Read xamtanga ረውምየት እቂዝ 6 Bible Online

ረውምየት እቂዝ 6 - xamtanga bible

ረውምየት እቂዝ 6

¹ነስየ ወረጘ ይና? ፃገ ንቕፃንስ ማጥን ኽጥያት ሰረሸነውዝ ፅብነመ?

²እረ ኣቓውማ! ኽጥያቲስ ክርንኵኑን፤ እደስለ ኣወይን የጝ ኽጥያት ሰራሸነውዝ ፅብነውድ?

³ክርስቶስ እየሱስ ጅቅ ላው ኣነ ማጥን ጣምቅሽነቅድ ጝክርጘይጅቅ ላው ኣናንስ ማጥን ጣምቅሽነጘ ኣርቓይርነቅመ?

⁴እንዝ ማጥን ክርስቶስ ኣይርት ክቭርዝ ክርጘይስ ጐጘ ይንም ጘጝት ኣይር ርዅየዝ ፅብናንስ ማጥን ጣምቅሸነውዝ ክርን ጝጅቅ ዲቭሽትንኵኑን።

⁵ጝጅቅ ጝክርጘይዝ እነይን ላው ኣነውዝየ ጝክርጘይስ ጐነይዝ ቈሽ እርግጥ ጝጅቅ ላው ኣንቅ።

⁶ነስየይስቅ ኽጥያትዝ በር ኣቓይነጘ ኽጥያትዙ እጅርነይድ ሸርሻንስ ማጥን ኣርጐው ይናእጅርነይድ ክርስቶስ ጅቅ ሲቅልሸጘ ኣርቕነኵን።

⁷ምላሰንድም ክረው እጅር ጝኽጥያቲስ ኻርነይ ፍኩ።

⁸ክርስቶስ ጅቅ ክርነውዝየ ጝጅቅ ፅብነጘ ኣርቕነኵን።

⁹ምላሰንድም ክርስቶስ ክርጘይስ ጓንስቅ ሊጘት ክራየጘ ኣርቕነኵን፤ ነስየይስቅ ክርጘ ክርስቶስትል ኻይል እጀውም።

¹⁰ጘጝ ክራንድ ኽጥያትዝ ማጥን ደግምሳው ኣቕንዝ ሊን ክርኩ፤ ነን ርዅየዝ ፅባንድም እደረስ የጝ ፅበውድ።

¹¹እኒዝጘ ክትንም ኽጥያቲስ ክትርነጘ፣ ዊገድ ግን ክርስቶስ እየሱስት ኣመካይነትዝ እደረስ ፅበቍ ኣቕርነጘ እግዝጥን።

¹²እንዝ ማጥን ክታጭቓ ምርቕፀድየንት ፋፅመነውዝ ክረው ክታስየይል ኽጥያት ኒግስጠ ፃቭትርነ።

¹³ክታኣካላንድዛት ጭቕትዙ መሰሪ ፃቭርን ኽጥያትዝ ኣልስትርነ፤ ኽሽስ ክርጘይስ ርዅየዝጐ ከረቍ እቂዝጘ ፃቭርን ክታቕምት እደረስ ኣልስጥን፤ ክታኣካላንድዛትም ፅድቅዙ መሰሪ ፃቭርን እደረስ ኣልስጥን።

¹⁴ምላሰንድም ክትን ፃገዝ ሳጚ ኽግዝ ሳ ኣይርነቅ ኣቕርናንስቅ ኽጥያት ክታት ቅማውም።

¹⁵ነስየ ወረጘ ኣና? ፃገዝ ሳጚ ኽግዝ ሳ ኣይነቅ ኣናንስቅ ኽጥያት ሰራሽነመ? እረ ኣቓውማ!

¹⁶ክታቕምት በሪዝጘ ፃቭርን ኣልስርናንድ እድየን ክትን ቅምሽርነዊዝ በር ኣቕርነጘ ኣርቓይርነቅመ? ነንም ኽጥያቲዝ በር ኣቐነው፣ ክርጘ ነሰኵ፤ እደረስ ኣዚተነው ግን ፅድቅ ችጝሰኵ።

¹⁷ዊገድ ግን ክትን ኽጥያትዝ በር ዊንድርነቅ ኣቕርንሽም፣ ነን ግን ለምትርነው ክንድጚዝ ምሉ በምሉዝ ኣዚትርነቅ ኣቕርናንስቅ እደረስ ሚዝየነ ኣነ።

¹⁸ኽጥያትዙ በርነይስ ኻርነይ ፍርን ፅድቅዝ ኣገልጋያን ኣቕርንኵርኑ።

¹⁹ክታተፈጥረውድ ዝላቐው ኣቓንስቅ እቀ ቋቋዝ እኒንት ዊግጠኵን፤ ክታኣካላንድዛት ርኵስነዝመ ወሳ ፊረው ጭቕትዝ በር ፃቭርን ኣልስርና ዊንድርነጘ ነን ቈሽ ፅድቅዝ ኣገልጋያን ፃብርን ኣልስጥን፤ እንም ክታት ቅድስነል ችጝዝጡ።

²⁰ኽጥያትዝ በር ዊንድርናንድ ፅድቅ ሰቭ ሰራሸነውዝ ግድ እጅርነቅም ዊንድርኑ።

²¹እደስለ እድየን ነን ኣይቭትርነው ዊገይስ ኣይንድ ውር ኣርወ ችጝርኑ? እኒን ዊገይዙ ኻትሸነድ ክርጘ የጝ።

²²ነን ግን ኽጥያቲስ ኻርነይ ፍርን እደረት ኣገልጋያን ኣቕርንኵርኑ፤ እንዝም ቅድስነ ችጝትርንቅ፤ ቅድስነዙ ኻትሸነድም ዘላልምዙ ርዅየ የጝ።

²³ምላሰንድም ኽጥያትዙ ወየድ ክርጘ የጝ፤ እደረት ይውትድ ግን ይናኣደረ ክርስቶስ እየሱስት ኣመካይነትዝ ዘላልምዙ ርዅየ የጝ።