Read xamtanga ረውምየት እቂዝ 7 Bible Online

ረውምየት እቂዝ 7 - xamtanga bible

ረውምየት እቂዝ 7

¹ይፅን ክታችወ! ኽግ ኣርቐቍዝ ዊግጠኵን፤ ኽግ ላው እጅርል ስልጣን ፃየው ኣቐውድ እጅርድየን ርዅየዝ ፅባንድ ጭቝ ኣቐጘ ኣርቓይርነቅመ?

²ላይ እውነ ጝርጕርየ ጅቅ ገባሸነውዙ ኽግዝ ዊስንሽረይ ኣረውድ ጝርጕርየድ ርዅየዝ ፅባንትል ኣሽ የጝ፤ ጝርጕርየድ ክርሽ ግን ገባሸነውዙ ኽጊስ ኻርነይ ፍርኵች።

³እንዝ ማጥን ጝርጕርየድ ርዅየዝ ፅባ ላየ ግልወ ድውርሽ ሸርሙጠ ይሽተች፤ ጝርጕርየድ ክርሽ ግን ላየ ግልወ ድውርሽም እኳ ገባሸነውዙ ኽጊስ ኻርነይ ፍራንስቅ ሸርሙጠ ይሽታይም።

⁴እንዝ ማጥን ይፅን ክታችወ! ክትንም ክርስቶስት ስየይዝ ኣመካይነትዝ ኽግስ ክትርንኵርኑ፤ እንም ክርጘይስ ጐዊዝ ጝጭስ ኣቕርን እደረስ ፍር ፍርዝናንስ ማጥን የጝ።

⁵ስየዙ ፍቃድዝ ዊናንድ ክርጘዝ ፍር ፍርዝናንስ ማጥን ኽግዝ ቂስቅሽተው ኽጥያትዙ ምርቕፀድ ይናሰውነቲል ሰራሻ ዊኑ።

⁶ነን ግን ጘጝ እፁሽን ዊነዊስ ክርናንስቅ ኽጊስ ኻርነይ ፍንኵኑን፤ ኣቓንስቅም መንፈስዙ ኣይር ጒደነይዝ ኣግልግልነኵንጚ ኣርጐው ፃፍሽተው ኽጊዝም ኣግልግላይነቅ።

⁷ነስየ ወረጘ ይና? ኽግ ጝቕም ኽጥያትመ? እረ ኣየውማ! ዊገድ ግን ኽግዝ ኣማካይነትዝ ኣየው ኣቓን ኽጥያት ወረጘ ኣቐጘ ኣርቕጨም ዊኒቀር፤ ኽግድ፦ «ማርቕፅተ» ዪየው ኣቓን ምርቕፀ ወረጘ ኣቐጘ እርግጥ ኣርቕጨም ዊኒቀር።

⁸ኽጥያት ግን ትዛዝድ ነሰው ኣጋልዝ ፃቭ ኣውማው ምርቕፀድየንትቅ ይግል ቂስቅስሽጠ ፃቩ፤ ኽግ እጀው ኣቐውዝየ ግን ኽጥያት ክረው የጝ።

⁹ያንም በውገ ኽግ እጀው ዊናንድ ርዅየ ጕርየ ዊኑን፤ ትዛዝ ተረት ግረ ግን ኽጥያት ፅበው ኣቑ፤ ያንም ክጡን።

¹⁰ርዅየዝ ኣጠ ኻስቭኑ እድየን ትዛዝድየን ክርጘ ነሰጘ ተረድጩን።

¹¹ኽጥያት ትዛዝዝ ኣመካይነትዝ ችጝሸው ኣጋልድየንት ጣቅምሽ ይት ኻጝሱ፤ ትዛዝዝ ኣመካይነትዝም ይት ቍዉ።

¹²እንዝ ማጥን ጝቕም ኽግድ ቅዱስ የጝ፤ ትዛዝድም ቅዱስ፣ ፃድቅ፣ ቀሰው፣ የጝ።

¹³እደሰለ ቀሰው ኣቐው ዊገድመ ይጭስ ክርጘ ኣቑ? እረ ኣየውማ! ዊገድ ግን ኽጥያት፣ ኽጥያት ኣቐነውድ ኣርቕሽታንስ ማጥን ቀሰው ኣቐው ዊገይዝ ኣመካይነትዝ ይግል ክርጘ ነሱ፤ እንም ኽጥያት ትዛዝዝ ኣመካይነትዝ ወሰገቨ ኽጥያት ኣቓንስ ማጥን የጝ።

¹⁴ኽግድ መንፈሳዊ ኣቐጘ ኣርቕነኵን፤ ያን ግን ኽጥያትዝ በረ ኣጨ ቂጨር ስየዙ እጅር የጝ።

¹⁵ያን ፃቨው ዊገድየንት ኣርቐቅም፤ ፃቭጨ በነውድየንት ፃቨቅም፤ ዊገድ ግን ሽክጠውድየንት ፃቨኵን።

¹⁶ፃቭጨ በናይቀውድየንት ፃቨር ኣቐውዝየ ኽግድ ቀሰው ኣቐጘ ሚዝርጠኵን።

¹⁷እነየው ኣቐውዝየ ጝት ፃቨርድ ያን ኣዪጝቀ ይግል ፅበው ኽጥያትድ የጝ።

¹⁸ይጊስ፣ የነትም ይስየይስ ውረውረ ቀሰው ዊገ ችጝሻየጘ ኣርቐኵን፤ ቀሰው ኣቐው ዊገድየንት ፃቨነው በን ፃቀር የጝ፤ ኣነጚ ጝት ፋፅመነው ቸለቅም።

¹⁹ያን ፃቨውድ፣ ፃቭጨ በነው ቀሰው ዊገድየንትም ኣየው፤ ዊገድ ግን ፃቭጨ በናይቀው ጭቓ ዊገድየንት ፃቨኵን።

²⁰ፃቭጨ በናይቀው ጭቓ ዊገድየንት ፃቨር ኣቐውዝየ ጝት ፃቨርድ ያን ይቕም ኣዪጝቀ ይግል ፅበው ኽጥያትድ የጝ።

²¹ቀሰው ዊገድ ፃቭጨ በናንድ ጭቕት ይግል እኩ፤ ኣቓንስቅም እኒን ኽግድ ይኣቒል ሰራሻ ኣቐጘ ተረድጨኵን።

²²ኣቒቱ ይሰውነቲዝ እደረት ኽጊዝ ጭቕጘ ዲስ የኵን።

²³ዊገድ ግን ይሰዊነቲዝቍ ኣካላኒዝ ኣቒል ኣቕ ሰራሸው ኽጥያትዙ ኽጊዝ እፁሸተ ፃቭ ይኣይምረውዊዙ ኽጊጅቅ ጋጥመው ላየ ኽግ ይሰውነቲዝቍ ኣከላኒዝ ኣቒል ኣቕ ሰራሻንድ ቓለኵን።

²⁴ያን ኣወየር ጐስቛል እጅር የጝፈ! እኒን ክርጘዝ ይውሽተው ሰውነቲስ ይት ኣው ቓዝጡ?

²⁵ይናኣደረ እየሱስ ክርስቶስት ኣመካይነትዝ እደረስ ሚዝየነ ኣነ፤ እደስለስ ያን ይቕም ይኣይምረዊዝ እደረት ኽግዝ በረ የጝ፤ ይሰውነቲዝ ግን ኽጥያትዙ ኽግዝ በረ የጝ።