Read xamtanga ረውምየት እቂዝ 8 Bible Online

ረውምየት እቂዝ 8 - xamtanga bible

ረውምየት እቂዝ 8

¹ነስየ ክርስቶስ እየሱስትቍ ኣቐቊዝ ነን ኵነንየ እጀውም።

²ምላሰንድም ርዅየ ይወው እደረት መንፈሲዙ ኽግድ ክርስቶስ እየሱስት ኣመካይነትዝ ኽጥያትዝመ ክርጘዝዙ ኽጊስ ይት ኻርነይ ፊስኩ።

³ኽግድ ስየዙ ባኽሪዝ ምላሰንዝ ዝላቓንስቅ ፋፅመነ በውድየንት፣ እደረ በገዘ ጝዅርድየንት ኽጥያትኘ እጅርዝ ተከዝ ኽጥያትዙ ምስዋይት ኣቓንስ ማጥን እፃቐነውዝ ፋፅሙ፤ እንዝም ኽጥያትድየንት ስየዝ ኣመካይነትዝ ኲንኑ።

⁴እንም ስየዙ ፍቃድዝ ኣዪጝቀ መንፈስዙ ፍቃድዝ ፅብነቅ ይናጭስ ኽግድ ዋቕረው ፅድቅድ ምሉ በምሉዝ ፋፅምሻንስ ማጥን የጝ።

⁵ስየዙ ፍቃዲዝጘ ፅበቍድ ስየዙ በንድየንት ኻስቭጘኵ፤ መንፈስዙ ፍቃዲዝጘ ፅበቍድ ግን መንፈስዙ በንድየንት ኻስቭጘኵ።

⁶ስየዝቍዝ ኻስቨነውድ ክርጘ ነሰኵ፤ መንፈስዙ ፍቃድድ ኻስቨነው ግን ርዅየዝመ ዲግተዝ ነሰኵ።

⁷ስየዝቍዝ ኻስቨው እጅር እደረት ፃለት የጝ፤ እደረት ኽጊዝ ኣዚታውም፤ ኣዚትጠም ቸላውም።

⁸ስየዙ ፍቃድዝ ቃውሸቍድ እደረት ዲስ ሽጥጘ ቸላቍም።

⁹ክትን ግን እደረት መንፈስድ ክታግል ፅበው ኣቐውዝየ መንፈስዙ ፍቃድዝ የጝ ፅብርነውድጚ ስየዙ ፍቃድዝም ኣየው፤ ኣውማው እጅር ክርስቶስት መንፈስድ እጅው ኣቐውዝየ፣ ጘጝ እጅርድ ክርስቶስትውም ኣየው።

¹⁰ዊገድ ግን ክርስቶስ ክታኣቒል ፅበውዝየ ክታሰውነትድ ኽጥያትዝ ኣመካይነትዝ ክረው ኣቓንድ፣ ክታመንፈስድ ግን ፅድቅዝ ኣመካይነትዝ ፅበው የጝ።

¹¹እየሱስት ክርጘይስ ጕይሰው እደረት መንፈስድ ክታግል ፅበው ኣቐውዝየ፣ ክርስቶስት ክርጘይስ ጕይሰውድ ክታኣቒል ፅበው ጝመንፈሲዝ ኣመካይነትዝ፣ ክረው ክታሰውነቲዝ ርዅየ ይውጡ።

¹²እንዝ ማጥን ይፅን ክታችወ! ቢን ፃይነቅ የጝ፤ ኣነጚ እን ቢንድ ስየዙ ፍቃዲዝጘ ፅብናንስ ማጥንም ኣየው።

¹³ምላሰንድም ስየዙ ፍቃዲዝጘ ፅብርንሽ ክርትርንቅ፤ ጭቓ ኣቐው ስየዙ ሰብድየንት መንፈስዝ ኣመካይነትዝ ቍውርንሽ ግን ርዅየዝ ፅብትርንቅ።

¹⁴እንዛይ እደረት መንፈስዝ ቃውሸቍድቅ እደረት ቝር ጛይ።

¹⁵ምላሰንድም እንደ ገነ ጐውተነውዝቍ በር ፃቨው መንፈስድ ኣዪጝቀ ዅርነይዙ መንፈስድ ለምትርንኵርኑ፤ ኣቓንስቅም ጝት፦ «ኣየ! ኣየ!» ይን ጭጝነኵን።

¹⁶እደረት ቝር ኣነጘ እድየን መንፈስድ ይናመንፈሲጅቅ ኣቕ ይናጭስ ሚዝርደኵ።

¹⁷ዅል ኣነውዝየ ቈሽ ጝወራሻን የጝ፤ ክርስቶስ ጅቅ ላብጠ ዊርስነቅ የጝ፤ ነን ጝሚከረይስ እርግጥ ኣድልሽነቅ ኣንሽ እግረ ጝክቭሪስ ኣድልሽነቅ ኣንቅ።

