Read xamtanga ረውምየት እቂዝ 3 Bible Online

ረውምየት እቂዝ 3 - xamtanga bible

ረውምየት እቂዝ 3

¹እደስለ ኣይዅዳነው ኣቐነዊዙ ኣርወድ ወረጘ የጝ? ግርዝሽተነዊዙ ወየድስ ወረጘ የጝ?

²ኣውማው ዊገይዝቅ ጝኣርወድ ንቕፀው የጝ፤ እጝቂስቅ በውገ እደረት ቃልድ ኽድር ይውሽተውድ ኣዅዳኒዝ የጝ።

³እደስለ ጛጊስ ላው ላው ኣምናቍ ዊንጛን ጛይ ኣምናቍ ኣቐነውድ እደረት ኣምንሽንድ እዳዝጠመ?

⁴ፍፅምዝ ኣቓውም፤ «ክቃሊዝቍዝ እማንተው ኣትር፤ ፍርድል ጥውራንድም ለጣትር» ይሽት ፃፍሸጘ፣ እጅርቅ ኻሽወረ ኣቕሽም እደረ እማንተው ኣነ።

⁵ዊገድ ግን ይናኣመፅድ እደረት ፅድቅድየንት ጋልፅ ቓሊሰው ኣቐውዝየ ወረጘ ይነ ቸልንቅ? እደረ ይናግል ጝቍጠድ ነሳን ትክክል ኣየውም ይሽትጠመ? እኒንት እቀ ልምዲዝጘ ዊግጠኵን።

⁶ፍፅም ኣቓውም፤ እነየው ኣቐውዝየ እደረ ኣልሚል ኣወይ ፊርድጣ?

⁷ያን ኻሽወረ ኣቐነውድ እደረቱ ኣምንሽንድየንት ጋልፀው፣ ጝጭስም ክቭር ችጝሰው ኣቐውዝየ ያን ኽጥያትኘ ይሽጥ ፊርድጨውድ ውር ቃጥ የጝ?

⁸እኒንመ፦ « ‹ቀሰው ተራንስ ማጥን ጭቓ ሰራሽነ› ይጘኵ» ይጛ ላው ላው እቅ ይናት ዛሽጛንትጘ የጝ፤ እንዛይ እቂል ተረው ፍርድድ ጭቅየው የጝ።

⁹ነስየ ወረጘ ይና? ይን ኣይዅዳንድ ኣኽዛቫኒስ ቺዝነቅመ? እረ ኣየውማ! ኣይዅዳንድም ኣጝነ ኣኽዛቫንድ እጝቅቅ ኽጥያትኝጥ ኣጘጘ በውርስን ኪስንኵኑን።

¹⁰እንም እንት ይሽት ፃፍሸጘ የጝ፦ «ላው እኳ ፃድቅ እጀውም፤ ላውም እኳ እጀውም።

¹¹ኣስክውም እጀውም፤ እደረትም ደምዘው ላው እጅርም እጀው።

¹²እጝቅቅ እደረት ጒደነይስ ፍጝኵ፤ ላው ኣቕጝም ጣቅማቍ ኣቕጝኵ፤ ቀሰው ሰቭ ሰራሸውም እጀውም፤ ላው እጅር እኳ እጀውም፤

¹³ጝታኻረጅድ ቢተው መቃቭሪዝጘ የጝ፤ ጝታላቒዝ ኻጝስጘኵ፤ ጝታኪፍሪል ሲቭረይዙ መርዝ እኩ።

¹⁴ጝታምቸድ እፀዝመ ማረዝ እቻቕኩ።

¹⁵ጝታልኵጣንድ ብር ቅብሰነውዝ ቀልጣፋን ጛይ፤

¹⁶ድዘርዝመ ጕስቝልነዝ ጝታጒደነይል እኩ።

¹⁷ዲግተዙ ጒደነድየንት ኣርቓቍም።

¹⁸ስሪስቅ እደረት ጐውታቍም።»

¹⁹ነስየ ምቸ እጝቅ ዲቭሽታንስ፣ እጝቅ ኣልምድም እደረት ፍርድዝ ሳይል ኣቓንስ ማጥን ኽግ ዊግተውድቅ ኽግዝ ሳይል ፅበቊዝ ኣቐጘ ኣርቕነኵን።

²⁰እንዝ ማጥን ኣውማው እጅርቅ ኽግ ፋፅመነውዝ እደረት በዊል ፃድቅ ኣጠ ቸላውም፤ ኽሽስ እጅር ኽጥያትኘ ኣቐነውድ ኽግዝ ኣማካነትዝ ኣርቕሽተኵ።

²¹ነን ግን ኽግዝመ ነቭያታንዝ ሚዝርድጘው እደረት ፅድቅድ ኽግ እጀው ጋልፅሽትኩ።

²²እን ፅድቅድ ችጝሸውድ እየሱስ ክርስቶስት ኣምነነውዝ የጝ፤ የነትም እጝቅ ኣምነቊዝቅ የጝ፤ ምላሰንድም ቲተ እጀውም።

²³እጝቅቅ ኽጥያት ሰራሽጝኵ፤ እደረት ክቭርድም ጛጊስ ጒድልኩ።

²⁴እየሱስ ክርስቶስ ቺ ኣቐነውዝ ኻርነይዝ ጝፃገይዝ ፃድቅጘኵ።

²⁵ጝት ኣምነቍድቅ ጝብሪዝ ጝታኽጥያቲስ ይቅርተ ችጛንስ ማጥን እደረ እየሱስ ክርስቶስት ምስዋይት ፃቭ ኣልስኩ፤ እኒንት ፃቨውድም በውገ ሰራሽተው ኽጥያትድ ቐፃቒጝቀ ኣቕልዝ ዲቈነውዝ ጝፅድቅድየንት ቓሊሳንስ ማጥን የጝ።

²⁶እደረ እን ዚምኒዝ እኒንት ፃቨውድ ጝፅድቅድ ቓሊስጠ የጝ፤ ምላሰንድም ጘጝ ጝቕም ፃድቅ ኣቕ እየሱስ ክርስቶስት ኣምነቍድዛት ፃድቅዘኵ።

²⁷እደስለ ማክኽሽነ ጥውሸው ዊገ ወረጘ እኩ? ጘጝመ እዳቕኩ፤ ማክኽሸነውድ እዳቐውድ ወረጘዝ የጝ? ኽግድ ፋፅመነውዝመ? ኣየውም፤ ዊገድ ግን እምንትዝ የጝ።

²⁸እጅር ኽግ ፋፅመነውዝ ኣዪጝቀ እምንትዝ ፃድቅጠጘ ኣርቕነኵን።

²⁹እደረ ኣይዅዳኒዝ ኣምላክ ጭቝመ ውረ? ኣኽዛቫኒዝስ ኣምላክ ኣየውቀ? የይ! ኣኽዛቫኒዝ ኣምላክም የጝ።

³⁰ጊርዝሽተውድየንት እምንትዝ፣ ጊርዝሽቲየውድየንትም ጘጝት እምንትዝ ፃድቅዘው እደረ ላው የጝ።

³¹እደስለ እምንትዝ ምላሰንዝ ኽግድ ሸርንቅ የነትመ? ኣየውም፤ ኽግድ ፀናዝንቅጚ።