም ስራ?

²²ሻርሙጥተ ይረርድመ ክቕም ሻርሙጥራ? ጣወታንድ ስኽፍ ይረርድመ ጝታመቅደስ ጝንጥድዛት ዚርፍራ?

²³ኽግዝ ማክኽሽረርድመ ኽግድየንት ፋዘነውዝ እደረት ኣዋርዝራ?

²⁴እንም፦ «ክታቍዝ እደረት ሽድ ኣኽዛቫኒዝ ዛሽሸኵ» ይሽት ፃፍሸጘ የጝ።

²⁵ኽግድ ፋፅምረር ኣርሽ ጊርዝሽተነውድ ጣቅመው የጝ፤ ኽግድ ፋዝረር ኣርሽ ግን ጊርዝሽቲየዊዝጘ ኣቕርኵሩ።

²⁶ጊርዝሽቲየው እጅር ኽግድ ኣዘውድየንት ፋፅምሽ ጘጝ ጊርዝሽቲየው ኣቕሽም እኳ ጊርዝሽተዊዝጘ ኣቕ እጊታውመ?

²⁷ክት ፃፍሸው ኽግ ፃይረር ኣርሽ፣ ጊርዝሽትረርም ኣርሽ እኳ ኽግድየንት ፋዝራንስቅ ጝሰውነትድየንት ጊርዝሽቲየው ኽግድ ፋፅመው እጅርድ ክት ኪስጡ።

²⁸ነስየ ሽዝ ጭቝ ኣይዅዳነው ኣቐውድ እማንተው ኣይዅዳነውም ኣየው፤ እኒዝጘም እትለው ሰውነትዙ ግዝርትም እማንተው ግዝርትም ኣየው።

²⁹ኽሽስ ላው እጅር እማንተው ኣይዅዳነው የነውድ ኣቒትውዝ ኣይዅዳነው ኣቐውድ የጝ፤ ግዝርት የነውድም ጝታእዘንድየንት እደረት መንፈስዝ ጊርዘነው የጝጚ ኽግዝ ፃፍሸጘ ስየዙ ግዝርትም ኣየው፤ እነየው እጅርድ ጝሚዝየነድ እጅሪስ ኣዪይጝቀ እደረቲስ የጝ።