¹⁸እን ኣልሚስ ለምርነው ይናስቃይድ እግረ ይናጭስ ጋልፅሽትጡ ክቭሪጅቅ ሚዝንሻንድ ውረውረቅ ኣየው ኣቐጘ እግዘኵን።

¹⁹ፍጥርትድቅ እደረት ቝሪዙ ጋልፅሽተነድ ኽየው በንዝ ሊሚደኵ።

²⁰ምላሰንድም ፍጥርትድቅ ጊነዝ ኣጠ ፃቭሽትኩ፤ እንም ፍጥርትድ ጝቕም ማርፅ ኣዪጝቀ ቲስፈዝ ቅምሽጠ ፃቨው እደረት ፍቃድዝ የጝ።

²¹ቲስፈድም ፍጥርትድ ጝቕም ቢስብሰነውዙ በርነይስ ኻርነይ ፍ እደረት ቝርስ ኣቐው ኪብረው ኻርነይል ችጝጠ የጝ።

²²ፍጥርትድቅ ነኳን ኣሽ ፅበውድ ቅምትዙ ስቃይዝጘ ጨጝቅሻ ኣቐጘ ኣርቕነኵን።

²³ጘጝ ጭቝም ኣዪጝቀ መንፈስ ቅዱስቱ በውረ ይውትድየንት ችጝነቅ ይን ይናቕምም ይናሰውነቲዙ ኻርነይ ፈነ ኣቐው እደረት ቝር ኣቐነውድየንት ቲስፈዝ ሊሚድና ይናኣቒዝ ጨጝቅሽነኵን።

²⁴ምላሰንድም ቓድነውድ እኒን ቲስፈይዝ የጝ፤ ዊገድ ግን ቲስፈድ ቓሊሽተው ኣቐውዝየ ቲስፈም ኣየው፤ ቓሊሽተውድየንትሰ ኣው ቲስፈ ፃቭጣ?

²⁵ገነ ቓሊነውድየንት ቲስፈ ፃቭነቅ ኣንሽ ግን ጝት ኣቕልዝ ሊሚድነኵን።

²⁶እኒዝጘም መንፈስ ቅዱስ ይናዝላይስ ከቨኵ፤ ኣወይን ፃልይነ ጥውሽጠጘ ኣርቓይነቅም፤ ጝቕም መንፈስ ግን ቃልዝ ጋልፅጥነ ቸልሻው ዊገዝ ይናጭስ ጨወኵ።

²⁷ይናእዘንድየንት ሚርምረው እደረ፣ መንፈስዙ ኻሰቭድ ወረጘ ኣቐጘ ኣርቐኵ፤ ምላሰንድም መንፈስ እደረት ፍቃዲዝጘ ቅዱሳኒዝ ጨወኵ።

²⁸እደረት ቀነቊዝ፣ ጝኻሰቪዝጘም ጭጝሸቊዝ፣ እጝቅ ዊገድቅ ጝታጭስ ቀሰውዝ ኣቐው ኣቐጘ ኣርቕነኵን።

²⁹እደረ በውግዝ ኣርቐቍድዛት ጝዅርት ሚልክድ ተክጥጘ ማጥን በውግዝ ዊስኑ፤ እንም ጝዅር ንቕፀቍ ዚኒዝ ማኽሊል ባር ኣቓንስ ማጥን የጝ።

³⁰በውግዝ ዊስነቍድዛትም ጭጙ፤ ጭጘቍድዛትም ፃድቅዙ፤ ፃድቅዘቍድዛትም ኪብርዙ።

³¹እደስለ እን ዊገይዝቍዝ ወረጘ ዊስንቅ? እደረ ይናጅቅ ኣቐውዝየ ኣው የጝ ይናት ተቃውምሽጠ ቸለውድ?

³²በገዘ ጝዅርስ ኣርኽርኺጝቀ ይናእጝቅዝቅ ጝት ዲቍስ ነየውድ ኣወሽ እጝቅትቅ ልግስነዝ ቈሽ ነያው?

³³እደረ ማርፀቍድዛት ኣው የጝ ኪሰውድ? ፃድቅዘውድ እደረ የጝ።

³⁴እደስለ ፊርደውድ ኣው የጝ? ክረውድ፣ ክርጘይስም ጐውድ፣ እደረት ለዊል ጐየው እየሱስ ክርስቶስ ይናማጥን ጨወኵ።

³⁵ክርስቶስት ፍቅሪስ ይናት ቲዘውድ ኣው የጝ? ችግርመ? ዊንስ ስቃይመ? ዊንስ ስድትመ? ዊንስ ግድርመ? ዊንስ ዝባተነውመ? ዊንስ ኻደገመ? ዊንስ ሰይፍመ?

³⁶እንም፦ «ክማጥን ግሪ ጨቨቅ ቍውሽትነኵን፤ ዝውሸቍ ቢቂዝጘም እጊትኑን» ይሽት ፃፍሸጘ የጝ።

³⁷ኣውማውም ይናት ቲዛው፤ እንዝቅ ይናት ቀነው ክርስቶስት ኣመካይነትዝ ኻቐቲስ ዲቍነኵን።

³⁸እንዝ ማጥን ክርጘም ኣነ ርዅየ፣ መላካንም ኣጝነ ጋኒናን፣ ነን ፅበውድም ኣነ እግረ ተረውድ፣ ዊንም ኣውማው ኻይልድቅ፣

³⁹ንየስ የነውም ኣነ ዝጥቅ የነው፣ ኣውማው ፍጥርትድቅም ኣቕሽ ይናኣደረ እየሱስ ክርስቶስት ኣመካይነትዝ ችጝነው እደረት ፍቅሪስ ይናት ቲዝጠ ቸላው ኣቐጘ ተረድጭኩን።