Read xamtanga ረውምየት እቂዝ 4 Bible Online

ረውምየት እቂዝ 4 - xamtanga bible

ረውምየት እቂዝ 4

¹ነስየ ይናኣይር ኣቐው ኣቭርኻም እን ዊገይዝቍዝ ችጙ ይነውድ ወረጘ የጝ?

²ኣቭርኻም ሰቭዝ ፃድቅ ዊናን ማክኽሸነው ዊገ ፃየው ኣጠ ዊኑ፤ ዊገድ ግን እደረት በዊል ማክኽሽጠ ቸላውም።

³መፃፍስ ወረጘ ዩ? «ኣቭርኻም እደረት ኣምኑ፤ ጝእምንትድም ጝጭስ ፅድቅ ኣቕ እጊቱ» የውኩ።

⁴ላው እጅር ሰቭ ሰራሸውዝየ ጝምኻየድ ጥውሸው ወየጚ ይውት ኣቕም እጊታው።

⁵ፃድቅዘው ሰቭ እጀው፣ ኽጥያትኘድየት ፃድቅዘው እደረት ኣምነው እጅርዝ፣ ጝእምንትድ ፅድቅ ኣቕ እጊተኵ።

⁶ዳዊትም እደረ ሰቭዝ ኣዪጝቀ ዝም የው ፃድቅዘው እጅርድ ውርጘ ቀቫሸው ኣቐነውድ ቓሊስጠ፦

⁷«ጝታኣመፅድ ይቅር ይሽተው፣ ጝታኽጥያትድም ዲምስሽተው እቅድ ቀቫሸቍ ጛይ!

⁸እደረ ጝኽጥያትድየንት እግዛው እጅርድ ቀቫሸው የጝ!» የው ዊግትኩ።

⁹እደስለ እኒን ዳዊት ዊግተው ቀቫሽንድ ጊርዝሽተቊዝ ጭቝመ? ዊንስ ጊርዝሽቲየቊዝም የጝ? ጊርዝሽቲየቊዝም የጝጚ፤ ምላሰንድም ኣቭርኻምት እምንትድ ጝጭስ ፅድቅ ኣቕ እጊቱ ይንኵኑን።

¹⁰ኣውን የጝ እኒን ፅድቅድ ጝጭስ እጊተውድ? ጊርዝሽተት ግረመ? ዊንስ ጊርስዝቲጝቀ በውገ የጝ? ጊርዝሽተት ግረ ኣዪጝቀ ጊርዝሽቲጝቀ በውገ የጝ።

¹¹ጊርዝሽቲጝቀ ፃይ ዊነው እምንቲዝ ችጘው ፅድቅድየንት ቓሊሰው ምልክት ኣቓንስ ማጥን ጊርዝሽቱ፤ እንዝ ማጥን ኣቭርኻም ጊርዝሽቲጝቀ ኣምነቍ፣ ጝታእምንትድየንም ጛጭስ ፅድቅ ኣቕ እጊተው እቂዝቅ ኣይር የጝ።

¹²ጘጝ ጊርዝሽተቊዝም ኣይር የጝ፤ ጊርዝሽተቊዝ ጭቝ ኣዪጝቀ ይናኣይር ኣቭርኻም ጊርዝሽቲጝቀ በውገ ፃይ ዊነው ጝእምንትድየንት ቲክነቊዝቅም ኣይር የጝ።

¹³ጘጝ ኣልምድ ዊርስጠጘ እደረ ቲስፈዙ ቃልድ ጝጭስመ ጝዚረይዝ ይወውድ ኽግዝ ኣመካይነትዝም ኣየው፤ ዊገድ ግን እምንትዝ ችጝሸው ፅድቅዝ ኣመካይነትዝ የጝ።

¹⁴ቲስፈዙ ቃልድየንት ዊርሰቍድ ኽግዝ ፅበቍድ ኣጘውዝየ እምንት ጣቅማው፣ ቲስፈዙ ቃልድም ጊነ ኣቕ እዳጠ ዊኑ።

¹⁵ኽግ እደረት ቍጠድ ነሰኵ፤ ኽግ እጀው፣ ኽግ ፋዘነውዙ በደል እጀውም።

¹⁶እንዝ ማጥን ቲስፈዙ ቃልድ እምንትዝ ተርኩ፤ እንም ቲስፈዙ ቃልድ ፃገዝ ኣቓንስ፣ ኣቭርኻምስመ እጝቅ ጝዚረይዝቅም ፀናቓንስ ማጥን የጝ፤ እንም ኽግድየንት ቲክነቊዝ ጭቝ ኣዪጝቀ ኣቭርኻምትጘ ኣምነቊዝቅ የጝ፤ ምላሰንድም ኣቭርኻም ይናእጝቅዝቅ ኣይር የጝ።

¹⁷እንም፦ «ክት ንቕፀው ኽዝቭዝ ኣይር ፃቭኩን» ይሽት ፃፍሸጘ የጝ፤ ጘጝ ክረቊዝ ርዅየ ይወው፣ እጀውድየንትም ፅበው ፃቨው ጝኣምነው ኣምላክት በዊል ይናኣይር የጝ።

¹⁸«ክዚረድ ጘጝት ኣጡ» ይሽት ፃፍሸዊዝ ሚስርትዝ ኣቭርኻም ቲስፈ ፃቨነው ውረውረቅ ዊኒጝቀ ቲስፈዙ ቃልድየንት ኣምን ንቕፀው ኽዝቭዝ ኣይር ኣቑ።

¹⁹ላ ምቱ እጅር ኣቕ ፅባ፣ ጝቕምት ሰውነቲዝመ ሳረት ማፅንትድም ክረው ኣቐጘ ፅብ ኣርቓ፣ ጝእምንቲዝ ዝላቒየውም።

²⁰ኽሽስ ጝእምንቲዝ ፀናቐነውዝ እደረስ ክቭር ይዉጚ እደረት ቲስፈዙ ቃልድየንት ተጠራጥርሺየውም።

²¹እደረ ጝጭስ ይወው ቲስፈዙ ቃልድየንት ፋፅመነው ቸልጠጘ ምሉ በምሉዝ ኣምን ዊኑ።

²²እንዝ ማጥን ጝጭስ ፅድቅ ኣቕ እጊቱ።

²³ዊገድ ግን፦ «ፅድቅ ኣቕ እጊቱ» የው ቃልድ ፃፍሸውድ ጝጭስ ጭቝ ኣዪጝቀ፣

²⁴ይናእምንትድየንት ይናጭስ ፅድቅ ፃቭ እግዘው፣ ይናኣደረ እየሱስ ክርስቶስት ክርጘይስ ጒሰው እደረት ኣምነቅ ይናጭስም የጝ።

²⁵እኒን ኣደረ እየሱስም ይናኽጥያቲዝ ማጥን ዲቍሽት ክሩ፤ ይናት ፃድቃን ፅቭ እደረትል ኣልስጠም ክርጘይስ ጉ።